Ŋwàʼlə̀ Mak 6 - The New Testament in the Babanki language

Və mo Yesò a Nazalèt

¹ Yesò lù fa tsu ə̀ bwènə̀ pfwo a ntə̀ʼ a ghə̀ nkwi tsu, ndzɨ̀mtə̀sə bàm wen sə boʼsə wen.

² Tʉʼ layn a kətsi kə zhʉtəkə vəwenə, ghə̀ dyʉ̀ ə̀ kwèn a ngə̀ŋ ntsèntə̀ ə̀ zìtə̀ sə ziʼi tsu. Viʼi zhʉtə ziʼi wen no vəghoʼo sə diʼ nə̀ kanə bèmə̀ la, “Wìʼ ghèn tə zhʉ nyʉ̀ venə fa fe? A lè kù ndo ə nku nki tof ghenə à wen a? Ghə̀ nè nyʉ̀ kanəvə venə ale?

³ Gàʼa kò ghə̀ diʼ tò no wàyn wìʼ yì a ghə̀ komə fo lə̀. A adìʼ wàyn Mèli lə̀. Gaʼa kò vəlèmə̀ və wen diʼ Jems nə̀ Josèf nə̀ Judàs bènə̀ Simon. Gaʼa kò vəlèmə̀ və wen vunə ki tsi tò no a vəghəŋ a ntìntìn.” Vəwenə gàʼ a lì, mù zìtə̀ sə bàynə̀ wen.

⁴ Yesò mù gàʼ à vəwenə la, “Və lu ngumlə̀ nshə̀ʼtə̀ Nyìngòŋ no fe əcho kəshi a ghə̀ fʉ fa tsu. Viʼi loʼ wen nə̀ viʼi ngwàʼa ngə̀ŋ wen ko nə̀ ngumlə̀ wen.”

⁵ Yesò nko yèn ji ə nè kənyʉ̀ kə kanəkə əchò tò ando ghə̀ nghʉ avu a tʉ viʼi və kwaʼkəvə vətsenvə chʉʼʉ vəwenə.

⁶ Yesò yen la vəwenə ko kiʼ byɨmə, sə diʼ no nə̀ kanə ghoʼo ghə̀. Ghə̀ mù lù sə jèʼè ziʼì dyʉ̀ nə̀ viʼi a ntə̀ʼsə sətsensə a sə mboʼsə̀ tsu.

Yesò tɨm ndzɨ̀mtə̀sə bàm wen njʉ̀sə̀bò

⁷ Ghə̀ dzàŋ ndzɨ̀mtə̀sə bàm wen njʉ̀sə̀bò ə̀ tɨ̀m vəwenə tò vəbò vəbò bè kù àdyoʼ à vəwenə a kətʉ ə̀ zhwì byɨvə.

^8-9 Ghə̀ gàʼ a lì mù gàʼ à vəwenə la vəwenə nè sə̀ ndyʉ̀, kə wìʼ à lyɨ̀ kəfo kətsenkə əcho mbàŋ bènə̀ gwʉsə aghʉ wen. Kə wìʼ à lyɨ̀ kəfo kə zhɨkə ko kəmbò, kə wìʼ à wè ko à wen a kəmbò. Kə wìʼ à lyɨ̀ ndisə bò.

¹⁰ Ghə̀ bè gàʼ à vəwenə la, “Ghə̀ŋ kwen no a ntə̀ʼ ko, ko no te a ngə̀ŋ ko, və shisə ghə̀ŋ tsu, ghə̀ŋ ntsi tò tsu əzaʼa fa zhʉ a ghə̀ŋ ne lù fa ntə̀ʼ ayì ko fa ngə̀ŋ ayì.

¹¹ No a ntə̀ʼ ko a ghə̀ŋ dyʉ̀ tsu və faŋ ke shisə ghə̀ŋ ko əzhʉtə kənyʉ̀ a ghə̀ŋ gàʼà, ghə̀ŋ fʉ fa tsu. Ghə̀ŋ sə mfʉ̀ ghə̀ŋ ghòmə dzemsə səŋsə à vəwenə ndi vəwenə nkɨ la vəwenə ne li nshwè.”

¹² Vəwenə fʉ̀ mù sə ziʼì dyʉ̀ à viʼi la vəwenə kwitə tətyɨm tə vəwenə fà vəwenə a nyʉ̀ byɨvə

¹³ Vəwenə ndzɨ̀mə̀ shìsə̀ zhwì byɨvə fà viʼi a təwèn no vəghoʼo be zuʼu viʼi vəkwaʼkəvə no vəghoʼo chʉʼʉ vəwenə.

