Shwèʼ 27 - The New Testament in the Babanki language

Və lyɨ̀ Bol ə̀ dyʉ̀ nə̀ wen a Lum

¹ Andìʼ ando və nghʉ li la yès kwenə a kəbaŋ kə à mù ə̀ dyʉ̀ a Italì, və ku Bol wenə̀ viʼi mfɨŋ vətsenvə à kətʉ kə vəsugyèʼ viʼi Lum kətsenkə, zhiʼ wen diʼ Juliyòs. Və ndzàŋə̀ nòyn Vəsugyèʼ a vyi nə̀ vəsugyèʼ və Fòn ghoʼo.

² Yès lù ə̀ dyʉ̀ kwèn a kəbaŋ kə a mù a kə nlu fa ntə̀ʼ Adlamitùm sə shiʼì dyʉ̀ fa shyə a baŋ a mù ndyʉ̀ tɨmə̀ tsu a loʼ Asìyà. Alistakùs, wù loʼ Macedonia tsen a ghə̀ nlu fa ntə̀ʼ Tèsàlonikà ndìʼ yo vəwenə a muʼu.

³ Tʉʼ lan yès dyʉ̀ zaʼa a Sidòn, Juliyòs nkìʼ tyɨm jùŋghə à Bol ə̀ ghʉ̀sə wen la ghə̀ dyʉ̀ yen viʼi ndoŋsə wen ə̀ kiʼi fo a ghə̀ nkəŋə.

⁴ Yès mù lù fà tsu sə ndyʉ̀ fwof sə chò ku ngəʼ a yès, yès lù ə̀ bàylə̀ dyʉ̀ jì fa shyə a fwof nko nchò fa tsu a mbyɨ̀ loʼ Saybùs,

⁵ ə̀ bwènə̀ kwèn a kəntìntìn kə a mù ə̀ dyàŋ dyʉ̀ fa shyə yì a ghə̀ mboʼsə à Silisiyà bènə̀ Bamfiliyà ə̀ dyʉ̀ zaʼa a ntə̀ʼ Myla aloʼ Lisiyà.

⁶ Kətʉ kə vəsugyèʼ kì yen kəbaŋ kə a mù a kə nlu fa ntə̀ʼ Alèksandìliyà sə dyʉ̀ a Italì ə̀ wè yes tsu, yo vəwenə lù.

⁷ Yès lyɨ̀ mətsi, jèʼè tò ndzìndzì byìʼàndo fwof toghə nchò nè la jèʼ ayi nto. Yès jèʼ tò a lì dyʉ̀ zaʼa a ntə̀ʼ Nidùs. Fwof nko ghʉ̀sə la yès dyʉ̀ jì fa ji ayì. Yès mù bàlə̀ dyʉ̀ jì fa shyə Salmòn a loʼ Klete a fwof nko chò fa tsu.

⁸ Yès sə̀ jèʼè tò fa mbyɨ̀ à mù, nè dzɨŋ tò a lì ə̀ kaʼ ə̀ zaʼa a kəshi kətsenkə a baŋ a mù mvi tsi tsu və dzàŋə̀ la, “Kəshi Kəbwaməkə,” ə boʼsə a ntə̀ʼ Lasiyà.

⁹ Yès byɨsə mətsi tsu tò kədyàŋ byìʼàndo jèʼ ayi mbyɨfə to ghoʼo yès byìʼì ando andiʼ a ntìntìn byɨ̀ŋ. Bol mù tyɨftə viʼi a vyi la,

¹⁰ “Vəlèmə̀ vwomə, mà yenə la jèʼ vəghəŋ ə dyʉ̀ nə̀ mbì kìʼ ngəʼ fànsə. Kəbaŋ kə a mù kènkə kə̀ʼə̀ la kə a sàykə̀, fo vi a və diʼì tsu lì byɨf viʼi be pfʉkə.”

