Shwèʼ 21 - The New Testament in the Babanki language

Bol dyʉ̀ a Jelusalèm

¹ Yès ghʉsə viʼi Efesùs vi ə̀ dyàŋ dyʉ̀ tò fəchìʼ a ntə̀ʼ Cos. Tʉʼ layn, yès dyʉ̀ a ntə̀ʼ Lodes, nè lù fà tsu ə̀ dyʉ̀ a ntə̀ʼ Batalà.

² Andìʼ ando yès ndìʼ tsu, yès yen kəbaŋ kə a mù a kə ndyʉ̀ a loʼ Fònisiya ə kwèn tsu ə lù.

³ Yès nè jèʼ no alə̀ dyʉ̀ zaʼa a kəshi kətsenkə sə ki dyʉ̀sə̀ yèn loʼ Saybùs, alì shiʼi ə̀ dyʉ̀ jì fa loʼ Sylia. Kəbaŋ kə a mù akì kə vì tɨ̀mə a ntə̀ʼ Tayà andiʼ kəshi a və ndiʼ shìsə̀ fo tsu, yès mù fʉ̀ tsu.

⁴ Andìʼ tsu, yès kəŋ ə̀ yèn viʼi vəbyɨməvə vətsenvə tsu yo vəwenə tsi mətsi sòmbo. Kəzhwì kə ŋwòʼəkə nè vəwenə shə̀ʼtə̀ à Bol la kə ko bòŋ la ghə̀ be dyʉ̀ a Jelusalèm.

⁵ Andìʼ ando yès ntsìtə li kwʉ̀ʼ, mù sə kəŋə əlù, vəwenə fʉ̀kə̀ no vətsèm wenə̀ ki vəwenə nə̀ vunə ə̀ vì ətensə yes a chʉ̀ a mù, yo vəwenə gwʉ̀ʼtə alwi yo vəwenə tsu ə̀ jɨ̀m.

⁶ Yo vəwenə nè tòŋtə mè yès kwen a kəbaŋ kə a mù ə̀ lù, vəwenə mù bwènə̀ sə pfwo.

⁷ Yès lù fa ntə̀ʼ Tayà ə̀ jèʼ tò alə̀ ə̀ dyʉ̀ fʉ̀ a ntə̀ʼ Bolemyas ə̀ ghayntə viʼi vəbyɨməvə vətsenvə tsu yo vəwenə tsi

⁸ Tʉʼ lan, yès lù dyʉ̀ a Sisalìyà ə̀ dyʉ̀ kwèn a ngə̀ŋ wutsen a ghə̀ nshə̀ʼtə̀ ntɨm jùŋ Nyìngòŋ, zhiʼ wen diʼ Filib bè tsì tsu. Ghə̀ ndìʼ wìʼ muʼ fa ntìntìn viʼi vyi a və ntsuʼù a Jelusalèm lì.

⁹ Ghə̀ nkìʼ vunə ki wen vəkàʼ kò andìʼ la vəwenə tɨmə làmkə. Vəwenə nshə̀ʼtə̀ dyʉ̀ nə̀ gaʼa Nyìngòŋ.

¹⁰ Yes tsìtə tsu no mətsi alə̀. Nshə̀ʼtə̀ ghoʼo tsen lù fa Judiyà ə̀ vì tsu, zhiʼ wen diʼ Agabus.

¹¹ Ghə̀ vì shì kətəŋ kə Bol ə̀ kwìʼ aghʉ wen nə̀ avu wen tsu tò fà wen a ngə̀ŋ ə̀ gàʼ la, “Kəzhwì kə ŋwòʼəkə gàʼ la, a lè ando Vəjew vi a və diʼì a Jelusalèm ne kwiʼ wìʼ yì a ghə̀ kiʼì kətəŋ kènkə ə ku wen à tɨmə.”

¹² Yo viʼi vyi a və ndiʼì tsu nè zhʉ̀ kənyʉ̀ akènkə ə̀ sènsə Bol la kə ghə̀ be à kùʼ a Jelusalèm,

¹³ alì Bol bwènsə̀ gàʼ la, “Ghə̀ŋ ə nè ghò lə̀? Byìʼì ghò a ghə̀ŋ ə ku ngəʼ à mò a tyɨm a? Mà ko kə̀ʼtə̀ ə və kwiʼ mò tò kwiʼi a Jelusalèm, mà kə̀ʼtə̀ əpfʉ tè pfʉ byìʼì Bobo Yesò.”

¹⁴ Yès yen mè la yès zì kò yès ə lə̀ kwitə kwòʼtə̀ wen mù ghʉsə ə̀ gàʼ la, “A nè nchò tè ghò nə̀ wù, kə nchò ando Bobo kəŋə.”

