Ŋwàʼlə̀ Mak 4 - The New Testament in the Babanki language

Ngàyn kùmə̀ tì sɨ̀m

¹ Yesò bè zìtə̀ sə dìʼsə̀ viʼi a mbyɨ̀ mo Galìlì. Nòynə viʼi a və mvì a kəshi ayì ndìʼ no ghoʼo. Ghə̀ yen a lì ə̀ kwen ŋwʉʼʉ a nkànuʼ a tì à mù, viʼi a vyi tɨmə kàʼ a wèn à mù.

² Ghə̀ dìʼsə̀ vəwenə no nə̀ nyʉ̀ ghoʼvə tò a ngàynsə. Ghə̀ gàʼ à vəwenə à wen a ziʼi la,

³ “Ghə̀ŋ zhʉtə a! wutsen nlu li ə̀ fʉ̀ ə mòʼo ngwàʼ wen,

⁴ sə mòʼò, ghətsen fəŋkə a kəghʉ̀ kə ji a ghə̀ nchò fa sɨm, mənyin vì tsə̀btə̀ ə̀ pfìʼ no tsèm.

⁵ Ghətsen fəŋkə a təwu kò nse nghoʼo tsu, ə̀ zàŋsə̀ fʉ̀ byìʼàndo nse ntyenə.

⁶ No a zhʉ̀ kò a chwìchwì mbanə ə̀ nyʉ̀ʼ ngwàʼ ayì ghə̀ zɨm byìʼàndo aghaŋ yi nkò kwen shìʼi a nse.

⁷ Ashɨ a tsenghə fəŋkə a kəshi a ndzoŋsə nkuʼu tsu, nè fʉ̀, ndzoŋsə a shìsə kuʼ ə̀ sùlə̀ à wenə ghə̀ kò ghə̀ lə̀ kumə.

⁸ A tsenghə fəŋkə no a nse jùŋə, kuʼ ə̀ kù no a nkayn, və sə fʉ pfì. Ashɨ asaŋ nku a kətʉ kə saŋ tsenghə ghoʼo zaʼa a məwum ntaʼ; ku a kətsenkə məwum ntʉfə, be ku a kətsenkə ghɨ.”

⁹ Yesò gàʼ a vəwenə la, “No ndò a ghə̀ tofə ghə̀ tùʼù zhʉtə.”

Kənyʉ̀ a və mò ngàynsə sènsə byìʼì kəwenkə

¹⁰ Nòyn yi nè gə̀sə̀ fa mbyɨ̀ Yesò ghə̀ faŋ tò wenə̀ viʼi ntɨm wen vi njʉ̀sə̀bò bènə̀ ndzɨ̀mtə̀sə bàm wen sətsensə. Vəwenə mù bèm à wen la ngàynsə ashìsə gàʼà la ghò lo.

¹¹ Ghə̀ bwènsə̀ gàʼ à vəwenə la, “Nyìngòŋ ku li tof à ghə̀ŋ la ghə̀ŋ nzhʉ kɨ nyʉ̀ lyomtəvə a və diʼì kùmə̀ soʼ fòn Nyìngòŋ, alì və diʼi dìʼsə viʼi vətsenvə tò a ngàynsə

¹² ndi vəwenə nki tò ki kò vəwenə lu nyenə; zhʉtə̀ nyʉ̀ tò zhʉtə alì kò vəwenə lù nkɨ kənyʉ̀ a və gàʼà, byìʼàndo vəwenə tu nyenə bè zhʉ kɨ nyʉ̀ mu vəwenə a bwènə̀ vì à Nyìngòŋ ghə̀ maʼa mbyɨsə vəwenə.”

Yesò shə̀ʼtə̀ kənyʉ̀ a ngàyn tì sɨ̀m ə ziʼì

¹³ Ando Yesò ngàʼa a lì mù bèm à vəwenə la, “Kə diʼ la ghə̀ŋ ko zhʉ kɨ ngàyn aghèn mu? Ghə̀ŋ le sətsèn fàŋ ke kɨ kənyʉ̀ a ngàyn ghèn ə dìʼsə, ghə̀ŋ bè lə̀ kɨ ngàyn tsen a?

¹⁴ Ngwàʼ yì a wìʼ yì mòʼò li dìʼ kənyʉ̀ kə Nyìngòŋ.

