Ŋwàʼlə̀ Mak 15 - The New Testament in the Babanki language

Və dyʉ̀ nə̀ Yesò a shɨ Bilate

¹ Tʉʼ lan, tʉtʉ vəpfèm və ngə̀ŋ Nyìngòŋ, vəchəʼ, ndìʼsə̀sə təsoʼ bènə̀ viʼi soʼo nsoʼsə vi no vətsèm ghàʼa ə̀ ntsèntə̀ ə̀ bàʼtə nyʉ̀ vəwenə mù kwìʼ Yesò ə̀ dyʉ̀ nə̀ wen à Bilate.

² Bilate bèm à wen la,“Wù diʼ fòn Vəjew mu?” Yesò bwènsə̀ gàʼ la, “Kə diʼ tò ando wu gaʼà.”

³ Tʉtʉ vəpfèm və ngə̀ŋ Nyìngòŋ mù sə zuʼu nyʉ̀ no ghoʼo a wèn Yesò.

⁴ Bilate bè gìsə̀ bèm à Yesò la, “Zhʉ nyʉ̀ no ghoʼo a və ghàmə̀ wù tsu a. Wù bwènsə̀ la ghò fa tsu a?”

⁵ Alì kò Yesò lù bwènsə̀ no kənyʉ̀. Bilate mù sə diʼ nə̀ kanə.

Və chòsə̀ soʼ la və zhwi Yesò

⁶ No zhʉ kəzhɨ kə məzaʼsə̀ kə mvi zaʼa, Bilate ə gàʼa və shisə wìʼ fa ngə̀ŋ mfɨŋ a viʼi kòŋə la və shìsə.

⁷ Andìʼ a tʉʼ ayì wutsen diʼ a mfɨŋ a və dzàŋə̀ wen nə̀ Balabas. Ghə̀ ndìʼ tsu wenə̀ viʼi vətsenvə a wen vəwenə nzìtə soyn a ntə̀ʼ bè zhwì wìʼ.

⁸ Nòyn viʼi tsèntə̀ mù sə gàʼà à Bilate la ghə̀ ne tò ando ghə̀ nə̀ nè

⁹ Ghə̀ bèm à vəwenə la, “Ghə̀ŋ kòŋ la mà shisə fòn Vəjew mu?”

¹⁰ Ghə̀ mbèmə̀ a lì byìʼàndo ghə̀ nkɨ li la à nè tò kənghə̀ʼ tʉtʉ vəpfèm və ngə̀ŋ Nyìngòŋ nghaʼ Yesò ə ku à wen.

¹¹ Tʉtʉ vəpfèm və ngə̀ŋ Nyìngòŋ twis nòyn viʼi vi la və gàʼ à Bilate la ghə̀ shisə à diʼ Bàlabàs.

¹² Bilate bè mù bèm à vəwenə la, “Ghə̀ŋ ke kəŋə la mà shisə̀ wen ə̀ nè ale nə̀ wìʼ ghèn a ghə̀ŋ dzàŋə̀ nə̀ fòn Vəjew a?”

¹³ Vəwenə bwènsə̀ zɨ̀mə a gɨ to la,“Bantə wen a kəntò!”

¹⁴ Bilate bè bèm la,“Byìʼì ghò? Ghə̀ byɨ̀sə no ghò?” Vəwenə bè zɨ̀mə̀ dyʉ̀ tò nə̀ mbì la,“Bantə wen a kəntò!”

¹⁵ Bilate shìsə̀ Bàlabàs fa mfɨŋ ndi nè la viʼi vi ndiʼ nə̀ saŋlə ə̀ ghòm Yesò nə̀ kənjʉ̀ mù ku wen la və dyʉ̀ bayntə a kəntò.

Vəsugyèʼ sə̀ chəʼə Yesò

¹⁶ Vəsugyèʼ vətsenvə lyɨ̀ Yesò kwèn nə̀ wen a fətin a tì ntuʼ mù dzàŋtə̀ vəsugyèʼ vi a və mfaŋə̀ no vətsèm.

