Shwèʼ 24 - The New Testament in the Babanki language

Vəjew ghàm Bol

¹ A sə ndiʼ a bàmə mətsi ntàyn, Ananyàs a ndiʼì kətʉ kə tʉtʉ vəpfèm və ngə̀ŋ Nyìngòŋ lù shìʼi a ntə̀ʼ Sisalìyà, wenə̀ vəchəʼ vətsenvə bènə̀ wutsen a ghə̀ nsoʼo nsoʼsə, a və ndzàŋə̀ wen nə̀ Teltulùs. Vəwenə vì a shɨ Felik a ndiʼì Gumnà loʼ aghèn ə̀ shə̀ʼtə̀ ngəʼ vəwenə byìʼì Bol.

² Və dzàŋ Bol, ə kù ji à Teltulùs la ghə̀ gàʼ, ghə̀ mù zìtə̀ sə gàʼà nyʉ̀ venə byìʼì Bol la: “Tì kəbə̀ŋ ə ghoʼo, yès kiʼi li mbwaʼmə̀ no a kəghaf kə dyəkə, byìʼàndo wù soʼo yès nə̀ tofə. Wù ne li nyʉ̀ jùŋvə mvi à yès a loʼ no ghoʼo.

³ Yès ə saŋlə̀ à wù no nkàyn byìʼì nyʉ̀ avenə.

⁴ Mà ko kòŋ əlyɨ zhʉ wu nànto, sə sensə̀ la wù zhʉtə ntemə nyʉ̀ vyi a yès kìʼ əshə̀ʼtə̀ à wù.

⁵ Yès sə tə yèn la wìʼ ghèn dìʼ no wu byɨ fànsə. Ghə̀ moʼò li kəngə̀sə̀ a ntìntìn Vəjew tò a mbì tsèm, be diʼ kətʉ a nòyn mənàŋ mə viʼi Nazalèt.

^6-7 Yès tə ghaʼa wen ghə̀ kəŋə ə byɨsə ngə̀ŋ Nyìngòŋ yes, ənè la kə ghə̀ ndìʼ laynə a shɨ Nyìngòŋ. Yès tə nghʉ la yès a soʼ wen ando soʼ yes ə kəŋə.

⁸ Sə tsen nkàntə̀ wù bèm nyʉ̀ venə à wen, wù be à zhʉ kwʉ̀ʼsə̀ nyʉ̀ tsenəvə vi a yès ə ghàmə̀ wen tsu.”

⁹ Vəjew tsèntə̀ gàʼ tò la, nyʉ̀ vyi a və ghàmə̀ wen tsu diʼ nəmwèʼè no tsèm.

Bol gàʼ ndi gyàmtə̀ wenə wen a shɨ gumnà Felik

¹⁰ Gumnà ayì ku ji à Bol la ghə̀ gàʼ, ghə̀ mù lù gàʼ la, “Mà kɨ li la wù soʼ li loʼ ghenə no a ngwʉ̀ʼsə ghoʼsə, ma sə saŋlə̀ luwèn ə nti à wù a shɨ əgàʼ ndi gyàmtə̀ wen ghomə.

¹¹ Wù zì wù kəŋ ə̀ yèn tò fà wù a ngeŋ la mətsi cho li tò njʉ̀ səbò luwèn ando mà tə kùʼ a Jelusalèm ə ghoʼsə Nyìngòŋ.

¹² Vəwenə ko tə yèn la mà soʼtə̀ nyʉ̀ yo viʼi. Mà ko tə mòʼ kəngə̀sə̀ kətsenkə a ntìntìn viʼi ngə̀ŋ Nyìngòŋ kò a aloʼ ntsèntə̀, kò no fe yi a tì ntə̀ʼ,

¹³ kò andiʼ la vəwenə zì vəwenə diʼ kənyʉ̀ kə mùʼ fa tì nyʉ̀ venə a vəwenə gàʼà byìʼì mò luwèn.

¹⁴ Kənyʉ̀ kì kə mùʼ a mà zì mà byɨmə dìʼ tò la, mà kuʼsə Nyìngòŋ, dzɨ̀mtə̀ Jìsə shì a Bobo kəŋə la viʼi ntsi fa tsu no tè ando vəwenə gàʼà la àdìʼ jisə ndzɨ̀ŋsə. Nyìngòŋ aghèn a mà ghoʼsə̀ lə̀ dìʼ yì a vətìʼ və vəghəŋ nghoʼsə̀ fa mbi. Mà be byɨmə a nyʉ̀ vyi a və nyòʼò a soʼ Mosìs no tsèm bènə̀ vi a və nyòʼò a vəŋwàʼlə̀ və nshə̀ʼtə̀sə səghoʼkəsə.

