Shwèʼ 16 - The New Testament in the Babanki language

Timotì tsèntə̀ Bol nə̀ Silàs wenə̀ vəwenə sə jèʼè a muʼu

¹ Bol wenə̀ Silàs jèʼ ə̀ dyʉ̀ zaʼa Delbə̀ nə̀ Lista. Wu byɨmə tsen ntsi tsu, zhiʼ wen diʼ Timotì, lì wen be diʼ wu byɨmə, a ndìʼ Jus, alì tìʼ wen diʼ wu Glis.

² Viʼi vəbyɨməvə a və ndìʼ a Lista bènə̀ a Ikonùm nkɨ la Timotì kìʼ ntsìnə̀ jùŋə.

³ Bol nkəŋə əlyɨ Timotì wenə̀ wen lu, mù nè la və shɨtə ndyə̀ wen. Ghə̀ ne a lì byìʼàndo Vəjew vi a və ntsi tsu nkɨ la tìʼ Timotì ndìʼ wu Glis.

⁴ Vəwenə mù lù sə jèʼè shə̀ʼtə dyʉ̀ no a ntə̀ʼ ko a vəwenə ndyʉ̀ tsu, təsoʼ tì a viʼi vəbyɨməvə bènə̀ vəchəʼ a Jelusalèm ŋwʉʼʉ li ə̀ ghʉ la viʼi vəbyɨməvə nghʉ. Vəwenə gàʼ à viʼi ntə̀ʼsə ashì la vəwenə ə mwòmsə̀ əghʉ təsoʼ atì.

⁵ Byìʼì alə̀, byɨmə yi a viʼi nkiʼi no a ntsèntə̀ viʼi vəbyɨməvə a ntə̀ʼ ko sə kwi dyʉ̀ tò nə̀ mbì. Viʼi be byɨmə no vəghoʼo tsèntə nòyn ayi tò mətsi tsèm.

Kənyʉ̀ kə fʉ̀ a kə̀ʼ Bol a nə̀ jòm

⁶ Bol wenə̀ viʼi ndoŋsə wen jèʼ dyʉ̀ a Fligiya bènə̀ Gàlesìyà byìʼàndo Kəzhwì kə ŋwòʼəkə nko ghʉ̀sə la vəwenə shə̀ʼtə̀ ntɨm ə jùŋ a loʼ Asìyà.

⁷ Vəwenə nè dyʉ̀ boʼsə a Misìyà sə kəŋə əkuʼ dyʉ̀ ji fa Bitinyà, Kəzhwì kə Yesò kə bè tènsə la kə vəwenə a kùʼ tsu.

⁸ Vəwenə mù shìʼi dyʉ̀ chò jì fa Misìyà ə̀ dyʉ̀ zaʼa a ntə̀ʼ Tuwas.

⁹ A sə ndiʼ nəntʉʼʉ, kənyʉ̀ kə fʉ̀ vì a kə̀ʼ Bol a nə̀ jòm, ghə̀ yen wìʼ mu ghə̀ lù fa Macedonia, ghə̀ ti a wen a shɨ sensə̀ wen gàʼà la, “Dyaŋ ə̀ vì a Macedonia ə̀ gyàmtə̀ yès.”

¹⁰ Fa yì a bàm, yo vəwenə baʼtə̀ tò a zhʉ a yì əlu dyʉ̀ a loʼ Macedonia byìʼàndo yès nyen li la Nyìngòŋ ə kəŋə la yès dyʉ̀ shə̀ʼtə̀ ntɨm jùŋ à loʼ ayì.