¹⁵ Yès bè tsìtə tsu mù bàʼtə fo vyesə ə̀ lù kùʼ a Jelusalèm.

¹⁶ Yo viʼi vəbyɨməvə vətsenvə ndyʉ̀ tsu a muʼu mù və lù fa Sisalìyà. Vəwenə lyɨ̀ yès yo vəwenə dyʉ̀ tsì a ngə̀ŋ wù Saybùs tsen, zhiʼ wen diʼ Mnasòn, a andiʼì wu byɨmə no fà kəghaf.

Bol dyʉ̀ ghayntə Jems

¹⁷ Yès dyʉ̀ zaʼa a Jelusalèm, viʼi vəbyɨməvə shisə yes tsu nə̀ saŋlə ghə̀.

¹⁸ Tʉʼ layn, yo və Bol dyʉ̀ yèn Jems ali vəchəʼ və viʼi və byɨməvə.

¹⁹ Bol toŋtə vəwenə ə̀ shə̀ʼtə̀ no nyʉ̀ tsèm a Nyìngòŋ ə ne à viʼi tɨm əchò fà wen a shwèʼ.

²⁰ Vəwenə zhʉ nyʉ̀ avenə sə ghoʼsə̀ Nyìngòŋ mù gàʼ à Bol la, “wu zi wu yen la ngwaʼ və Jus a və zi ko və lu taŋ əbyɨmə li be ghʉ soʼ Mosìs no nkayn.

²¹ Və shəʼtə̀ li à vəwenə la wu ziʼì Vəjew a və tsi a təloʼ tə tɨm la kə vəwenə nghʉ təsoʼ tì a Mosìs ə vì nə̀ təwentə, mbe shə̀ʼtə̀ la wù gàʼà la kə vəwenə a nshyə ndyə̀ tə vunə vəwenə, la wù tensə̀ nyʉ̀ vyi a ntsìnə̀ Vəjew ə kəŋə.

²² Vəwenə a zhʉ la wù vi li. Yès zì yès nè ale?

²³ Viʼi diʼ a shə̀ vəkàʼ a və ghʉ li kənyʉ̀ a məkàyn wenə̀ və Nyìngòŋ. Ne tò kənyʉ̀ a yès a gàʼ la wù ne

²⁴ Wù a lyɨ̀ vəwenə wenə̀ və wenə dyʉ̀ shʉ̀ təwen təŋtə ndi nlaynə a shɨ Nyìngòŋ, wù loʼ no ghò yì a vəwenə ndiʼ lòʼ ndi və kom tʉ vəwenə. Wù sətsèn nè a lì, və à yèn nəmwèʼè la no tè ghò a və tə ngàʼà byìʼì wù dìʼi ndzɨ̀ŋ byìʼàndo no nkàntə̀ wù ə̀ ghʉ soʼ Mosìs.

²⁵ Yes ntɨm li ŋwàʼlə̀ à viʼi tɨm vi a və sə diʼ viʼi vəbyɨməvə la, yès ghʉ li la kə wìʼ fà tsu a nzhɨ kəfo a kə sə diʼ mu və moʼò li a nə̀ kəku à vənyìngòŋ, bè gàʼ la kə vəwenə a nlo mənlyuŋ kò pfiʼ nyàm a və sɨŋsə̀ sɨŋsə, bènə̀ la kə wìʼ fa tsu lù tsì nə̀ wùwì kò nə̀ wulɨm a ko diʼ ghə̀ wen.”

²⁶ Tʉʼ layn, Bol lyɨ̀ viʼi a vyi wenə̀ vəwenə dyʉ̀ shʉ̀ təwen tə vəwenə, ghə̀ mù lù dyʉ̀ kwèn a ngə̀ŋ Nyìngòŋ ə̀ shə̀ʼtə̀ mətsi mì a vəwenə ndìʼi ne mwètə̀ ə shʉ̀ təwen tə vəwenə, bè shə̀ʼtə̀ zhʉ yi a no ndò fà vəwenə a ntìntìn ndiʼ ne ku kəku kə wen ando soʼ ndìʼì.

Viʼi Lum ghaʼ Bol a ngə̀ŋ Nyìngòŋ

²⁷ Andìʼ ando mətsi a mì sòmbo nsə mè dyʉ̀, Vəjew vətsenvə mu lù fa loʼ Asìyà yen Bol a ngə̀ŋ Nyìngòŋ ə̀ nè ngəʼ zìtə̀ a tì nòyn viʼi vi, vəwenə ghaʼ Bol,

²⁸ mù sə zɨmə gàʼà la, “Wo viʼi Islel, ghə̀ŋ gyàmtə̀! Ghèn dìʼ wìʼ yì a ghə̀ jèʼè ziʼì nyʉ̀ byɨvə byìʼì viʼi Islel nə̀ soʼ Mosìs bènə̀ ngə̀ŋ Nyìngòŋ ghèn. A sə diʼ luwèn, ghə̀ be nlyɨ̀ viʼi tɨm ə̀ nkwen wenə̀ vəwenə a ngə̀ŋ Nyìngòŋ, sə mbyɨ shi nè la kə və ndiʼ ŋwoʼo.”

