Ŋwàʼlə̀ Mak 1 - The New Testament in the Babanki language

Shyèʼè Joyn wù ku à mù

¹ Kènkə diʼ kənzìtə kə ntɨm jùŋə Yesò Klistò, ə Wàyn Nyìngòŋ.

² Nshə̀ʼtə̀ Isayà nsə̀ diʼ mu ghə̀ nyòʼò li ntɨm. Nyìngòŋ ghə̀ gàʼà la, “Yen a! Mà lu tɨm wù ntɨm ə̀ mò ə ghə̀ dyʉ̀ à wù à mbì ə̀ shɨ̀tə̀ jì à wù.

³ Wutsen ə zɨmə gàʼà fa nse zɨm la, ‘Ghə̀ŋ shɨtə jì Bobo. Ghə̀ŋ ne mə jìtə mə wen mə nàyn.’”

⁴ Joyn wù ku à mù mfʉ li vì a nse zɨm sə shə̀ʼtə̀ ntɨm Nyìngòŋ gàʼà la, “Viʼi kwitə tətyɨm tə vəwenə ə shi mu ndi Nyìngòŋ maʼa nyʉ̀ byɨvə vəwenə.”

⁵ Viʼi lù fa loʼ Judiyà nə̀ fa Jelusalèm tò vətsèm ə̀ dyʉ̀ à wen sə dì byìʼì mbyɨsə vəwenə. Ghə̀ ku mu à vəwenə à mù mə Jodàn.

⁶ Kə ndiʼ a lì Joyn mòʼò ndisə mu və bo nə̀ nyɨŋsə nyàm tsen a və dzàŋə nə̀ Kamel, kwiʼi kətəŋ mu və shɨ̀tə̀ nə̀ gwʉ̀ nyàm. Fozhɨvə wen ndìʼ tò ngùməsə nə̀ fədyom.

⁷ Ghə̀ nshə̀ʼtə̀ kənyʉ̀ kə Nyìngòŋ à viʼi gàʼà la, “Wìʼ ə vì fà mò bàm a ghə̀ chò mò. Mà ko kwʉ̀ʼ tè a nə̀ kəkòs əlaŋtə la mà zàtə̀ mpfʉ̀sə gwʉsə aghʉ wen.

⁸ Mà ku mu à ghə̀ŋ tò nə̀ mu a lì ghə̀ diʼ vì ku mu à ghə̀ŋ nə̀ kəzhwì kə ŋwoʼəkə.”

Ando Yesò nshì mu Satan mwòm wen

⁹ Andìʼ to mətsì ayì, Yesò lù fa Nazalèt ashə loʼ Galìlì ə̀ dyʉ̀ Joyn ku mu à wen à mù mə Jodàn.

¹⁰ Ghə̀ nè shì mu sə mfʉ̀ kuʼu vì fa mu, ə̀ yèn ando kaŋ bòʼmə̀, kəzhwì kə ŋwoʼəkə fʉ̀ shiʼi à wen a kətʉ diʼ tò nə̀ kəlàto.

¹¹ Gɨ̀ tsen fʉ̀ fa kàŋ gàʼà la, “Wù dìʼ wàyn kòŋ mò. Mà saŋlə̀ byìʼì wù nəkwoŋ.”

¹² No a zhʉ̀ kò, kəzhwì kəŋwoʼkə nè Yesò lù dyʉ̀ a nse zɨm,

¹³ ə̀ tsì tsu mətsi məwum nkàʼ, Satan mwòmsə̀ wen, ghə̀ be tsi dyʉ̀ tò a shi a nyamsə toʼ sə ntsi tsu, alì ntsɨ̀ŋsə ngə̀ŋ Nyìngòŋ sə nlye wen.

Yesò dzàŋ viʼi ku shʉsə vəkàʼ a nə̀ ndzɨ̀mtə̀sə bàm ə wen

¹⁴ A ndìʼ ando və nwè Joyn a mfɨŋ, Yesò bwènə̀ kuʼ dyʉ̀ a Galìlì sə shə̀ʼtə̀ ntɨm jùŋ Nyìngòŋ tsu,

¹⁵ gàʼà la, “Zhʉ kwʉʼʉ̀ li, soʼo Fòyn Nyìngòŋ boʼsə li. Ghə̀ŋ kwitə tətyɨm təŋtə fà ghə̀ŋ a mbyɨsə ə̀ byɨmə ntɨm jùŋə ghèn.”