Pfʉ Joyn wù ku à mù

¹⁴ Viʼi zhʉ nyʉ̀ vyi a Yesò ə̀ nè tò shì tsèm. Fòn Helòd bè zhʉ. Və mù sə jèʼè gàʼà la, àdìʼ Joyn wù ku à mù a ghə̀ bwènsə̀ li nlu fa pfʉ. La a lè kənyʉ̀ a kə ne, ghə̀ sə kiʼ kədyòʼ ənè nyʉ̀ venə alə̀.

¹⁵ Viʼi vətsenvə gàʼà la, àdìʼ nshə̀ʼtə̀ Elijà a ghə̀ bwènə̀ mvi vətsenvə be gàʼà la àdìʼ nshə̀ʼtə̀ ghoʼo tsen to nə̀ shìsə a sə ndiʼì a tʉʼ mbì.

¹⁶ Helòd nè zhʉ̀ a lì gàʼ la, “Adìʼ Joyn wù ku à mù. Mà ə ne li və tin kətʉ kə wen, alì ghə̀ be mbwènsə̀ nlu fa pfʉ!”

¹⁷ Helòd ndìʼ mu ghə̀ ngàʼà li tò fà wen a ngə̀ŋ la və ghaʼ Joyn wù ku à mù ə̀ shwìn a mfɨŋ byìʼàndo no wen Helòd nghaʼ li shì Helodiyas ə̀ lam no tè ando andìʼ wì lèmə̀ wen Filib.

¹⁸ Byìʼì kənyʉ̀ a kèn, Joyn wù ku à mù faŋ sə kùmtə̀ tò kumtə a wen la, “Wù ne li kənyʉ̀ a soʼ ko byɨmə ando wu lamə wì lèmə̀ wù lì!”

¹⁹ Helodiyas mù sə fwisə̀ tin a Joyn, kəŋə jì əzhwi wen alì kò ghə̀ lə̀ nyenə,

²⁰ No nkàntə̀ Helòd ə̀ mfànə̀ Joyn byìʼe ghə̀ nkɨ la Joyn dìʼ wù kənyʉ̀ kə tɨməkə be diʼ wù Nyìngòŋ. Helòd ko mbyɨmə la və ne kənyʉ̀ kə byɨkə kətsenkə à Joyn. Ghə̀ nkòŋ ə nzhʉtə̀ nyʉ̀ vyi a Joyn ngàʼà alì nyʉ̀ a vyi zhuŋsə wen no nànto.

²¹ Helodiyas yen ji kətsi kətsenkə. Andìʼ kətsi a Helòd nzhɨ kətsi kə bwi wen, wenə̀ viʼi a wenə̀ vəwenə nsoʼo loʼ, nə̀ tʉ vəsugyèʼ bènə̀ ngəʼsə loʼ sə tsensə a loʼ Galìlì.

²² Wàyn wùwì Helodiyas nè kwen vì mù sə bènə̀. Kənyʉ̀ ki kə fwom à Helòd wenə̀ viʼi və vi və wen vi. Ghə̀ mù gàʼà wàyn wùwì ayì la, “Bèmə no tè ghò a wù kòŋə̀ a mà a ku à wù.”

²³ Ghə̀ bè gàʼ à əkàn à wen la, “Wù bèm no tè ghò à mò, mà kù à wù, wù kòŋ mà gətə no tè loʼ ghomə a kəntìntìn kù à wù.”

²⁴ Wàyn wùwì ayì mù fʉ̀ dyʉ̀ bèm à lì wen la yì bèm no ghò lo? Lì wen gàʼ la, “Dyʉ̀ gàʼ la ghə̀ tin kətʉ kə Joyn wù ku à mù kù à wù.”

²⁵ Ghə̀ zàŋsə̀ bwènə̀ kwen dyʉ̀ gàʼ à Helòd la, “Mà kə la wù tin kətʉ kə Joyn wù ku à mù ə̀ wè a kyeʼ lyelə kù à mò tò luwèn lə̀.”

²⁶ Kənyʉ̀ akì nè fòn sə diʼ nə̀ sheʼkə̀ no nànto alì kò ghə̀ lə̀ kòŋ əbyɨsə gàʼa a wàyn aghèn byìʼàndo ghə̀ nsə̀ diʼ mu ghə̀ gaʼà li kənyʉ̀ akì ə kàyn a shɨ viʼi və vi və wen.