²⁹ Vəwenə ngàʼà a lì byìʼ ando vəwenə nyen li Bol a tì ntə̀ʼ wenə̀ wù Efesùs tsen a və ndzàŋə̀ wen nə̀ Tlophimùs mù sə̀ kwòʼò tò la Bol lyɨ̀ li wen, wenə̀ wen nkwen a tì ngə̀ŋ Nyìngòŋ.

³⁰ Ngəʼ mù zì tò shì tsèm a ntə̀ʼ, viʼi shen ə̀ dyʉ̀ ghaʼ Bol ə̀ gùf fʉ̀ nə̀ wen fa tì ngə̀ŋ Nyìngòŋ ə̀ chiʼtə təchʉ̀ ti.

³¹ A nè sə ndiʼ ando nòyn ayi ə̀ mwòmsə əzhwi Bol, və tɨm la və dyʉ̀ ə̀ shə̀ʼtə̀ à kətʉ kə vəsugyèʼ kə ghoʼokə viʼi Lum la Jelusalèm lɨmə la bèm.

³² Ghə̀ nè zhʉ̀ kənyʉ̀ akì no a zhʉ̀ kò, ə̀ lyɨ̀ vəsugyèʼ bènə̀ tʉtʉ vəsugyèʼ vətsenvə, wenə̀ vəwenə shen shìʼi a kəshi ayì. Viʼi a vyi nè yèn wen tò yenə wenə̀ vəsugyèʼ kò vəwenə bè kùm kəvu a wèn Bol.

³³ Kətʉ kə vəsugyèʼ akì dyʉ̀ à Bol ə̀ gàʼ və ghaʼ wen ə̀ kwìʼi wen nə̀ mpfɨŋsə səbò. Ghə̀ mù bèm à viʼi a vyi la, “Wìʼ ghèn dìʼ ndo? Ghə̀ nè ghò?”

³⁴ Viʼi vətsenvə fa tì nòyn ayì sə zɨmə̀ kənyʉ̀ kə mùʼ, vətsenvə zɨmə̀ gàʼà kə kədyàŋ kə. Kətʉ kə vəsugyèʼ kə ghoʼokə kì yen la kəmfɨŋmə̀ kə diʼ no nànto kò a ndiʼ la ghə̀ zì ghə̀ kɨ la à chò ghò lo. Ghə̀ mù gàʼ la vəsugyèʼ vi lyɨ Bol ə̀ kùʼ nə̀ wen a kəbəŋ vəsugyèʼ.

³⁵ Vəwenə jèʼ ə̀ dyʉ̀ zaʼa a nsəʼsə əkuʼ a kəbəŋ ayì ə̀ tsòʼsə̀ Bol byìʼàndo nòyn a ghə̀ mvì fa bàm mbyɨfə,

³⁶ zɨmə gàʼà tò la, “Və zhwi wen!”

Bol mwòmsə̀ əgàʼ ndi gyàmtə̀ wen ə wen

³⁷ Andìʼ ando və nsə kəŋə əkwen nə̀ Bol a kəbəŋ vəsugyèʼ, ghə̀ bèm à kətʉ kə vəsugyèʼ akì la, “A mà lè zì mà gàʼ kənyʉ̀ à wù a?” Ghə̀ bwènsə̀ gàʼ la, “Wu gaʼa gàʼà Glis a? Gaʼa.

³⁸ Wù lì ko diʼ wù Ijìb yì a ghə̀ nzìtə ngəʼ a shèn ə̀ gùf viʼi à wen a bàm ə zaʼa a nkamsə səkàʼ ə̀ dyʉ̀ nə̀ vəwenə a nse zɨm la vəwenə mfʉ̀ zhwilə̀ viʼi lì.”

³⁹ Bol bwènsə̀ à wen la, “Mà dìʼ wu Jus, mu və mbwì mo a ntə̀ʼ Talsus a loʼ Silisiyà. Mà dìʼ alə̀ mu mà fʉ̀ fa ntə̀ʼ to. Mà lonə la wù ku mo nə̀ jì mà gàʼ à viʼi venə.”

⁴⁰ Kətʉ kə vəsugyèʼ kì ku ji, Bol tɨmə a nsəʼsə əkuʼ a kəbəŋ ayì ə chìʼ viʼi nə̀ kəvu kəwenkə. Vəwenə nè chɨmə mè no a zhʉ̀ kò, ghə̀ gàʼ à vəwenə a gaʼà Hibùlù la: