Shwèʼ 15 - The New Testament in the Babanki language

Viʼi ntɨm Yesò ghaʼ ntsèntə̀ a Jelusalèm wenə̀ vəchəʼ

¹ Viʼi vətsenvə lù fa loʼ Judiyà ə̀ shìʼi vì a Antìyòk ə zìtə̀ sə ziʼi viʼi vəbyɨməvə tsu gàʼà la, “Və fàŋ ke shɨ̀tə ndyə̀ wù ando soʼ Mosìs gàʼà kò Nyìngòŋ lù bwòŋsə̀ wù.”

² Bol wenə̀ Balnabas kiʼi ntaŋ fànsə wenə̀ viʼi a vyi byìʼì ziʼi aghenə. Və mù tsuʼ Bol wenə̀ Balnabas bènə̀ viʼi vəbyɨməvə vətsenvə fa Antìyòk la vəwenə kuʼ ə̀ dyʉ̀ a Jelusalèm ə̀ yèn viʼi ntɨm Yesò nə̀ vəchəʼ wenə̀ vəwenə bèsə̀ kənyʉ̀ akènkə.

³ Viʼi vəbyɨməvə baʼtə̀ jèʼ aghenə ə dyʉ̀ tènsə vəwenə a ji. Vəwenə dyʉ̀ chò fa loʼ Fònisiya nə̀ Samalìyà shə̀ʼtə à viʼi vəbyɨməvə vətsenvə tsu ando viʼi tɨm vətsenvə kwitə li ntsìnə̀ vəwenə ə̀ byɨmə Yesò. Soʼgho aghèn nè, viʼi vəbyɨməvə no vətsèm sə saŋlə̀ no nànto.

⁴ Vəwenə nè dyʉ̀ zaʼa a Jelusalèm, nòyn viʼi vəbyɨməvə, nə̀ viʼi ntɨm Yesò bènə̀ vəchəʼ shisə vəwenə. Vəwenə shə̀ʼtə̀ à viʼi avenə ando Nyìngòŋ tə ngyàmtə̀ vəwenə, vəwenə nè no tè ghò a vəwenə tə nkəŋə ənè.

⁵ Viʼi vəbyɨməvə vətsenvə, a andìʼ viʼi nòyn Və Falàsi gàʼ la, “Viʼi tɨm vi a və byɨmə lì dìʼi və shɨtə ndyə̀ tə vəwenə, vəwenə bè diʼi byɨmə əghʉ soʼ Mosìs.”

⁶ Viʼi ntɨm Yesò bènə̀ vəchəʼ vi ghaʼ ntsèntə̀ ə lye kənyʉ̀ akènkə.

⁷ Vəwenə nè gùmə̀ a kənyʉ̀ akì zaʼa a kəshi kətsenkə, Bità lù gàʼ la, “Vəlèmə̀ vwomə, ghə̀ŋ ə kɨ nəmwèʼè la Nyìngòŋ ntsuʼ li mò fa ghə̀ŋ a ntìntìn a tʉʼ mbì la mà nshə̀ʼtə̀ ntɨm jùŋ à viʼi tɨm ndi vəwenə zhʉ ə̀ byɨmə à Bobo.

⁸ Nyìngòŋ a ghə̀ kɨ nyʉ̀ tsèm a və diʼì a tyɨm ə̀ no ndò diʼì li a ndayn la viʼi tɨm zì və byɨmə a Bobo a ji la, ghə̀ ne li Kəzhwì kə ŋwòʼəkə mvi à vəwenə ndə̀ŋndəŋ ando kə mvi à vəghəŋ.

⁹ Ghə̀ ndiʼì li la nəkwoŋ ko diʼ à viʼi tɨm fà vəghəŋ a ji la ghə̀ nshʉ li mbyɨsə fà vəwenə a tətyɨm byìʼàndo vəwenə mbyɨmə̀ à Bobo.

¹⁰ Byìʼì ghò a ghə̀ŋ mwòmsə̀ luwèn ənè la tin Nyìngòŋ fwi a? Ghə̀ŋ ə kəŋə la ndzɨ̀mtə̀sə bàm Yesò shìsə byeʼe kəbwèʼè, a vətìʼ və vəghəŋ və mbì ko vəghəŋ nko zì və byeʼe byìʼì ghò?

¹¹ Kə ko diʼ a lì byìʼàndo vəghəŋ ə byɨmə la Nyìngòŋ bwoŋsə̀ li vəghəŋ byìʼì boŋə tyɨm ə Bobo Yesò, ndə̀ŋndəŋ ando ghə̀ be bwòŋsə̀ vəwenə tò a lì.”