²⁷ Ghə̀ tɨm sugyèʼ tsen fa tì vi a və ntsi a ntuʼ to a zhʉ̀ ayì ə̀ gàʼ à wen la ghə̀ dyʉ̀ tin ə̀ vì nə̀ kətʉ kə Joyn wù ku à mù.

²⁸ Ghə̀ dyʉ̀ a kəshi yì a Joyn ndìʼ tsu a mfɨŋ ə̀ tin kətʉ kə wen, ə̀ vì nə̀ kəwenkə a kyeʼ lyenə, ə̀ kù à wàyn wùwì ayì ghə̀ dyʉ̀ kù à lì wen.

²⁹ Ando ndzɨ̀mtə̀sə bàm Joyn ə̀ nzhʉ kənyʉ̀ akì, vəwenə dyʉ̀ lyɨ̀ bvenə ə wen ə dyʉ̀ bvɨ̀mə̀.

Yesò zhis viʼi nkam sətàyn

³⁰ Viʼi ntɨm Yesò bwènə̀ dyʉ̀ à wen, ə̀ shə̀ʼtə̀ no nyʉ̀ tsèm a vəwenə jèʼè li ndìʼsə̀ be nè.

³¹ Yesò mù gàʼ à vəwenə la, “Ghə̀ŋ vi vəghəŋ dyʉ̀ a kəshi kə lyomtəkə ə̀ zhʉ̀tə̀.” Ghə̀ ngàʼà a lì byìʼàndo viʼi nsə̀ vì tò vì no vəghoʼo, kò vəwenə lu nkiʼ zhʉ əzhɨ.

³² Vəwenə kwen a nkànuʼ ə̀ lù mu sə ndyʉ̀ a kəshi a wìʼ nko diʼ tsu.

³³ Nghoʼo viʼi bè yèn ando vəwenə ndyʉ̀, ə̀ kɨ la adìʼ vəwenə, bè fʉ̀ tò fa ntə̀ʼsə sətsèm ə̀ nyɨŋ dyʉ̀ tsu to kəghʉ a vəwenə a mbì.

³⁴ Ghə̀ dyʉ̀ nè sə zaʼa tsu ə̀ yèn nòyn viʼi no ghoʼo, sə kiʼ kusə nshinsə à vəwenə byìʼàndo vəwenə ndìʼ tò nə̀ byisə kèn nə̀ ntsɨ̀ŋ. Ghə̀ mù sə dìʼsə vəwenə nə̀ nyʉ̀ no ghoʼo.

³⁵ A nè sə ndiʼ a mpfwòmə, ndzɨ̀mtə̀sə bàm wen sə vì gàʼ à wen la, “Kəshi kènkə diʼ a bàm, mu tʉ bè sə̀ jɨ vì.

³⁶ Gàʼa à viʼi venə, vəwenə bwènə̀ dyʉ̀ a shi a təsɨm tə boʼsə, ə̀ be kwen a ntə̀ʼsə ə̀ zen fozhɨvə fa tsu ə̀ zhɨ.”

³⁷ Alì Yesò bwènsə̀ gàʼ à vəwenə la, “Nkàntə̀ ghə̀ŋ ku kəfo vəwenə zhɨ.” Vəwenə bwènsə̀ bèm à wen la, “Kə mu sə diʼ la yès a dyʉ̀ ə zen fozhɨvə a mbo ko shə̀ʼ a vəwenə a zhɨ ə və kwʉʼ a?”

³⁸ Ghə̀ bwènsə̀ bèm à vəwenə la, “Ghə̀ŋ kiʼi təghɨf tə kəbayn tə shyə̀ʼ? Ghə̀ŋ lye.” Vəwenə lye ə̀ gaʼà la, “Tə diʼ tò tətàyn nə̀ shʉsə səbò.”

³⁹ Yesò gàʼ à ndzɨ̀mtə̀sə bàm wen la vəwenə ne viʼi vi ŋwʉʼtə a nsè a kwi agəŋ a tənòyn a tənòyn.

⁴⁰ Vəwenə mù ŋwʉʼ. Tənòyn tə tsentə kiʼ viʼi məwum ntàyn ntàyn, vətsenvə kiʼ viʼi ghɨ.

