Ɛzala 5 - Bòó Bibeli Luayãtaala

Tatɛnai lákɛ̃a kí Daliusiɛ

¹ Ãnabi Age ń ãnabi Zakali, Ido nɛ́o ãnabikɛkɛ̀ Yuda pↄ́ kú Yelusalɛũↄ ń Yuda bùsuo píi ń Isailiↄ Lua tↄ́o.

² Ɔ̃ Salatiɛli nɛ́ Zolobabɛli ń Yozada nɛ́ Yesuao fɛ̀lɛ nà Lua kpɛboawa Yelusalɛũ. Lua ãnabipiↄ kúńnↄ, aalɛ dↄńlɛ.

³ Wegↄ̃ↄ Uflata baala dↄaana Tatɛnai ń Setaa Bozenaio ń ń gbɛ̃́ↄ mↄ̀ ń lé, aa ń lá aa mɛ̀: Dé mɛ́ á gbá zɛ́ à kpɛ́ɛ bee kɛkɛ boi?

⁴ Aa gbɛ̃́ pↄ́ lɛ́ kpɛ́pi boↄ tↄ́ gbɛ̀a lↄ.

⁵ Ń beeo Lua lɛ́ wɛ́tɛ Yuda gbɛ̃zↄ̃ↄpiↄzi, ↄ̃ aai onɛ́ aa kã́maboo. Aa mɛ̀ wà lɛ́kpãsãkɛ Daliusiɛ gĩa, aai lá pↄ́ a kɛ̃ a yã́ musu e.

⁶ Uflata baala dↄaana Tatɛnai ń Setaa Bozenaio ń ń gbɛ̃́ Pɛɛsi buiↄ lakɛ̃, ↄ̃ aa kpã̀sã kí Daliusiɛ.

⁷ Lɛ́kpãsã pↄ́ aa kɛ̀ɛ̀n kɛ, aa mɛ̀: Kí Daliusi, wa fↄkpàma maamaa.

⁸ Kí, ǹyↄ̃ dↄ̃ kɛ́ wa gɛ Yuda bùsuu e Lua zↄ̃ↄde kpɛ́u. Wàlɛ kpɛ́pi bo ń gbɛ̀ gbɛ̃̀nɛↄ, wàlɛ lí da kpɛ́pi gĩↄwa. Wàlɛ zĩpi kɛ ń laaio, àlɛ táa'o.

⁹ Wa yãlàla ń gbɛ̃zↄ̃ↄↄwa wa mɛ̀: Dé mɛ́ á gbá zɛ́ à kpɛ́ɛ bee kɛkɛ boi?

¹⁰ Wa ń tↄ́ gbɛ̀a kɛ́ wà e onɛ, ↄ̃ wa ń dↄaanapiↄ tↄ́ dàlau.

¹¹ Lá aa yã́zãsìwán kɛ: Aa mɛ̀ musu ń zĩ́lɛo Lua zↄ̀blenaↄn ń ũ. Kpɛ́ pↄ́ wa bò yãa à wɛ̃ kɛ̀, ↄ̃ wa kɛ̀kɛ lɛ́ bo lↄ. Isailiↄ kí zↄ̃ↄ mɛ́ bò yãa.

¹² Aa mɛ̀ ń deziↄ Lua Musude pↄ fɛ̀lɛ, ↄ̃ à ń ná Babiloni bui Nɛbukanɛza, Babɛli kíaɛ a ↄzĩ, ↄ̃ à kpɛ́pi wìwi à gbɛ̃́piↄ sɛ̀lɛ tàńnↄ Babɛli.

¹³ Bee gbɛa Babɛli kí Kilusi kpalablea wɛ̃̀ sɛ̃́ia guu à yãdìlɛ à mɛ̀ wà ɛa Lua kpɛ́pi bo lↄ.

¹⁴ Baa vua ń ã́nusu pↄ́ pↄ́ Nɛbukanɛza sɛ̀lɛ Lua kpɛ́u Yelusalɛũ, a kàlɛ a tã́akpɛu Babɛliↄ, kí Kilusi bↄ̀lɛ kpà Sesebazaa pↄ́ à aà dìlɛ bùsu dↄaana ũwaɛ.

¹⁵ A òɛ̀ aà pↄ́piↄ sɛ gɛ kálɛ Lua kpɛ́u Yelusalɛũ, tó wà kpɛ́pi kɛ̀kɛ dↄ̀.

¹⁶ Ɔ̃ Sesebazaa mↄ̀ Lua kpɛ́ ɛ̃ kpàlɛ. Wàlɛ kpɛ́pi bo za gↄↄ beeɛ e gbã, kási i láa yãao.

¹⁷ Kí, tó à kɛ̀nɛ maa, lá wɛɛlɛ kíaↄ lákalɛkĩi Babɛli, ní gwa tó kí Kilusi yãdìlɛ wà Lua kpɛ́ dↄ Yelusalɛũɛ. Lá ń è, ní lɛ́kpãsãkɛwɛ̃ɛ.