Shwèʼ 25 - The New Testament in the Babanki language

Bol sensə la və dyʉ̀ ə̀ soʼ yi a Lum

¹ Andìʼ a bàmə mətsi ntaʼ ando Festus nkuʼù a kəkɨ a nə̀ gumnà Sisalìyà, ghə̀ lù kùʼ a Jelusalèm.

² Tʉtʉ vəpfèm və ngə̀ŋ Nyìngòŋ bènə̀ tʉtʉ Vəjew gàʼ nyʉ̀ byɨvə a wen byìʼì Bol. Vəwenə loyn Festus

³ la ghə̀ ne və lyɨ Bol ə̀ vì nə̀ wen a Jelusalèm, gàʼà a lì byìʼàndo vəwenə mbaʼtə li əzhwi wen a ji.

⁴ Ghə̀ gàʼ à vəwenə la, “Bol dìʼ mu və shwinə̀ li wen a Sisalìyà, mà diʼi bwènə̀ dyʉ̀ tsu a mətsi ghèn.

⁵ Ghə̀ŋ gaʼà tʉtʉ vəŋə və boʼsə ə̀ vì nə̀ mò tsu shə̀ʼtə̀ kənyʉ̀ kì a ghə̀ byɨsə̀.”

⁶ Festus tsi tsu mətsi fwomə, və sə ngàʼ la mətsi wum ghə̀ bwènə̀ shìʼi a Sisalìyà. Tʉʼ layn ghə̀ dyʉ̀ a kəbòʼ kə nsoʼ ə̀ gàʼ la və dyʉ̀ ə̀ lyɨ̀ Bol ə̀ vì nə̀ wen.

⁷ Və vì nə̀ wen no a zhʉ̀ kò, Vəjew vi a və nlu fa Jelusalèm ə̀ vì tsu tɨmə kàʼa wen sə zhò ndzɨ̀ŋsə byìʼì Bol no səghoʼo alì kò vəwenə lu ndìʼì la kənyʉ̀ a vəwenə gàʼà byìʼì Bol dìʼ nəmwèʼè.

⁸ Bol gàʼ ndi gyàmtə̀ wen ə wen la, “Mà ko kwàʼ soʼ Vəjew, ko ma lù byɨ̀sə kənyʉ̀ kətsenkə à vəwenə a ngə̀ŋ Nyìngòŋ, ko ndiʼ la mà gaʼà li tè kənyʉ̀ kə byɨkə kətsenkə byìʼì fòyn ə ghoʼo ə Lum.”

⁹ Festus nkəŋə la Vəjew ə nkòŋə̀ wen, ghə̀ mù bèm à Bol la, “Wù le a kòŋ ə kuʼ a Jelusalèm və soʼ wù tsu à mò a shɨ byìʼì nyʉ̀ venə a və gàʼà a shèn byìʼì wù lə̀ a?”

¹⁰ Bol bwènsə̀ la, “Mà dìʼ a shə̀ a kəbòʼ kə nsoʼ fòyn ghoʼo yì a ghə̀ diʼì a Lum, və diʼi soʼ mo tò a shèn. Nkàntə̀ wù ə̀ kɨ no nkàyn la mà ko byɨ̀sə kənyʉ̀ à Vəjew.

¹¹ Mà sətsèn ndiʼ mu mà kwaʼà li soʼ a və diʼi zhwi mo, mà ko tènsə la kə və zhwi, alì mu vəwenə sətsèn ngàʼà nyʉ̀ venə byìʼì mò alə̀ à diʼ ndzɨ̀ŋsə, mu wìʼ ko kiʼ kədyòʼ əku mo à vəwenə. Mà sensə̀ la fòn ghoʼo soʼ nsoʼ ghom.”

¹² Festus chʉʼmə tʉ wenə̀ viʼi vyi a və ku tyɨftə à wen mù gàʼ à Bol la, “Ando wù sensə̀ li la nsoʼ wù dyʉ̀ à fòn ghoʼo lì, nsoʼ ayì lì a dyʉ̀ tò à wen.”

Festus shə̀ʼtə̀ nsoʼ Bol à Fòn Aglibà

¹³ A sə ndiʼ a bàmə vəsàŋ vəshyəʼ alə̀, Fòyn Aglibà wenə̀ Beniys vì a Sisalìyà ətoŋtə be shisə Festus.

¹⁴ Vəwenə nè tsìtə tsu mətsi nshəʼ alə̀, Festus shə̀ʼtə̀ ngəʼ Bol à wen gàʼà la, “Wìʼ dìʼ a shə̀ a Felik tə shwìn ə̀ ghʉ̀sə a ngə̀ŋ mfɨŋ,

¹⁵ ma tə nkuʼ ndyʉ̀ a Jelusalèm, tʉtʉ vəpfèm və ngə̀ŋ Nyìngòŋ bènə̀ vəchəʼ və Vəjew gàʼ nyʉ̀ byɨvə byìʼì wen bè gàʼ nyʉ̀ la mà byɨmə la və diʼ ku ngəʼ à wen.

