Shwèʼ 18 - The New Testament in the Babanki language

Bol nè shə̀ʼtə̀ Ntɨm Jùŋ à viʼi Kolìn

¹ Bol nè gàʼà à viʼi Atèns myètə̀ ə̀ lù fà tsu ə̀ dyʉ̀ a ntə̀ʼ Kolìn.

² Andìʼ ando ghə̀ ndyʉ̀ zaʼa tsu ə̀ yèn wu Jus tsen a və mbwi wen a loʼ Bontùs, zhiʼ wen diʼ Akwilà. Ghə̀ diʼ mu ghə̀ kwʉ̀ʼtə̀ mvi tò vi tsu wenə̀ wì wen Blisilyà. Vəwenə nlù fa Lum a loʼ Italì ə̀ vì tsu byìʼàndo fòyn Klodùs ndìʼ mu ghə̀ chòsə̀ li soʼ la Vəjew fʉ fà Lum no vətsèm. Bol lù dyʉ̀ yèn vəwenə,

³ wenə̀ vəwenə sə tsi be tsèntə nè təshyèʼ a muʼu byìʼàndo vəwenə mbe tasə fo tò nə̀ Bol nə̀ gwʉsə nyamsə, shɨ̀tə̀ təto tsu.

⁴ Bol sə dyʉ̀ kwenə a ngə̀ŋ ntsèntə̀ Vəjew tò məntsi mə nzhʉtəmə no ntsèm, soʼtə̀ nyʉ̀ tsu wenə̀ Vəjew bènə̀ viʼi Glis, mwòmsə̀ ənè la vəwenə byɨmə kənyʉ̀ kì a ghə̀ ngàʼà.

⁵ Silàs wenə̀ Timotì nè lù fà Macedonia ə̀ vì a Kolìn. Bol ghʉsə no nyʉ̀ tsèm a ghə̀ ə̀ nè ə sə shə̀ʼtə tò ntɨm jùŋ à Vəjew be dìʼì laynsə̀ à vəwenə la Yesò dìʼ wìʼ yì a Nyìngòŋ tsuʼ li nghʉ.

⁶ Ando vəwenə ntensə kənyʉ̀ kì a ghə̀ ngàʼà be telə̀ wen, ghə̀ bwèn dzèm wen à vəwenə ə̀ gàʼ la, “Ghə̀ŋ sətsèn nè kənyʉ̀ kènkə alə̀, Nyìngòŋ maʼa ghə̀ŋ, mu à diʼi nsoʼ ghə̀ŋ, mu kəvu komkə ko à ndiʼ tsu. Mà lì a ghʉsə ghə̀ŋ luwèn ə̀ dyʉ̀ nshə̀ʼtə̀ ntɨm jùŋ aghèn à viʼi tɨmə.”

⁷ Ghə̀ gàʼ a lì, mù lù ghʉsə Vəjew a vyi ə̀ dyʉ̀ sə tsi a ngə̀ŋ wù kətɨm tsen a zhiʼ wen ndìʼ Titiyòs Justus a ghə̀ mbe gumlə̀ Nyìngòŋ. Ngə̀ŋ wen ndìʼ tò a mbyɨ̀ ngə̀ŋ ntsèntə̀ viʼi Jus.

⁸ Wutsen a andìʼ kətʉ kə ngə̀ŋ ntsèntə̀ akì a zhiʼi wen ndìʼ Klisbùs zhʉ ntɨm jùŋ a ghèn, wenə̀ viʼi ngwaʼa ngə̀ŋ wen, bènə̀ viʼi vətsenvə a Kolìn no və ghoʼo byɨmə à Bobo ə̀ shì mu.

⁹ A sə ndiʼ nəntʉʼʉ a kətsi kətsenkə, kənyʉ̀ kə fʉ̀ a kə̀ʼ Bol a nə̀ jòm, Bobo gàʼ tsu à wen la, “Kə a fwàyn viʼi venə, ngàʼà tò gaʼa à vəwenə,

¹⁰ byìʼàndo mà dìʼ yowù. Wìʼ ko a nè kənyʉ̀ kə byɨkə à wù. Nziʼi tò ziʼi byìʼàndo viʼi vwomə diʼ a ntə̀ʼ a shə̀ no vəghoʼo.”

¹¹ Ando ghə̀ ngaʼà a lì, Bol bè tsì a Kolìn ngwʉʼ mpfen nə̀ kəbyeʼ kə, shə̀ʼtə̀ tò ntɨm ə̀ Nyìngòŋ.

¹² Andìʼ ando və ghʉ̀ Galiyò la ghə̀ nsoʼo shə loʼ ayi a və ndzàŋə̀ nə̀ Akayà, Vəjew vətsenvə tsèntə̀ ghàʼ Bol ə̀ dyʉ̀ nə̀ wen a kəshi kə nsoʼ

¹³ ə̀ dyʉ̀ gàʼ à Galiyò la, “Wìʼ ghèn nè la viʼi ngumlə̀ Nyìngòŋ a ji tsen a soʼo ko byɨmə.”

¹⁴ Ando Bol nkəŋ ŋoʼsə chʉ̀ wen ə gàʼ, Galiyò tin ə̀ gàʼ la, “Ghə̀ŋ zhʉtə a Vəjew! A tu ndiʼ la Bol ghèn kwaʼà li soʼ ko la ghə̀ nè li kənyʉ̀ kə byɨkə kətsenkə, mu mà zhʉtə kənyʉ̀ kì a ghə̀ŋ ə gàʼà.

