Ŋwàʼlə̀ Luk 5 - The New Testament in the Babanki language

Yesò lyɨ̀ ndzɨ̀mtə̀sə bàm wen sə mbì

¹ A nə̀ sə diʼ a kətsi kətsenkə, Yesò dyʉ̀ tɨmə a mbyɨ̀ mo Gènesalèt sə shə̀ʼtə̀ kənyʉ̀ kə Nyìngòŋ nòyn viʼi vì sə fosə kwenə vì əzhʉtə.

² Ghə̀ yen və nkanuʼ və bò a mbyɨ̀ Amù mu viʼi vyì a və ə nku shʉsə fʉ̀li fa tsu ə ŋwʉʼmə a bàm ə sə shyə̀ʼ mə̀lam mə vəwenə.

³ Ghə̀ kwen a ghə̀ muʼ a ndiʼi ghə̀ Simùn, ə gàʼ a wen la ghə̀ zəf ə kwentə dyʉ̀ nə̀ wen a mù. A ndiʼ ando Simùn nkwentəli dyʉ̀ nə̀ wen, ghə̀ shiʼi ŋwʉʼ tsu mù sə̀ dìʼsə viʼi.

⁴ Ghə̀ nè gàʼà myètə̀ mù gàʼ a Simùn la, “Kwentə dyʉ̀ nə̀ nkanuʼ a ntìntìn amù, moʼ shiʼsə mə̀lam məŋə, a ghə̀ŋ a ku shʉsə.”

⁵ Simùn bwènsə̀ gàʼ a wen la, “Yes tə tsi tò mə moʼ a Ti, kò yes lu ku kəfo, ali à sətsen à gàʼ wù alə̀, mà gàʼ, və bè moʼ shiʼsə.”

⁶ Vəwenə mòʼ məlàm myì ə ku shʉsə no se ghoʼo mə̀lam mə vəwenə sə kəŋ tinkə.

⁷ Vəwenə kabtə̀ viʼi jeʼ vəwenə la vəwenə vi ə gyàmtə̀ vəwenə, vəwenə vi nə̀ nkanuʼ tsen ə lwinsə və nkanuʼ na vyì və bò və sə̀ kəŋ shwemə a mù.

⁸ A ndiʼ ando Simùn Bità nyenə kənyʉ̀ a kə nlyɨ̀ kəshi, ghə̀ shiʼi à wen alwi ashɨ Yesò ə gàʼ a wen la, “Lu fa mò a mbyɨ̀ a Tìʼ. Mà diʼ wu ə byɨ!”

⁹ Ghə̀ ngàʼa ali byìʼì ando wen viʼi jèʼ wen ndiʼ nə̀ kaynə byìʼì shʉsə sə ghoʼsə shì a vəwenə nku.

¹⁰ Vunə Zebedì vyì a və Simùn nshwèʼè a muʼu, a ndiʼi Jems nə̀ Joyn, bè ndìʼi nə̀ kàynə. Yesò mù gàʼ a Simùn la, “Kə wù be fàyn, əzìtə̀ fa luwen ədyʉ̀ mbì, wù ne nku viʼi.”

¹¹ Vəwenə nè bwènə̀ vì nə̀ və nkanuʼ və vəwenə a mbyɨ̀ amù ə ghʉsə no mə gho ə dzɨ̀mtə̀ dyʉ̀ nə̀ Yesò.

Yesò chʉ wù kənsòtə̀

¹² Yesò lu dyʉ̀ a ntə̀ʼ tsen, wìʼ vì mu kənsòtə̀ kə pfiʼli wenə wen no tsèm. Ghə̀ nə̀ yen Yesò ə vì ə fəŋ a wen ashɨ ə sensə wen la ghə̀ chʉʼ wen gàʼ la, “Tìʼ, wù sətsen kòŋ, wu chʉʼ mo.”

¹³ Ghə̀ nàʼsə̀ kəvu kə wen ə kumə wen gàʼ la, “Ma kòŋ li, toli.” No a zhʉ kò, kənsòtə̀ a kyì mè fa wen a wen.