¹² Bità gàʼ a lì viʼi vətsèm chiʼ tò la kùʼ. Bol wenə̀ Balnabas shə̀ʼtə̀ chwitə bènə̀ nyʉ̀ kanəvə a Nyìngòŋ tə gyàmtə̀ nè, vəwenə dìʼ à viʼi tɨm.

¹³ Vəwenə nè gàʼ ə̀ mwètə̀, Jems lù tɨ̀mə ə̀ gàʼ la, “Vəlèmə̀ vwomə, ghə̀ŋ zhʉtə mò a!.

¹⁴ Simon gàʼ li laynsə la Nyìngòŋ diʼì li la ghə̀ tùʼmə̀ nə̀ viʼi ə tɨm a ji la ghə̀ tsuʼ li viʼi wen fà vəwenə a ntìntìn.

¹⁵ Nyʉ̀ avenə kwʉ̀ʼʉ̀ tò ndə̀ŋndəŋ ando nshə̀ʼtə̀sə ghoʼkəsə nyòʼo a Ŋwàʼlə̀ Nyìngòŋ la:

¹⁶ ‘Bobo gàʼ la, Mà lu bwènə̀ vì a bàm nyʉ̀ venə ə tsèntə viʼi ngwàʼa ngə̀ŋ Devìt a və ngesə̀ li. No tè ando ghə̀ nsaykə̀ li mè, mà lu nè, ə ghə̀ bwènə̀ vì tsèntə̀,

¹⁷ viʼi vətsenvə vi a àdìʼ viʼi tɨm nkəŋə əyen mo. Viʼi avenə diʼ vi a mà tsuʼ li la vəwenə ndiʼ vwomə.

¹⁸ Ghenə diʼ gaʼa Bobo a ghə̀ ne li la viʼi kɨ nyʉ̀ avenə no fà kəghaf.’”

¹⁹ Jems bè gàʼ la, “Kwòʼtə ghomə diʼ la kə vəghəŋ à ku ngəʼ a viʼi tɨm vi a vəwenə byɨmə li à Nyìngòŋ.

²⁰ Vəghəŋ boŋsə̀ nyòʼ ŋwàʼlə̀ ə̀ shə̀ʼtə̀ a vəwenə la kə vəwenə à zhɨ̀ kəfo a və moʼò li a nə̀ kəku à vənyìngòŋ; la kə vəwenə à ntsi nə̀ ki kò nə̀ lʉmə viʼi, ko əpfiʼ tè nyàm tsen a və sɨŋsə̀ sɨŋsə, ko nyʉ mənlyuŋ.

²¹ A dìʼi nyʉ̀ vyi a Mosìs nziʼì, və sə tsi dzàŋə̀ a aloʼ ntsèntə̀sə tò a ntə̀ʼsə sətsèm a mətsi məzhʉ̀təmə no fà kəghaf.”

Və tɨm ŋwàʼlə̀ à viʼi tɨm vəbyɨməvə vi

²² Viʼi ntɨm Yesò nə̀ vəchəʼ bènə̀ nòyn viʼi vəbyɨməvə vi no tsèm mù ghʉ̀ la vəwenə a tsuʼ viʼi vətsenvə fà vəwenə a ntìntìn ə tɨm wenə̀ və Bol nə̀ Balnabas a Antìyòk. Vəwenə ntsùʼ Silàs wenə̀ Judàs a zhiʼ wen tsenghə ndìʼ Balabas. Vəwenə ndìʼ viʼi, a viʼi vətsèm ngumlə̀ vəwenə.

²³ Və ntɨ̀m vəwenə a Antìyòk nə̀ ŋwàʼlə̀ ghə̀ gàʼà la: Yès viʼi ntɨm Yesò nə̀ vəchəʼ, à diʼì vəlèmə̀ vəŋə ə tɨmə̀ toŋtə à ghə̀ŋ viʼi tɨm vəbyɨməvə vi a və tsi a Antìyòk, nə̀ a loʼ Sylia bènə̀ a Silisiyà.

²⁴ Yès zhʉ li la viʼi vətsenvə fa yès a ntìntìn tə vì gàʼ nyʉ̀, à ghə̀ŋ və sə ku ngəʼ a ghə̀ŋ a tətyɨm. Nyʉ̀ avenə a Vəwenə tə gàʼ lə̀ ko tə gàʼ yès.

²⁵ Yès mu ŋwʉʼʉ ə nyen la kə bòŋ la yès tsuʼ viʼi vətsenvə ə̀ tɨ̀m, vəwenə vì à ghə̀ŋ wenə̀ və Balnabas nə̀ Bol, a diʼ viʼi a yès kòŋə̀ no a nkàyn

²⁶ à bè diʼ viʼi a vəwenə ku li təwen tə vəwenə a shyèʼè Bobo vəghəŋ Yesò Klistò.