¹⁵ Ando ghə̀ŋ bòŋsə̀ soʼo nyʉ̀ byìʼì ziʼi tsenghə, nə̀ təzhiʼ tə viʼi bènə̀ soʼo ghə̀ŋ lə̀, à kɨ tò ghə̀ŋ. Mà zì kò mà lə̀ tɨ̀mə ə̀ nsoʼo nki nyʉ̀ à nə̀ venə.”

¹⁶ Ghə̀ gàʼ a lì ə̀ gàʼ la və dzɨ̀mə̀ shìsə̀ Vəjew a vyi fà kəshi kə nsoʼ akì.

¹⁷ Viʼi a vyi ghaʼ Sòstenìs a andiʼì kətʉ a ngə̀ŋ ntsèntə̀ Vəjew ə̀ ghòm wen tò a chʉ̀ kəshi kə nsoʼ ayì alì kò Galiyò lə̀ gàʼ tè kənyʉ̀.

Bol bwènə̀ dyʉ̀ a Antìyòk

¹⁸ Bol bè tsìtə no məntsi alə̀ wenə̀ viʼi vəbyɨməvə a Kolìn ə̀ mù tòŋtə vəwenə ə̀ lù wenə̀ Blisilyà bènə̀ Akwilà fà ntə̀ʼ Senchilì ə̀ dyʉ̀ a loʼ Sylia. Mibu vəwenə sə nkwen a nkanuʼ əlù, mu Bol kom li kətʉ kə wen byìʼàndo ghə̀ ndìʼ mu ghə̀ ghʉ li kənyʉ̀ kətsenkə a məkàyn wenə̀ Nyìngòŋ.

¹⁹ Vəwenə jèʼè ə̀ dyʉ̀ zaʼa a ntə̀ʼ Efesùs, Bol ghʉsə Blisilyà wenə̀ Akwilà ə̀ dyʉ̀ a ngə̀ŋ ntsèntə̀ Vəjew wenə̀ vəwenə sə soʼtə̀ nyʉ̀ tsu.

²⁰ Vəwenə sə̀ sensə̀ Bol la ghə̀ tsìtə wenə̀ vəwenə no məntsi mə ghoʼomə̀, alì ghə̀ tensə.

²¹ Andìʼ ando ghə̀ nlù, ghə̀ gàʼ à vəwenə la, “Mà lu be bwènə̀ vì, a zhʉ a Nyìngòŋ sətsèn kòŋ.” Ghə̀ gàʼ a lì mù lù ə̀ mòʼtə̀ Blisilyà wenə̀ Akwilà a Efesùs.

²² Bol nè dyʉ̀ zaʼa ntə̀ʼ Sisalìyà ə̀ kuʼ dyʉ̀ tòŋtə ntsèntə̀ viʼi vəbyɨməvə a Jelusalèm, ə lù fà tsu bwènə̀ shiʼi fa Antìyòk,

²³ ə̀ tsìtə tsu no alə̀. Ghə̀ nè lù fa tsu ə̀ jèʼè chò fa shì tsèm a Galesìyà bènə̀ Fligiya, gyàmtə̀ dyʉ̀ nə̀ ndzɨ̀mtə̀sə bàm Yesò ndi vəwenə nkiʼ tyɨmə toghə a shi aghèn.

Abolòs shə̀ʼtə̀ Ntɨm Jùŋ a ntə̀ʼ Efesùs bènə̀ a Kolìn

²⁴ Wu Jus tsen lù vì a Efesùs mu ghə̀ kwì a Alèksandìliyà, zhiʼ wen diʼ Abolòs. Ghə̀ nkɨ əgàʼ a ji a no ndò nkòŋ əzhʉtə. Ghə̀ nkɨ nyʉ̀ fa tì Ŋwàʼlə̀ Nyìngòŋ no ghoʼo.

²⁵ Ghə̀ ndìʼ mu ghə̀ bè ziʼi nyʉ̀ byìʼì jisə shìsə a Bobo kəŋ la viʼi ntsi fa tsu, ə sə gàʼà no nə̀ kədyoʼkə, be ziʼi viʼi byìʼì Yesò a ji a ghə̀ ndìʼì la ghə̀ nkɨ kənyʉ̀ a ghə̀ nziʼì. Ghə̀ ntùʼù kɨ tò nyʉ̀ vyi a Joyn wu ku amù nziʼì byìʼì mu mì a ghə̀ nku à viʼi lì.

²⁶ Blisilyà wenə̀ Akwilà nè zhʉ̀ ziʼi yi a ghə̀ nziʼi nə̀ tyɨmə toghə a ngə̀ŋ ntsèntə̀ ə̀ gàʼ la Abolòs vì a vəwenə ngə̀ŋ. Ghə̀ vì, vəwenə shɨ̀tə̀ shə̀ʼtə̀ jì yì a wen a Nyìngòŋ kəŋ la viʼi ntsi fa tsu.

²⁷ A sə ndiʼ ando Abolòs ngàʼà la ghə̀ a kòŋ ətɨmə dyʉ̀ a Akayà, viʼi vəbyɨməvə a Efesùs gyàmtə̀ wen ə̀ nyòʼ ŋwàʼlə̀ à viʼi vəbyɨməvə a Akayà gàʼà la vəwenə shisə wen no a nkàyn. Ghə̀ tɨmə̀ ə̀ dyʉ̀ tsu ə̀ sə ku gyàmtə̀ ghoʼghə à viʼi vyi a və sə ndiʼ mu və byɨmə li byìʼì bòŋə̀ tyɨm ə Nyìngòŋ.

²⁸ Abolòs soʼo nyʉ̀ no a nkàyn, dìʼì laynsə fa Ŋwàʼlə̀ Nyìngòŋ la Yesò dìʼ wen Klistò. No wu Jus muʼ nko bè gàʼ kənyʉ̀ byìʼì ziʼi yi a ghə̀ nziʼì.