Ŋwàʼlə̀ Mak 9 - The New Testament in the Babanki language

¹ Yesò bè gàʼ à viʼi a vyi la, “Mà gàʼà à ghə̀ŋ nəmwèʼè la, viʼi vətsenvə ti a shə̀ luwèn a vəwenə ko lu pfʉ no a mpfen əzaʼa fa tʉʼ a vəwenə a yen ando Nyìngòŋ soʼo foynə wen nə̀ kədyoʼkə.”

Kə̀ʼ Yesò kwitə

² A sə ndiʼ a bàmə mətsi ntʉfə, Yesò lyɨ̀ Bità, Jems bènə̀ Joyn wenə̀ vəwenə kuʼ a kwi pfen dyə̀fə tsen, kò wìʼ ndiʼ tsu. Ne kuʼ zaʼa tsu, kə̀ʼə̀ wen bvʉ̀tə̀ kwitə tò a vəwenə a shɨ.

³ Ndisə wen sə kaʼsə sə fəfə ŋwàŋtə̀ chò jì a wù mbi ghèn zì ghə̀ shʉ ndisə sə layn ə fəfə diʼ.

⁴ A sətsèn ayì vəwenə yen Elijà wenə̀ Mosìs vəwenə gàʼà à Yesò.

⁵ Bità mù gàʼ à Yesò la, “kə boŋə li a ndìʼsə̀ ando vəghəŋ dìʼ a shèn. Yès a bwom təto tətaʼ wù nkiʼ mùʼ, Mosìs kiʼ mùʼ, Elijà be kiʼ tsenghə.”

⁶ Ghə̀ nko kɨ̀ la ghə̀ gàʼà la ghò lo byìʼàndo kənyʉ̀ akì kə mfàynsə̀ à vəwenə no nànto.

⁷ Mbòʼ shiʼi tò a zhʉ ayì chiʼtə vəwenə, gɨ̀ fʉ̀ fa tsu gàʼà la, “Ghèn dìʼ wàyn kòŋ mò. Ghə̀ŋ nzhʉ fà wen.”

⁸ Vəwenə ki kaʼsə kò vəwenə bè yèn wìʼ əchò Yesò wenə̀ vəwenə.

⁹ Vəwenə nè bwènə̀ sə nshiʼi fa pfen ayì, Yesò kàyn la kə vəwenə à shə̀ʼtə̀ kənyʉ̀ akì à wìʼ əzaʼa fa tʉʼ a Wàyn Wìʼ lu lù fa pfʉ.

¹⁰ Vəwenə zhʉ kənyʉ̀ a Yesò yì gàʼ alì sə kantə̀ tò à vəwenə a ntìntìn la, “Wàyn Wìʼ lè zì ghə̀ lu ale fa pfʉ a?”

¹¹ Vəwenə bèm à Yesò la, “Byìʼì ghò a ndìʼsə̀sə təsoʼ sə gàʼà la adìʼ vì Elijà a mbì a?”

¹² Ghə̀ gàʼ à vəwenə la, “Adìʼ nəmwèʼè la Elijà ne vì a mbì ndi shɨ̀tə̀ no nyʉ̀ tsèm alì byìʼì ghò a və nyòʼò a ŋwàʼlə̀ Nyìngòŋ la Wàyn Wìʼ ne yen ngəʼ a nyʉ̀ no ghoʼo və be nyàblə̀ nə̀ wen a?

¹³ Mà gàʼà à ghə̀ŋ nəmwèʼè la Elijà vi li, viʼi nè no mə ghò a və kòŋə̀ à wen ando ŋwàʼlə̀ Nyìngòŋ ngaʼà byìʼì wen.”

Yesò chʉʼ wàyn wulɨm a ghə̀ nkiʼi kəzhwì kə byɨkə

¹⁴ Andìʼ ando vəwenə mbwènə̀ vì tsèntə̀ wenə̀ ndzɨ̀mtə̀sə bàm Yesò sətsensə shì, vəwenə yen mu nòyn viʼi no ghoʼo tɨmə li nkaʼ vəwenə. Ndìʼsə̀sə təsoʼ sətsensə ndìʼ a tì nòyn ayì soʼtə̀ nyʉ̀ wenə̀ ndzɨ̀mtə̀sə bàm Yesò a shì.

¹⁵ Nòyn viʼi ayi nè yèn Yesò no a zhʉ kò, sə diʼ nə̀ kanə mù nyɨŋ dyʉ̀ tòŋtə wen.

¹⁶ Yesò bèm à ndzɨ̀mtə̀sə bàm wen a shì la, “Ghə̀ŋ soʼtə̀ ghò wenə̀ viʼi venə a?”

¹⁷ Wutsen fà tì nòyn yi gàʼ la, “Ndìʼsə̀, mà vì nə̀ wàyn wulɨm mò à ghə̀ kiʼ kəzhwì kə byɨkə kə sə nè la ghə̀ ndiʼ jɨ.