²⁷ A lè kənyʉ̀ ki a yès tɨmə̀ Judàs nə̀ Silàs wenə̀ və Balnabas nə̀ Bol. Vəwenə a shə̀ʼtə̀ ndə̀ŋndəŋ kənyʉ̀ à ghə̀ŋ a yès nyòʼò a ŋwàʼlə̀ ghèn nə̀ chʉ.

²⁸ Kəzhwì kə ŋwòʼəkə nè li yès kwòʼtə la yès ko diʼ ku ngəʼ tsen à ghə̀ŋ, əchò tò mənyʉ̀tə mèn a yès ə kəŋə gàʼ la ghə̀ŋ ə nè lə̀,

²⁹ Kə ghə̀ŋ à zhɨ̀ fozhɨvə a və moʼò li a nə̀ kəku à vənyìngòŋ; kə ghə̀ŋ a nyʉ mənlyuŋ kò pfiʼ nyàm a və sɨŋsə̀ sɨŋsə; kə ghə̀ŋ a tsi nə̀ ki ko nə̀ lʉmə, a ko kiʼ ghə̀ŋ. Ghə̀ŋ a ndiʼ tò a nkàyn a zhʉ a ghə̀ŋ sətsèn ghʉ̀ nyʉ̀ venə a yès ə gàʼà lə̀. Ghə̀ŋ faŋ lì.

³⁰ Viʼi avenə a və ntɨmə̀ lə̀ shiʼi dyʉ̀ a Antìyòk ə̀ tsèntə̀ viʼi vəbyɨməvə vi no vətsèm a kəshi kə mùʼ ə̀ kù ŋwàʼlə̀ yì à vəwenə.

³¹ Viʼi vəbyɨməvə a vyi nè dzàŋ ŋwàʼlə̀ ayì mè sə diʼ nə̀ saŋlə ghə̀ no nànto byìʼì nyʉ̀ jùŋvə vi a və nyòʼo tsu ətomsə vəwenə la vəwenə nto à vəwenə a byɨmə.

³² Judàs wenə̀ Silàs, a ndiʼì nshə̀ʼtə̀sə səghoʼkəsə lyɨ̀ zhʉ no alə̀ əshə̀ʼtə̀ ntɨm ə̀ Nyìngòŋ a vəwenə ə be gàʼa nyʉ̀ à və tomsə̀ la vəwenə nto a vəwenə a byɨmə be kiʼ kədyòʼ.

³³ Vəwenə nè tsìtə tsu mətsi no alə̀, və mù bwènsə̀ tènsə la vəwenə pfwo tò nə̀ mbwaʼmə̀. Vəwenə mù bwènə̀ pfwo ə̀ dyʉ̀ yèn viʼi vyi a və ntɨmə̀ vəwenə lì,

³⁴ alì Silàs ghʉ la yì a faŋ tsu.

³⁵ Bol wenə̀ Balnabas be tsìtə no alə̀ a Antìyòk wenə̀ viʼi vətsenvə no vəghoʼo ziʼì viʼi be shə̀ʼtə̀ ntɨm Bobo.

Bol wenə̀ Balnabas gə̀sə̀

³⁶ Mətsi mə tsènə̀ chò, Bol gàʼ à Balnabas la, “Yowù bwènsə̀ jèʼ ə̀ ghayntə vəlèmə̀ və yowù a ntə̀ʼsə shì a yowù dìʼ mu yowù shə̀ʼtə̀ li ntɨm jùŋ tsu byìʼì Bobo ə yen la byɨmə vəwenə bo to dyʉ̀ tò nə̀ mbì lo.”

³⁷ Balnabas sə kəŋə la wenə̀ və Joyn Mak tsèntə jèʼ a muʼu,

³⁸ alì Bol yen la kə ko bòŋ la ghə̀ boʼsə vəwenə byìʼàndo ghə̀ nlu li ghʉ̀sə vəwenə a loʼ ə Bamfiliyà mibu vəwenə myètə̀ shwèʼ yi a vəwenə diʼi nè.

³⁹ Vəwenə zìtə̀ ntaŋ a kəshi ayì no faynsə ə̀ gə̀sə̀. Balnabas lyɨ̀ Joyn Mak wenə̀ wen kwen a kànuʼ ə̀ dyʉ̀ a Saybùs.

⁴⁰ Bol mù tsuʼ Silàs, viʼi vəbyɨməvə jɨ̀m la Nyìngòŋ ntùʼmə̀ à vəwenə, vəwenə mù lù.

⁴¹ Wenə Silàs jèʼ ə chò fa loʼ Sylia nə̀ Silisiyà, jèʼè nè la viʼi vəbyɨməvə tsu nto dyʉ̀ tò nə̀ mbì à vəwenə a byɨmə.