Ŋwàʼlə̀ Mak 8 - The New Testament in the Babanki language

Yesò zhis viʼi nkamsə səkàʼ

¹ A sə ndiʼ kətsi kətsenkə tò a mətsì ayì, nòyn ghoʼghə be vì zhùŋtə̀ a mbyɨ̀ Yesò kò kəfo kə ndiʼ vəwenə zhɨ. Ghə̀ mù dzàŋtə̀ ndzɨ̀mtə̀sə bàm wen ə̀ gàʼ à vəwenə la,

² “Mà kusə̀ nshinsə à viʼi venə. Vəwenə tsi li mətsì ntaʼ yo vəwenə luwèn, alì kò kəfo mbè ndiʼ ə vəwenə zhɨ.

³ Mà sətsèn gàʼ à vəwenə luwèn la vəwenə bwènə̀ mpfwo dyʉ̀ nə̀ jɨ̀ŋ viʼi vətsenvə à fʉ̀ fəŋkə jɨŋsə a ji byìʼàndo vəwenə vətsenvə lù no fa kəghaf.”

⁴ Ndzɨ̀mtə̀sə bàm wen sə bèm à wen la, “Wìʼ lè zì ghə̀ lyɨ fozhɨvə a və a kwʉʼ fa fe a tì toʼ a shèn ə zhis nki nòyn ghenə tsu a?”

⁵ Yesò bèm à vəwenə la, “Ghə̀ŋ kìʼ təghɨf tə kəbayn tə shyə̀ʼ a fì a? Vəwenə bwènsə̀ la, “Yès kìʼ təghɨf sòmbo.”

⁶ Ghə̀ gàʼ à nòyn viʼi vi la və ŋwʉʼtə a nse, ghə̀ mù shì təghɨf tə kəbayn tì sòmbo ə̀ kù kəzòŋ à Nyìngòŋ, bwəʼlə kù à ndzɨ̀mtə̀sə bàm wen la vəwenə tomtə dyʉ̀ a shɨ viʼi a vyi.

⁷ Vəwenə bè nkìʼ məshʉ̀tə mə ntsenə̀ tò nshəʼ alə̀. Yesò bè kù kəzòŋ à Nyìngòŋ byìʼì shʉsə ashì mù gàʼ à ndzɨ̀mtə̀sə bàm wen la sə gətə à viʼi a vyi.

^8-9 Viʼi avenə nkuʼu dyʉ̀ a nkamsə səkàʼ. No məndò zhɨ kwiʼ. Ndzɨ̀mtə̀sə bàm wen sə boŋtə bwəʼ a və mfaŋə̀ və lwin a nkyèsə sòmbo. Yesò mù gàʼ la vəwenə lu mpfwo.

¹⁰ Vəwenə sə mpfwo, ghə̀ kwen tò a zhʉ ayì a nkànuʼ wenə̀ ndzɨ̀mtə̀sə bàm wen ə̀ dyàŋ dyʉ̀ a shyə loʼ Dalmanuta.

Və Falàsi gàʼ à Yesò la ghə̀ diʼ kəchwitə à vəwenə

¹¹ Və Falàsi vətsenvə vì à Yesò ə̀ zìtə̀ sə soʼtə̀ nyʉ̀ wenə̀ vəwenə, kuʼsə̀ jì əghaʼa wen tsu, mù gàʼ à wen la ghə̀ ne kənyʉ̀ kə kaynəkə kətsenkə a nə̀ kəchwitə ədìʼ la kədyòʼ kə wen kə lù fà Nyìngòŋ.

¹² Yesò dèmkə̀ ə̀ shom mù bèm la, “Byìʼì ghò a viʼi kəlyɨŋ kə luwèn kəŋ yen kəchwitə fà Nyìngòŋ a? Mà gàʼà à ghə̀ŋ nəmwèʼè la, ghə̀ŋ ko a yen kəchwitə.”