¹⁴ Yesò tyɨftə wen la, “Kə wù a mwòm əshə̀ʼtə̀ a wìʼ,” ali “Dyʉ̀ diʼ wen wu a pfem ngə̀ŋ Nyìngòŋ ə ku kəku kyi a soʼ Mosìs gàʼa la wìʼ to fa kənsòtə̀, ghə̀ ku ndi viʼi kɨ la wu toli.”

¹⁵ Ali soʼgho byìʼì Yesò zaʼa no shi tsèm nòyn viʼi vì əzhʉtə ando ghə̀ dìʼsə be vì la ghə̀ chʉʼ təkwaʼa tə vəwenə.

¹⁶ Ali ghə̀ moʼtə vəwenə ə dyʉ̀ a kəshi, tò wen nyɨŋ ə jɨm.

Yesò chʉʼ wù kənkwaʼkə

¹⁷ A sə ndiʼ kətsi kətsenkə tò mətsi ayì, Yesò sə nziʼi a kəshi, viʼi Falàsi nə̀ ndìʼsə̀sə təsoʼ sə ŋwʉʼ tsu, mu vəwenə fʉ̀ no fa ntə̀ʼsə tsèm a Galìlì nə̀ Judiyà bènə̀ Jelusalèm. A ndiʼ ali, kədyòʼ kə Bobo kə diʼ à wen ə ghə̀ chʉʼ təkwaʼa.

¹⁸ Tò alə̀, viʼi sə vì nə̀ wìʼ mu ghə̀ kwaʼkəli, a kəbùŋ, sə kəŋ jì əkwen nə̀ wen a ngə̀ŋ yì a Yesò ndiʼ tsu ə nyòŋsə̀ wen a wenə ashɨ.

¹⁹ Ali jì nko ndiʼ ə vəwenə kwen nə̀ wen byìʼì nòyn viʼi a ghə̀ ndiʼi. Vəwenə kuʼ nə̀ wen jì fa kətʉ kə ngə̀ŋ ə tsuʼ kəbʉ̀ʼ ə shiʼsə wen ə dyʉ̀ nə̀ wen a ntìntìn nòyn yì ə nyòŋsə̀ wen ashɨ Yesò.

²⁰ A ndiʼ ando ghə̀ nyenli byɨmə a vəwenə nkiʼi, ghə̀ gàʼ à wù kənkwaʼkə yì la, “Ma lyesəli nku mbyɨ shəsə!”

²¹ Ndìʼsə̀ sə təsoʼ nə̀ və Falàsi zìtə̀ sə bèmə̀ à vəwenə ntyìntyìn la, “Ghèn diʼ ndo a ghə̀ telə̀ Nyìngòŋ alə̀ a? A lə zì a lyesə ku ndo mbyɨsə wìʼ, chò tò Nyìngòŋ a?”

²² Ando Yesò nkɨ kənyʉ̀ vəwenə nkwòʼtə̀ ghə̀ bèm a vəwenə la, “Ghə̀ŋ kayntə nyʉ̀ və ne alə̀ byiʼ gho?

²³ A bwaʼmə kəkò, əgàʼ la, Və lyesəli nku mbyɨ shəsə mu, əgàʼ la, ‘Lu wù jeʼ lo?’

²⁴ Ma diʼi a ghə̀ŋ luwen la Wàyn wìʼ kiʼi adyòʼ a kwi nse ə lyesə ku mbyɨsə viʼi.” Ghə̀ mù gàʼ a wù ə kənkwaʼkə yi la, “Mà gàʼ a wù la wù lu ə lyɨ̀ kəbùŋ kyə̀ ə pfwo.”

²⁵ A zhʉ ayì ghə̀ lù tò vəwenə ashɨ ə lyɨ̀ kəbùŋ kə wen a ghə̀ yi nyoŋ tsu sə̀ pfwo, ghoʼsə dyʉ̀ nə̀ Nyìngòŋ.

²⁶ Vəwenə sə diʼ nə̀ kàynə, fàyn ghaʼ vəwenə, vəwenə bwomsə Nyìngòŋ gàʼ à la, “Vəghəŋ yenli nyʉ̀ kàynə və layn!”