Lydiyà kwitə sə diʼ wu byɨmə a Filibày

¹¹ Yès lù fa Tuwas ə̀ kwèn a nkànuʼ ə nàyn tò fəchìʼ a fəloʼtə̀ fə tsenfə a fə ndìʼ a ntìntìn àmù mə ghoʼomə̀ a və ndzàŋə̀ nə̀ Samothlàs. Tʉʼ layn, yès dyʉ̀ a ntə̀ʼ Niyàbolìs,

¹² nè lù fà tsu ə dyʉ̀ a Filibày, a ndiʼì no ntə̀ʼ to a ghə̀ ndiʼì a Macedonia. Nghoʼo viʼi a və ntsi tsu ndìʼ viʼi Lum. Yès tsìtə tsu no mətsi nshəʼ alə̀,

¹³ kətsi kəzhʉtə kə Vəjew nè vì, yès lù fʉ̀ fa ntə̀ʼ ayì ə̀ dyʉ̀ a mbyɨ̀ àmù byìʼàndo yès nkɨ la adìʼ kəshi a Vəjew ndyʉ̀ zhùŋtə̀ tsu jɨ̀mə̀. Yès dyʉ̀ ŋwʉʼʉ tsu sə ziʼi ki vi a və mvì tsu.

¹⁴ Andìʼ a tì ki avenə a və mvì zhùŋtə̀ və sə zhʉtə̀ ando Bol gàʼà lì, wùwì tsen diʼ tsu, a zhiʼ wen ndìʼ Lydiyà mu ghə̀ lù fa ntə̀ʼ Tatiliyà. Ghə̀ nè mbaʼlə̀ nə̀ ndisə a ko yi nto no nànto, a be diʼ wùwì a ghə̀ ngumlə̀ Nyìngòŋ. Bobo bòʼtə̀ kwòʼtə̀ wen la ghə̀ ntùʼù zhʉtə̀ nyʉ̀ vyi a Bol ngàʼà lì ə̀ byɨmə nyʉ̀ a vyi.

¹⁵ Və ku mu à wen bènə̀ à viʼi vi a wenə̀ vəwenə ntsi a muʼu. Ghə̀ mù gàʼ à yès la, “Ghə̀ŋ vi lì ntsi a mò a ngə̀ŋ, ando ghə̀ŋ yen li la mà byɨmə li nəmwèʼè à Bobo lə̀.” Ghə̀ faŋ ə̀ sə̀ sensə̀ yès tò sensə, yès kaʼa dyʉ̀.

Və ghaʼ Bol bènə̀ Silàs ə wè a ngə̀ŋ mfɨŋ

¹⁶ Tʉʼ layn kətsi kətsenkə, yès bè sə ndyʉ̀ a kəshi kə jɨ̀m ə̀ bùmtə̀ wàyn wùwì tsen a ghə̀ nshyèʼè kəkòs à wìʼ. Ghə̀ nkìʼ Kəzhwì kə byɨkə. Kəzhwì kə byɨkə akì nè ghə̀ shə̀ʼtə nyʉ̀ a və lu fʉ̀ à viʼi. Ghə̀ mpfwo nə̀ ko no ghoʼo fà nyʉ̀ a vyi a ghə̀ nshə̀ʼtə̀ à viʼi lì. Ghə̀ mvi ku kò ayi à viʼi a və nkiʼ wen.

¹⁷ Ghə̀ dzɨ̀mtə̀ yo və Bol, zɨmə̀ gàʼà vì tò la, “Viʼi venə diʼ viʼi a və shyèʼè à Nyìngòŋ yì a ghə̀ Ŋaŋtə Chò vənyìngòŋ no vətsèm lì. Vəwenə shə̀ʼtə̀ jì a Nyìngòŋ zì ghə̀ bwoŋsə ghə̀ŋ fa tsu.”

¹⁸ Ghə̀ faŋ sə gàʼà tò alə̀ no mətsi nshə̀ʼ alə̀ tin Bol zìtə̀ əfwi. Bol gàʼ à kəzhwì kə byɨkə akì la, “Ma kàynə à wù a kədyòʼ Yesò Klistò la wù cho fʉ̀ fà wen a wèn.” Kəzhwì kə byɨkə akì fʉ̀ fà wen wèn tò a zhʉ ayì.

