Ŋwàʼlə̀ Luk 4 - The New Testament in the Babanki language

Yesò to ghoʼ Deblə̀

¹ Yesò bwènə̀ fʉ̀ kuʼ fa mù mə Jodàn mu kəzhwì kəŋwoʼkə lwinli à wen tyɨm, kə lyɨ̀ wen ə kwen nə̀ wen a nse zɨm.

² Deblə̀ mwom ə wen tsu a mətsi məwum nkàʼ. Ghə̀ tsi mətsi a mèn no ntsèm kò ghə̀ lə zhɨ kəfo no fa mpfen, jɨ̀ŋ mù sə zafə wen.

³ Deblə̀ mù gàʼ a wen la “A zhʉ a wu diʼi wàyn Nyìngòŋ, gàʼ li nguʼ ghèn kaʼkə a kəfo kəzhɨkə, wù zhɨ.”

⁴ Yesò bwènsə̀ gàʼ a wen la “Və nyòʼ li a ŋwàʼlə̀ Nyìngòŋ la wìʼ ko tsi to byìʼì kəfo kəzhɨkə.”

⁵ Deblə̀ lyɨ̀ wen fa tsu ə kuʼ nə̀ wen a kəshi kəŋaŋtəkə, lyɨ̀ tò kətemə kə zhʉ ə diʼ təloʼ tə mbi a wen no tətsèm,

⁶ mù gàʼ a wen la “Ma a ku adyòʼ a wù la wù nsoʼo shi a vènə no tsèm nə̀ ghoʼo yi a ghə̀ diʼ tsu byiʼ ando və nku li à mò no tsèm mu mà kòŋ mà ku à no məndò.

⁷ Wù sətsèn gumlə mò, à ne kiʼ to wù no tsèm.”

⁸ Yesò bwènsə̀ la “Və nyòʼ li a ŋwàʼlə̀ Nyìngòŋ la wù diʼi ə gumlə tò Bobo Nyìngòŋ wù bè shyèʼ tò a wen.”

⁹ Ghə̀ lyɨ̀ Yesò fa tsu ə dyʉ̀ nə̀ wen a Jelusalèm ə kuʼ tom wen no a fədzuʼudzuʼu fə ngə̀ŋ Nyìngòŋ ghoʼo ə gàʼ à wen la “A zhʉ a wù diʼi wàyn Nyìngòŋ, tsoʼo li fa kəshi ghèn a nsè mà yen

¹⁰ byiʼàndo və nyòʼ li a ŋwàʼlə̀ Nyìngòŋ la ghə̀ ne tɨmə ntsɨŋsə wen la sə ntsɨ̀ŋə̀ wù.

¹¹ Sə ne ghaʼ wù ə jèʼsə wù a kaŋ ndi nè la kə wù a tem kəghʉ kyèkə a nguʼ.”

¹² Alì Yesò bwènsə̀ gàʼ a wen la “Və nyòʼ li a ŋwàʼlə̀ Nyìngòŋ la, kə wù lə mwòmsə̀ Bobo Nyìngòŋ wù.”

¹³ A ndiʼ ando Deblə̀ mwòmsə̀ li Yesò tò jì sə tsèm, ghə̀ bwènə̀ fa bàm ə Yesò a kətsi ayì.

Kənzìtə̀ kə shyèʼ Yesò a Galìlì

¹⁴ Yesò bwènə̀ pfwo dyʉ̀ a Galìlì,bu jèʼè tò kədyòʼ kəzhwì kəŋwoʼkə. Soʼgho byìʼì wen jèʼè a loʼ ayi no tsèm.

¹⁵ Ghə̀ nè sə njèʼè ziʼi a aloʼ ntsentə Nyìngòŋ və Jus, no məndo sə kuʼsə wen.

Və tensə Yesò a nazalèt

¹⁶ Yesò lu dyʉ̀ a Nazalèt a ndiʼ ntə̀ʼ a ghə̀ nkwi tsu, ə dyʉ̀ kwèn a ngə̀ŋ ntsentə a kətsi kə zhʉtə kə vəwenə kətsenkə ando à ndiʼ ntsìnə̀ wen ə lu tɨmə dzàŋ ŋwàʼlə̀ Nyìngòŋ.

