Shwèʼ 14 - The New Testament in the Babanki language

Bol wenə̀ Balnabas shə̀ʼtə̀ Ntɨm Jùŋ a Ikonùm

¹ Bol wenə̀ Balnabas dyʉ̀ a Ikonùm dyʉ̀ kwèn a ngə̀ŋ ntsèntə̀ viʼi Jus tò ando vəwenə ə̀ nè no fe a vəwenə ndyʉ̀, ə̀ ziʼi tsu no a ji kaynə, viʼi Jus nə̀ viʼi tɨm no vəghoʼo byɨmə à Bobo.

² Viʼi Jus vi a vəwenə ntyèn la vəwenə ko byɨmə à Bobo lì zìtə̀ sə bosə̀ viʼi tɨm vi la tinsə vəwenə sə mfwi à wèn viʼi avenə.

³ Byìʼì alə̀, Bol wenə̀ Balnabas tsi tsu no alə̀, gàʼà nyʉ̀ byìʼì Bobo kè nə̀ faynə. Bobo dìʼ la ntɨm yì a vəwenə nziʼi byìʼì boŋə tyɨm Nyìngòŋ ndìʼ nəmwèʼè, ə̀ kù kədyòʼ la vəwenə ndìʼì chwitə be nè nyʉ̀ kanəvə.

⁴ Viʼi vi a və ndìʼ a ntə̀ʼ ayì sə kiʼi kəngə̀sə̀, viʼi vətsenvə tɨmə a bàm viʼi Jus, vətsenvə tɨmə a bàm viʼi ntɨm Yesò vi.

⁵ Viʼi tɨm bènə̀ viʼi Islel vətsenvə, boʼsə nə̀ tʉtʉ vəwenə ghʉ la vəwenə a nyàblə̀ nə̀ viʼi ntɨm vi be temlə vəwenə nə̀ ngùʼsə ə zhwilə.

⁶ Bol wenə̀ Balnabas nè zhʉ̀ kənyʉ̀ akì ə nyɨŋ ə dyʉ̀ a Lista nə̀ Delbə̀, a andìʼ ə ntə̀ʼsə a Likoniya, bènə̀ bene nyɨŋ ədyʉ̀ a məntə̀ʼtə a mə mboʼsə̀ a loʼ a ghèn

⁷ sə shə̀ʼtə̀ dyʉ̀ nə̀ ntɨm jùŋ tsu byìʼì Bobo.

Viʼi ku ngəʼ à Bol wenə̀ Balnabas a Lista

⁸ Wìʼ ndìʼ a ntə̀ʼ Lista a və nsə bwi wen mu afwen wen kwaʼkə li, kèn la ghə̀ ntɨmə̀ jèʼ no fa mpfen.

⁹ Wìʼ aghèn ŋwʉʼʉ sə zhʉtə̀ ando Bol ngàʼà à viʼi. Bol ki wen tò fəchìʼ ə̀ yèn la ghə̀ kìʼ byɨmə mu ghə̀ zì ghə̀ nè ghə̀ to,

¹⁰ ə gàʼ à wen no a gɨ to la, “Lù tɨ̀mə!” Wìʼ ayì saʼ ə lù tɨ̀mə sə jèʼè kaʼa fa tsu.

¹¹ Viʼi nè yèn kənyʉ̀ à Bol nè, ə̀ zìtə̀ sə zɨmə̀ gàʼà a vəwenə a gaʼa loʼ la, “venə diʼ vənyìngòŋ a və lù fa kàŋ, ə̀ mvi à vəghəŋ kə̀ʼə̀ tò nə̀ viʼi!”

¹² Vəwenə chʉ zhiʼ a wèn Balnabas la Zeyùs, ə̀ chʉ̀ ghə̀ Bol la Helmes, byìʼàndo andìʼ wen a ghə̀ ndìʼ wu gàʼa.

¹³ Ngə̀ŋ yì a viʼi ndyʉ̀ ghoʼsə̀ Zeyùs tsu ndìʼ tò a chʉ mbì ntə̀ʼ ayì. Pfèm ngə̀ŋ ayì vì nə̀ təlɨm tə nyamsə mbuluʼ bènə̀ dzudzu la wenə̀ və viʼi vi moʼ kəku tsu à Bol wenə̀ Balnabas a chʉ mbàyn yì a ngə̀ŋ ayì ndiʼì tsu.

¹⁴ Bol wenə̀ Balnabas nè zhʉ̀ kənyʉ̀ akì a viʼi a vyi nkəŋə ənè lì sə bàytə̀ ndisə vəwenə ədìʼ la vəwenə kò kòŋ kənyʉ̀ akì, ə̀ nyɨ̀ŋ kwèn a tì nòyn viʼi vi bèmə̀ la,

¹⁵ “Viʼi ndoŋsə yès, ghə̀ŋ ə nè ghò lə̀? Yès dìʼ viʼi tò nə̀ ghə̀ŋ. Yès ə vì nə̀ ntɨm ə jùŋ à ghə̀ŋ ənè la ghə̀ŋ ghʉsə vənyìngòŋ və ndzɨ̀ŋsə venə ə̀ bwènə̀ vì à Nyìngòŋ a ghə̀ faŋə̀ to ghan ə̀ mùʼ, àdìʼ Nyìngòŋ ghèn a ghə̀ bwomə kàŋ wenə̀ nse, nə̀ mu mə nghoʼo mə̀, bènə̀ no ghò a ghə̀ diʼì a shi avenə.