¹¹ Kətʉ kə vəsugyèʼ kì tyen la ghə̀ ko a zhʉ kənyʉ̀ a Bol ngàʼà, ghə̀ bòŋsə̀ ghʉ̀ kətʉ kə wen tò a kənyʉ̀ a tì kəbàŋ wenə̀ wìʼ a ghə̀ ngùfə̀ kəbaŋ akì ngàʼà.

¹² Kəshi kì a kəbaŋ kə a mù kì nti tsu nko bòŋ, nghoʼo viʼi fa vəwenə a ntìntìn sə kòŋə̀ tò la və ndyʉ̀ nə̀ mbì a ntìntìn à mù zhʉ̀ tsen vəwenə à dyʉ̀ zaʼa a Italì ə̀ tɨ̀mə tsu. Italì ndìʼ kəshi kì a baŋ a mù mvi ti tsu a Klete a kə nki dyʉ̀sə̀ nə̀ shyə a chʉzhʉ nshwè tsu.

Fwof to ghə̀ chò a ntìntìn à mù

¹³ A ne sə ndiʼ ando fwof bwaʼmə tsen ghə̀ əzìtə̀ sə chò fa shyə ten tò ndzìndzì viʼi a vyi yen a lì sə̀ kwòʼtə̀ la vəwenə a ne kənyʉ̀ a vəwenə yì ghʉ, vəwenə gùfə̀ tsuʼu ndyə̀ yi gaʼa ndi ne ghaŋsə kəbaŋ tsu lì mù sə̀ jèʼè dyʉ̀ a mbyɨ̀ loʼ Klete.

¹⁴ A sə laʼtə fwof toghə tsenghə zìtə̀ sə̀ chò a ghə̀ vi fa shə kwi, kwenə vì fa loʼ Klete a mù,

¹⁵ sə̀ vì a lì nə̀ʼə̀ kəbaŋ kə a mù kì, yès mwòmsə̀ ədyʉ̀ ji fa shyə yì a ghə̀ mvì fa tsu, kə ghoʼ yes, yès mù lansə̀ ghʉ̀sə, kəbaŋ akì la kə jèʼè tò a tì fwof ayì.

¹⁶ Yès bàlə̀ chò jì fa fəloʼtə̀ fə tsen fə a tì à mù a və ndzàŋə̀ nə̀ Kawudà, mù mwòmsə̀ no nə̀ kədyòʼ kə ə gùf ə kwènsə nkànuʼ yì a və chuŋ a bàmə kəbaŋ.

¹⁷ Və gùf ə kwènsə nə̀ wen a lì ə shɨ̀tə̀ kwìʼ kəbaŋ akì la kə à bàymə̀. Viʼi vi a və ntisə̀ kəbaŋ akì sə fànə̀ la kə zì kə dyʉ̀ ə̀ pfèn a kədə̀ŋ kə kəsese kì a kə ndìʼ a tì à mù a benə loʼ Syltis, vəwenə mù zàs kəbàs kə ndisə kə to kə a və chuŋə̀ a wèn kəbaŋ kə a mù kə sə nè la kə kə à nyɨŋə no nànto, ə̀ ghʉ̀sə la à ntenə tò fwof.

¹⁸ Fwof toghə ayì faŋ sə ku ngəʼ tò ku. Tʉʼ nè lan vəwenə sə boŋtə̀ fo a və ndìʼ a tì kəbaŋ akì mòʼò a mù.

¹⁹ Tʉʼ be nè sə lan a kənkùmtə̀ kə kətsi, vəwenə sə tsuʼtə fo fa kəbàŋ akì mòʼò a mù.

²⁰ Mətsi mə chò no nghoʼo kèn la wìʼ fà yès ə yenə chʉzhʉ kò mədzɨ̀ŋ, a chò tò fwof. Ando ghə̀ mfaŋə̀ sə chò tò a lì, yès mù sə̀ yenə tò la yès ko be a bwòŋ.

²¹ A nè sə ndiʼ ando viʼi a vyi nshwèʼè li no kəghaf kèn la vəwenə zhɨ kəfo, Bol lù tɨ̀mə à vəwenə a shɨ ə̀ gàʼ la, “Vəlèmə̀ vwomə, a tu ndìʼ la ghə̀ŋ tə zhʉ kənyʉ̀ a mà tə gàʼ vəghəŋ faŋ tò a Klete, mu vəghəŋ ko byɨ̀sə fo ə̀ kiʼi nkì kənlè kènkə.

