Ŋwàʼlə̀ Mak 3 - The New Testament in the Babanki language

Yesò chʉʼ kwoŋ wìʼ a ghə̀ mpfʉ

¹ A bè nè sə ndiʼ kətsi kətsenkə, Yesò dyʉ̀ kwen a ngə̀ŋ ntsèntə̀, wutsen diʼ tsu mu kwoŋ wen tsenghə pfʉ li.

² Viʼi ghʉ ashɨ a wèn Yesò əyen la ghə̀ a chʉʼ wìʼ ayì a kətsi kə zhʉtəkə ndi vəwenə kiʼi jì ghàmə̀ wen lo.

³ Yesò gàʼ à wù mpfʉ̀ kwòŋ ayì la, “chò vì a shèn.”

⁴ Ghə̀ chò, Yesò mù bèm à vəwenə la, “Soʼ byɨmə la və ne njùŋ a kətsi kə zhʉtəkə mu mbyɨ lo, ghə̀ byɨmə la və bwoŋsə wìʼ mu və zhwi wen zhwi lo?” Vəwenə chɨmə tò la kùʼ.

⁵ Yesò ki kaʼsə nə̀ vəwenə alə̀ mu tin wen fwi li alì be kusə̀ nshinsə byìʼì chiʼi kətʉ vəwenə. Ghə̀ mù gàʼ à wìʼ ayì la, “Nàʼsə kwoŋ wu.” Ghə̀ nàʼsə̀ no a zhʉ kò kwoŋ ayì to.

⁶ Və Falàsi vi nè fʉ̀ no a zhʉ kò ə̀ ghàʼa ntsèntə̀ wenə̀ viʼi Helòd mù sə shɨ̀tə̀ jì əzhwi Yesò.

Nòyn viʼi vì yèn Yesò a mbyɨ̀ mo

⁷ Yesò wenə̀ ndzɨ̀mtə̀sə bàm wen lù dyʉ̀ a mbyɨ̀ mo Galìlì. Viʼi dzɨ̀mtə̀ dyʉ̀ nə̀ vəwenə mu və lù fa Galìlì bènə̀ fa Judiyà.

⁸ Vətsenvə nlu fa Jelusalèm, fa Idumiya, vətsenvə tɨm ə̀ vì fa ndzèn mo Jodàn, bènə̀ fa shyə Tayà nə̀ Sidòn, ando vəwenə nzhʉ nyʉ̀ vyi a Yesò ə̀ nè.

⁹ Yesò mù gàʼ à ndzɨ̀mtə̀sə bàm wen la sə vi nə̀ nkànuʼ ghə̀ kwen tsu a bwen a lì viʼi à mfaʼsə̀ wen,

¹⁰ byìʼàndo andìʼ a lì mu ghə̀ chʉʼ li viʼi no vəghoʼo. No ndo a ghə̀ nkwaʼa mù sə fosə̀ vì tò vi ndi əkùmsə̀ wen.

¹¹ Viʼi a və nkiʼ zhwì byɨvə nyenə wen no a zhʉ̀ kò, zhwì byɨvə a vyi nè vəwenə fəŋkə a nse sə zɨmə̀ dì gàʼà la, “Wù dìʼ wàyn Nyìngòŋ!”

¹² Yesò ə ku soʼ à vəwenə la kə və a shə̀ʼtə̀ wìʼ a yi diʼi wen.

Yesò tsuʼtə viʼi ntɨm wen njʉ̀sə̀bò

¹³ A nè sə ndiʼ a zhʉ tsenghə, Yesò kuʼ ə̀ dyʉ̀ a kwi pfen ə̀ dzàŋ viʼi a ghə̀ nkəŋə la və dzɨ̀mtə̀ kùʼ nə̀ wen.

¹⁴ Ghə̀ tsuʼ vətsenvə fà vəwenə a ntìntìn njʉ̀sə̀bò la və njèʼè boʼsə wen ə̀ ghʉ̀ vəwenə a viʼi ntɨm wen la və njèʼè shə̀ʼtə̀ kənyʉ̀ kə Nyìngòŋ,

¹⁵ be kiʼ àdyoʼ ədzɨ̀m shìsə zhwì byɨvə.

¹⁶ Viʼi ntɨm a vyi ndìʼ Simon yì a Yesò nkù zhiʼ wen tsenghə nə̀ Bità,

¹⁷ nə̀ Jems wenə̀ lèmə̀ wen ə Joyn vunə Zebedì. Yesò chʉ zhiʼ tsenghə à vəwenə nə̀ Bonelges a ghə̀ shə̀ʼtə̀ la vəwenə diʼ vunə ghʉ̀ bwanə ghə̀.