¹⁶ Andiʼ kətsi kətsenkə Yesò sə nchò fa mbyɨ̀ mo Galìlì, ə̀ yèn Simon wenə̀ lèmə̀ wen Andɨ̀lò, vəwenə mòʼò dyʉ̀ nə̀ fəlàm fə a tì à mù əku shʉsə ando andìʼ ə shwèʼè vəwenə.

¹⁷ Ghə̀ mù gàʼ à vəwenə la, “Ghə̀ŋ vi ə dzɨ̀mtə̀ mò, mà ziʼi ghə̀ŋ, ghə̀ŋ mbòŋsə̀ kutə̀ viʼi.”

¹⁸ No a zhʉ̀ kò, vəwenə ghʉsə məlàm mə vəwenə tsu ə dzɨ̀mtə̀ Yesò.

¹⁹ Ghə̀ bè sə dyʉ̀tə̀ tò alə̀ bè yèn Jems wenə̀ lèmə̀ wen ə̀ Joyn vunə Zebedì vəwenə ŋwʉʼ à vəwenə a nkànuʼ temə məlàm mə vəwenə.

²⁰ Ando Yesò nyenə vəwenə ghə̀ dzàŋ vəwenə tò dzàŋə. Vəwenə fʉ̀ ghʉ̀sə tìʼ vəwenə wenə̀ viʼi shwèʼ vi a və ndiʼ tsu a tì nkànuʼ ayì ə̀ dzɨ̀mtə̀ dyʉ̀ nə̀ Yesò.

Yesò dzɨ̀m ə̀ shìsə̀ kəzhwì kə byɨkə fà wìʼ a wèn

²¹ Vəwenə nè dyʉ̀ zaʼa a ntə̀ʼ Kàbanùm, a nsə ndiʼ a kətsi kə zhʉtəkə, ghə̀ dyʉ̀ kwèn a ngə̀ŋ ntsèntə̀ sə ziʼi viʼi tsu.

²² Ziʼi wen nè viʼi sə diʼ nə̀ kaynə byìʼàndo ghə̀ ko ndìʼsə̀ a nə̀ ndìʼsə̀sə təsoʼ. Ghə̀ ndìʼsə̀ a nə̀ wìʼ a ghə̀ kìʼ àdyoʼ.

²³ A sətsèn və yen wìʼ a ngə̀ŋ ntsèntə̀ ayì ghə̀ kiʼ kəzhwì kə byɨkə kə nè ghə̀ zɨmə

²⁴ ə̀ gàʼ la, “Wù kəŋə ghò à yès a ntìntìn a Yesò wàyn wù Nazalèt ghèn, wù vi əbyɨsə yes mu? Mà kɨ li wìʼ a wù diʼ wen. A dìʼ wù, wu ŋwoʼə Nyìngòŋ.”

²⁵ A lì Yesò kəŋkə̀ kəzhwì kə byɨkə akì gàʼà la, “Kə be gàʼ! chò fʉ̀ fa wèn wìʼ ghèn!”

²⁶ Kəzhwì kə byɨkə akì nə̀ʼ wìʼ ayì no nànto ə̀ bè zɨ̀mə no a gɨ to ə̀ mù fʉ̀ fa wen a wèn.

²⁷ Viʼi sə diʼ nə̀ kanə mù sə bèmə̀ à vəwenə a ntìntìn la, “Kènkə dìʼ ghò? Nki ziʼi fighə mu? Wìʼ ghèn ə kàyntə̀ nyʉ̀ nə̀ àdyoʼ no tè bè zhwì byɨvə zhʉ wen.”

²⁸ Əzìtə̀ fa zhʉ ayì, soʼgho byìʼì ziʼi wen ayi sàykə dyʉ̀ no a shì tsèm a Galìlì.

Yesò chʉʼ viʼi no vəghoʼo

²⁹ Yesò wenə Jems nə̀ Joyn fʉ̀ fa ngə̀ŋ ntsèntə̀ yì no a zhʉ̀ kò ə̀ nàyn tò fəchìʼ a ngə̀ŋ Simon bènə̀ Andɨ̀lò.

³⁰ Kə nsə ndiʼ a lì chì Simon ə wùwì kiʼ fiba. Yesò sə nkwenə vì a ngə̀ŋ no a zhʉ̀ kò və shə̀ʼtə̀ kwaʼa ayi à wen.

