Shwèʼ 20 - The New Testament in the Babanki language

Bol bwènə̀ dyʉ̀ a Macedonia bè chò dyʉ̀ a Glis

¹ Andìʼ ando ngəʼ yì me li, Bol dzàŋtə̀ viʼi vəbyɨməvə vi ə̀ gàʼ əgàʼ à vəwenə ətomsə nè la byɨmə vəwenə nto mù gàʼ à vəwenə la vəwenə faŋ tò a nkàyn. Ghə̀ gàʼ a lì lù dyʉ̀ a Macedonia.

² Ghə̀ jèʼ chò fa shyə ayì ziʼì dyʉ̀ nə̀ viʼi no vəghoʼo nè la byɨmə vəwenə nto mù chò dyʉ̀ zaʼa a Glis,

³ ə tsi tsu vəsàŋ vətaʼ. A sə ndiʼ ando ghə̀ mbaʼtə̀ ədyʉ̀ a Sylia, ghə̀ zhʉ la Vəjew mbaʼtə əzhwi wen, ghə̀ mù ghʉ̀ la ghə̀ a bwènə̀ dyʉ̀ chò ji fa Macedonia.

⁴ Ghə̀ njèʼè wenə Sobatel wàyn Ballùs fa Belì, nə̀ Alistakùs nə̀ Sekundùs a vəwenə nlu fa Tèsàlonikà nə̀ Gayòs a ghə̀ nlu fa Delbə̀, nə̀ Tychicùs, nə̀ Tlophimùs a vəwenə nlu fa loʼ Asìyà bènə̀ Timotì.

⁵ Andìʼ ando və nsə ndyʉ̀ a jèʼ ayì, viʼi venə dyʉ̀ a mbì sə kə̀ʼtə̀ yès a ntə̀ʼ Tuwas.

⁶ Yès dyʉ̀ zaʼa a Fìlìbày. Mətsi mì a və nzhɨ kəbayn kènə̀ fəshɨ̀ŋ fə tsu ne chò, yès kwen a nkànuʼ ə̀ lyɨ̀ mətsì ntàyn əjèʼ kwetə vəwenə a Tuwas, yo vəwenə tsi tsu ə woŋ mpfen.

Bol dyʉ̀ kənchiʼ bàm kə ghayn wen a Tuwas

⁷ A nè sə ndiʼ a kəlyɨŋ kə zhʉ mpfwomə a mbì kətsi a woŋ, yès tsèntə̀ əzhɨ, Bol zìtə̀ sə ziʼì viʼi, ə̀ ziʼi tò ziʼi ə zaʼa a ntìntìn nəntʉʼʉ byìʼàndo tʉʼ ndiʼ layn ghə̀ lu.

⁸ Andìʼ a tì ngə̀ŋ kàŋ yì a yès ntsèntə̀ tsu, nkɨsə ndìʼ tsu no səghoʼo.

⁹ Wàyndyə nkùŋ tsen kuʼ ə̀ ŋwʉʼʉ a chʉ wundù, zhiʼ wen diʼ Eutychus. Bol sə nziʼi, mbəynsə ku wen, ghə̀ bʉnə alə̀ ə lù fa tsu ə̀ shiʼi fə̀ŋ a nse. Viʼi shiʼi ə̀ tsòʼsə̀ wen sə lye mu ghə̀ pfʉ li.

¹⁰ Bol shìʼi ə̀ dyʉ̀ làŋtə ə̀ tsòʼsə̀ wen ə̀ gàʼ la, “Kə ghə̀ŋ be a dì, ghə̀ bò diʼ tò to.”

¹¹ Fa yì a bàm Bol wenə̀ viʼi wen bwènə̀ kuʼ a tì ngə̀ŋ yì ə̀ tsèntə̀ zhɨ ntaʼ Bobo. Bol be zìtə̀ sə ziʼì vəwenə tò ziʼi tʉʼ kaʼa layn ghə̀ mù lù.

¹² Vəwenə lyɨ̀ wàyndyə nkùŋ yì, wenə̀ vəwenə pfwo, ghə̀ bò diʼ tò to. Kənyʉ̀ akì nè tətyɨm tə vəwenə tə mu zhʉtə no a nkàyn.