¹⁷ Və ku ŋwàʼlə̀ nshə̀ʼtə̀ Isayà a wen, ghə̀ bòʼ ə kəŋ ə yen kəshi kyi a və ə nyòʼo tsu la:

¹⁸ Kəzhwì kə Bobo kə diʼ à mò a kətʉ, byiʼ ando ghə̀ tsuʼ li mò la ma shə̀ʼtə ntɨm jùŋ a viʼi a və femə a kəzhwì. Ghə̀ tɨm li mò la mà laʼà à viʼi vyi a və ghaʼtə li la kətsi kə kwʉʼli ə və ghʉsə vəwenə, be ntɨm mo la mà laʼà à nshɨfə la kətsi kə kwʉʼli ə vəwenə yenə shi, ə be shisə viʼi vyi a və nyàblə̀ nə̀ vəwenə li fa ngəʼ,

¹⁹ əlaʼà à viʼi a venə la ghèn diʼi ngwʉʼ yi a Tìʼ bwaʼsə viʼi wen tsu.

²⁰ Ando ghə̀ ndzàŋ myètə̀ kəshi a kèn, ghə̀ bwènsə̀ chiʼtə ŋwàʼlə̀ ayì ə kù a wìʼ yì a ghə̀ nghʉ ə shiʼi ŋwʉʼ. No məndo a ngə̀ŋ ntsentə tuŋə̀ ashɨ tò wen a wèn.

²¹ Ghə̀ mù gàʼa vəwenə la “Nyʉ̀ na venə a mà dzàŋli ghə̀ŋə zhʉ lə və kwʉʼli layn.”

²² No məndo yen la ghə̀ gàʼli a nkàyn sə̀ kayntə̀ la gaʼa gàʼà fwomə ghə̀ ghenə̀ fʉ̀ tò fa wen a chʉ̀ lo? Lu fa tsu ə bwènə̀ sə bèmə̀ la “Gàʼa kò ghèn diʼ wàyn Josèf lo?”

²³ Ghə̀ gàʼa vəwenə la “Ma kɨli la ghə̀ŋ a laʼtə ə gàʼa gàʼ shəʼ ghə̀ ghenə a mò la wu chʉʼʉ viʼi, wen ə wu. Nèli nyʉ̀ vyi luwen a wù a loʼ a yes zhʉ la wù tə nè a kàbanùm.”

²⁴ Ghə̀ mù gàʼ la “Ma gàʼà nəmwèʼè à ghə̀ŋ la və kò lə nshisə nshə̀ʼtə̀ Nyìngòŋ a kəshi a ghə̀ fʉ̀ fa tsu.

²⁵ Ghə̀ŋ kɨ nəmwèʼè la andiʼ a tʉʼʉ Elija, kyì mpfʉ̀ nghoʼo a loʼ Islel. Nyìngòŋ bè nè kò ghʉ lu vì a ngwʉ̀sə̀ taʼ nə̀ kəbyeʼkə jɨŋ byɨ ghaʼ loʼ no tsèm.

²⁶ Nyìngòŋ tɨm Elijà tò wùwì mpfʉ̀ mùʼ a ntə̀ʼ zalafàt a loʼ Sidòn, ali kyi mpfʉ̀ nghoʼo a loʼ Islel.

²⁷ A diʼ ndə̀ŋndəŋ ando à ndiʼ a tʉʼʉ nshə̀ʼtə̀ Elishà, nghoʼo viʼi a Islel nkwaʼa nə̀ kənsòtə̀ kə alì kò Nyìngòŋ chʉʼli no wìʼ mùʼ əcho Namàn a diʼ wù kətɨm a ghə̀ nlù fa Sylia.”

²⁸ Andiʼ ando vəwenə nzhʉli nyʉ̀ a vènə, a ghə̀ ngàʼ a ngə̀ŋ ntsèntə̀, tətyɨm tə vəwenə zaf no ŋàŋ.

²⁹ A zhʉ a ghèn, vəwenə lù guf wen ə fʉ̀ nə̀ wen fa ntə̀ʼ a yi ə lyɨ wen a kwi pfen yì a ntə̀ʼ ayi ndiʼ tsu sə kəŋ buŋsə wen a bàm.

³⁰ Alì ghə̀ bwènə̀ chò tò fa vəwenə a ntyìntyìn sə dyʉ̀ à wen kəshi.

