Shwèʼ 23 - The New Testament in the Babanki language

Və vì nə̀ Bol a kəbòʼ kə nsoʼ

¹ Bol ki dyʉ̀sə̀ nə̀ viʼi vi a ntsèntə̀ ayì ə̀ gàʼ à vəwenə la, “Vəlèmə̀ vwomə, mà ko kwòʼò kwoʼ la ntsìnə̀ yì a mà tsi a shɨ Nyìngòŋ ə zaʼa fa layn dìʼ ale lo. Mà kɨ la ghə̀ dìʼ to nkàyn”

² Ananyàs a ndiʼì kətʉ kə vəpfèm və ngə̀ŋ Nyìngòŋ gàʼ à viʼi vyi a və nti boʼsə Bol lì la vəwenə ghom kəvu à wen a chʉ̀.

³ Bol gàʼ à wen la, “Nyìngòŋ be lu ghòm wù ndə̀ŋndəŋ, wù fəfə kə̀ʼə̀ a nə̀ wen ə ngə̀ŋ a və zuʼu! Wù ŋwʉʼ a fì gàʼà la və soʼ mò ando soʼ ə kəŋə, be kwàʼà soʼ ayi tò nkàyntə̀ wù, əgàʼ la və ghom ə chʉ̀ ghomə.”

⁴ Viʼi vi a və nti boʼsə Bol gàʼ à wen la, “Wù telə̀ kətʉ kə vəpfèm və ngə̀ŋ Nyìngòŋ lo?”

⁵ Bol bwènsə̀ gàʼ à vəwenə la, “Vəlèmə̀ vwomə, mà ko yì kɨ̀ la ghə̀ dìʼ alə̀, diʼ kətʉ kə vəpfèm və ngə̀ŋ Nyìngòŋ. Mà tu yi kɨ, mu mà ko yì tè wen byìʼàndo və nyòʼò li a Ŋwàʼlə̀ Nyìngòŋ la, ‘Kə wìʼ lù tè wìʼ a ghə̀ soʼo viʼi wen.’”

⁶ A sə ndiʼ ando Bol nyen li la fa ntìntìn viʼi a və ndìʼ a ntsèntə̀ ayì, vətsenvə ndìʼ Və Falàsi, vətsenvə diʼ Vəsadùsis, ghə̀ mù zɨ̀mə no a gɨ to la, “Vəlèmə̀ vwomə, mà dìʼ alə̀ diʼ wu Falàsi, mu vətìʼ vwomə bè ndìʼ tò Və Falàsi. Və soʼo mò a shèn luwèn byìʼàndo mà byɨmə la Nyìngòŋ lu nè viʼi lu fà pfʉ.”

⁷ Ghə̀ nè gàʼ nyʉ̀ avenə no a zhʉ̀ kò ntaŋ zìtə̀, kəngə̀sə̀ kə bè mù sə̀ diʼ a ntìntìn Və Falàsi bènə̀ Vəsadùsis,

⁸ byìʼàndo Vəsadùsis nko byɨmə la viʼi lu lù fà pfʉ, la kəfo kətsenkə ko diʼ a nə̀ ntsɨŋsə ngə̀ŋ Nyìngòŋ ko a nə̀ kəzhwì, alì Və Falàsi mbyɨmə̀ a nyʉ̀ avenə no tsèm.

⁹ Təzɨmə tə sə gàʼà dyʉ̀ tò nə̀ mbì. Ndìʼsə̀ sə təsoʼ sətsensə a andìʼ viʼi nòyn Və Falàsi mù lù tɨ̀mə sə taŋmə̀ no nə̀ kədyòʼ kə gàʼà la, “Yès ko yèn kənyʉ̀ kə byɨkə kì à wìʼ ghèn ne. A zì a ndiʼ mu à gàʼ kəzhwì kò ntsɨ̀ŋ ngə̀ŋ Nyìngòŋ tsen à wen!.”

¹⁰ Kətʉ kə vəsugyèʼ kə ghoʼo kə kì yen la ntaŋ sə to dyʉ̀ tò nə̀ mbì ghə̀ sə̀ fànə̀ la viʼi a vyi a sàtə Bol tò a kiʼ a kiʼ, ghə̀ gàʼ à vəsugyèʼ vəwen la və shiʼi ə̀ dyʉ̀ lyɨ̀ Bol fʉ̀ nə̀ wen fa tì nòyn ayì ə̀ kwèn nə̀ wen a tì kəbə̀ŋ kə vəsugyèʼ.