Bol lù fà Tuwas ə̀ dyʉ̀ a Miletùs

¹³ Yès lù kwèn a nkànuʼ ə̀ dyʉ̀ a mbì a Assos, andiʼ kəshi a yès ndiʼ lyɨ̀ Bol fa tsu. Ghə̀ ngàʼa la yès ne a lì byìʼàndo ghə̀ nlù dyʉ̀ tsu fa ji.

¹⁴ Ghə̀ nè vì yèn yès tsu, yo vəwenə kwen a nkànuʼ ə̀ tɨm ə̀ dyʉ̀ a ntə̀ʼ Mitìlìn.

¹⁵ Yes dyʉ̀ zaʼa tsu bè kwèn a nkànuʼ ə̀ jèʼ no alə̀, a nè sə ndiʼ a kənkùmtə̀ kə kətsi, yès chò loʼ Nyìngòŋ. Tʉʼ nè be sə layn, yès kwen a loʼ Samòs. A bè sə ndiʼ a kənkùmtə̀ kə kətsi, yès dyʉ̀ zaʼa a ntə̀ʼ Miletùs.

¹⁶ Andìʼ a lì mu Bol ghʉ li la yì ko chò ji fa Efesùs byìʼàndo ghə̀ nko kòŋ əle zhʉ a loʼ Asìyà. Ghə̀ nlɨfə a lì ando ghə̀ kəŋə əjèʼ kwen a Jelusalèm mibu kətsi kə Bentekòs kə vi kwʉ̀ʼ.

Bol gàʼ kənchiʼ bàm kə gàʼ à vəchəʼ a Efesùs

¹⁷ Andìʼ ando Bol ndìʼ a Miletùs, ghə̀ tɨm ntɨm à vəchəʼ və viʼi vəbyɨməvə a Efesùs la vəwenə vì ə̀ yenə wen.

¹⁸ Vəwenə nè vì ghə̀ gàʼ à vəwenə la, Ghə̀ŋ kɨ li ando mà ntsi bè shwèʼ à ghə̀ŋ a ntìntìn tò fa mbì kətsì ando mà mvi a loʼ Asìyà.

¹⁹ No tè ando Vəjew vətsenvə mbaʼtə̀ nyʉ̀ byɨvə byìʼì mò, be ku ngəʼ à mò nè la mà ndì. Mà tə nè shwèʼ ə ghomə to nə̀ wù shwèʼ Bobo be gumlə̀ viʼi tò məzhʉ̀ ntsèm.

²⁰ Ghə̀ŋ ə kɨ la ma ko tə sə nziʼì ghə̀ŋ a ntìntìn viʼi ko à ghə̀ŋ a aloʼ ə̀ lyòmtə̀ no tè kənyʉ̀ kə tyetəkə kətsenkə a kə nzì kə gyàmtə̀ ghə̀ŋ.

²¹ Mà tə mpfàntə̀ Vəjew wenə̀ viʼi tɨm la vəwenə kwitə tətyɨm tə vəwenə fà vəwenə mbyɨsə ə̀ bwènə̀ vì à Nyìngòŋ, ə̀ byɨmə à Bobo vəghəŋ Yesò Klistò.

²² Mà dyʉ̀ a Jelusalèm byìʼàndo Kəzhwì kə ŋwòʼəkə nkə̀ŋ la mà dyʉ̀ tsu ko ndiʼ la, mà kɨ la a ndyʉ̀ ə fʉ̀ gho nə̀ mò tsu lo,

²³ alì kənyʉ̀ a mà nkɨ dìʼ tò la ando Kəzhwì kə ŋwòʼəkə diʼì li me à mò no a ntə̀ʼ ko a mà chò fa tsu, la mà dìʼ wù mfɨŋ ngəʼsə be kə̀ʼtə̀ mò tsu.

²⁴ A kòŋ à cho tè ghò nə̀ mò, mà diʼi myètə shwèʼ yi a Bobo Yesò tə kù la mà ə nè. Shyèʼ ayi diʼ la mà shə̀ʼtə̀ ntɨm jùŋ byìʼì boŋə tyɨmə a Nyìngòŋ kìʼ a viʼi.