²² Mà sə sensə̀ gàʼà à ghə̀ŋ luwèn la ghə̀ŋ ghaʼ tətyɨm təŋtə byìʼàndo a sàykə̀ tò kəbaŋ kènkə kò a ndiʼ la wìʼ fa ghə̀ŋ a pfʉ li.

²³ Mà gàʼà alə̀ byìʼàndo à tə ndiʼ nəntʉʼʉ lan, ntsɨ̀ŋ ngə̀ŋ Nyìngòŋ yì a ghə̀ kiʼì mo a be diʼ wen a mà kuʼsə̀ vì à mò,

²⁴ ə̀ gàʼ à mò la, ‘Bol, kə a fwàyn byìʼàndo Nyìngòŋ ghʉ li la wù a tɨmə a shɨ Fòn ghoʼo. Ghə̀ be ghʉ̀ la no wìʼ ko a pfʉ fa ntìntìn viʼi venə a wenə̀ vəwenə jèʼè lə̀ byìʼì boŋə tyɨm yi a ghə̀ kiʼ à wu.’

²⁵ Ma mu sə gàʼà à ghə̀ŋ ə vəlèmə̀ vwomə la, ghə̀ŋ ghaʼ tətyɨm təŋtə byìʼàndo mà byɨmə à Nyìngòŋ, kɨ la no tè ghò nè chò ando və gàʼà à mò.

²⁶ Fwof ne ten vəghəŋ ə shìsə̀ a bàm a loʼ tsenghə a tì à mù.”

²⁷ Təwoŋ tə nè chò təbò, fwof bu ghansə nə̀ yès tò ghansə a mù mə̀ Adɨ̀liyatik. A nè sə ndiʼ a ntìntìn nəntʉʼʉ, viʼi vyi a və ngùfə̀ kəbaŋ akì yen la vəwenə sə̀ boʼsə vì a mbyɨ̀ nse.

²⁸ Vəwenə mòʼ mpfʉ̀ ghə̀ shiʼi a tì à mù mu və chuŋ li kəfo kə diʼi kə kətsenkə tsu, ghə̀ shwemə shìʼi a tì à mù, vəwenə shyə̀ʼ ə̀ yen la mu a mì mə shwemə ntàmsə kəvu ghɨ nə̀ məwum mbò. Vəwenə jèʼtə̀ tò alə̀ be mòʼ mpfʉ̀ ayì ə̀ yèn la mu a mì shwemə ə zaʼa tò ntàmsə kəvu məwum abʉ̀muʼ.

²⁹ Vəwenə zìtə̀ sə fànə̀ la fwof a lyɨ̀ vəwenə ə dyʉ̀ pfèn ə zhwilə a təghu, və mù shìʼsə fo tsenəvə vi kàʼ a və nghaʼa kəbaŋ tsu fa bàm mù sə jɨ̀mə tò la tʉʼ lan.

³⁰ Viʼi vi a və gufə kə baŋ a ki sə̀ mwòmsə ə nyɨŋ mù fʉ̀ fa tsu sə shiʼsə̀ nkànuʼ yì bɨ̀lə̀ nè tò sə vəwenə ə kəŋə chò ədyʉ̀ shiʼsə fo vi a və ghaʼa kəbaŋ tsu fa mbì,

³¹ alì Bol yen kənyʉ̀ akì ə̀ gàʼ a kətʉ kə vəsugyèʼ kì wenə̀ vəsugyèʼ və wen la, “Viʼi kəbaŋ venə fàŋ ke ŋwʉʼʉ tò a tì kəbaŋ a shèn mu wìʼ fà ghə̀ŋ ko a bwòŋ.”

³² Vəsugyèʼ a vyi zhʉ a lì ə shyə tìntə mpfʉ̀sə nkànuʼ ayì ghə̀ sə dyʉ̀ a mù tò fà ngə̀ŋ.

