Shwèʼ 2 - The New Testament in the Babanki language

Məvì kəzhwì kə ŋwoʼəkə

¹ Andìʼ ando kətsi kə ghoʼokə a və ndzàŋə̀ nə̀ Bentakòs mvi, viʼi vəbyɨməvə tsèntə̀ a kəshi kə mùʼ.

² A sətsèn tsen kəfo kətsenkə dèm fa kàŋ to nə̀ fwof ə toghə, shiʼi ə̀ kwèn a ngə̀ŋ yì a vəwenə ndiʼì tsu.

³ Vəwenə mù bvʉ̀tə̀ yèn fo və diʼ to nə̀ kəlwàŋ kə zhìʼ ə̀ gə̀sə̀ dyʉ̀ ŋwʉʼʉ no a kətʉ ndò a ghə̀ ndiʼì tsu.

⁴ Kəzhwì kə Ŋwoʼəkə kwen à vəwenə a tətyɨm ə̀ nè no mə ndò a ghə̀ ndiʼì tsu zìtə̀ sə̀ gàʼà gaʼa Loʼo kədyàŋ ando kəzhwì akì ntensə wen la ghə̀ gàʼ.

⁵ Andìʼ a zhʉ ayì Vəjew diʼ a Jelusalèm a vəwenə mù gumlə Nyìngòŋ mu və lù no fa təloʼ tətsèm a tì mbi.

⁶ Vəwenə nè zhʉ̀ Kəfo ki a kə dèmə li, nòyn viʼi no və ghoʼo tsèntə̀. Vəwenə no və tsèm ndìʼ nə̀ mesə wèn byìʼàndo viʼi və byɨməvə a vyi ngàʼà, no ndò zhʉ tò à wen a gaʼa loʼ.

⁷ Vəwenə sə̀ diʼ nə̀ kanə, təchʉ̀ tə vəwenə bè zɨm byìʼì kənyʉ̀ akì. Vəwenə mù gàʼ la, “Viʼi venə a və gàʼà a shyə̀ lə̀ lù tò fa Galìlì no vətsèm.

⁸ A lè chò ghò mibu no ndò sə zhʉ vəwenə gàʼà tò gaʼa loʼ wen a?

⁹ Vəghəŋ dìʼ a shèn vətsenvə diʼ mu və lù fa shyə Balthia, fa shyə Midìyà nə̀ Elam, fa Mesobotamiyà, fa Judiyà nə̀ Kabadosiyà, fa Bontùs nə̀ fa Asìyà.

¹⁰ Fa Fligiya nə̀ Bamfiliyà, fa Ijìb bènə̀ təshyə tə Libiyà a tə boʼsə Silen. Və Vətsenvə lù fa Lum, adiʼ Vəjew nə̀ viʼi ntɨm vətsenvə vi a və kwitə li vəwenə və mù sə gumlə̀ Nyìngòŋ Vəjew.

¹¹ Vəghəŋ vətsenvə mfʉ mvì fa Klete nə̀ Alebyà. Vəghəŋ ə zhʉ vəwenə gàʼà tò təgàʼ tə təloʼ nə̀ vəghəŋ vi a Nyìngòŋ ne li.”

¹² Vəwenə nè sə̀ bu diʼ nə̀ kanə, kənyʉ̀ a kènkə be ku ngəʼ à vəwenə, kyè mù sə̀ bèmə̀ à kyè la, “Kènkə dìʼì la ghò?”

¹³ Alì viʼi vətsenvə bòŋsə̀ sə̀ chəʼə viʼi avenə gàʼà la, “Vəwenə nyʉ məlʉ̀ʼ mə nghaʼ vəwenə.”

