Shwèʼ 9 - The New Testament in the Babanki language

Saul kaʼsə sə diʼ wu byɨmə

¹ Saul mbu kàyntə̀ tò kədyòʼ la ghə̀ a zhwilə ndzɨ̀mtə̀sə bàm Bobo, ə̀ lù dyʉ̀ à kətʉ kə tʉtʉ vəpfèm və ngə̀ŋ Nyìngòŋ

² ə̀ gàʼ à wen la ghə̀ ku ŋwàʼlə̀ à yì, a ghə̀ dìʼì wìʼ a yì dìʼi wen, bènə̀ kədyòʼ kì a yì kiʼi ndi yì dyʉ̀ a aloʼ ntsèntə̀ Vəjew a Damaskus ə̀ ghaʼtə ndzɨ̀mtə̀sə Yesò no sətsèm ə̀ bwènsə̀ vì nə̀ vəwenə a Jelusalèm, lʉmə nə̀ ki.

³ Ghə̀ ku, Saul mù fʉ̀ ə̀ jèʼ sə boʼsə dyʉ̀ a Damaskus, bayn tsenghə bvʉ̀tə̀ fʉ̀ fa kàŋ ə̀ bàŋ ə̀ kàʼa wen a kəshi a ghə̀ ndiʼì tsu.

⁴ Ghə̀ feŋ a nse, ə̀ zhʉ̀ ando gɨ̀ tsen ə gàʼà à wen la, “Saul, Saul,byìʼì gho a wù tsuʼu kəghʉ kom a”.

⁵ Ghə̀ bèm la, “Adìʼ wù ndo, a Bobo?” Gɨ̀ ayì bwènsə̀ la, “Adìʼ mo Yesò yì a wù ku ngəʼ à wen lì.

⁶ Lù kwen ə̀ dyʉ̀ a tì ntə̀ʼ, a və a shə̀ʼtə̀ kənyʉ̀ a wù a wù diʼi nè.”

⁷ Viʼi vi a və njèʼè wenə̀ və Saul lì tɨmə ə chìʼ tò la kùʼ byìʼàndo vəwenə nzhʉ gɨ̀ ayì, alì kò vəwenə lu nyenə wìʼ.

⁸ Saul lù tɨ̀mə fà nse ə̀ bòʼtə̀ ashɨ wen alì kò ghə̀ lù yèn kəfo. Və mù ghaʼa wen fa kwoŋ ə̀ kwènsə wen a Damaskus.

⁹ Ghə̀ tsi mətsi ntaʼ, kò ghə̀ lu nyenə shi, kènla ghə̀ nyʉ li, ko zhɨ kəfo.

¹⁰ Andìʼ a lì, ndzɨ̀mtə̀ bàm Yesò tsen diʼ a Damaskus, a zhiʼ wen ndìʼ Ananyàs. Bobo fʉ̀ à wen a kə̀ʼ a jòm ə̀ tòŋtə wen la, “Ananyàs!” Ghə̀ byɨmə ə̀ gàʼ la, “Mà ghèn a Bobo.”

¹¹ Bobo gàʼ à wen la, “Lù ə̀ dyʉ̀ a ji yì a və dzàŋə̀ nə̀ Jì Nànə lì ə̀ bèm ngə̀ŋ wìʼ tsen tsu a və dzò wen nə̀ Judàs. Kwen ə̀ dyʉ̀ tsu ə̀ bèm wu Talsus tsen tsu a və dzàŋə̀ wen nə̀ Saul. Adìʼ luwèn ghə̀ jɨ̀mə̀.

¹² Ghə̀ yen to sə a diʼ a jòm la wìʼ tsen a və dzò wen nə̀ Ananyàs kwen li ə mvi ghʉ avu wen à yì a kətʉ ndi yì mbwènsə̀ yenə shì.”

¹³ Ananyàs bwènsə̀ gàʼ la, “Bobo, viʼi shə̀ʼtə̀ li nyʉ̀ à mo byìʼì wìʼ aghèn no vəghoʼo, la ghə̀ jèʼè nè viʼi vye yenə ngəʼ a Jelusalèm no nànto.

¹⁴ Ghə̀ dìʼ a shèn luwèn nə̀ adyòʼ mù à kù tʉtʉ vəpfèm və ngə̀ŋ Nyìngòŋ la ghə̀ vi ə̀ ghaʼtə no viʼi vətsèm a və jɨ̀mə̀ toŋtə̀ zhiʼ wu.”

¹⁵ Bobo gàʼ à Ananyàs la, “Dyʉ̀ tò dyʉ̀ byìʼàndo ma tsuʼ li wen la ghə̀ shyèʼ à mò ə nè la viʼi tɨm nə̀ təfòyn tə bènə̀ viʼi Islel, kɨ mo.

¹⁶ Nkàntə̀ mò a dìʼi nki ngəʼ à wen a ghə̀ diʼi yen ənè la viʼi kɨ mo.”