¹¹ A nè sə ndiʼ nəntʉʼʉ, Bobo vì tɨ̀mə a mbyɨ̀ Bol ə̀ gàʼ à wen la, “Nkiʼ tyɨm toghə tò a lì! Ando wù tɨmə̀ li a nə̀ wuyenə à mò a shɨ viʼi Jelusalèm, wù diʼ be dyʉ̀ tɨmə tò a lì a shɨ viʼi a Lum.”

Vəjew baʼtə̀ əzhwi Bol

¹² Tʉʼ nè lan, Vəjew vətsenvə tsèntə̀ ghʉ̀ a məkàyn la vəwenə ko be a zhɨ ko nyʉ tè kəfo, kətsenkə ə zaʼa fa zhʉ a vəwenə a zhwi Bol.

¹³ Viʼi avenə a və mbaʼtə̀ kənyʉ̀ akènkə nchò məwum nkàʼ.

¹⁴ Vəwenə mù dyʉ̀ yèn tʉtʉ vəpfèm və ngə̀ŋ Nyìngòŋ bènə̀ vəchəʼ ə̀ gàʼ à vəwenə la, “Yès tsentə̀ li nghʉ a məkàyn la yès ko be ten kəfo à yès a təchʉ̀, a bwen la yès zhwi Bol.

¹⁵ Yès ə̀ kəŋə luwèn la ghə̀ŋ viʼi soʼò nsoʼsə,tɨm ntɨm à kətʉ kə vəsugyèʼ kə ghoʼokə kì gàʼà à wen la və lyɨ Bol ə̀ vì nə̀ wen à ghə̀ŋ, bɨ̀lə̀ ədiʼ la ghə̀ŋ ə kəŋə ə bèmtə̀ mənyʉ̀lə̀ à wen no nkàyn. Və a sə mvì nə̀ wen ə yès zhwi wen kò a ndiʼ la ghə̀ tɨmə̀ zaʼa a shèn.”

¹⁶ Wàyn lèmə̀ Bol, wùwì zhʉ kənyʉ̀ kì a vəwenə mbaʼtə̀ lì ə̀ dyʉ̀ a kəbəŋ kə vəsugyèʼ kì ə̀ shə̀ʼtə̀ à Bol.

¹⁷ Bol dzàŋtə̀ kətʉ kə vəsugyèʼ kətsenkə ə̀ gàʼ à wen la, “Lyɨ wàyndyə nkùŋ ghèn ə̀ dyʉ̀ nə̀ wen à kətʉ kə vəsugyèʼ kə ghoʼo kə. Ghə̀ kìʼ kənyʉ̀ əshə̀ʼtə̀ à wen.”

¹⁸ Kətʉ kə vəsugyèʼ akì lyɨ̀ wàyndyə nkùŋ ayì ə̀ dyʉ̀ nə̀ wen à kətʉ kə vəsugyèʼ kə ghoʼokə akì ə̀ gàʼ à wen la, “Wù mfɨŋ yì a zhiʼ wen diʼ Bol lì gàʼ la mà lyɨ̀ wàyndyə nkùŋ ghèn ə̀ vì nə̀ wen à wù byìʼàndo ghə̀ kìʼ kənyʉ̀ əshə̀ʼtə̀ à wù.”

¹⁹ Kətʉ kə vəsugyèʼ kə ghoʼo kə akì ghaʼ kwoŋ wàyn ayi ə̀ gùftə̀ dyʉ̀ nə̀ wen a kəshi kə lyomtəkə ə̀ bèm à wen la, “Wù kəŋə shə̀ʼtə̀ la ghò à mò a?”

²⁰ Ghə̀ gàʼ la, “Vəjew və ghʉ li la à lu ndiʼ a boʼòngə̀ŋ ə vəwenə gàʼ à wù la wù lyɨ Bol ə̀ shìʼi nə̀ wen a kəbòʼ kə nsoʼ, bɨ̀lə̀ diʼ la vəwenə ə kəŋə əbèmtə tò nyʉ à wen.

²¹ Kə a zhʉtə kənyʉ̀ akènkə byìʼàndo vəwenə chò məwum nkàʼ a və a lyòmtə̀ mbvʉ̀tə̀ wen a ji, diʼ a lì mu vəwenə ghʉ li a məkàyn la vəwenə ko ten kəfo a vəwenə a təchʉ̀ ə zaʼa fa zhʉ a vəwenə a zhwi Bol. Vəwenə bvʉ̀tə̀ luwèn əzhwi wen, alì kə̀ʼtə̀ əzhʉ la wù a gàʼ la ghò lo.”

²² Kətʉ kə vəsugyèʼ kə ghoʼokə kì gàʼ à wen la, kə ghə̀ à mwòm əshə̀ʼtə̀ à wìʼ la ghə̀ shəʼtə̀ li kənyʉ̀ a kènkə à wen, mù gàʼ à wen la ghə̀ lu ndyʉ̀.

