Taytùs 3 - The New Testament in the Babanki language

Ntsìnə̀ a viʼi vəbyɨməvə diʼ əntsi

¹ Kùmtə à viʼi vyə la vəwenə nshiʼsə̀ təwen tə vəwenə à tʉtʉ vəwenə bènə̀ viʼi a və soʼo vəwenə, zhʉ gɨ̀ be bvʉ̀tə̀ ənè shyèʼ jùŋə ghə̀ no mənzhʉ̀ ntsèm.

² Gàʼa à vəwenə la kə vəwenə à ngàʼà nyʉ̀ byɨvə byìʼì viʼi, la vəwenə mbòŋsə̀ tsi ntsìnə̀ ə bwaʼmə à viʼi vətsèm, ku ndoŋ wenə̀ viʼi vətsèm be tsi ntsìnə̀ shiʼsə̀ wèn.

³ Andìʼ a mbì nkàyntə̀ vəghəŋ ə̀ dzɨ̀ŋtə̀ kèn la vəghəŋ ə zhʉ gɨ̀ be nè shwè. Vəghəŋ ndìʼ əkòs à tənkì tə nyʉ̀ mbi, be nè no ghò a vəghəŋ ə̀ nkòŋ ənè. Vəghəŋ ə ntsi tò a ne ənyʉ̀ byɨvə be shəmə, viʼi bàynə̀ vəghəŋ, vəghəŋ be kiʼ kəbàyn à vəghəŋ a ntìntìn,

⁴ alì no a zhʉ̀ kò a njùŋ bènə̀ ə̀kòŋ ə Nyìngòŋ ə mbwòŋsə̀ vəghəŋ ə̀ mfʉ

⁵ ghə̀ bwòŋsə̀ vəghəŋ. Ghə̀ ko ə̀ mbwòŋsə̀ vəghəŋ la vəghəŋ nè kənyʉ̀ kə jùŋə kə kətsenkə alì ghə̀ mbwòŋsə̀ vəghəŋ byìʼì kusə nshinsə wen əchò fà kəzhwì kə ŋwoʼkə. Kəzhwì kə ŋwoʼkə akènkə shʉ li vəghəŋ,vəghəŋ ə nlayn ə̀ mbe ku ntsìnə̀ fi à vəghəŋ.

⁶ Nyìngòŋ ə̀ nkuli kəzhwì kə ŋwoʼkə no kə ghoʼo à vəghəŋ əchò fà Yesò Klistò ə mbwòŋsə̀ vəghəŋ.

⁷ Nyìngòŋ ə nè alə̀ ndi vəghəŋ ə ndiʼ viʼi kənyʉ̀ kə tɨməkə chò fà boŋə tyɨm ə wen. A ji aghèn vəghəŋ lù kiʼi ə̀bwòŋ yi a ghə̀ ko lu mè.

⁸ Əgàʼ aghenə diʼ nəmwèʼè. Mà kəŋə la wù ə nshɨ̀tə̀ dìʼsə̀ ənyʉ̀ venə a mà gàʼà lə̀ ndi viʼi vyi a və byɨmə li à Nyìngòŋ ə ntùʼmə̀ be ghʉ tətyɨm tə vəwenə ə nè tò ənyʉ̀ juŋəvə. Ənyʉ̀ avenə gyàmtə̀ viʼi.

⁹ Kə a kwen a bèsə̀ nyʉ̀ a və ko kiʼ ətof, ə̀ be ə ntaŋtə təzhiʼ tə vətìʼ və vəghəŋ və mbì. Kə a kwen a ntaŋ nə̀ əsoyn kùmə̀ ə̀soʼ. Ənyʉ̀ kədyàŋ kədyàŋ avenə ko gyàmtə̀ wìʼ no kənyʉ̀ kətsenkə.

¹⁰ Wìʼ ə mvì nə̀ kəngə̀sə̀ kə, wu pfàntə̀ wen əzaʼa aghayn à bò. Wìʼ ayì faŋ ke kwitə, wù ghʉ̀sə dyʉ̀ nə̀ wen,

¹¹ kɨ la nki wìʼ aghèn ko bè kiʼ əkwoʼtə tɨməghə. Ənyʉ̀ byɨvə wen be dìʼì la ghə̀ dìʼ wu byɨ a ashɨ Nyìngòŋ.

Kətyɨftə kəmyètəkə

¹² No a zhʉ kò a mà təmə̀ Atemàs ko Tychicùs à wù, taŋkə la wù vi ə̀ yèn mo a Nikobolìs byìʼàndo mà ghʉ li la mà ndiʼ tò tsu a byɨ̀ŋ ghèn.

¹³ Zenàs ə wù soʼò nsoʼsə wenə̀ Abolòs nè sə nlù, wu gyàmtə̀ ku no tè gho ayì a vəwenə kəŋ əlù nə̀ kəwenkə ndi vəwenə zaŋsə.

¹⁴ Viʼi və byɨməvə vəghəŋ diʼ əmwòmsə̀ ənè tò ənyʉ̀ juŋəvə, kiʼ ə̀fo, vəwenə ngyàmtə̀ viʼi a vəwenə ko kiʼ. Kə vəwenə à ntsi ntsìnə̀ a ghə̀ ko kiʼ əse.

¹⁵ Viʼi vi a yo vəwenə diʼ a shen tɨmə̀ ətoŋtə à wù. Toŋtə ndoŋsə shyə̀sə afì a diʼì viʼi və byɨməvə. Nyìngòŋ diʼ boŋə tyɨm ə wen à ghə̀ŋ no vətsèm.