³³ Tʉʼ nə̀ sə nlaynə vì, Bol sensə vəwenə no vətsèm gàʼà la, “Ghə̀ŋ taŋkə ə zhɨ̀ kəfo. Ghə̀ŋ tsi li təwoŋ təbò luwèn, kwòʼò tò mbi kèn la kəfo kə kwen li a chʉ̀ wìʼ fa ghə̀ŋ.

³⁴ Mà mu sə lonə la ghə̀ŋ taŋkə ə̀ zhɨ̀ kəfo ndi ndiʼ vəto. No tè nyɨ̀ŋ muʼ ko a tinə fa kətʉ wìʼ fà ghə̀ŋ.”

³⁵ Bol ngàʼ a lì ə̀ lyɨ̀ kəbayn ə̀ kù kəzòŋ à Nyìngòŋ tò à vəwenə a shɨ mù byəʼ ə̀ zìtə̀ sə zhɨ.

³⁶ Vəwenə yen a lì tətyɨm tə vəwenə tə bwaʼmə no ndò fa vəwenə a ntìntìn zìtə̀ sə̀ zhɨ kəfo.

³⁷ Yès ntsèntə̀ dìʼ a tì kəbaŋ akì viʼi ghɨ bò nə̀ njʉ̀sə̀ ntʉfə a məwum sòmbo.

³⁸ No ndò nè zhɨ ə̀kwiʼ, vəwenə shìsə̀ asaŋ dyə yì a ghə̀ ndìʼ a tì kəbaŋ akì ə̀ mòʼ a mù ndi kəbaŋ akì kə zaŋsə.

Fwof nè kəbaŋ kə a mù kì sàykə̀

³⁹ Tʉʼ nè lan kò vəwenə lù kɨ̀ la shyə mbyɨ̀ à mù yì a vəwenə diʼì tsu dìʼ ghə̀ kò lo, alì yèn kəshi kə tsenkə kə diʼ a mbyɨ̀ à mù, mù ghʉ̀ la kə sətsèn mbwaʼmə̀, vəwenə à dyʉ̀ nə̀ kəbaŋ kə vəwenə ə̀ tɨ̀mə tsu.

⁴⁰ Vəwenə tintə fo vi a və nghaʼa kəbaŋ kì ə̀ ghʉ̀sə, və shiʼi a mù, be zàtə̀ mpfʉ̀sə shì a sə nghaʼa kəfo kì a kə tisə̀ kəbaŋ kə a mù lì, bè kùʼsə kəbàs kə ndisə kì a mbì ndi fwof ntenə dyʉ̀sə̀ nə̀ kəbaŋ kə a mù akì a nse.

⁴¹ Kəbaŋ akì kə dyʉ̀ pfèn a kədə̀ŋ kə kəsese kətsen a tì à mù, mbì yi chʉʼ a nse kò ghə̀ bè dyʉ̀ nə̀ mbì, mù vì pfèn bàm yi ghə̀ sàykə̀ tò a bàs a bàs.

⁴² Vəsugyèʼ vi yen a lì mù sə̀ baʼtə̀ əzhwilə viʼi mfɨŋ vi no vətsèm ndi la kə vəwenə à sàm ə̀ fʉ̀ nyɨŋkə,

⁴³ alì kətʉ kə vəsugyèʼ kì sə kəŋə ə bwòŋsə̀ Bol mù gàʼ à vəwenə la kə vəwenə à mwòm, ə̀ bòŋsə̀ gàʼ la no ndò a ghə̀ zì ghə̀ sàm tsòʼ ə̀ fʉ̀ a mbì ə sàm ə̀ tɨ̀m.

⁴⁴ Vi a və mfaŋə̀ lì shɨ̀tə̀ ghaʼ ntemə nkoʼ kò no tè kəbàs kə kəbaŋ kəkò a vəwenə nzì və ghaʼ mù sàm ə̀ dzɨ̀mtə̀. A lè ando yès ne mibu bwòŋ vətsèm.