Ŋwàʼlə̀ Mak 7 - The New Testament in the Babanki language

Ziʼi viʼi və mu və

¹ Viʼi Falàsi vətsenvə bènə̀ ndìʼsə̀sə təsoʼ sətsensə vì fa Jelusalèm vì pfʉ̀tə a mbyɨ̀ Yesò,

² sə nki, ə̀ yèn ando ndzɨ̀mtə̀sə bàm wen sətsensə nzhɨ nə̀ avu kəmɨ̀ŋə, kèn la vəwenə shʉ li a ji a ntsìnə̀ loʼ vəwenə nkəŋ la və shʉ avu fa tsu.

^3-4 (Və Falàsi nə̀ Vəjew no vətsèm ntsi ntsìnə̀ loʼ yì a vətìʼ və vəwenə ntsi. Vəwenə ko zhɨ kəfo a kə lu fa woŋ ke shʉ̀ ando ntsìnə̀ loʼ ndiʼì. Kò vəwenə lə nzhɨ kəfo kèn la vəwenə shʉ li avu vəwenə a ji aghèn. Vəwenə mbe ghʉ təsòʼ tìtə a tə ngàʼà la və diʼi nshʉ̀ ndoŋsə, nə̀ vəntòyn, bènə̀ kaŋə ando ntsìnə̀ loʼ ndiʼì.)

⁵ Viʼi vi yen ando viʼi Yesò nzhɨ kèn la vəwenə shʉ li avu, mù bèm à wen la, “Byìʼì ghò a ndzɨ̀mtə̀sə bàm wù ko tsi ntsìnə̀ vətìʼ və vəghəŋ a? Vəwenə zhɨ nə̀ avu kəmɨ̀ŋ.”

⁶ Yesò ghàm vəwenə gàʼà la, “Viʼi kəmbɨ̀lə̀ venə. Nshə̀ʼtə̀ Azayà nshə̀ʼtə̀ ntɨm Nyìngòŋ kùmə̀ ghə̀ŋ tò nəmwèʼè la, ‘Viʼi venə gumlə̀ mò to nə̀ chʉ alì ko vəwenə nlu lyɨ̀ mò a kəfo à vəwenə a tətyɨm.

⁷ Vəwenə yenə ngəʼ tò kədyàŋ gàʼà vəwenə ghoʼsə̀ mò, byìʼàndo vəwenə dìʼsə nyʉ̀ mu à shɨ̀tə̀ viʼi, ə̀ ghʉ la andiʼ təsoʼ tə Nyìngòŋ.’

⁸ “Ghə̀ŋ màʼà soʼ Nyìngòŋ, tùʼtə̀ ghaʼa tò ntsìnə̀ viʼi ghə̀ to.”

⁹ Ghə̀ bè gàʼ la, “Ghə̀ŋ nyɨŋə soʼ Nyìngòŋ a jì tof ndi kɨ əghaʼ ntsìnə̀ loʼ ghə̀ŋ,

¹⁰ byìʼe Mosìs nlù nyòʼ soʼ Nyìngòŋ a ghə̀ ngàʼà la,‘Gumlə̀ Tìʼ wù nə̀ Lì wù’ be gàʼà la,‘No ndò a ghə̀ te Tìʼ wen ko Lì wen, və diʼi zhwi wen,’

¹¹ alì ghə̀ŋ sə ziʼì la wìʼ sətsèn nkiʼ kəfo əku à tìʼ wen ko à lì wen bè bwènsə̀ gàʼ la, ‘Ghèn dìʼ Kolban’ (a kə shə̀ʼtə̀ la ghə̀ tə sə diʼ mu ghə̀ ghʉ li la ghə̀ a ku kəfo akì à Nyìngòŋ.)

¹² Kò və bè à kyè la ghə̀ ku kəfo akì à lì wen kò à tìʼ wen.

¹³ A lè ji a ghə̀ŋ ə tyenə kənyʉ̀ kə Nyìngòŋ fa tsu byìʼe ghə̀ŋ dìʼsə ntsìnə̀ loʼ ghə̀ŋ à viʼi. Ghə̀ŋ be nè tənkì tə nyʉ̀ a nə̀ tèntə no təghoʼo.”

Nyʉ̀ vyi a və nè ko viʼi laynə ashɨ Nyìngòŋ

¹⁴ Yesò gàʼ a lì bè dzàŋ nòyn viʼi vi ghə̀ vì, ghə̀ gàʼ à vəwenə la, “Ghə̀ŋ zhʉtə no ghə̀ŋ vətsèm ə̀ nkɨ la

¹⁵ kəfo kə ko diʼ a wìʼ zì ghə̀ zhɨ kə ne la ghə̀ ndiʼ nlaynə alì à dìʼ nyʉ̀ a və fʉ̀ fà wen à wèn a və nè ghə̀ sə diʼ ko ghə̀ lu laynə.

¹⁶ No ndò a ghə̀ kiʼì tof ghə̀ tùʼù zhʉ̀tə kənyʉ̀ a kènkə.”

¹⁷ Yesò nè lù mòʼtə̀ nòyn viʼi a vyi dyʉ̀ kwèn a ngə̀ŋ, ndzɨ̀mtə̀sə bàm wen sə gàʼ à wen la ghə̀ shə̀ʼtə̀ kənyʉ̀ a ngàyn yì ndìʼì.

¹⁸ Yesò gàʼ à vəwenə la, “Ghə̀ŋ bò bu tò ngu to nə̀ viʼi vətsenvə mu? Ghə̀ŋ kɨ la no tè ghò a wìʼ zhɨ ko zì ghə̀ ne la kə ghə̀ a ndiʼ nə̀ laynə.