Yesò zhɨ wenə viʼi nə̀ nyʉ̀ byɨvə

²⁷ A bàm nyʉ̀ venə, Yesò bè sə ndyʉ̀ ə yen wù, tinə kənsè, zhiʼ wen diʼ Levì, ghə̀ ŋwʉʼ a tò yi a və tinə kənsè tsu, gàʼ a wen la, “Dzɨ̀mtə̀ mo.”

²⁸ No a zhʉ kò, ghə̀ ghʉsə fo tsèm ə dzɨ̀mtə̀ wen.

²⁹ Levì shə̀tə̀ no ntaʼ ghoʼo à wen à ngə̀ŋ à Yesò. Viʼi vì tsu no və ghoʼo boʼsə nə̀ viʼi tinə kənsè, wen vəwenə mù sə̀ zhɨ.

³⁰ Viʼi Falàsi vətsevə nə̀ ndìʼsə̀sə təsoʼ mù sə dèmkə̀ bèmə a ndzɨ̀mtə̀sə bàm Yesò la, “Byiʼi ghò a ghə̀ŋ zhɨ bè nyʉ ghə̀ŋ viʼi a və tinə kənsè bènə̀ viʼi nè nyʉ̀ byɨvə a?”

³¹ Yesò bwènsə̀ gàʼ a vəwenə la, “Viʼi a və to ko kəŋ wù chʉʼʉ viʼi ali a kəŋ to viʼi və kwaʼa kə və.

³² Mà ko vi ə tisə viʼi a və sə̀ kiʼi ntsìnə̀ tɨmə, mà vì byiʼ viʼi nè nyʉ̀ byɨvə ənè la vəwenə kwitə tətyɨm tə vəwenə.”

³³ Vəwenə gàʼ à Yesò la, “Ndzɨ̀mtə̀sə bàm Joyn sə mbamə chʉ̀, jɨ̀mə, ndə̀ŋndəŋ ando ndzɨ̀mtə̀sə Falàsi mbamə chʉ̀, bè jɨ̀mə̀ ali shəsə zhɨ tò zhɨ bè nyʉ ando vəwenə kòŋə̀.”

³⁴ Yesò gàʼ a vəwenə la, “Və la zì və byɨmə la viʼi mbam ə chʉ̀ a kəshi kə lam a, lɨmə wùwì bù tsu a?

³⁵ Kətsi kə lu vì, a və a lyɨ̀ lɨmə wùwì fa vəwenə a ntìntìn, ə lu nə̀ wen a vəwenə mu ne mbamə chʉ̀.”

³⁶ Ghə̀ gàʼ ali ə mò ngàyn tsen a ghə̀ ngàʼ à la, “Wìʼ ko zì ghə̀ lyɨ̀ kəbàs kə ndisə kə fikə ə baʼsə ndisə musə tsu. Wìʼ sətsen nè ali, mu ghə̀ byɨbsə ndisə fisə a shi tò kədyàŋ, ko kəbàs kə fi kyì à kusə ndisə musə shi.

³⁷ A diʼ ndə̀ŋndəŋ ando wìʼ zì kò ghə̀ lə̀ wye məlyʉ̀ʼ mə mfimə̀ a vəsaʼ və gwʉ̀ nyàm və muvə byìʼàndo ghə̀ sətsen nè alì məlyʉ̀ʼ a myì nè sə to ə bàytə̀ vəsaʼ, ghə̀ gho məlyʉ̀ʼ bè gho vəsaʼ.

³⁸ Və diʼi wye məlyʉ̀ʼ mə mfimə̀ a vəsaʼ və fivə.

³⁹ Gaʼa kò ghə̀ŋ kɨ la wìʼ a ghə̀ nyʉ məlyʉ̀ʼ mu mə toli, ghə̀ ko zì ghə̀ be kòŋ məlyʉ̀ʼ kenla mə toli, ghə̀ faŋ tò la, ‘Məlyʉ̀ʼ mə to, myì boŋ.’”