¹⁵ Mà kìʼ tò ndə̀ŋndəŋ kwòʼtə̀ a vəwenə be kìʼ la Nyìngòŋ lu nè viʼi vəjùŋvə nə̀ vəbyɨvə lu fà pfʉ no vətsèm.

¹⁶ A le kənyʉ̀ a kə ne mà sə mwòmsə no məzhʉ̀ ntsèm nkiʼ ətyɨm ə laynə ghə̀ a shɨ Nyìngòŋ bènə̀ a shɨ viʼi.

¹⁷ “Andìʼ fà bàmə ngwʉ̀ʼsə no səghoʼo a mà ntsi li a kəbəŋ a mà mbwènə̀ vì a Jelusalèm nə̀ ko a və ntɨmə̀ la mà vi kù à viʼi vwomə, be kù à kəku à Nyìngòŋ.

¹⁸ Vəwenə nyèn mo a ngə̀ŋ Nyìngòŋ mu mà sə diʼ mu mà ne li nyʉ̀ avenə ə mè mbe shʉ wen ghomə ndi ndiʼ nə̀ laynə shɨ Nyìngòŋ. Kənyʉ̀ kə nko chò tsu kò andiʼ la nòyn viʼi diʼ tsu.

¹⁹ Andìʼ tò Vəjew vətsenvə a və nlu fa loʼ Asìyà. A zì à bòŋsə vì vəwenə ə̀ tɨ̀mə à wù a shɨ ə gàʼ kənyʉ̀ byìʼì mò a zhʉ a kənyʉ̀ kətsenkə ndiʼì.

²⁰ A bwen a lì, viʼi venə a shèn shə̀ʼtə̀ kənyʉ̀ kì a vəwenə tə yèn la mà byɨsə li ando mà tə gàʼ a shɨ kəbòʼ kə nsoʼ.

²¹ Kənyʉ̀ kə mùʼ a mà ne dìʼ tò la, ando mà ndiʼì a vəwenə a ntìntìn, mà zɨmə ə̀ gàʼ la, ‘Və soʼo mò layn alə̀ byìʼàndo ma byɨmə la viʼi lə̀ lù fà pfʉ.’”

²² Felik dìʼ wìʼ, a ghə̀ nkɨ byìʼì Jìsə shìsə a Bobo nkəŋə la viʼi ntsi fa tsu. Andìʼ ando Vəjew nghàmə̀ Bol, Felik gàʼ la kə və be soʼo nsoʼ ayì bè gàʼ la, yì lu tin nsoʼ ayì a zhʉ a Lysiyas a diʼì kətʉ kə vəsugyèʼ kə ghoʼo kə vì li.

²³ Ghə̀ gàʼ a lì mù chòsə̀ soʼ à kətʉ kə vəsugyèʼ la ghə̀ shwin Bol alì nbo kye wen ghə̀ fʉ jèʼtə̀ bè gàʼ la, kə və à ntàʼsə̀ viʼi ndoŋsə wen la kə vəwenə a vì nku fo vi à wen a ghə̀ kəŋə.

Bol gàʼ à Gumnà ə Felik

²⁴ Mətsi nè chò nshəʼ alə̀, Felik vì wenə̀ wì wen Dlusila, a ndìʼ wu Jus ə tɨm la və dyʉ̀ ə̀ dzàŋ Bol ghə̀ vì. Bol nè vì, vəwenə mù sə zhʉtə̀ ando Bol ngàʼà byìʼì byɨmə à viʼi kiʼì a Yesò Klistò.

²⁵ Bol nè sə gàʼ ə nshə̀ʼtə̀ ando viʼi diʼ ndiʼ kənyʉ̀ kə tɨməkə be ghaʼa təwentə vəwenə, bè shə̀ʼtə̀ ando kətsi kə lu vì a Nyìngòŋ lu soʼ viʼi. Ando ghə̀ ngaʼa kənyʉ̀ akènkə, fàyn ghaʼ Felik, ghə̀ gàʼ la Bol lu a yì ne be dzàŋə wen a zhʉ a yì kiʼi zhʉ.

²⁶ Andìʼ a zhʉ ayì, ghə̀ kwòʼtə̀ la Bol a ku ko à yì, ghə̀ mù sə̀ laʼtə̀ tò alə̀ ghə̀ dzàŋə Bol byìʼì kwòʼtə̀ aghenə wenə̀ wen bèsə̀ nyʉ̀.

²⁷ Ngwʉ̀ʼsə nè chò səbò, Bolsiyùs Festus vì lyɨ̀ kəshi kə Felik a nə̀ gumnà. Felik sə nlù ghʉ̀sə tò Bol a mfɨŋ byìʼàndo ghə̀ nkəŋə la Vəjew nkòŋə̀ wen.