¹⁷ Ananyàs lù ə̀ dyʉ̀ kwèn a ngə̀ŋ ayì ə̀ ghʉ̀ avu wen a kətʉ Saul gàʼà la, “Lèmə̀ ghom Saul, Bobo, a diʼi Yesò yì a wù yì yen a ji ando wù yì mvi a shèn lì, tɨm li mò la mà vi ə̀ nè ashɨ wu mbwènsə̀ yenə shi, bè nè la Kəzhwì kə ŋwòʼəkə vì à wù.”

¹⁸ Ando ghə̀ ngàʼà mwètə̀ to myetə fo fʉ̀ fa ashɨ Saul diʼ to nə̀ bo shʉsə ə̀ fəŋkə a nse, ashɨ wen bòʼtə̀, ghə̀ sə bwènsə̀ yenə shi. Ghə̀ lù shi mu.

¹⁹ Fa yì a bàm, ghə̀ zhɨ kəfo no a zhʉ̀ kò kədyòʼ kə bwènsə̀ vì a wen a wèn. Saul tsìtə mətsi alə̀ a Damaskus wenə̀ ndzɨ̀mtə̀sə bàm Yesò sətsensə,

Saul shə̀ʼtə̀ Ntɨm Jùŋ a Damaskus

²⁰ mù zìtə̀ lù fa tsu dyʉ̀ a aloʼ ntsèntə̀sə ə̀ shə̀ʼtə̀ ntɨm jùŋ byìʼì Yesò gàʼà la, “Ghə̀ dìʼ Wàyn Nyìngòŋ.”

²¹ No viʼi vətsèm a və nzhʉ ando Saul ngàʼà ndìʼ nə̀ kaynə mù sə bèmə̀ la, “Gaʼa kò ghèn dìʼ wìʼ yì a ghə̀ tə nzhwilə̀ viʼi a Jelusalèm byìʼàndo vəwenə ghoʼsə̀ Yesò lo?. Gaʼa kò ghə̀ tə vì shyə̀ ə be nè tò ndə̀ŋndəŋ kənyʉ̀ a kèn, əghaʼtə viʼi vəbyɨməvə ədyʉ̀ ku à tʉtʉ və vəpfèm və ngə̀ŋ Nyìngòŋ lo?”

²² Saul sə tùʼù shə̀ʼtə̀ dyʉ̀ nə̀ ntɨm jùŋ tò shə̀ʼtə̀. Ghə̀ nshə̀ʼtə̀ a lì dìʼì mwètə̀ la Yesò dìʼ wìʼ yì a Nyìngòŋ ntsuʼ li ə̀ ghʉ, kò a ndiʼ la wù Jus muʼ a ghə̀ ndiʼì a Damaskus nzì ghə̀ soʼtə̀ kənyʉ̀ kì a ghə̀ ngàʼà lì.

²³ Mətsi nè chò no ghoʼo alə̀, Vəjew tsèntə mù sə baʼtə̀ əzhwi Saul;

²⁴ alì və vì shə̀ʼtə̀ kənyʉ̀ kì a və mbaʼtə̀ ənè nə̀ wen à wen. Vəwenə sə vì bvʉ̀tə̀ wen nəntʉʼʉ, nə̀nchwì a təchʉ̀ tə mbàyn tə ntə̀ʼ ayì əzhwi.

²⁵ A lù sə diʼ nəntʉʼʉ kətsi kətsenkə, ndzɨ̀mtə̀sə bàm Saul sə lyɨ̀ wen ə̀ wè a nkyè ə̀ shìsə̀ wen fa kəbʉ̀ʼ a kə ndiʼì a wenə mbàyn ə shìsə̀ wen ə̀ ghʉ̀ a bàmə mbàyn, ghə̀ nyɨŋ.

Saul bwènə̀ dyʉ̀ a Jelusalèm

²⁶ Andìʼ ando Saul nkuʼ ə̀ zaʼa a Jelusalèm, sə mwòmsə̀ la ghə̀ tsèntə̀ nòynə ndzɨ̀mtə̀sə bàm Yesò, alì kò vəwenə lù byɨmə la ghə̀ ndiʼ ndzɨ̀mtə̀ bàm Yesò. Vəwenə no vətsèm mfànə̀ wen.

²⁷ Balnabas mù vì gyàmtə̀ wen ə̀ lyɨ̀ wen ə̀ dyʉ̀ nə̀ wen à viʼi ntɨm Yesò ə̀ shə̀ʼtə̀ laynsə à vəwenə ando Saul tə yen Bobo a jì ando ghə̀ tə ndyʉ̀ a Damaskus, ghə̀ gàʼ à wen. Balnabas bè gàʼ ando Saul shə̀ʼtə̀ li ntɨm jùŋ a Damaskus byìʼì Yesò nə̀ tyɨmə toghə.

²⁸ Saul faŋ ə̀ mù sə tsi tò wenə̀ viʼi ntɨm ə̀ Yesò, jèʼè kaʼa fa Jelusalèm no tsèm, shə̀ʼtə̀ ntɨm ə jùŋ byìʼì Bobo nə̀ tyɨmə toghə.

²⁹ Ghə̀ ngàʼà be soʼtə̀ nyʉ̀ wenə̀ Vəjew vi a və ngàʼà gaʼa Glis. Vəwenə mù zìtə̀ sə baʼtə̀ əzhwi wen.