¹⁶ Ma gàʼ à vəwenə la, ‘A ko diʼ ntsìnə̀ yes, viʼi Lum ə ku wìʼ a və gàʼà la ghə̀ byɨsə li kənyʉ̀ la və ku ngəʼ à wen kò à ndiʼ la ghə̀ tɨmə̀ tɨ̀mə a shɨ viʼi vyi a və ghàmə̀ wen lì ə gàʼ kənyʉ̀ ndi gyàmtə̀ wen ə wen.’

¹⁷ Andìʼ ando vəwenə nshiʼi vì a shèn, mà ko nzhwi zhʉ. Tʉʼ ə layn tò laynə, mà dyʉ̀ ŋwʉʼʉ a kəbòʼ kə nsoʼ ə̀ gàʼ la və dyʉ̀ lyɨ̀ ə̀ vì nə̀ wen.

¹⁸ Ghə̀ vì, viʼi a və nghàmə̀ wen lì lù sə gàʼà, ko ndiʼ la vəwenə gaʼà li kənyʉ̀ kə byɨkə kətsenkə fa nyʉ̀ a mà tə nkwòʼtə̀ la ghə̀ nè li.

¹⁹ Vəwenə mbòŋsə̀ soʼo tò nyʉ̀ wenə̀ və Bol byìʼì jì yì a vəwenə ghoʼsə̀ Nyìngòŋ tsu, bènə̀ byìʼì wutsen a ghə̀ mpfʉ li və dzàŋə̀ wen nə̀ Yesò, alì Bol gàʼ la ghə̀ dìʼ to.

²⁰ Mà ki kənyʉ̀ akì kə ghoʼ mo, mà mù bèm à Bol la ghə̀ a kòŋ ədyʉ̀ a Jelusalèm və soʼ nsoʼ wen tsu lo?

²¹ Bol sensə la və ghʉ yi tò a ngə̀ŋ mfɨŋ əzaʼa fa zhʉ a fòn ghoʼo a soʼ nsoʼ wen, mà mù ghʉ wen la kətsi kə vì ə mà tɨm wen à Fòn ghoʼo.”

²² Aglibà gàʼ à Festus la, “Ma kòŋ əzhʉ gaʼa wìʼ ghenə fà mò a ngeŋ.” Festus bwènsə̀ à wen la, “Wù lu zhʉ gaʼa wen a boʼòngə̀ŋ.”

²³ Tʉʼ layn, Aglibà wenə̀ Beniys vì nə̀ adɨŋə, ə̀ kwen ə̀ ŋwʉʼʉ a ngə̀ŋ ghoʼo yì a viʼi mvì zhùŋtə̀ tsu. Ghə̀ mvi wenə̀ tʉtʉ vəsugyèʼ vəghoʼkəvə bènə̀ viʼi və ghoʼkəvə a və ndìʼ a ntə̀ʼ ayì. Festus gàʼ və dyʉ̀ lyɨ̀ Bol vì nə̀ wen.

²⁴ Festus mù gàʼ la, “Fòn Aglibà bènə̀ viʼi vətsèm a və diʼì a shèn ghə̀ŋ yen a. Ghèn dìʼ wìʼ a Vəjew no vətsèm, vi a və diʼì a Jelusalèm bènə̀ vi a və diʼì a shə̀ ə gàʼ nyʉ̀ no ghoʼo byìʼì wen. Vəwenə tə zɨmə̀ gàʼà la, ghə̀ diʼi pfʉ.

²⁵ Nkàntə̀ mò nki ə nyen la ghə̀ ko nè kənyʉ̀ a kə dìʼì la və diʼi zhwi wen. Ando nkàntə̀ wen tə sènsə la yì a kòŋ əyen fòn ghoʼo, ghə̀ soʼ yi, mà mù ghʉ̀ la ma tɨm wen à fòn,

²⁶ alì kò ma lu nkiʼ no kətʉ kə kənyʉ̀ kə mùʼ ənyòʼ à fòn ghoʼo byìʼì wen. A le kənàʼ kə kənyʉ̀ a ma gaʼà la və vi nə̀ wen à ghə̀ŋ ndi ghə̀ gàʼ no tò à wù a shɨ a Fòyn Aglibà. Vəghəŋ ne soʼ nsoʼ ayì mà mu nkiʼ kənyʉ̀ a mà zì mà nyoʼ,

²⁷ byìʼàndo mà yen li la kə ko bòŋ la mà tɨm wù mfɨŋ, ke tuʼu shə̀ʼtə̀ kənyʉ̀ kì a ghə̀ byɨsə̀.”

« Roimhe

Air adhart »

Lean sinn:

Ceanglaichean taic

Sanasan