Və tɨm Bol à Felik a ndiʼì gumnà a Sisalìyà

²³ Kətʉ kə vəsugyèʼ kə ghoʼokə kì dzàŋtə̀ tʉ vəsugyèʼ və wen la vəbò ə̀ gàʼ à vəwenə la, “Ghə̀ŋ lyɨ vəsugyèʼ təghɨ təbò ə boʼsə nə̀ vəsugyèʼ vətsenvə a və nyɨŋə a tʉ nyamsə məwum sòmbo, bènə̀ vi a və soynə nə̀ aghoŋ təghɨ təbò, wenə̀ vəwenə mbvʉ̀tə̀ ədyʉ̀ a Sisalìyà. Vè vəwenə mbaʼtə̀ əlù a təzhʉ abʉ̀muʼ nəntʉʼʉ layn.

²⁴ Ghə̀ŋ ku vəlyəŋ vətsenvə à Bol, ghə̀ njèʼè à yì a tʉ. Ghə̀ŋ mwomsə əjèʼ nə̀ wen to nkàyn ə dyʉ̀ nə̀ wen à gumnà Felik.”

²⁵ Kətʉ kə vəsugyèʼ akì mù nyòʼ nyʉ̀ venə a ŋwàʼlə̀ ə̀ kù la vəwenə dyʉ̀ nə̀ wen, ŋwàʼlə̀ ayì ngàʼà la:

²⁶ “A nyòʼ mò Klodùs Lysiyas, nyoʼ ŋwàʼlə̀ ghèn à wù a Felik Gumnà jùŋə. Mà tɨmə toŋtə à wù.

²⁷ Kə diʼ la Vəjew tə ghàʼ wìʼ ghèn sə kəŋə əzhwi, mà vì kwen a yì a kənyʉ̀ yo vəsugyèʼ vwomə ə̀ bwòŋsə̀ wen ando mà tə zhʉ̀ la ghə̀ dìʼ wù Lum.

²⁸ Mà tə lyɨ̀ wen ə̀ shiʼi nə̀ wen a vəwenə kəbòʼ kə nsoʼ byìʼàndo mà tə nkəŋə əkɨ la və ghaʼa wen mu ghə̀ byɨsə ghò lo.

²⁹ Ando mà tə shìʼi lì, mà bòŋsə̀ yèn la vəwenə gàʼà a nyʉ̀ byìʼì soʼ vəwenə kò a ndiʼ la ghə̀ byɨsə li kənyʉ̀ a zi və zhwi wen kò we wen a mfɨŋ byìʼì kəwenkə.

³⁰ Və nè shə̀ʼtə̀ à mò la və bò baʼtə̀ tò bàʼtə əzhwi wen, mà nyen la kə bòŋ la mà tɨm wen à wù tò luwèn. Ma be gàʼ à viʼi a vyi a və ghàmə̀ wen lì la vəwenə dzɨ̀mtə̀ əvì shə̀ʼtə̀ ngəʼ vəwenə à wù.”

³¹ Kətʉ kə vəsugyèʼ akì zhʉ kənyʉ̀ kì a kətʉ kə vəwenə yì gàʼ ə̀ lyɨ̀ Bol tò nəntʉʼʉ ayì vəwenə jèʼ ə̀ dyʉ̀ zaʼa a Antibatlìs.

³² Tʉʼ lan, vəsugyèʼ vi a və njèʼè a kəghʉ̀ lì bwènə̀ pfwo. Bol lù sə̀ dyʉ̀ wenə̀ vi a və njèʼè a tʉ vəlyəŋ lì.

³³ Vəwenə lyɨ̀ wen wenə̀ vəwenə dyʉ̀ zaʼa a Sisalìyà ə̀ ku wen à gumnà ə boʼsə nə̀ ŋwàʼlə̀ yì a və tə kù à vəwenə lì.

³⁴ Gumnà ayì dzàŋ ŋwàʼlə̀ ayì ə̀ bèm à Bol la ghə̀ lù fa loʼ kò lo? A nè sə ndiʼ ando ghə̀ nzhʉ̀ la Bol lù fa loʼ Silisiyà,

³⁵ ghə̀ gàʼ à wen la, “Mà lu zhʉ nsoʼ wù a zhʉ a viʼi vyi a və ghàmə̀ wù lì vi li.” Ghə̀ gàʼ a lì mù gàʼ la vəsugyèʼ vəwen lyɨ Bol ə̀ dyʉ̀ ghʉ̀ a ntuʼ yì a Helòd mbwomə.