³⁰ Viʼi vəbyɨməvə vətsenvə vi nè kɨ kənyʉ̀ akì no a zhʉ̀ kò ə lyɨ̀ wen ə̀ nyɨŋsə ə̀ shìʼsə nə̀ wen a Sisalìyà ə̀ tɨ̀m la ghə̀ bwènə̀ dyʉ̀ a Talsus.

³¹ No viʼi vəbyɨməvə vətsèm a Judiyà nə̀ Galìlì bènə̀ a Samalìyà nko be fàynə. Nòyn viʼi vəbyɨməvə mù sə ghoʼo vì tò vì, byɨmə vəwenə be to kuʼu tò kuʼu, Kəzhwì kə ŋwòʼəkə gyàmtə̀ vəwenə, vəwenə ntsi ando Bobo nkəŋə.

Bità nè kənyʉ̀ kə kanəkə a Lida

³² Zhʉ tsenghə vì kwʉ̀ʼ, Bità sə jèʼè dyʉ̀ a shi no ghoʼo, ə̀ shìʼi dyʉ̀ la ghə̀ ghayntə viʼi vəbyɨməvə a və ndìʼ a ntə̀ʼ Lida.

³³ Ando ghə̀ nshiʼi lì ghə̀ yen wutsen tsu a zhiʼ wen ndìʼ Enyàs, mu ghə̀ kwaʼkə li sə nyoŋ tò a kwen a tì ngwʉ̀ʼsə fwomə.

³⁴ Bità gàʼ à wen la, “Enyàs, Yesò Klistò nè li la wù to tò luwèn. Lu shɨ̀tə̀ əkwen wù.” No a zhʉ̀ kò Enyàs lù.

³⁵ Viʼi no vətsèm a və ntsi a Lida bènə̀ vi a və ntsi a mbwaʼ tsen a və ndzàŋə̀ la Shalòn, nè yen ando Enyàs njèʼè ghayntə kaʼa, ə kwìtə tətyɨm tə vəwenə ə̀ byɨmə à Bobo.

Bità nè Dokas lù fà pfʉ

³⁶ Andìʼ a Joba, wùwì byɨmə tsen diʼ tsu a zhiʼ wen ndìʼ Tabita, andiʼ a gaʼa Glis zhiʼ a ghenə diʼ Dokas, kənàʼ ki diʼ “ngo.” Ghə̀ nè tò nyʉ̀ jùŋvə məzhʉ tsèm be ku gyàmtə̀ à viʼi kəmfem.

³⁷ A sə ndiʼ tò a mətsi ayì, bvìʼ ghaʼ wen ghə̀ pfʉ. Və shʉ̀ bvenə ə wen ə kuʼ nyòŋsə̀ a tì ngə̀ŋ kàŋ.

³⁸ Andìʼ a lì kò kəghaf kə ndiʼ əlù fa ntə̀ʼ Joba ə dyʉ̀ a Lida. Ndzɨ̀mtə̀sə bàm Yesò shìsə a sə ndiʼ a Joba nè zhʉ̀ la Bità dìʼ a Lida, vəwenə tɨm viʼi vəbò la və dyʉ̀ ə̀ gàʼ à wen la, vəwenə sensə̀ wen la ghə̀ nyɨŋ ə̀ shiʼi vì ə̀ yèn vəwenə.

³⁹ Bità wenə̀ vəwenə lù dyʉ̀ zaʼa tsu, və lyɨ̀ wen ghə̀ kuʼ a tì ngə̀ŋ kàŋ ayì. Ki mpfʉ no vətsèm fa ntə̀ʼ ayì zhùŋtə̀ kàʼa wen mù sə̀ dì, dìʼì ndisə tin shìsə bènə̀ gwʉ̀nə̀ vi a Dokas ntasə̀ a vəwenə à wen.

⁴⁰ Bità gàʼ la vəwenə no vətsèm fʉ̀ a kəbəŋ. Vəwenə fʉ̀kə̀, Bità mù gwʉ̀ʼtə alwi wen a nse ə̀ jɨ̀m à Nyìngòŋ, nè jɨ̀m ə̀ mè ə̀ fùʼtə gàʼ à bvenə ayi la, “Tabita, lu.” Ghə̀ bòʼtə̀ ashɨ wen sə lye àdìʼ Bità, ghə̀ lù ŋwʉʼʉ ŋwʉʼʉ.

⁴¹ Bità gyàmtə̀ tsòʼsə̀ wen ghə̀ lù tɨ̀mə mù dzàŋtə̀ viʼi vəbyɨməvə vyi bènə̀ ki mpfʉ vyi ə̀ dìʼ à vəwenə la ghə̀ diʼ tò to.

⁴² Soʼgho byìʼì kənyʉ̀ a kènkə sàykə dyʉ̀ a Joba no tsèm, viʼi no və ghoʼo bè byɨmə à Bobo.

⁴³ Fa yì a bàm, Bità tsi no alə̀ a Joba a ngə̀ŋ Simon tsen, a ghə̀ ntùʼmə̀ nə̀ gwʉsə nyamsə.