¹⁷ Vəwenə mòʼ ndisə təfòn a wèn Yesò ə̀ bo sòʼ ndzoŋsə ə̀ chìʼ à wen a kətʉ.

¹⁸ Mù zìtə̀ sə bwènə̀ wen gàʼà la,“Səʼ fòn Vəjew!”

¹⁹ Ando vəwenə mbwènə̀ wen a lì, və zìtə̀ sə ghòmə̀ wen fa kətʉ nə̀ mbàŋ, chʉ mənte à wen a wèn, shiʼì à vəwenə a nchiʼsə alwi nè kənlobtə̀ la vəwenə gumlə̀ wen.

²⁰ Andìʼ a zhʉ a vəwenə ne nyʉ̀ venə mè ə̀ tsuʼ ndisə shìsə a və yì mòʼ à wen a wèn lì ə̀ bwènsə̀ mòʼ nkàntə̀ ndisə wen a wen a wèn mù lyɨ̀ wen ədyʉ̀ bantə a kəntò.

Və bantə Yesò a kəntò

²¹ Vəwenə sə ndyʉ̀ a ji ə̀ yen wutsen a və ndzàŋə̀ nə̀ Simon andiʼ wù Silen, mu ghə̀ lù fa tì loʼ a shi təsɨm sə bwènə̀ pfwo. (Simon a ghèn ndiʼ tìʼì Alèksandà wenə̀ Lufùs.) Vəwenə kàyn la ghə̀ byeʼe kəntò kə Yesò.

²² Və lyɨ̀ Yesò ə̀ dyʉ̀ nə̀ wen a kəshi kətsenkə a və ndzàŋə̀ nə̀ Golgotà (kə shə̀ʼtə̀ la a dìʼi Kəshi kə Kəwuʼlə kə kətʉ)

²³ Və nè dyʉ̀ ə̀ zaʼa tsu, ə̀ lyɨ̀ məlyʉ̀ʼ ə̀ fɨ̀ŋtə̀ kəgəŋ kətsen tsu a və dzàŋ nə̀ miyif sə ku à wen, alì ghə̀ tyen la yì ko a nyʉ.

²⁴ Vəwenə mù bantə wen a kəntò, ə ghʉ ndisə wen sə temə bàʼ ndi yen la a lyɨ̀ ndo lyɨ kəbàs kə kò lo.

²⁵ Və mbantə wen a kəlyɨŋ kə təzhʉ abʉ̀muʼ a boʼòngə̀ŋ.

²⁶ Və ne bantə wen mè, ə nyòʼ kənyʉ̀ kì a və ngàʼà la ghə̀ ne lì a kəbàŋ kə fəkòʼ ə̀ bayntə a wen a kətʉ kə kəntò la,“FÒN VƏJEW.”

²⁷ Və ne a lì bè bantə viʼi vətsenvə vəbò. Və mbantə wù muʼ a shyə kwoŋ toghə nə̀ ghətsen a shyə kwoŋ nànkwè.

²⁸ (A ji ghèn kənyʉ̀ a və ə̀ nyòʼò a ŋwàʼlə̀ Nyìngòŋ la, “Və lu taŋ wen a tì viʼi kwaʼà təsoʼ” ndiʼ nəmwèʼè.)

²⁹ Viʼi mù sə chò fa ji nə̀ʼə̀ tʉ vəwenə telə̀ wen gàʼà la, “Gaʼa kò wù tə gàʼ la wu a bə̀ytə ngə̀ŋ Nyìngòŋ ə bwènsə̀ bwom a mətsi ntaʼ.

³⁰ Bwòŋsə lì wen ə wu luwèn ə̀ shiʼi fa kəntò yì yès yen.”

³¹ Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ bè sə̀ chəʼə wen gàʼà à vəwenə a ntìntìn la, “Ghə̀ tə mbwòŋsə̀ viʼi alì luwèn ghə̀ zì kò ghə̀ lə̀ bwòŋsə̀ wen ə wen.”

³² “Shiʼi fa kəntò a Klistò ə̀ fòn viʼi Islel! ndi yès yen ə̀ byɨmə à wù.” Viʼi vi vəbò a və mbantə wen wenə̀ vəwenə lì bè sə telə̀ wen.

