Ŋwàʼlə̀ Luk 24 - The New Testament in the Babanki language

Yesò lù fa Pfʉ̀

¹ A ndiʼ a mbì kətsi a tì ngàm fi a ti boʼo ngə̀ŋ vəwenə lyɨ məzhiʼ məzuʼmə myì a mə lemtə a kayn a vəwenə tə shɨtə li ə dyʉ̀ a sè Yesò.

² Ə yèn la və buŋsə̀li nguʼ yì fa chʉ̀ sè ayì.

³ Vəwenə kwen a yi tin alì ko vəwenə lə̀ yèn bvenə Yesò.

⁴ Vəwenə bu kaynə kənyʉ̀ kènkə a sə tsen lyʉmə və bò, a və əmoʼ ndisə a sə baynə ŋwàŋtə̀ tɨmə a vəwenə mbyɨ.

⁵ Ki vyì sə fwaynə mu shisə tʉ vəwenə a nsè, ali lʉmə a vyi bèm a vəwenə la “Byiʼi ghò a ghə̀ŋ kəŋ wìʼ a ghə̀ diʼ to fa ti viʼi vəpfʉkəvə a?

⁶ Ghə̀ ko diʼ a shen, ghə̀ŋ kwòʼtə̀ kənyʉ̀ a ghə̀ ngàʼa ghə̀ŋ a tʉʼ a ghə̀ mbu a Galìlì.

⁷ La və di ku wàyn wìʼ a viʼi ne nyʉ̀ byɨvə, və bayntə wen a kəntò, a lə sə ndiʼ a bàm mətsi taʼ, ghə̀ bwòŋ fa pfʉ.”

⁸ Vəwenə mù kwòʼtə̀ gaʼa wen.

⁹ Vəwenə bwènə̀ dyʉ̀ fa sè yi shə̀ʼtə̀ kənyʉ̀ a kènkə a dzɨ̀mtə̀ sə bàm Yesò njʉ̀ mu be ne a viʼi ve vətsenvə.

¹⁰ Viʼi a və shə̀ʼtə̀ kənyʉ̀ a viʼi ntem gàʼa Nyìngòŋ ə ndi Mèli, a ghə̀ əlu fa Madalin Jowanà, Mèli ə li Jems bè nə̀ ki ve tsèm a və ndiʼ wen və wen,

¹¹ Alì kò vəwenə lə byɨmə kənyʉ̀ kì a viʼi ngàʼà,byìʼe ando,vəwenə kwòʼtə̀ la a diʼ fətitì gaʼa zɨ̀məghə̀.

¹² Bità mù lu nyɨŋ dyʉ̀ a be sè Yesò laŋtə lye tin yi, yen tò basə ndisə sə nyoŋ a nsè ghə̀ mu bwènə̀ dyʉ̀ sə̀ kaynə kənyʉ̀ a kə fʉ̀ Yesò bumbtə viʼi və bo.

A ji Emmyòs

¹³ Tò kətsi ayi, ndzɨ̀mtə̀sə bàm ə Yesò sə tsensə sə bò sə̀ jèʼè dyʉ̀ a loʼo tsèn ghə̀ a və ndzò nə̀ Emmyòs a ghə̀ ndiʼì və mayə̀ sòmbo lu fa Jelusalèm,

¹⁴ sə̀ gàʼà a vəwen a ntìntìn byìʼì nyʉ̀ no tsèm a və fʉ̀ lə̀.

¹⁵ Vəwenə mbu gàʼà nkayn Yesò dèmə̀ kwetə vəwenə sə̀ jèʼè dyʉ̀ wen tò muʼu,

¹⁶ ali kò vəwenə lə̀ kɨ wìʼ a ghə̀ diʼi wen.

¹⁷ Ghə̀ bèm a vəwenə la “a diʼ nki kənyʉ̀ kə kò a ghə̀ŋ bèsə̀ ale?” Vəwenə tɨmə sə kə̀ʼə̀ tò shinsə.

¹⁸ Wìʼ muʼ fa vəwenə a ntyìntyìn a və ndzò nə̀ Klobas gaʼa wen la “wu bè diʼ wu ghan a Jelusalèm a wu ko kɨ nyʉ̀ a kə tə fʉ̀ tsu a mətsi ghèn?”