Bità gàʼ à nòyn ə viʼi

¹⁴ Bità ando ghə̀ ndiʼì wenə̀ viʼi ntɨm ə̀ Yesò vətsenvə vi njʉ̀mùʼ mù fʉ̀tə̀ vì ə̀ gàʼ a gɨ to la, “Ghə̀ŋ ə viʼi Jus bènə̀ ghə̀ŋ vi no vətsèm a ghə̀ŋ ə tsi a Jelusalèm, ghə̀ŋ zhʉtə à! Ghə̀ŋ diʼi əkɨ la,

¹⁵ Viʼi venə ko bomə məlʉ̀ʼ ando ghə̀ŋ ə kwòʼtə̀ byìʼàndo luwèn bò bu tò təzhʉ abʉ̀muʼ a boʼòngə̀ŋ.

¹⁶ Kənyʉ̀ akènkə a vəwenə ə nè lə̀ bòŋsə̀ dìʼ kənyʉ̀ a nshə̀ʼtə̀ Jowel ə̀ nlù gàʼa. Ghə̀ nlù gàʼa la,

¹⁷ Nyìngòŋ ə gàʼ a la, ‘A lu ndiʼ a mətsi mə̀ kənsèsə̀, Mà ku kəzhwì komkə à viʼi no vətsèm. Vu vəŋə ə lʉmə nə̀ ki lu nshə̀ʼtə̀ nyʉ̀ à viʼi a Nyìngòŋ ə̀ shə̀ʼtə̀ à vəwenə. Mà lu nè ə mbvòʼò wìʼ ə yèyn nyʉ̀ to sə tsi jòm, be ne jòmsə ə ntsi viʼi vətovə ghə̀ŋ.

¹⁸ Nəmwèʼè, mà lu be ku kəzhwì komkə no te à viʼi shyèʼè mò, lʉmə nə̀ ki a mətsi a mì, vəwenə nshə̀ʼtə̀ nyʉ̀ vyi a mà nshə̀ʼtə̀ à vəwenə.

¹⁹ Mà lu ne nyʉ̀ kanəvə a kàŋ ə be dìʼ chwitə a nse. Viʼi lu yen mənlyuŋ nə̀ zhiʼ bènə̀ mbòʼ fələʼ.

²⁰ A lu ndiʼ a tʉʼ ayì, chʉzhʉ kaʼkə ndiʼ mfɨnə̀, sàŋ be mbò to nə̀ mənlyuŋ. Mibu kətsi kə ghoʼokə kə Bobo kə sə vì.

²¹ A lu ndiʼ a tʉ a nyʉ̀ avenə fʉ̀, Bobo bwòŋsə̀ no ndò a ghə̀ dzàŋə̀ zhiʼ wen’”.

²² Bità gàʼ a lì bè gàʼ la, “Ghə̀ŋ viʼi Islel, ghə̀ŋ tuʼù zhʉtə nyʉ̀ venə a mà kə ə gàʼ lə̀! Yesò ə wù Nazalèt ndìʼ wìʼ a Nyìngòŋ ndiʼì li à ghə̀ŋ a ndayn. Ghə̀ ndìʼì əchò fa nyʉ̀ kanəvə bènə̀ chwitə a ghə̀ nè əchò fà wen ə Yesò à ghə̀ŋ a ntìntìn. Nkàyntə̀ ghə̀ŋ ə kɨ nyʉ̀ avenə.

²³ Və mbaʼlə̀ li Yesò aghèn ando Nyìngòŋ ə̀ nshɨ̀tə̀ li ə̀ ghʉ bè kɨ, ghə̀ŋ zhwi wen a ji la ghə̀ŋ ə̀ nku wen à viʼi ne nyʉ̀ byɨvə. Vəwenə bantə wen a kəntò,

²⁴ alì Nyìngòŋ nè ghə̀ lù fa pfʉ ə̀ bwòŋsə̀ wen fa kədyòʼ kə pfʉ byìʼàndo ji ko ndìʼ a pfʉ nzì ghə̀ lə̀ ghaʼa wen.

