Isaia 23 - Bòó Bibeli Luayãtaala

Yã́ pↄ́ a Tiideↄ le

¹ Tii yã́. Ísia gó'ilɛnadeↄ, à ↄ́ↄlↄ, asa Tii gↄ̃̀ yàaaɛ, kpɛ́e i gↄ̃ lↄo, godↄkĩi kú lↄo. Sipi bùsudeↄ mɛ́ baopi kpànɛ́.

² À kɛ kílikili ísialɛdeↄ ń Sidↄ̃ laatana pↄ́ aa kã̀ ísiatagɛnaↄ musuↄ.

³ Bua pↄ́ kú Niili saɛ mɛ́ Tiideↄ pↄ'ekĩi ũ. We aaì pↄ́wɛna lúluu wà buaò í zↄ̃ↄwa, ↄ̃ Tii gↄ̃̀ buiↄ ɛlɛblekĩi ũ.

⁴ Sidↄ̃deↄ ń ísia gũgũna wɛ̃́lɛ bĩ́ideↄ, á gɛɛ a gↄ̃ kpá á wɛ́iɛ, asa ísia mɛ̀: Mi nↄwãwãkɛo, mi nɛ'io, mi nɛgↄ̃ɛ gwao, mi nɛnↄɛ tòlokɛo.

⁵ Tó Egipiↄ Tiideↄ baopi mà, aa bã̀abãabo.

⁶ À bua ta Taasisi, à ↄ́ↄlↄ á ísialɛdeↄ!

⁷ Á wɛ̃́lɛ pↄnade pↄ́ kálɛa za zin weo lò? Wɛ̃́lɛpi gbɛ̃eↄ mɛ́ fã̀aa aa gɛ̀ zↄ̃̀lɛ bùsu zã̀zãↄuo lò?

⁸ Tiideↄ gbɛ̃́ↄ kpà kpalau yãa, an laatanaↄá kíaↄnɛ, an pↄyianaↄ tↄbↄ̀ dṹniau. Dé mɛ́ dìlɛ yã́pi Tii lei?

⁹ Dii Zĩgↄ̃de mɛ́ dìlɛ à ĩ́andãnapiↄ gawi kↄ ɛ́, i gbɛ̃́ pↄ́ aa tↄbↄ̀ dṹniaupiↄ busa.

¹⁰ Taasisiↄ, à dagua lán Niili í paawa, gbɛ̃e ku à kpáɛ́ lↄo.

¹¹ Dii ↄ lòo ísiaa, a tò bùsu pↄ́ kú a saɛↄ lùalua. À yãdìlɛ Kanaa bùsu yã́ musu, à mɛ̀ wà a wɛ̃́lɛ bĩ́ideↄ dɛɛlɛ.

¹² À mɛ̀: Sidↄ̃ wɛ̃́lɛ pↄ́ gbɛ̃e i zĩblema yãao, wà lɛ̀lɛma ń gbãao saɛ, ńyↄ̃ e ĩ́anadã lↄo. Tó a fɛlɛ bua íwa e Sipi bùsuu, baa wekĩi á ĩ́ampakĩi eo.

¹³ À bùsupi gwa, Babiloniↄ tò à gↄ̃̀ gbɛ̃gbonaↄ tòo ũ, i kɛ Asiliↄ no. Aa gbà lɛsĩ dà wa kpàaĩ ń a bĩ́iↄ, aa a kpɛ́ maaↄ dɛ̀ɛlɛ, gupi gↄ̃̀ yáiyai.

¹⁴ Ísia gó'ilɛnadeↄ, à ↄ́ↄlↄ, asa á wɛ̃́lɛ gbãa gↄ̃̀ yàaaɛ.

¹⁵ Gↄↄ bee Tii yã́ a sã gbɛ̃́ↄgu wɛ̃̀ bàaↄ̃kwi lán kía wɛ̃̀ dasilɛwa. Tó wɛ̃̀ bàaↄ̃kwipi làa, lá wa ò lɛ pↄ́ wa dà ń káaluao guuwa, màa aↄ dɛ ń Tiio wà mɛ̀:

¹⁶ Káalua pↄ́ gbɛ̃e lɛ́ mↄ́ma lↄo, ǹ n mↄↄna sɛ da wɛ̃́lɛa. Lɛ maamaa, ní lɛↄ siò dasidasi, kɛ́ n yã́ e dↄ gbɛ̃́ↄgu yã́i.

¹⁷ Wɛ̃̀ bàaↄ̃kwipi gbɛa Dii a ɛa aɛdↄ Tiiwa. Tii a ɛa na a laataawa, i káaluaka ń dṹnia bùsuↄ píi.

¹⁸ Aà zĩa yíaa ài aↄ dɛ Dii pↄ́ ũɛ. Wa àipi dilɛo, wa ulɛo, aↄ dɛ Dii sìsinaↄ pↄ́ ũɛ, kɛ́ aa e pↄble maamaa, aai pↄkasa ↄdeↄ lú.