¹⁵ Tətyɨm tə viʼi vətsenvə diʼ to nə̀ ngwàʼ yì a ghə̀ fəŋkə a ji lì. Vəwenə dyʉ̀ zhʉ gaʼa Nyìngòŋ tò zhʉ ando və gàʼà Satan nyɨŋ vì shìsə̀ gàʼà ayì a və yì wè à vəwenə tətyɨm lì.

¹⁶ Tətyɨm tə viʼi vətsenvə diʼ to nə̀ nse təghu a və moʼò ngwàʼ tsu. Nki viʼi a venə lə nzhʉ kənyʉ̀ kə Nyìngòŋ tò zhʉ vəwenə zàŋsə byɨmə nə̀ saŋlə ghə̀.

¹⁷ Kənyʉ̀ akì kwèn à vəwenə a tətyɨm alì kò aghaŋ yi lù nshiʼi à vəwenə a tətyɨm. Vəwenə ghaʼa tyɨm tò fəshitə̀ alə̀, ngəʼ ko tsuʼu aghʉ byìʼì kənyʉ̀ kə Nyìngòŋ nè sə vì no a zhʉ̀ kò, vəwenə zàŋsə̀ fəŋkə.

¹⁸ Tətyɨm tə viʼi vətsenvə be diʼ to nə̀ kəshi a ndzoŋsə kuʼu tsu a və moʼò ngwàʼ tsu. A dìʼ vəwenə a və zhʉ kənyʉ̀ kə Nyìngòŋ

¹⁹ alì nyʉ mbi bènə̀ kòŋ yi a viʼi kòŋə̀ ghoʼ bènə̀ kòŋ a viʼi kòŋə̀ fo mbi tsenəvə mù sə tàʼsə̀ vəwenə kò andìʼ la gàʼ ayi a kumə ashɨ a vəwenə a ntsìnə̀sə.

²⁰ Tətyɨm tə viʼi vətsenvə diʼ to nə̀ nse jùŋə a və we ngwàʼ tsu. Adiʼ viʼi a və zhʉ kənyʉ̀ kə Nyìngòŋ vəwenə ghàʼ tò ghaʼa kə kumə ashɨ à vəwenə ntsìnə̀sə; à tsenghə kùmə̀ ashɨ məwum ntaʼ, a tsenghə məwum ntʉfə, a tsenghə kùmə̀ ghɨ.”

Yesò mò ngàyn kùmə̀ kənkàʼtə̀

²¹ Yesò bè gàʼ à vəwenə la, “Və lè zì və kwen nə̀ kənkàʼtə̀ kə a ngə̀ŋ ə̀ pfʉ̀sə a ti nkyè ko lyòmtə̀ a tʉ kwen a? Gaʼa kò və lu nkwen və tòm a kəshi kə ŋaŋtəkə?

²² Və lyòmtə̀ tè no ghò kò və à lə̀ fàŋ ke yen. A lyòmtə no tè kənyʉ̀ kə kò, ko kə nè fàŋ kə fʉ̀ a ndayn.

²³ No ndo a ghə̀ kiʼì tof ghə̀ tùʼtə̀ zhʉ̀tə lì.”

²⁴ Ghə̀ bè gàʼ à vəwenə la, “Ghə̀ŋ ntùʼmə̀ nə̀ nyʉ̀ vyi a ghə̀ŋ zhʉ. No nshə̀ʼ ko a ghə̀ŋ ku fo tsu à viʼi à dìʼi ndə̀ŋndəŋ nshə̀ʼ a və be lə ku tsu à ghə̀ŋ ə be ku tè ku ə chò.”

²⁵ Na kènkə dìʼì la, no ndò a ghə̀ kiʼì və ne ku kwʉ̀ʼsə̀ à wen. A ngho no ndò, və à shì tè kətyetəkə kì a ghə̀ kiʼi lì.

Ngàyn shɨ ngwàʼ

²⁶ Yesò bè dyʉ̀ mbì əgàʼ la, “Soʼo fòn Nyìngòŋ diʼ ando wìʼ lu mfʉ̀ ghə̀ mòʼo ngwàʼ à wen a sɨ̀m,

²⁷ ghə̀ pfwo sə bʉnə̀, tʉʼ lan ghə̀ lu, to a lì, ngwàʼ ayì nè fʉ̀ sə kwi kò ghə̀ lù nkɨ kənyʉ̀ a kə chò nə̀ ngwàʼ ayì.