³¹ Ghə̀ dyʉ̀ ghàʼ kəvu kə wen ə̀ tsòʼsə̀ wen, no a zhʉ̀ kò bvìʼ wen yì mè ghə̀ lù ku fozhɨvə vəwenə zhɨ.

³² A nè sə ndiʼ a kəlyɨŋ kə zhʉ mpfwòmə, viʼi vì nə̀ viʼi və kwaʼkəvə vəwenə no vətsèm bènə̀ vi a və nkiʼi zhwì byɨvə,

³³ viʼi lù fa ntə̀ʼ ayì no vətsèm ə̀ vì zhùŋtə̀ tò a chʉ ngə̀ŋ ayì.

³⁴ Yesò chʉʼ viʼi no vəghoʼo a və nkiʼi təkwaʼa tò a tənkì a tənkì, be dzɨ̀m shìsə̀ zhwì byɨvə no ghoʼo fa təwèn vətsenvə. Ghə̀ ndzɨ̀mə̀ a lì kò ghə̀ lə mbyɨmə la no kəzhwì kə byɨkə kə mùʼ kə gàʼ kənyʉ̀ byìʼàndo zhwì byɨvə a vyi nkɨ wen.

Yesò shə̀ʼtə̀ kənyʉ̀ kə Nyìngòŋ a Galìlì

³⁵ Tʉʼʉ sə nlàynə vì, ghə̀ lu ə̀ fʉ̀ dyʉ̀ a kəshi kəlyomtəkə tò wen nyɨŋ, mù sə jɨ̀mə̀.

³⁶ Simon wenə̀ viʼi jèʼè wen mù sə jèʼè kəŋə wen.

³⁷ A ndìʼ ando vəwenə nyènə wen, vəwenə gàʼ a wen la, “Və kəŋ wù tò vətsèm!”

³⁸ Ghə̀ gàʼ à vəwenə la, “Ghə̀ŋ vi vəghəŋ dyʉ̀ a ntə̀ʼsə sətsensə a sə boʼsə a shə̀, ndi mà be shə̀ʼtə̀ dyʉ̀ nə̀ kənyʉ̀ kə Nyìngòŋ kə tsu, byìʼàndo a dìʼ kənyʉ̀ a mà tə vì ənè.”

³⁹ Ghə̀ gàʼ a lì sə jèʼè no shi tsèm a Galìlì, kwenə a aloʼ ntsèntə̀sə vəwenə gàʼà kənyʉ̀ kə Nyìngòŋ tsu, be dzɨ̀mə̀ shìsə̀ zhwì byɨvə fà viʼi a təwèn.

Yesò chʉʼ wu kənsòtə̀

⁴⁰ Wù kənsòtə̀ tsen vì ə̀ shiʼi à wen a nchiʼsə alwi a shɨ Yesò mù sə sensə̀ wen gàʼà la, “Wù sətsèn kòŋ mù wù zi wù chʉʼ mo.”

⁴¹ Yesò sə diʼ nə̀ kusə nshinsə à wìʼ ayì no nànto ə̀ nàʼsə̀ kəvu kə wen ə̀ kùmsə̀ wen ə̀ gàʼ la, “Ma kòŋ li, to lì.”

⁴² No a zhʉ̀ kò, kənsòtə̀ akì mè fa wen a wèn ghə̀ to.

⁴³ Yesò mù gàʼ à wen la ghə̀ ə̀ ndyʉ̀ bè pfàntə̀ wen la,

⁴⁴ “Kə a mwòm la wù shə̀ʼtə̀ kənyʉ̀ a wìʼ a kə yì chò. Dyʉ̀ diʼ wen ə wu tò à pfèm ə̀ ngə̀ŋ Nyìngòŋ bè kù kəku kì a soʼ Mosìs ngàʼa, ndi dìʼ la wù to li fà wù a kənsòtə̀.”

⁴⁵ Ghə̀ bòŋsə̀ dyʉ̀ sə kwe no ndo ghə̀ shə̀ʼtə̀ kənyʉ̀ akì tò shə̀ʼtə̀ à wen. Soʼgho ayì sàykə̀ a shi no tsèm, kə mù sə chò Yesò ə ghə̀ kwen a tì ntə̀ʼ ayì a dayn, ghə̀ mù sə jèʼè dyʉ̀ tò fa wenə̀ loʼ a nse zɨm. Alì viʼi be sə fʉ fa shi tsèm tò fʉ vi yenə wen tsu.