¹⁸ No a zhʉ̀ kò, a kə ghaʼa wen kə temə wen a nse, ghə̀ nàʼtə̀ ə̀ to la ntɨ̀ŋ, kəfʉ̀ʼʉfʉ̀ʼʉ kə sə fʉ̀ fa wen a chʉ̀, ghə̀ be pfiʼi asoŋ wen. Mà yi mvi ə nsensə ndzɨ̀mtə̀sə bàm wù la sə dzɨ̀mə̀ shìsə kəzhwì kə byɨkə a kènkə, vəwenə mwom nənlù ədzɨ̀m shìsə̀.”

¹⁹ Yesò gàʼ à vəwenə la, “Ghenə diʼ viʼi kəlyɨŋ kə kò a və ghò byɨmə alə̀ a? Mà a ndiʼ vəghəŋ əzaʼa fa ze bu ghə̀ŋ byɨmə a? Vi nə̀ wàyn ayì à mò.”

²⁰ Vəwenə lyɨ̀ wàyn ayì vì nə̀ wen à Yesò. Kəzhwì kə byɨkə akì nè yèn Yesò tò yenə no a zhʉ̀ kò, ə̀ nè wàyn ayì fəŋ a nse sə bəŋkə̀ fa tsu kəfʉ̀ʼʉfʉ̀ʼʉ kə fʉ̀ fà wen a chʉ̀.

²¹ Yesò bèm à tìʼ wàyn ayì la, “Əkwaʼa ghenə tsi li à wen a wèn ale?” Ghə̀ gàʼ la, “Fa tʉʼ a ghə̀ bò mbu wàyn bwaʼ.”

²² “Nghoʼo məzhʉ̀ kə lu nkəŋə əzhwi wen; mòʼò wen a zhìʼ ko à mù. A sətsèn ndiʼ mu wù zì wù ne kənyʉ̀ wu kùsə nshinsə à yès ə̀ gyàmtə̀ yès.”

²³ Yesò bwènsə̀ gàʼ à wen la, “Byìʼì ghò a wu gàʼà à mò la a zhʉ a mà zì mà ne kənyʉ̀ a? No ndò a ghə̀ byɨmə mu və zi və ne no mə ghò à wen.”

²⁴ Ando ghə̀ ngàʼ mwètə̀, tìʼ wàyn ayì zɨmə ə̀ gàʼ la, “Mà kìʼ byɨmə alì kò ghə̀ lù kwʉ̀ʼ. Gyàmtə̀ mo ə kwʉ̀ʼsə̀.”

²⁵ Yesò nè yèn ando viʼi nyɨŋə vì no vəghoʼo à wen a mbyɨ̀, “Ghə̀ kàyntə̀ nyʉ̀ à kəzhwì kə byɨkə gàʼa la, Mà gàʼà a wù a kəzhwì kə byɨkə kenkə a wù ne la kə wàyn ghèn a gàʼà kò ndiʼ la ghə̀ zhʉ lə̀ la kə cho fʉ̀ fà wen a wèn. Kə be lu kwen tʉʼ tsenghə.”

²⁶ Kəzhwì kə byɨkə akì ku nkəʼ ə̀ nə̀ʼ wàyn ayì no nànto mù fʉ̀, wàyn ayì mù sə kə̀ʼə̀ to nə̀ kəmpfʉ kə wìʼ. Nghoʼo viʼi mù sə gàʼà la, “Ghə̀ pfʉ li.”

²⁷ Yesò ghaʼ kəvu kə wen ə̀ gyàmtə̀ wen ghə̀ lù tɨ̀mə.

²⁸ Yesò nè kwèn a ngə̀ŋ, ndzɨ̀mtə̀sə bàm wen sə nyoʼtə bèm à wen la, “Byìʼì ghò a kə yì nto ghoʼo yès, yès dzɨ̀m shìsə̀ kəzhwì kə byɨkə akì a?”

²⁹ Ghə̀ gàʼ à vəwenə la, “Nki kəzhwì a kènkə dìʼ mu a zì à dzɨ̀m ə̀shìsə tò jɨ̀m. Kəfo kə kədyàŋ kə zi kò kə lù dzɨ̀m shìsə̀.”

Yesò bè gàʼ byìʼì pfʉ wen

³⁰ Vəwenə lù fa kəshi ayì sə jèʼè dyʉ̀ chò fa tì Galìlì, Yesò nko kòŋ la wìʼ kɨ la yì dìʼ tsu,

³¹ byìʼàndo ghə̀ nziʼì ndzɨ̀mtə̀sə bàm wen gàʼà à vəwenə la,“Və ne ku Wàyn Wìʼ à viʼi və zhwi wen. A sə ndiʼ a mətsi ntaʼ, ghə̀ lù fa pfʉ.”

³² Vəwenə nko kɨ̀ kənyʉ̀ a ziʼi ghenə nshyə̀ʼtə̀ alì sə fànə̀ əbèm à wen.

Yesò ziʼi byìʼì wìʼ a ghə̀ chò wutsen

³³ Vəwenə dyʉ̀ zaʼa à Kabanùm ə̀ kwen a ngə̀ŋ, Yesò mù bèm à vəwenə la, “Ghə̀ŋ yi nsoʼtə̀ ntaŋmə vì la ghò a ji lì?”