²⁸ Kə nə̀ ndiʼ a lì à nè nse la ngwàʼ ayì nkwi. A nə̀ mfʉ̀ ntu fa nse a mbì, kətʉ kə fʉ tsu mibu ashɨ kùmə a kətʉ ayì.

²⁹ Ashɨ ayi nə̀ mbi nò a zhʉ̀ kò, və fʉ̀ pfì byìʼàndo zhʉ məpfì ə kwʉʼʉ̀ li.”

Ngàyn shɨ ngwàʼ fəkòʼ fə mostàd

³⁰ Yesò bè bèm la, “Və lè zì və shəʼmə soʼ fòn Nyìngòŋ no nə̀ ghò lo? Və lè zì və be mò no ngàyn ko ndi dìʼ ji a soʼ fòn Nyìngòŋ diʼ fa tsu a?

³¹ Ghə̀ diʼ to nə̀ shɨ ngwàʼ fəkòʼ fətsenfə a və dzàŋə̀ nə̀ mostàd. A dìʼ a zhʉ a və mòʼò, fə zhisə̀ chò ashɨ nkòʼ no ntsèm a tì mbi,

³² alì andiʼ a zhʉ a fəkòʼ a fì nè kwi kuʼ fə sə ghoʼo chò no nkòʼ ntsèm, tətam tə fʉ tsu ghoʼkə no a nkàyn, mənyin sə vì bwomə təlòʼ tə vəwenə tsu.”

³³ Yesò nshyə̀ʼtə̀ kənyʉ̀ kə Nyìngòŋ à vəwenə chò tò fa ngàynsə sènsə tò a di a vəwenə a zhʉ kɨ.

³⁴ Ghə̀ nko shə̀ʼtə̀ kənyʉ̀ à vəwenə kèn la ghə̀ mò a nə̀ ngàyn, alì ghə̀ nè bwènə̀ dyʉ̀ a bàm, ghə̀ shɨ̀tə̀ shə̀ʼtə̀ kənyʉ̀ a ngàynsə a shìsə dìʼsə à ndzɨ̀mtə̀sə bàm wen.

Yesò chìʼ fwof toghə

³⁵ A sə ndiʼ tò a mpfwomə kətsì yì a ghə̀ ndìʼsə̀ viʼi lì, ghə̀ gàʼ à ndzɨ̀mtə̀sə bàm wen la, “Vəghəŋ dyaŋ dyʉ̀ a ndzèn mo tsen ghèn.”

³⁶ Vəwenə mù ghʉ̀sə nòyn viʼi vi, ndzɨ̀mtə̀sə bàm wen sə mù dyʉ̀ kwèn a tì nkànuʼ yì a ghə̀ nsə̀ ŋwʉʼ tsu lì mù sə zɨ̀fə̀. Vənkanuʼ vətsenvə mbe dyʉ̀ fà vəwenə a bàm.

³⁷ Vəwenə sə ndyàŋə̀, fwof toghə tsenghə zìtə̀ sə chò tenə mu mə vi pfènə̀ a wèn nkànuʼ yì chò kwenə à yi tin ə̀ nè ghə̀ sə shwemə shiʼi a tì à mù.

³⁸ Kə nsə mfʉ̀ a lì, Yesò diʼ a tì nkànuʼ yì mu ghə̀ zhəʼtə li a kənbuŋtə̀ kə kwen sə bʉnə̀. Vəwenə zhòm wen ə̀ bèm à wen la, “Ndìʼsə̀, kə diʼ la yès ə pfʉkə dyʉ̀ kò wù lù nyenə mu?”

³⁹ Ghə̀ lù kàyntə̀ nyʉ̀ à fwof ayi gàʼà la, “Bwaʼmə!” bè gàʼ à mu mì la,“Tɨmə tò a lì.” No a zhʉ̀ kò, fwof yi bwaʼ, shi chiʼ la kùʼ.

⁴⁰ Ghə̀ mù bèm à vəwenə la, “Ghə̀ŋ fànə̀ ghò alə̀ a? Kə diʼ la ghə̀ŋ ko təmə̀ byɨmə à Nyìngòŋ mù?”

⁴¹ Kənyʉ̀ akì nè vəwenə sə fànə̀ no nànto mù sə bèmə̀ à vəwenə a ntìntìn la, “Wìʼ ghèn dìʼ no ndò a tè fwof nə̀ mu zhʉ wen a!”