²⁵ A diʼ ando fòyn Devìt ə̀ ngaʼà li byìʼì Yesò la, ‘Mà nyenə Bobo Nyìngòŋ à mò a shɨ tò məzhʉ̀ ntsèm, ghə̀ diʼ à mò a shyə kwoŋ toghə, ndi kə no kəfo kətsenkə à nə̀ʼsə̀ mò.

²⁶ Byìʼì kənyʉ̀ akènkə, tyɨm ə̀ ghomə saŋlə̀, mà be ghoʼsə̀ wen nə̀ chʉ̀ ghomə, tè bè a lì, ma ki dyʉ̀sə̀ tò nə̀ kənyʉ̀ kì a ghə̀ lu nè à mò,

²⁷ byìʼàndo wù ko lu kyemə kəzhwì kom la kə faŋ a loʼ viʼi və pfʉkəvə, ko à ndiʼ la wù a ghʉsə bvenə wù shwèʼ nəmwèʼè wù la ghə̀ fwe.

²⁸ Wù diʼì li jisə shyə̀sə à mò a mà zì mà jèʼ fa tsu ndi ndiʼ ə to. Mà ne ndiʼ nə̀ saŋlə ghə̀ byìʼàndo wù dìʼ yowù no məzhʉ̀ ntsèm.’”

²⁹ Bità mù dyʉ̀ mbì əgàʼ la, “Vəlèmə̀ vwomə, mà zì ma gàʼ à ghə̀ŋ no nəmwèʼè byìʼì tìʼ vətìʼ və vəghəŋ ghə̀ mbì ə fòn Devìt la ghə̀ mpfʉ li, və bvɨ̀mə̀ wen, se wen bo sə diʼ əkuʼ əzaʼa lan.

³⁰ Devìt ə̀ ndìʼ nshə̀ʼtə̀ ghoʼo Nyìngòŋ mu Nyìngòŋ nzhɨ li məkàyn wenə̀ wen la ghə̀ lu ŋwʉʼsə wù ngwaʼa ngə̀ŋ wen à wen a kəfwoyn.

³¹ Ghə̀ nyen li kənyʉ̀ kì a Nyìngòŋ ndìʼ ne nè mibu zhʉ yi kuʼ ə̀ kwʉ̀ʼ mù gàʼ kùmə̀ wìʼ yì a Nyìngòŋ ntsuʼ li ə̀ ghʉ la ghə̀ lu lù fa pfʉ la, ‘Nyìngòŋ ko lu kyemə wen a loʼ viʼi vəpfʉkəvə, bvenə ə wen ko lu fwè.’

³² Nyìngòŋ nkye li la Yesò aghèn lu fa pfʉ. Vəghəŋ vətsèm dìʼ viʼi və yenəvə a kənyʉ̀ aghèn.

³³ Ghə̀ mù lyɨ̀ wen ə̀ kùʼsə à wen a shyə kwoŋ ə̀ toghə. Yesò shi kəzhwì kəŋwoʼəkə kì a Tìʼ wen ə̀ nghʉ la ghə̀ lu ku à wen, ə̀ ku kəzhwì akì a ghə̀ŋ ə yenə be zhʉ à yès luwèn.

³⁴ Vəghəŋ kɨ li la fòyn Devìt fa wen a ngə̀ŋ nko kùʼ a kàŋ, alì ə̀ gàʼ la, ‘Bobo Nyìngòŋ ngàʼa à Bobo ghom la, ŋwʉʼmə à mò a shyə kwoŋ ə̀ toghə,

³⁵ Əzaʼa fa zhʉ a mà a ne viʼi kəbàyn ə̀ wù ə ndiʼ ntomsə aghʉ wù.’”

³⁶ “Viʼi Islel no vətsèm diʼi əkɨ nəmwèʼè la Nyìngòŋ ə ne li Yesò ghèn a ghə̀ŋ tə̀ bayntə a kəntò lə̀ sə diʼ Bobo bè diʼ Klistò.”