¹³ Ando ghə̀ ngàʼà a lì, ə̀ ghʉ̀sə vəwenə ə bwènə̀ kwen a nkanuʼ wenə̀ ndzɨ̀mtə̀sə bàm wen ə̀ tɨm a ndzèn mo tsen yì.

Fəshɨ̀ŋ fə Və Falàsi nə̀ fə Helòd fə

¹⁴ Vəwenə zaʼa a ndzèn ayì mu ndzɨ̀mtə̀sə bàm wen sə lyesə li əlyɨ̀ kəbayn. A ndìʼ tò ghɨfə kəbayn la mùʼ a tì nkànuʼ ayì.

¹⁵ Yesò gàʼ à vəwenə la, “Ghə̀ŋ ntùʼmə̀ byìʼì fəshɨ̀ŋ fìfə a Və Falàsi bènə̀ Helòd kiʼi à vəwenə a ntìntìn.”

¹⁶ Vəwenə mù sə bèsə̀ kənyʉ̀ ki à vəwenə a ntìntìn gàʼà la, “Ghə̀ gàʼ alə̀ byìʼàndo vəghəŋ ko kiʼ kəbayn.”

¹⁷ Yesò kɨ kənyʉ̀ a vəwenə mbèsə̀ ə̀ bèm à vəwenə la, “Byìʼì ghò a ghə̀ŋ gàʼà la a dìʼ byìʼàndo ghə̀ŋ ko kiʼ kəbayn a? Kə diʼ la ghə̀ŋ ko təmə̀ kɨ kənyʉ̀ mu? Ghə̀ŋ be ko zì ghə̀ŋ nkwòʼtə̀ nyʉ̀?

¹⁸ Byìʼì ghò a ghə̀ŋ kiʼì ashɨ ko ghə̀ŋ lə nyenə a? Kiʼ tiʼitiʼi kò andìʼ la və zhʉ a? Ghə̀ŋ ko bè kwòʼtə̀ kənyʉ̀ no a mpfen!

¹⁹ A ndìʼ ando mà mbyəʼlə, təghɨf tə kəbayn tìtə tətàyn ə zhis viʼi nkamsə sətàyn, ghə̀ŋ mboŋtə byəʼ və lwin a nkyèsə sə shə̀ʼ lì?” Vəwenə gàʼ la, “A ndiʼi nkyèsə njʉ̀sə̀bò.”

²⁰ Yesò bè bèm à vəwenə la, “A mbè ndìʼ ando mà mbyəʼlə̀ tìtə sòmbo ə̀ gə̀tə̀ à viʼi nkamsə səkàʼ, ghə̀ŋ mboŋtə byəʼ vi və lwin a nkyèsə sə shə̀ʼ lì.” Vəwenə gàʼ à wen la, “A ndiʼi nkyèsə la sòmbo.”

²¹ Yesò mù bèm à vəwenə la,“A lè diʼ la tətof ə təŋtə ko təmə bwènə̀ mvì mu?”

Yesò chʉʼ wù kənshɨ̀f a Betsadà

²² Yesò wenə̀ ndzɨ̀mtə̀sə bàm wen nè vì a Betsadà, viʼi vətsenvə vì nə̀ wìʼ à wen mu ghə̀ shɨfə̀li li sə sensə̀ la ghə̀ kum ə wen.

²³ Yesò ghaʼ kwoŋ wìʼ ayì wenə̀ wen fʉ̀ fa ntə̀ʼ ayì, ghə̀ chʉ mənte à wen a ashɨ mù ghʉ̀ avu wen à wen a kətʉ ə̀ bèm à wen la, “Wu lè zì wù yen kəfo a?”

²⁴ Ghə̀ tsòʼsə̀ ashɨ wen ə gàʼ la, “Mà yenə viʼi alì və diʼ to nə̀ nkòʼ a mə jèʼè.”

²⁵ Yesò bè ghʉ̀ avu wen a ashɨ wù kənshɨ̀f ayì nò a zhʉ̀ kò ashɨ wen bòʼkə̀ ghə̀ sə bwènsə̀ yenə shi no a nkàyn.