¹⁹ Andìʼ a zhʉ a viʼi vyi a və nkìʼ wàyn wùwì ayì nyen li la ghə̀ ko be a shyèʼ ko à vəwenə, vəwenə ghaʼ Bol wenə̀ Silàs ə̀ gùf dyʉ̀ nə̀ vəwenə a kəshi yì a və soʼo viʼi tsu a woŋ.

²⁰ Vəwenə nè vì nə̀ Bol wenə̀ Silàs zaʼa a shɨ viʼi nsoʼ ə̀ gàʼ la, “Viʼi venə diʼ Vəjew a və jèʼè sə̀ʼə̀ ngəʼsə a ntìntìn viʼi ntə̀ʼ vəghəŋ.

²¹ Vəwenə ziʼi la vəghəŋ ə nè nyʉ̀ a soʼ vəghəŋ a nə̀ viʼi Lum ko byɨmə la vəghəŋ nè.”

²² Nòyn viʼi vyi a və ndiʼì tsu feŋ a kətʉ Bol wenə̀ Silàs sə̀ ghòmə̀. Viʼi nsoʼ vi gàʼ, və ghaʼ tsùʼtə ndisə fa Bol nə̀ Silàs, ə ghòmə̀ vəwenə nə̀ mbàŋsə.

²³ Vəsugyèʼ nè ghòm vəwenə no a nkàyn mù dyʉ̀ wè vəwenə a mfɨŋ. Və be gàʼ à wìʼ yì a ghə̀ shyèʼè a mfɨŋ lì la ghə̀ shɨtə̀ shwìn vəwenə no a nkàyn.

²⁴ Wìʼ ayì zhʉ soʼ ayi ə̀ kwen dyʉ̀ shwìn vəwenə no a tì ngə̀ŋ a ngə̀ŋ mfɨŋ ə kùm ghàŋtə̀ afwen vəwenə nə̀ ntemə nkòʼ.

²⁵ A nè sə̀ ndiʼ a ntìntìn nəntʉʼʉ, Bol wenə̀ Silàs sə jɨ̀mə̀, zhɨmə̀ ndzàŋsə à Nyìngòŋ, viʼi mfɨŋ vətsenvə sə zhʉtə̀ nyʉ̀ vyi a vəwenə nzhɨmə gàʼà.

²⁶ A sə laʼtə, nse nə̀ʼ no nəmwèʼè nəmwèʼè, ngə̀ŋ mfɨŋ yì sə kəŋ feŋ. Təchʉ̀ tə aloʼ tə bòʼkə̀ tò a zhʉ ayì no tətsèm, mfɨŋsə shì a və nkwiʼ afwen viʼi mfɨŋ tsu lì zàykə̀ no sətsèm.

²⁷ Wìʼ yì a ghə̀ ntsɨ̀ŋ ngə̀ŋ mfɨŋ ayì shen ə̀ lù yèn mu və bòʼtə̀ li təchʉ̀ tə ngə̀ŋ mfɨŋ yì ə̀ ghʉ̀sə tò təbòʼkə təbòʼkə no tətsèm. Ghə̀ tsuʼ fənyì fə wen sə kəŋ sù wen ə wen tsu kwòʼtə̀ la viʼi ngə̀ŋ mfɨŋ nyɨŋkə li,

²⁸ alì Bol zɨmə ə̀ gàʼ la, “Kə a sù wen ə wù, yès diʼ a shə̀ tò vətsèm.”

²⁹ Wìʼ ayì dzàŋ ə̀ gàʼ la və vi nə̀ nkɨsə. Və vì nə̀ səwensə, ghə̀ kwen dyʉ̀ fə̀ŋ a shɨ Bol wenə̀ Silàs sə tsɨŋtə̀ fa tsu byìʼàndo fàyn nku ngəʼ à wen.