Yesò Pfʉ

³³ A nè sə ndiʼ a ntìntìn nə̀nchwì, shi bvʉ̀tə̀ fen no tsèm, nè bwènsə̀ bayn tò a kəlyɨŋ kə mbwaʼà kəbə̀ŋ.

³⁴ A zhʉ ayì, Yesò dì no a gɨ̀ to la, “Eloi Eloi, Lama sabatani?” Adiʼ la, “Nyìngòŋ ghom, Nyìngòŋ ghom, byìʼì ghò a wù kyemə mo a?”

³⁵ Viʼi vətsenvə a və nti boʼsə tsu zhʉ a lì sə gàʼà la, “Ghə̀ŋ zhʉtə a! ghə̀ sə dzàŋ Elijà.”

³⁶ Wutsen fa ntìntìn viʼi a vyi nyɨŋ dyʉ̀ lyɨ̀ nkuncha ə̀ chʉ̀ kəmbas kə məlyʉ̀ʼ tsu ə̀ sù a kətyɨ sə ku la ghə̀ nyʉ gàʼà la, “Ghə̀ŋ kye lì vəghəŋ yen la Elijà a vì əshiʼsə wen lo?”

³⁷ Yesò ku nkəʼ dì ə tem kəzhwì kə wen tò ghayn mùʼ.

³⁸ Ndisə a və nghaŋsə̀ la sə ngə̀tə̀ ngə̀ŋ Nyìngòŋ a ghan à bò bàymə̀ əwaŋ bò əlù fa kətʉ shìʼi zaʼa a tèn.

³⁹ Kətʉ kə vəsugyèʼ kì a kə nti tsu nè yèn ji a Yesò ndì be pfʉ fa tsu, ə̀ gàʼ la, “Nəmwèʼè, wìʼ ghèn tə ndiʼ no wàyn Nyìngòŋ.”

⁴⁰ Ki vətsenvə mbe ti no kəghaf yenə nyʉ̀ tsèm a və nchò. A ntìntìn ki avenə, à ndìʼ, Mèli wù Magdala, Mèli lì Jems tyetə wen ə Josèf bènə̀ Salomè.

⁴¹ Vəwenə ngyàmtə̀ Yesò a tʉʼ a ghə̀ ndìʼ a Galìlì be dzɨ̀mtə̀ wen. Ki vətsenvə mbe dìʼ tsu no və ghoʼo a və ndzɨ̀mtə̀ wen ə kùʼ a Jelusalèm.

Və bvɨ̀mə̀ Yesò

^42-43 A sə ndiʼ a kəlyɨŋ kə zhʉ mpfwomə a tʉʼ ndiʼi layn a ndiʼ kətsi kə zhʉtəkə, Josèf wù Alimàtya, kwiʼi tyɨm dyʉ̀ gàʼ à Bilate la yì kəŋ əlyɨ̀ kəmpfʉ kə Yesò ə dyʉ̀ bvɨ̀mə̀. Ghə̀ ndiʼ wìʼ a və ngumlə̀ a tì ntsèntə̀ viʼi ku təsoʼ. Ghə̀ nkə̀ʼtə̀ soʼ foyn Nyìngòŋ.

⁴⁴ Bilate ndìʼ nə̀ kaynə əzhʉ la Yesò pfʉ li, mù tɨm ə̀ dzàŋ kətʉ kə vəsugyèʼ ə bèm à wen la Yesò pfʉ li nəmwèʼè lo. Ghə̀ byɨmə.

⁴⁵ Bilate mù kù kədyòʼ la Josèf lyɨ kəmpfʉ kə wen.

⁴⁶ Ghə̀ zen ə kwoŋ ndisə ə̀ shìʼsə kəmpfʉ kə Yesò ə̀ lèmtə tsu ə̀ bvɨ̀mə̀ wen a tì sè a və ntyuŋə a wu, ə̀ buŋsə ngùʼ ə shiʼi kènə chʉ̀ sè wen tsu.

⁴⁷ Mèli wù Magdala nə̀ Mèli lì Josèf yen kəshi a və mbvɨ̀mə̀ Yesò tsu.