¹⁶ Andìʼ a mbì, Nyìngòŋ aghèn ghʉsə la no ndò ndyʉ̀ a ji a ghə̀ kòŋə̀,

¹⁷ alì ko ghə̀ lù fàŋ ke dìʼ à viʼi a ndayn nki Nyìngòŋ a ghə̀ dìʼi wen əchò fa nyʉ̀ jùŋ və vi a ghə̀ nè. Ghə̀ nè ghʉ shiʼì fozhɨvə be kwi a təsɨm tò a zhʉ jùŋghə. Ghə̀ ku fozhɨvə à ghə̀ŋ be nè tətyɨm tyəŋtə saŋlə̀.”

¹⁸ Tè gaʼa Bol wenə̀ Balnabas ghenə nko zì ghə̀ taʼsə la kə viʼi vi moʼ kəku à vəwenə.

¹⁹ Vəjew vətsenvə lù vì fa ntə̀ʼ Antìyòk a Bisidiyà nə̀ fa Ikonùm ə bòsə nòyn yi ghə̀ zhʉ tò kənyʉ̀ a vəwenə ngàʼà, mù tèmlə Bol ə̀ gùf fʉ̀ nə̀ wen fà ntə̀ʼ ayì, kwòʼtə̀ la ghə̀ pfʉ li.

²⁰ Ndzɨ̀mtə̀sə bàm Yesò sə nè zhùŋtə̀ kaʼ a wen a mbyɨ̀, ghə̀ lù bwènə̀ kwèn a tì ntə̀ʼ ayì. Tʉʼ layn, ghə̀ lù wenə̀ Balnabas ə̀ dyʉ̀ a ntə̀ʼ Delbə̀.

Bol wenə̀ Balnabas bwènə̀ dyʉ̀ a Antìyòk a loʼ Sylia

²¹ Bol wenə̀ Balnabas shə̀ʼtə̀ ntɨm jùŋ a Delbə̀, viʼi byɨmə sə diʼ ndzɨ̀mtə̀sə bàm Yesò no vəghoʼo. Vəwenə lù ə̀ bwènə̀ dyʉ̀ a Lista ə̀ chò dyʉ̀ a Ikonùm. Fa Ikonùm vəwenə dyʉ̀ zaʼa a Antìyòk a loʼ Bisidiyà,

²² ə tomsə viʼi vəbyɨməvə la vəwenə nghaʼa tyɨmə a vəwenə a byɨmə. Vəwenə bè gàʼ la, “Vəghəŋ diʼi chò fa tì ngəʼsə no sə ghoʼo mibu kwen a kəshi kə fòyn Nyìngòŋ.”

²³ Andìʼ no a ntsèntə̀ viʼi vəbyɨməvə,ko Bol wenə̀ Balnabas ə tsuʼ vəchəʼ və ngə̀ŋ Nyìngòŋ, ə̀ kù à vəwenə. Vəwenə nè tsu, vəwenə jɨ̀mə̀ bè bàmə chʉ̀ mù ghʉ̀sə vəchəʼ a vyi a avu Nyìngòŋ yì a vəwenə nghʉ choʼsə vəwenə à wen.

²⁴ Vəwenə jèʼ ə̀ chò fa Bisidiyà ə̀ dyʉ̀ a loʼ Bamfiliyà,

²⁵ ə̀ shə̀ʼtə̀ ntɨm jùŋ à viʼi Bèga mù lù fa tsu ə̀ shìʼi dyʉ̀ a ntə̀ʼ Atalyà.

²⁶ Fa Atalyà, vəwenə kwen a nkanuʼ ə̀ bwènə̀ dyʉ̀ a Antìyòk, a Sylia a kəshi yì a və nkù vəwenə tsu a avu Nyìngòŋ la ghə̀ ntùʼmə̀ nə̀ vəwenə, vəwenə nè shwèʼ yi a vəwenə nsə̀ diʼ mu vəwenə myetə̀ li luwèn.

²⁷ Vəwenə nè vì zaʼa a Antìyòk, ə̀ tsèntə̀ nòyn viʼi vəbyɨməvə no tsèm ə̀ shə̀ʼtə̀ nyʉ̀ vyi a Nyìngòŋ ə̀ gyàmtə̀, vəwenə ə̀ nè no tsèm, bè shə̀ʼtə̀ tò ando ghə̀ ku ji la viʼi tɨm byɨmə à Yesò.

²⁸ Vəwenə gàʼ a lì ə̀ tsi tsu wenə̀ və ndzɨ̀mtə̀sə bàm Yesò no alə̀.