Yesò dzɨ̀m kəzhwì kəbyɨkə

³¹ Ghə̀ nshili a ntə̀ʼ tsèn a Galìlì a və ndzàŋ nə̀ Kàbanùm, sə ziʼi vəwenə a kətsi kə zhʉtə kə kətsenkə.

³² Viʼi ndiʼ nə̀ kaynə byìʼàndo ziʼi wen nkiʼi adyòʼ.

³³ A ndiʼ a ngə̀ŋ a yì wutsen ndiʼ tsu a ghə̀ nkiʼi ə zhwì byɨvə a wen a wen, ghə̀ zɨmə no gɨ to la:

³⁴ “Wemey! wù kəŋ gho a yes a ntìntìn a Yesò, wàyn wu Nazalèt ghèn, wù vì byɨbsə yes mu? Ma kɨli wìʼ a wu diʼ wen wù diʼ wù ŋwoʼə Nyìngòŋ.”

³⁵ Yesò kayntə nyʉ̀ a kəzhwì kə byɨ a kyikə gàʼà la “Chɨmə toʼli ə chò fʉ̀ fa wenə wìʼ ghèn!” kəzhwì kə byɨ a kyi kə tem wìʼ ayi a nsè tò ashɨ viʼi ə fʉ̀ fa wen a wèn kenla kə lyomsəli wen.

³⁶ Vəwenə ndiʼ nə̀ kaynə ə mù sə̀ bèm a vəwenə ntyìntyìn əkɨ la “Wìʼ ghèn gàʼà alə̀ lo? Ghə̀ kàyntə̀ nyʉ̀, a zhwì byɨvə və fʉ̀ fa viʼi wen byìʼàndo ghə̀ kiʼi adyòʼ”

³⁷ Soʼgho byìʼì wen jèʼ no shi tsèm a shə loʼ ayi.

Yesò chʉʼ viʼi no və ghoʼo

³⁸ Yesò fʉ̀ fa ngə̀ŋ ntsèntə̀ ayì ə dyʉ̀ kwen a ngə̀ŋ Simon. A ndiʼ alì chì simon wùwì nkwaʼa nə̀ fiba to, vəwenə sensə Yesò la ghə̀ gyàmtə̀ wen.

³⁹ Ghə̀ dyʉ̀ tɨmə a wen kətʉ kə kwen, ə kəŋkə̀ fiba ayi ghə̀ mòʼtə̀ wen. Fa zhʉ a ghèn ghə̀ lù ku fozhɨvə, vəwenə zhɨ.

⁴⁰ Chʉzhʉ ne sə shwe, no məndo a ghə̀ kiʼ wu kwaʼa, kò ghə̀ kwaʼa tè nə̀ nkì kwaʼa kò, lyɨ̀ wen vì nə̀ wen à Yesò. Ghə̀ mù ghʉ avu wen a vəwenə a tʉ ə chʉʼ vəwenə.

⁴¹ Zhwì byɨvə bè fʉ̀ fa wèn nghoʼo viʼi zɨmə gàʼà la “Wu diʼ wàyn Nyìngòŋ.” Alì Yesò kəŋkə̀ vəwenə kènla ghə̀ ghʉsəli la vəwenə bè gàʼ kənyʉ̀ byìʼàndo vəwenə nkɨ la ghə̀ ndiʼ wìʼ yi a Nyìngòŋ tsuʼli ə ghʉ.

⁴² Ando tʉʼ nlàynə, Yesò lù dyʉ̀ a kəshi kəlyomtəkə, tò wen nyɨŋ. Nòynə viʼi fʉ̀ a ntə̀ʼ ayi sə jèʼè kəŋ wen, ə nè yen wen ə sə mwomsə ətàm la kə ghə̀ bè lù mòʼtə̀ vəwenə.

⁴³ Alì ghə̀ gàʼ a vəwenə la “Ma diʼi shə̀ʼtə̀ ntɨm jùŋ byìʼì soʼo foyn Nyìngòŋ a ntə̀ʼsə tsensə byiʼàndo à diʼ kənyʉ̀ a kèn a və tə tɨm mo la mà nè.”

⁴⁴ Ghə̀ mù lù dyʉ̀ sə̀ jèʼè shə̀ʼtə̀ ntɨm Nyìngòŋ aloʼ ntsentə a Judiyà.