²⁶ Yesò gàʼ la ghə̀ bwenə mpfwo a lì la kə ghə̀ be à bwènsə̀ kwèn a ntə̀ʼ yì.

Bità shə̀ʼtə̀ wìʼ a Yesò dìʼi wen

²⁷ Yesò wenə̀ ndzɨ̀mtə̀sə bàm wen sə lù sə dyʉ̀ a ntə̀ʼsə a loʼ Sisalìyà Fìlìbày. Ando vəwenə jèʼè dyʉ̀ a ji ghə̀ bèm à vəwenə la, “Viʼi gàʼà la ma dìʼ ndo?”

²⁸ Vəwenə gàʼ à wen la, “Viʼi gàʼà la wù diʼi Joyn wù ku à mù, vətsenvə gàʼà la wù diʼi nshyə̀ʼtə̀ Elijà, vətsenvə gàʼà la wù diʼi nshyə̀ʼtə̀ ghoʼo tsen.”

²⁹ Yesò bèm à vəwenə la, “Nkàyntə̀ ghə̀ŋ ə gàʼà la mà dìʼ ndo?” Bità gàʼ à wen la,“Adìʼ wù Klistò.”

³⁰ Yesò mù kàyn à vəwenə la kə vəwenə à shə̀ʼtə̀ wìʼ a yi diʼi wen à wìʼ.

Yesò gàʼ byìʼì ngəʼsə wen bènə̀ pfʉ wen

³¹ Yesò gàʼ a lì mù zìtə̀ sə dìʼsə ndzɨ̀mtə̀sə bàm wen gàʼà la, “Wàyn wìʼ ne yenə ngəʼ byɨ, ə̀ vəchəʼ nə̀ tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ ne mo wen ə zhwi wen, à nè sə ndiʼ a mətsi ntaʼ, ghə̀ bwensə lù fa pfʉ.”

³² Yesò nè gàʼ ə̀ laynsə à vəwenə a lì no a zhʉ̀ kò, Bità gùftə̀ wen a bàm, ə̀ kənkə wen gàʼà la, “Kə ghə̀ be à gàʼ a ji ghèn.”

³³ Yesò fuʼtə ə̀ ki ndzɨ̀mtə̀sə bàm wen ə̀ kənkə Bità gàʼà la, “Bwènə̀ fà mò a bàm a Satan! Byìʼe Wù ko kiʼì kwòʼtə Nyìngòŋ, wu kwòʼtə̀ to nə̀ wìʼ.”

³⁴ Yesò dzàŋtə̀ nòyn viʼi vi bènə̀ ndzɨ̀mtə̀sə bàm wen ə̀ gàʼ à vəwenə la,“No ndò a ghə̀ kòŋə ədzɨ̀mtə mo, mu ghə̀ diʼi maʼa ngə̀ŋ kətʉ wen ə byèʼè kəntò kə wen ə dzɨ̀mtə mo,

³⁵ byìʼàndo no ndò a mwòmsə̀ ə bwòŋsə̀ ngə̀ŋ kətʉ wen ghə̀ a pfʉ alì mu à pfʉ̀ no ndò byìʼì mò nə̀ ntɨmə jùŋə ghom mu ghə̀ a bwòŋ.

³⁶ Wìʼ lè zì ghə̀ se no ghò a zhʉ a ghə̀ sətsèn kiʼi mbi ghèn no tsèm alì lè kəzhwì kəwen a?

³⁷ Wìʼ lè zì ghə̀ zen sò kətʉ wen no nə̀ ghò?

³⁸ No ndò sətsèn ndìʼsə̀ kətʉ byìʼì mò nə̀ ziʼi ghomə a shɨ viʼi mbyi nyʉ̀ byɨvə ghèn a və ko fànə̀ Nyìngòŋ lə̀, Wàyn Wìʼ be lù nkiʼ kətʉ kədiʼikə byìʼì wen a zhʉ a ghə̀ bwènə̀ mvi a tì baynə ghoʼghə Tìʼ wen wenə̀ ntsɨ̀ŋsə ŋwòʼə sə wen.”