³⁰ Ghə̀ mù lyɨ̀ vəwenə fʉ̀ wenə̀ vəwenə a kəbəŋ ə̀ bèm à vəwenə la, “Vətìʼ, mà lè zì mà nè ghò bu lu kiʼi bwòŋ a?”

³¹ Vəwenə gàʼ à wen la, “Byɨmə à Bobo Yesò, a Nyìngòŋ a bwòŋsə wù wenə̀ viʼi ngə̀ŋ wù no vətsèm.”

³² Vəwenə gàʼ a lì mù shə̀ʼtə̀ ntɨm Bobo à wen wenə̀ viʼi vi a wenə̀ vəwenə ntsi a muʼu.

³³ Tò a zhʉ ayì, wìʼ aghèn lyɨ̀ və Bol ə̀ shʉ̀ shi vəwenə. Və Bol ku mu tò a zhʉ ayì à wen wenə̀ viʼi vyi a və ntsi à wen a ngə̀ŋ.

³⁴ Wìʼ ayì lyɨ̀ Bol wenə̀ Silàs ə̀ dyʉ̀ wenə̀ vəwenə à wen a ngə̀ŋ ə̀ kù kəfo vəwenə zhɨ. Ghə̀ sə saŋlə̀ wenə̀ viʼi wen no nànto byìʼàndo vəwenə nsə̀ diʼ luwèn mu vəwenə byɨmə li à Nyìngòŋ.

³⁵ Tʉʼ nè layn, viʼi a və nsoʼo lì tɨm vəsugyèʼ la və dyʉ̀ ə̀ gàʼ à wìʼ yì a ghə̀ ntsɨ̀ŋə̀ ngə̀ŋ mfɨŋ yì la ghə̀ ghʉsə viʼi vi və ndyʉ̀.

³⁶ Wìʼ ayì shə̀ʼtə̀ à Bol wenə̀ Silàs la və tɨm li ntɨm gàʼà la yì ghʉsə vəwenə, vəwenə ndyʉ̀. Ghə̀ gàʼ a lì mù gàʼ la, “Ghə̀ŋ fʉ lì mpfwo tò nə̀ mbwaʼmə̀.”

³⁷ Bol gàʼ la, “Viʼi a və soʼo ko tə dìʼ la yès byɨsə li kənyʉ̀, alì nè və ghòm yès a shɨ viʼi kò və lə̀ lyɨ̀ la yès dìʼ viʼi Lum! Vəwenə tə nè a lì bè ghàʼ yès ə̀ wè a mfɨŋ,ə sə kəŋə nyoʼtə shìsə̀ luwèn byìʼì ghò? Yès zì ko yès lù fʉ̀. Vəwenə vì tò nkàntə̀ vəwenə ə̀ shìsə̀ yès.”

³⁸ Vəsugyèʼ vi bwènə̀ dyʉ̀ shə̀ʼtə̀ nyʉ̀ a vyi à viʼi nsoʼo nsoʼ lì. Vəwenə nè zhʉ la Bol wenə̀ Silàs dìʼ viʼi Lum, fàyn ghoʼghə vì a vəwenə.

³⁹ Vəwenə lù dyʉ̀ a mfɨŋ yì ə̀ yèn Bol wenə̀ Silàs ə̀ sènsə vəwenə la vəwenə lyèsə kənyʉ̀ akì, mù gàʼ la vəwenə fʉ̀ fà mfɨŋ ayì ə̀ lù fà a ntə̀ʼ ayì.

⁴⁰ Bol wenə̀ Silàs nè fʉ̀ fà mfɨŋ ayì, ə̀ dyʉ̀ a ngə̀ŋ Lydiyà ə yèn viʼi vəbyɨməvə tsu, ə̀ shɨ̀tə̀ gàʼ à vəwenə ndi tomsə vəwenə ə byɨmə vəwenə nto dyʉ̀ tò nə̀ mbì mù lù ə̀ fʉ̀ fa ntə̀ʼ ayì.