³⁴ Vəwenə chiʼ tò la kùʼ byìʼàndo à yi ndiʼ a ji kəngùmə̀ kə diʼ à vəwenə a ntìntìn la à chò ndò chò wutsen lo.

³⁵ Yesò ŋwʉʼʉ a nse ə̀ gàʼ à ndzɨ̀mtə̀sə bàm wen shì njʉ̀sə̀ bò la sə kwentə vì boʼsə wen. Ando vəwenə mviʼtə̀ boʼsə, ghə̀ gàʼ à vəwenə la, “No ndò yì a ghə̀ kòŋ ndiʼ mbì dìʼì ghʉ wenə wen a bàm viʼi no vətsèm be ndiʼ wù shwèʼ à viʼi vətsèm.”

³⁶ Ghə̀ nè gàʼ mwètə̀ ə̀ gùbtə̀ wàyn bwaʼ tòm à vəwenə a shɨ bè tsòʼsə̀ wen mù gàʼ à vəwenə la,

³⁷ “No ndò a ghə̀ tuʼmə̀ nə̀ wàyn a nə̀ ghèn byìʼì mò mu ghə̀ tuʼmə̀ li nə̀ mò nkɨ la ghə̀ tuʼmə̀ li nə̀ wìʼ a ghə̀ tɨmə̀ mo.”

No ndò a ghə̀ ko soynə vəghəŋ dìʼ à vəghəŋ a shyə

³⁸ Joyn gàʼ à Yesò la, “Ndìʼsə̀, yès tə yèn wìʼ ghə̀ dzɨ̀mə̀ shìsə̀ zhwì byɨvə a wù a zhiʼ, yès gàʼ la kə ghə̀ be à mwòm byìʼàndo ghə̀ ko diʼ wù muʼ fa vəghəŋ a ntìntìn.”

³⁹ Yesò gàʼ à vəwenə la, “Kə ghə̀ŋ be tàm wen byìʼàndo wìʼ a ghə̀ nè kənyʉ̀ kə kanəkə à mò zhiʼ ko zì ghə̀ be fùʼtə ngàʼà nyʉ̀ byɨvə byìʼì mò.

⁴⁰ No ndò a ghə̀ ko soynə vəghəŋ dìʼ à vəghəŋ a shə.

⁴¹ Mà gàʼà à ghə̀ŋ nəmwèʼè la no ndò a ghə̀ ku ndoŋ à mù à ghə̀ŋ la ghə̀ŋ nyʉ byìʼàndo ghə̀ŋ dzɨ̀mtə̀ mò zì kò ghə̀ lù faŋ ke kiʼi moʼtə wen.”

Nyʉ̀ vi a və nè la wìʼ nè mbyɨ

⁴² A sətsèn à ne tè ndò la wàyn muʼ fa ntìntìn vunə venə a və dìʼ mu və byɨmə li à mò ne mbyɨ mu kə a bòŋ la və chuŋ ti à wen a ŋwì dyʉ̀ mòʼ wen à mù mə nghoʼomə̀.

^43-44 Kəvu kə̀ sətsèn nè la wù ne mbyɨ wu tin ə̀ màʼà. Kə bòŋ la wù kwen a bwòŋ nə̀ kəvu kə mùʼ əchò la wù kwen a kəshi kə byɨkə a zhiʼ bolə̀ tsu kò ghə̀ lu nlɨmə nə̀ avu wù no a tsèm.

^45-46 Kəghʉ kə̀ sətsèn nè la wù ne mbyɨ, wu tin ə̀ màʼà. Kə bòŋ la wù kwen a bwòŋ nə̀ kəghʉ kə mùʼ əchò la wù nkiʼ aghʉ wu no tsèm, və moʼ wù a kəshi kə zhìʼ byɨghə.

⁴⁷ Shɨ wu be nè la wù ne mbyɨ, wu tòŋ shìsə̀, kə bòŋ la wù kwen a soʼ fòn Nyìngòŋ nə̀ shɨ̀ mùʼ əchò la wù nkiʼ ashɨ à wu no tsèm à bò, və moʼ wù a kəshi kə zhìʼ byɨghə,

⁴⁸ a andiʼ kəshi a bviʼbviʼsə fwèsə̀ kətsoʼ kə wèn wìʼ tò fwesə tsu, zhiʼ bè bolə̀ tsu a və zì kò və lù lèmsə.

⁴⁹ Fəmbvaŋ fìfə a və lu shɨ̀tə̀ no ndò tsu lu ndiʼ tò zhiʼ.

⁵⁰ Fəmbvaŋ fə bòŋə̀ alì mu fə sətsèn dìʼ ke be nlyɨ̀mə̀ wù à ne ghò nə̀ fəwenfə la fə be nlyɨ̀mə̀ a? “Ghə̀ŋ ndiʼ tò nə̀ fəmbvaŋ à ghə̀ŋ ntsìnə̀sə, no tè ndò be ntsi tò ntsìnə̀ bwaʼmə wenə̀ lèmə̀ wen.”