²⁵ Ghə̀ŋ kɨ li la mà tə njèʼè fà ghə̀ŋ a ntìntìn shə̀ʼtə̀ kənyʉ̀ byìʼì kəshi kə fòn Nyìngòŋ. Ma sə gàʼà à ghə̀ŋ luwèn la ghə̀ŋ ko lu be yen mo no mpfen.

²⁶ Mà gàʼà nəmwèʼè à ghə̀ŋ layn ghèn la, wìʼ fà ghə̀ŋ sətsèn be lè jì ko à be à ndiʼ nsoʼ ghom,

²⁷ byìʼàndo ma ko tə lyòmtə̀ kənyʉ̀ fa ghə̀ŋ byìʼì kənyʉ̀ kì a Nyìngòŋ ə baʼtə̀ ənè.

²⁸ Ghə̀ŋ ntùʼmə̀ nə̀ təwen təŋtə bè tùʼmə̀ nə̀ viʼi vi a Kəzhwì kə ŋwòʼəkə ghʉ li à ghə̀ŋ a ti. Ghə̀ŋ ndiʼ ntùʼmə̀sə ntsèntə̀ viʼi vəbyɨməvə Nyìngòŋ a ghə̀ nè à sə diʼ ntsèntə̀ viʼi wen ə chò fa pfʉ Wàyn wen.

²⁹ Mà kɨ li la ma lù no a zhʉ kò viʼi vì ə̀ kwèn à ghə̀ŋ a ntìntìn to nə̀ nyamsə bo ə sàs viʼi vəbyɨməvə avenə,

³⁰ Zhʉ ne vì a viʼi ne fʉ̀ tò fà ghə̀ŋ a ntìntìn nzhò ndzɨ̀ŋsə, gùfə̀ viʼi vəbyɨməvə la və dzɨ̀mtə̀ vəwenə.

³¹ Ghə̀ŋ ntùʼmə̀ lì be kwòʼtə̀ ando mà tə nziʼì ghə̀ŋ nə̀nchwì bènə̀ nəntʉʼʉ a tì ngwʉ̀ʼsə sènsə sətaʼ nə̀ məshɨ à mò ashɨ la ghə̀ŋ tuʼù kɨ̀ Nyìngòŋ.

³² A nə̀ luwèn mà ku li ghə̀ŋ a kəvu Nyìngòŋ nə̀ Ntɨm jùŋ byìʼì boŋə tyɨmə wen, a ghə̀ kiʼì à viʼi a ntùʼmə̀ nə̀ ghə̀ŋ. Nyìngòŋ a ngyàmtə̀ ghə̀ŋ, bwaʼsə̀ ghə̀ŋ nə̀ fo jùŋvə vi a ghə̀ ghʉ̀ tò à viʼi wen no vətsèm.

³³ Mà nko tɨmə̀ shɨ̀m ko wìʼ kò ndisə wen.

³⁴ Nkàntə̀ ghə̀ŋ ə kɨ la no ghò yì a yo viʼi vwomə tə nkiʼ dìʼ mu à tə shwèʼ tò mò nə̀ avu à ghomə.

³⁵ Ma diʼì li à ghə̀ŋ tò a jisə a jisə la ghə̀ŋ diʼi nshwèʼè nə̀ kədyoʼkə to nə̀ mò ndi vəghəŋ ngyàmtə̀ viʼi a və bwaʼa. Vəghəŋ sə ngyàmtə̀ a lì, vəghəŋ nkwòʼtə̀ kənyʉ̀ kì a Bobo vəghəŋ Yesò ngaʼà tò nkàntə̀ wen la, Saŋlə diʼ à wìʼ yì a ghə̀ ku chò ando ghə̀ diʼ à wìʼ yì a ghə̀ shi tò shi.

³⁶ Bol nè gàʼ mwètə̀, wenə̀ vəwenə shiʼi à vəwenə a nchiʼsə alwi ə̀ jɨ̀m.

³⁷ Vəwenə zìtə̀ no vətsèm sə dì bwamtə wen gàʼà la ghə̀ jèʼ to a nkàyn.

³⁸ Vəwenə ngàʼà tè a lì ko vəwenə lu nsaŋlə̀ byìʼì kənyʉ̀ kì a ghə̀ ngaʼà la vəwenə ko be lu yenə wen. Vəwenə lyɨ̀ wen ə̀ dyʉ̀ wè a nkànuʼ.