Ɛbɛluↄ 2 - Bòó Bibeli Luayãtaala

Yesu gↄ̃a gbɛ̃nazĩna ũ láwáwa

¹ A yã́ mɛ́ tò wà yã́ pↄ́ wá mà kũ ↄplapla, kɛ́ wásu zã zɛ́wao yã́i.

² Asa lá ikoyã pↄ́ malaikaↄ òá sĩanaɛ, mɛ́ wà fĩabò gbɛ̃́ pↄ́ gì mai aa pã̀aↄnɛ a zɛ́wa,

³ tó wi suabaa zↄ̃ↄpi yãda sao, wá bↄe? Suabayãpi bↄ̀ Dii kĩ́iɛ, ↄ̃ gbɛ̃́ pↄ́ màↄ a sĩana pìliwàwɛ̃ɛ.

⁴ Lua suabayãpi seela ↄ̀lↄnɛ́ yãbↄnsaɛↄ ń dabudabu dasi kɛaↄ guu ń a Nisĩna gba pↄ́ a bìilɛwɛ̃ɛ a pↄeãwao.

⁵ I kɛ malaikaↄ ↄ̃ Lua dṹnia zia pↄ́ wálɛ a yã́ o nànɛ́ ń ↄzĩo.

⁶ A ku guei wà mɛ̀: Bↄ́n gbɛ̃nazĩna ũ kɛ́ aà yã́ ìↄ dↄngui? Bↄ́n aà ũ kɛ́ ni laaidↄwài?

⁷ N aà kɛ̃̀sã malaikaↄzi gↄↄpla, n aà kpà kpalau ń gawio ń bɛɛɛo.

⁸ Ń tò pↄ́pii misìilɛɛ̀. Kɛ́ Lua tò pↄ́pii misìilɛɛ̀, i a kee to misiilɛaɛ̀ saio. Tia kɛ́wa, wi e pↄ́pii misìilɛɛ̀ gĩao,

⁹ wá è Yesu yã́ɛ. Lua aà kɛ̃̀sã malaikaↄzi gↄↄpla, kɛ́ Lua gbɛ̃kɛ guu aà ga gbɛ̃́pii gɛ̃ɛ ũ, ↄ̃ à aà kpà kpalau ń gawio ń bɛɛɛo ga taasi pↄ́ a kɛ̀ yã́i.

¹⁰ Lá pↄ́pii bↄ̀ Lua kĩ́i mɛ́ pↄ́pii dɛ aà pↄ́ ũ, kɛ́ a ye gɛ̃ ń gbɛ̃́ↄ a gawi guu dasi a nɛ́ↄ ũ, à kũ̀ aà to an Suabanki gↄ̃ wásawasa taasikɛa guuɛ.

¹¹ Gbɛ̃́ pↄ́ lɛ́ gↄ̃ Lua pↄ́ ũↄ ń gbɛ̃́ pↄ́ lɛ́ ń kɛ Luapi pↄ́ ũo an de doũɛ. A yã́i tò aà ń sísia a dãunaↄ ũ lí aà wí kṹo.

¹² À mɛ̀: Má n yã́ o ma dãunaↄnɛ, má n táasilɛ kↄ̃kãaa guu.

¹³ À mɛ̀ lↄ: Má aà náai vĩ. À mɛ̀ lↄ: Má kɛ́, ń nɛ́ pↄ́ Lua kpàaↄ.

¹⁴ Lá nɛ́piↄá gbɛ̃nazĩnaↄnɛ, màa aàpi sↄ̃ à gↄ̃̀ gbɛ̃nazĩna ũ láńwa, kɛ́ à ga, i Ibiisi pↄ́ ì ga gba zɛ́ kaalɛ,

¹⁵ i gbɛ̃́ pↄ́ aalɛ vĩakɛ gaɛ aa gↄ̃̀ a zↄↄ ũ e ń wɛ̃ni lɛ́uↄ bo.

¹⁶ Sĩana guu malaikaↄ ↄ̃ àlɛ ↄdamáo, Ablahaũ buiↄnɛ.

¹⁷ À kũ̀ aà gↄ̃ lá a dãunaↄwa yã́pii guuɛ, kɛ́ à gↄ̃ Sa'onkia sùuude náaide ũ Lua zĩ guu, i gbɛ̃́ↄ duuna kɛ̃́má.

¹⁸ Lá à taasikɛ̀ à yↄ̃a fↄ̃̀, a fↄ̃ dↄ gbɛ̃́ pↄ́ wàlɛ ń yↄ̃ↄlɛ.

« Roimhe

Air adhart »

Lean sinn:

Ceanglaichean taic

Sanasan