³⁷ Viʼi avenə nè zhʉ̀ nyʉ̀ vyi a Bità ngàʼà, və sə̀ ku ngəʼ à vəwenə a tətyɨm no nànto. Vəwenə mù bèm à Bità wenə̀ viʼi ntɨm Yesò vətsenvə vi la, “Vəlèmə yès lè zì yès ne ale?”

³⁸ Bità bwènsə̀ gàʼ à vəwenə la, “No ghə̀ŋ vətsèm kwitə tətyɨm tyəŋtə fà ghə̀ŋ a nyʉ̀ byɨvə ə̀ shì mu ə dìʼ la ghə̀ŋ ə byɨmə li a Yesò Klistò ndi Nyìngòŋ lyèsə ku nyʉ̀ byɨvə ghə̀ŋ, ə̀ kù Kəzhwì kə Ŋwoʼəkə kènkə à ghə̀ŋ.

³⁹ Kəzhwì kə Ŋwoʼə kènkə a Nyìngòŋ nghʉ li la ghə̀ lu ku lə̀ ə dìʼ à ghə̀ŋ, nə̀ a vunə vəŋə bènə̀ à viʼi a və diʼì no kəghaf. A dìʼ viʼi vi no vətsèm a Bobo Nyìngòŋ dzàŋə̀ li la və vi à wen.”

⁴⁰ Bità gàʼ a lì bè shə̀ʼtə̀ kùʼ nə̀ nyʉ̀ à viʼi a vyi no ghoʼo bè sə̀ sensə̀ vəwenə gàʼà la, “Ghə̀ŋ gyàmtə̀ tə wen tyəŋtə ndi kə Nyìngòŋ lù ku ngəʼ à ghə̀ŋ ando ghə̀ ndiʼ lu ku à viʼi tətyɨm təbyɨtə a kəlyɨŋ kə luwèn.”

⁴¹ Byìʼì a lì viʼi no vəghoʼo byɨmə gaʼa Bità, və ku mu à vəwenə. Viʼi əzaʼa nkamsə sətaʼ kwʉ̀ʼsə̀ a nòyn viʼi və byɨməvə vi a kətsi akì

⁴² vəwenə bè kù təwen tə vəwenə sə̀ zhʉtə̀ nyʉ̀ vyi a viʼi ntɨm ə̀ Yesò nziʼì gə̀tə̀ no kənyʉ̀ kə kò akì a vəwenə nkiʼi zhɨ be jɨ̀mə̀ tò a kənyʉ̀ kə mùʼ.

Jì a viʼi və byɨməvə ntsi fa tsu

⁴³ Nyìngòŋ nè viʼi ntɨm ə Yesò və sə̀ nè nyʉ̀ kanəvə no ghoʼo, və nè viʼi vətsèm sə̀ diʼ nə̀ kanə.

⁴⁴ Viʼi və byɨməvə vi faŋ ə̀ sə̀ diʼ tò a kənyʉ̀ kə mùʼ be gə̀tə̀ no mə ghò yì a vəwenə nkiʼi à vəwenə a ntìntìn.

⁴⁵ Vəwenə bàʼlə fo vi a vəwenə nkiʼi ə̀ gə̀tə̀ ko yi à viʼi vəbyɨməvə vi a və nko kiʼ.

⁴⁶ Vəwenə vi zhùŋtə̀ à ngə̀ŋ Nyìngòŋ tò mətsì ntsèm. Vəwenə nè fʉ̀, və sə jèʼè zhɨ tò à ngə̀ŋ a ngə̀ŋ be saŋlə̀ a kənyʉ̀ kə mùʼ,

⁴⁷ be ghoʼsə̀ Nyìngòŋ. Viʼi vətsèm sə̀ ki vəwenə, vəwenə kuʼmə tò byìʼì ntsìnə̀ jùŋ yì a vəwenə ntsi. Bobo sə̀ kwʉ̀ʼsə̀ viʼi vi a ghə̀ mbwòŋsə̀ li à vəwenə a nòyn tò mətsì ntsèm.