¹⁹ Ghə̀ bwènsə̀ bèm a vəwenə la “Nyʉ̀ kò?” Vəwenə gàʼ a wen la “Nyʉ̀ kumsə Yesò wu Nazalèt, a ndiʼi nshyə̀ʼtə̀ ghoʼo. Ghə̀ əgaʼa bè nè nyʉ ghoʼkəvə a Nyìngòŋ viʼi bè byɨmə.

²⁰ Tʉtʉ vəpfèm və Nyìngòŋ nè viʼi a və soʼo vəghəŋ tə lyɨ wen ku la və zhwi wen, ə mù bayntə wen a kəntò.

²¹ Ali mù vəghəŋ nkwoʼtə̀ la a ndiʼi wen a ghə̀ ndiʼ lə bwòŋsə̀ viʼi Islel. Kənyʉ̀ a kə kwʉʼsə̀ tsu kə diʼi la a shi mətsi taʼ fa kətsi a nyʉ̀ venə tə̀ fʉ̀.

²² Əbe sə dyʉ̀ la ki vətsen və fa yes a ntyìntyìn nè yes sə diʼ nə̀ kaynə. Vəwenə yi ndiʼi a benə sè yi tò ti boʼngə̀ŋ,

²³ kò vəwenə lə̀ yènə ə bvenə wen vəwenə bwènə̀ vi sə gaʼà la vəwenə yi yèn ntsɨ̀ŋsə ngə̀ŋ Nyìngòŋ sə fʉ̀ a vəwenə a shi to nə̀ jòm sə gaʼà.

²⁴ Viʼi vətsen və fa yes a ntyìntyìn nlu ə dyʉ̀ a be sè ayì, bè yèn tò ndə̀ŋndəŋ kənyʉ̀ ando ki vyi yi gàʼ, ali kò vəwenə lə yènə wen”.

²⁵ Ghə̀ mù bwènsə̀ gàʼ a vəwenə la. Ghə̀ŋ ndiʼi ndzə̀ŋtə̀, tətyɨm tyəŋtə bwaʼa ghə̀ŋ byɨmə kənyʉ̀ a nshə̀ʼtə̀sə ngaʼa.

²⁶ Nshə̀ʼtə̀sə bè ko gàʼa la kè bè ko ndiʼ la Klistò diʼi yèn ngəʼ mibu kwèn a wen a fòyn?

²⁷ Ghə̀ mù zìtə̀ fa Mosìs nə̀ nshə̀ʼtə̀sə no sə̀tsèm əgaʼa laynsə nyʉ̀ tsèm a və nyoʼo a ŋwàʼlə̀ Nyìngòŋ byìʼì wen. Ghə̀ mù gaʼa laynsə a vəwenə nyʉ̀ tsèm zìtə̀ fa Mosìs ədyʉ̀ a nshə̀ʼtə̀sə sətsèm nyoʼo li byìʼì wen.

²⁸ Ando vəwenə boʼsə dyʉ̀ a loʼo vəwenə dyʉ̀ tsu, Yesò nè to sə ghə̀ bù dyʉ̀ nə̀ mbi,

²⁹ ali vəwenə sensə̀ wen la ghə̀ ndiʼi we vəwenə nətʉ̀ ayì ando zhʉ̀ ndyʉ̀ li ə shi sə fenə̀.

Ghə̀ mù dyʉ̀ ə tsi wenə vəwenə

³⁰ Ando ghə̀ ŋwʉʼmə wenə vəwenə a kəchiʼ əzhɨ, ghə̀ lyɨ̀ kə̀bayn ə bwaʼsə̀, ə byəʼlə bè mù ku a vəwenə

³¹ tò a zhʉ a ghèn, tətof tə vəwenə bòʼtə̀. Vəwenə kɨ wen, ali ghə̀ lè fa vəwenə ashɨ.

³² Vəwenə sə̀ gaʼa vəwenə a ntyìntyìn la “Gaʼa kò tətyɨm tə vəghəŋ tə yi lɨmə fa tin ando ghə̀ yi ngàʼà laynsə nyʉ̀ a və nyoʼo li a vəghəŋ a ji.”

³³ Tò a zhʉ a ghə̀ŋ, vəwenə lu tɨmə, ə bwènə̀ dyʉ̀ a Jelusalèm, ə yèn ndzɨ̀mtə̀ sə bàm Yesò njʉ̀ mùʼ bènə̀ viʼi vətsen və a və ndiʼi wenə̀ vəwenə, və tsèntə̀

³⁴ Sə gaʼà la “Bobo bwènsə̀li nlu fa pfʉ ə fʉ̀ a kəʼ Simùn.”