¹⁹ Kə diʼ alə̀ byìʼàndo ghə̀ zhɨ kəfo kò kə lu ndyʉ̀ à wen a tyɨm. Ghə̀ zhɨ kə dyʉ̀ à wen a bèm, fa tsu kə chò fʉ̀ tò fʉ fà wen a wèn.” (Yesò ngàʼà a lì ədìʼ la no kəfo kəzhɨkə kə kò kə laynə a məzhɨ.)

²⁰ Ghə̀ gàʼ a lì mù gàʼ la, “Adìʼ tò kənyʉ̀ kì a kə fʉ̀ fà wìʼ à wèn a kə nè la ghə̀ ndiʼ nə̀ laynə.

²¹ Kwòʼtə̀ byɨghə fʉ̀ tò fà wìʼ a tyɨm a ghə̀ nè la ghə̀ nè ngʉ̀ʼ byɨvə, nè la ghə̀ ndzɨ̀mtə̀ ki, tsoŋə, zhwilə̀ viʼi,

²² tsi nə̀ ki viʼi kò nə̀ vəlɨm və viʼi, kiʼ ashɨ kəmbàŋbàŋ, kiʼ tyɨm byɨghə, lobtə̀ viʼi, ku kətʉ kə diʼikə à viʼi, kiʼ kəghəʼ a viʼi, zhò kùwòŋ, kiʼ ghaŋsə wèn bènə̀ kəndzɨ̀ŋtə̀.

²³ Nyʉ̀ byɨvə venə no tsèm fʉ̀ tò fà wìʼ a wèn və mù nè kò ghə̀ lu diʼ wù laynə.”

Byɨmə wùwì tsen

²⁴ Yesò mù lù fa Galìlì ə̀ dyʉ̀ a shyə loʼ yì a Tayà wenə̀ Sidòn ə̀ ndìʼ tsu. Ghə̀ dyʉ̀ kwèn a ngə̀ŋ tsen kò ghə̀ lù kòŋ la wìʼ kɨ la ghə̀ dìʼ tsu, alì viʼi bè kɨ̀ tò kɨ.

^25-26 Wùwì tsen ndìʼ tsu kiʼ wàyn a ghə̀ nkìʼ kəzhwì kə byɨkə. Ghə̀ nè zhʉ̀ tò zhʉ la Yesò dìʼ a ngə̀ŋ ayì ə̀ vì fə̀ŋ à wen a shɨ mù sə sensə̀ wen la ghə̀ dzɨ̀m shìsə̀ kəzhwì kə byɨkə akì. Andìʼ a lì wùwì aghèn ndìʼ wù kətɨm mu və bwi wen a Fònisiya a loʼ Sylia.

²⁷ Yesò bòŋsə̀ bwènsə̀ la,“Ghʉsə və zhis vunə a mbì mi byìʼàndo kə ko bòŋ la və lyɨ fozhɨvə vunə ə̀ mòʼ à bʉsə.”

²⁸ Wùwì ayì byɨmə ə̀ gàʼ la, “Mà kɨ li a lì a Tìʼ alì tè bʉsə a sə ŋwʉʼ boʼsə a kəshi a vunə zhɨ tsu boŋtə̀ bwəʼ fozhɨvə vəwenə zhɨ!”

²⁹ Byìʼì gaʼa wen, Yesò mù gàʼ la, “Pfwo, kəzhwì kə byɨkə kì fʉ li fa wèn wàyn wù.”

³⁰ Ghə̀ sə pfwo dyʉ̀, ə̀ yen wàyn wen yì ghə̀ nyoŋ a kwen mu kəzhwì kə byɨkə kì fʉ li fà wen a wèn.

Yesò chʉʼ wìʼ a ghə̀ nko zhʉ shi kò ghə̀ lu ngàʼà

³¹ Yesò lù fa shyə Tayà dyʉ̀ chò fa Sidòn bè chò jì fa shyə̀ Ntə̀ʼsə Wum ə̀ dyʉ̀ a mo Galìlì.

³² Və vì nə̀ wìʼ à wen tsu mu kətʉ kə wen kə pfʉ li kò ghə̀ lu ngàʼà mù sə sènsə Yesò la ghə̀ kum wìʼ ayì ghə̀ to.

³³ Yesò gubtə̀ wen ashə mbyɨ ə̀ tèn mənyi mə avu wen a tiʼitiʼi wìʼ ayì bè chʉ̀ mənte ə̀ kùm kəlyɨmə kə wìʼ ayì nə̀ mənte a mì,

³⁴ mù ki kùʼsə nə̀ kaŋə ə̀ dèm bè mù gàʼ à wen la, “Ephatha” àdìʼ mu ghə̀ gàʼ la, “Bòʼmə!”

³⁵ Tò a zhʉ ayì, tiʼitiʼi wen bòʼkə̀, kəlyɨmə kə wen bè zì əjèʼ. Ghə̀ mù zìtə̀ sə gàʼà tò a nkàyn.

³⁶ Yesò mù ku soʼ à viʼi a vyi la kə vəwenə à shə̀ʼtə̀ kənyʉ̀ akì à wìʼ, vəwenə bòŋsə̀ sə shə̀ʼtə̀ dyʉ̀ nə̀ kənyʉ̀ akì tò shə̀ʼtə̀.

³⁷ No ndò a ghə̀ nzhʉ kənyʉ̀ akì ndìʼ nə̀ kanə mù sə gàʼà dyʉ̀ la, “Ghə̀ nè nyʉ̀ tsèm və dyʉ̀ tò a nkàyn, nè tè mpfʉ̀sə tʉ sə zhʉ shi be nè tè və bɨbɨ̀ gàʼà.”