⁴¹ Ghə̀ mù shì təghɨf tə kəbayn tìtə tətàyn nə̀ shʉ shìsə səbò ə̀ ki kùʼsə nə̀ kàŋə, ə̀ kʉ̀ kəzòŋ à Nyìngòŋ, mù byəʼlə kəbayn akì ə̀ kù la ndzɨ̀mtə̀sə bàm wen sə tomtə a shɨ viʼi vi. Ghə̀ be lyɨ̀ shʉ shìsə səbò ə̀ gə̀tə̀ à viʼi no vətsèm.

⁴² Vəwenə zhɨ kwiʼ no vətsèm.

⁴³ Ndzɨ̀mtə̀sə bàm Yesò shì boŋtə byə̀ʼ bayn nə̀ byəʼ shʉsə sə lwinkə a nkyèsə njʉ̀sə̀bò.

⁴⁴ Viʼi a və nzhɨ fozhɨvə a vyi ndìʼ no və ghoʼo. Lyʉmə ndiʼ a ntìntìn viʼi avenə nkamsə sətàyn.

Yesò jèʼ a kwi à mù

⁴⁵ Viʼi vi nè zhɨ mwètə̀ no a zhʉ kò, Yesò gàʼ à ndzɨ̀mtə̀sə bàm wen la sə kwen a nkànuʼ ə̀ tɨm ə̀ dyʉ̀ a ndzèn a Betsadà a mbì, yì faŋ a bàm ə̀ gàʼ viʼi vi mpfwo.

⁴⁶ Ando ghə̀ gàʼ a lì, ghə̀ lù kuʼ a kwi pfen əjɨ̀m.

⁴⁷ Tʉ nè sə njɨ vì, ghə̀ diʼ a ndzèn yì tò wen nyɨŋ mu ndzɨ̀mtə̀sə bàm wen sə sə̀ diʼ kəntìntìn kə a mù nə̀ nkanuʼ yì.

⁴⁸ Ghə̀ sə yen vəwenə femə nə̀ nkànuʼ, gho əzəf ando fwof mboŋsə vì fà vəwenə a mbì. A nè sə ndiʼ a nlayn tʉʼ, ghə̀ lù sə jèʼè dyʉ̀ a kwi à mù ədyʉ̀ yen ndzɨ̀mtə̀sə bàm wen. Ando ghə̀ dyʉ̀ zaʼa à vəwenə a mbyɨ̀ mù sə kəŋə əchò,

⁴⁹ Vəwenə yen ando ghə̀ jèʼè vi a kwi à mù sə ghʉ la a dìʼ mpfʉ nse, mù zɨmə̀ tò vətsèm.

⁵⁰ No a zhʉ ko, ghə̀ gàʼ à vəwenə la, “Kə ghə̀ŋ a fàyn. A dìʼ mo. Ghə̀ŋ ghaʼ tətyɨm təŋtə.”

⁵¹ Ghə̀ gaʼà a lì, ə̀ kwen kwentə vəwenə a nkanuʼ yì, fwof ayi tin, vəwenə sə diʼ nə̀ kaynə ghoʼoghə,

⁵² byìʼàndo vəwenə nko kɨ kənyʉ̀ a kə yì chò nə̀ kəbayn kì. Kə nto ghoʼo vəwenə ə vəwenə kɨ.

Yesò chʉʼ viʼi a Gènesalèt

⁵³ Ando Vəwenə ntɨmə̀ mu mwètə̀ ə̀ dyʉ̀ a ntə̀ʼ Gènesalèt, vəwenə ghʉ vənkanuʼ və vəwenə a mbyɨ̀ à mù,

⁵⁴ vəwenə sə mfʉ̀ fa nkànuʼ, viʼi yen Yesò ə̀ kɨ.

⁵⁵ No a zhʉ̀ kò, viʼi mu sə buŋə viʼi vəkwaʼkəvə a təghàm fa ntə̀ʼsə a nsə mboʼsə dyʉ̀ nə̀ vəwenə no fe a və zhʉ la Yesò dìʼ tsu.

⁵⁶ Yesò nè sə dyʉ̀ no tè fe, ko a dìʼ tè a ntə̀ʼ tyetə, ko a dìʼ te a ntə̀ʼ ghoʼo, ko a dìʼ tè mbwaʼa təsɨm, ko a təwoŋ, və fʉ̀ vì nə̀ viʼi vəkwaʼkəvə tsu, mù sə sensə̀ wen la ghə̀ ghʉsə və kumsə tè su ndisə wen. Viʼi a və nkumsə, ghə̀ chʉʼ vəwenə no vətsèm.