³⁵ Vəwenə mù shə̀ʼtə̀ kənyʉ̀ a kə nfʉ̀ nə̀ vəwenə a ji bènə̀ ando vəwenə nkɨ wen ando ghə̀ mbyeʼlə kə̀bayn. Yesò fʉ̀ a shɨ ndzɨ̀mtə̀sə bàm wen.

³⁶ Ando vəwenə mbu gàʼà, Yesò fa wen agəŋ tɨmə a vəwenə a ntìntìn, gàʼ la “Mbwamə̀ ndiʼi a ghə̀ŋ.”

³⁷ Viʼi venə ndiʼ nə̀ fàyn, no nànto, sə kwòʼtə̀ la vəwenə nyènə̀ mpfʉ̀ nse.

³⁸ Ghə̀ gàʼ a vəwenə la “Byiʼi ghò a təkwòʼtə̀ tə ku ngəʼ a ghə̀ŋ a tətyɨm a?”

³⁹ Ghə̀ŋ yèn avu ghomə bènə̀ aghʉ ghomə a ndi lutə̀ su kɨ la a diʼ mo. Mwòmtə mo ə zhʉ byeʼe mpfʉ̀ nse ko kiʼi nyàmə̀ wèn bènə̀ kwoŋə.

⁴⁰ Ando ghə̀ ngàʼa, ghə̀ di avu wen bènə̀ aghʉ wen a vəwenə.

⁴¹ Ando vəwenə mbu momə̀ byeʼe saŋlə ndiʼ a vəwenə tətyɨm no nànto, ghə̀ bèm a vəwenə la “Ghə̀ŋ bè kiʼi kəfo kə zhɨkə a shyə̀.”

⁴² Vəwenə ku shʉ nyuʼ a wen,

⁴³ Ghə̀ shi ə pfiʼ tò vəwenə ashɨ.

⁴⁴ Ghə̀ mù gàʼ a vəwenə la “Venə diʼi nyʉ̀ a ma gàʼli a ghə̀ŋ ando ma mbu ndiʼ vəghəŋ la nyʉ̀ tsèm a kə ndiʼ a soʼo Mosìs, ə nə̀ nyʉ̀ a nshə̀ʼtə̀sə nyoʼo li bènə̀ Salms diʼi lu fʉ̀.”

⁴⁵ Ghə̀ mù boʼtə̀ tətof tə vəwenə ndi vəwenə nzhʉ ə kɨ gaʼa Nyìngòŋ,

⁴⁶ bè mù gàʼ a vəwenə la “Nəmwèʼè, və nyoʼli la Klistò ne yen ngəʼ a sə̀ ndiʼ a bàmə mətsi ntaʼ ghə̀ be lu fa pfʉ,

⁴⁷ bènə̀ la və a shə̀ʼtə̀ kənyʉ̀ kə Nyìngòŋ ndì viʼi wen azhiʼ no tə loʼ tə̀tsèm əzìtə̀ fa Jelusalèm Nyìngòŋ lyesə ku mbyɨsə vəwenə.

⁴⁸ Ghə̀ŋ diʼ viʼi a ghə̀ŋ zhʉli bè yèn nyʉ̀ venə.

⁴⁹ Luwèn ma nè a tɨm kəzhwì kə̀ŋwoʼkə a ghə̀ŋ to ando tiʼi ghom nghʉli, alì ghə̀ŋ ndiʼi tò a shə̀ zaʼa fa zhʉ a kəzhwì kə̀ŋwoʼkə ne vi ə ku adyòʼ a ghə̀ŋ.”

Yesò bwènə̀ kuʼ a kàŋ

⁵⁰ Yesò mù tènsə dyʉ̀ nə̀ vəwenə a Betanì kuʼsə avu wen a kàŋ ə bwaʼsə vəwenə,

⁵¹ ando ghə̀ mbwàʼsə̀ vəwenə ghə̀ lu mòʼtə̀ vəwenə və lyɨ wen kuʼsə̀ a kàŋ.

⁵² Vəwenə ghoʼsə̀ wen mù bwènə̀ dyʉ̀ a Jelusalèm nə̀ saŋlə ghoʼo ghə̀,

⁵³ ə sə̀ kuʼsə̀ Nyìngòŋ no me zhʉ tsèm a wen a ngə̀ŋ.