¹⁸ A mbe ndìʼ Andɨ̀lò nə̀ Filib nə̀ Bàtòlòmiyà, nə̀ Matìyò, nə̀ Tomòs, nə̀ Jems wàyn Alphùyùs, nə̀ Tadiyòs, nə̀ Simon a və ndzàŋə̀ wen nə̀ Zilyòt,

¹⁹ bènə̀ Judàs Iskalìyòt yì a ghə̀ nlù bàʼlə Yesò.

Yesò wenə̀ Belzibùl

²⁰ Yesò nè bwènə̀ pfwo, viʼi bè vì zhùŋtə̀ à wen a mbyɨ̀ no vəghoʼo a ji a jì nko ndìʼ ə Yesò wenə̀ Ndzɨ̀mtə̀sə bàm wen sə zhɨ kəfo.

²¹ Viʼi wen nè yèn ando ghə̀ nshwèʼè dyʉ̀ tò dyʉ̀ sə kəŋə dyʉ̀ nə̀ wen ə nyɨŋsə wen byìʼàndo viʼi nsə̀ gàʼà la tof kətʉ wen nyɨŋ li.

²² Ndìʼsə̀sə təsoʼ sətsensə a sə mvi fa Jelusalèm sə̀ gàʼà tò la, “Belzibùl dìʼ à wen a bèm.” Bè gàʼà la, “Ghə̀ dìʼ alə̀ dzɨ̀mtə̀ shìsə̀ zhwì byɨvə nə̀ kədyoʼkə mu à kù fòn ə̀ zhwì byɨvə.”

²³ Yesò mù dzàŋ vəwenə ə̀ mò ngàynsə sətsensə à vəwenə la, “Satan lè zì ghə̀ ndzɨ̀mə̀ shìsə̀ tò Satan fà viʼi a wèn ale?”

²⁴ Viʼi mù yì ndiʼ viʼi loʼ mùʼ, ə nkiʼ kəngə̀sə̀ à vəwenə a ntìntìn, vətsenvə soynə vətsenvə kò loʼ ayi a fàŋ ke fəŋ.

²⁵ Viʼi sətsèn ndiʼ viʼi ngwàʼa ngə̀ŋ mùʼ, ə̀ nkiʼ kəngə̀sə̀ a vəwenə a ntìntìn, mu ngwàʼa ngə̀ŋ ayi a sàykə̀.

²⁶ Loʼ Satan lè sətsèn ndiʼ a ndzensə a ndzensə bwènsə̀ soynə wenə wen mu ghə̀ a fəŋ, kə ndiʼ la kənsèsə̀ kə ki kə vi li.

²⁷ Wìʼ zì kò ghə̀ lə̀ kwèn a ngə̀ŋ wù kədyòʼ ə̀ ghaʼ shì fo wen, a bwen tò la ghə̀ ghaʼ li ə̀ kwiʼ wen a mbì mi.

²⁸ “Mà gàʼà à ghə̀ŋ nəmwèʼè la àdìʼ tè mbyɨ kò a viʼi nè mu Nyìngòŋ zì ghə̀ maʼa bè màʼà no tè mbàʼ ko a vəwenə te wen tsu,

²⁹ alì mu no ndo sətsèn tè kəzhwì kə ŋwoʼəkə kò və lə̀ bè lyèsə̀ ku wen. Mu kə lì dìʼì la mbyɨ wen faŋ li à wen a kətʉ tò ghan mùʼ.”

³⁰ Yesò ngàʼà a lì byìʼàndo vəwenə ngàʼà la, “Ghə̀ kìʼ kəzhwì kə byɨkə.”

Yesò shə̀ʼtə̀ tənki tə viʼi adiʼ lì wen bènə̀ vəlèmə̀ və wen

³¹ Lì Yesò bènə̀ vəlèmə̀ və wen vì tɨ̀mə a kəbəŋ ə̀ tɨ̀m la və dzàŋ wen.

³² Andìʼ a lì mu nòyn viʼi ŋwʉʼʉ li nkaʼ Yesò. Vəwenə gàʼ à wen la, “Yen a! lì wù wenə̀ vəlèmə̀ vyə dìʼ a kəbəŋ kəŋ wù.”

³³ Yesò bwènsə̀ bèm à vəwenə la, “Lì ghom nə̀ vəlèmə̀ vwomə diʼ vəndò?”

³⁴ Ando ghə̀ ngàʼa a lì ə̀ ki kaʼsə nə̀ vəwenə mù gàʼ la, “Lì ghom nə̀ vəlèmə̀ vwomə diʼ viʼi venə.

³⁵ No ndò a ghə̀ ne kənyʉ̀ kì a Nyìngòŋ kəŋə dìʼ lèmə̀ ghom, wùwì nə̀ wulɨm à bè dìʼ lì ghom.”