Ŋwàʼlə̀ Luk 23 - The New Testament in the Babanki language

Və vì nə̀ Yesò a shɨ Bilate

¹ Ntsèntə̀ viʼi nsoʼ vyi no vətsèm lù ə lyɨ̀ Yesò ə dyʉ̀ nə̀ wen a shɨ Bilate,

² mù zìtə̀ sə̀ zuʼu nyʉ̀ a wen a wèn gaʼa la “Yes tə̀ ghaʼ wìʼ ghèn ghə̀ dìʼsə̀ jì byɨ a viʼi vəghəŋ, tensə la kə vəwenə a loʼ kənsè a fòyn ghoʼo a Lum. Ghə̀ be gaʼà la ghə̀ diʼ Klistò a diʼ fòyn tsen.”

³ Bilate mù bèm a wen la “wu bè diʼ fòyn viʼi Islel?” Yesò bwènsə̀ gaʼa wen la “A gàʼ wu alì”

⁴ Bilate mù gaʼa tʉtʉ vəpfèm və Nyìngòŋ vyi bènə̀ nòynə ayi la ma ko yèn kənyʉ̀ kəbyɨkə wìʼ ghèn.

⁵ Vəwenə bè sə̀mtə̀ gàʼ tò gàʼ la “Ghə̀ bosə viʼi la və dyʉ̀ a jì byɨ, a loʼ Judiyà no vətsèm, ghə̀ tə̀ zìtə̀ fa ntə̀ʼ Galìlì, luwèn ghə̀ sə̀ diʼ a shə̀.”

Və vì nə̀ Yesò a shɨ Elod

⁶ Ando Bilate nzhʉ gàʼ ghenə, ghə̀ mù bèm əkɨ la Yesò nlu fa loʼ Galìlì lo?

⁷ Ghə̀ nè zhʉ la ghə̀ lu fa shyə a Elod soʼo, ghə̀ bwènsə̀ tɨm Yesò a Elod a ghə̀ ndiʼi a loʼ Jelusalèm a zhʉ a ghèn.

⁸ A ndiʼ a zhʉ a Elod n-yenə Yesò, ghə̀ ndiʼ nə̀ saŋlə ghoʼo ghə̀ byiʼè ghə̀ lutə̀ sù kəŋ ə yenə wen byìʼe ndo ghə̀ nzhʉli byìʼì wen mù ghʉ la yi lu yèn wen, ghə̀ nè nyʉ̀ kaynə və yì yen.

⁹ Elod mù bèmtə̀ tʉ nyʉ̀ no ghoʼo a Yesò, ali kò ghə̀ lə̀ bwènsə̀ kənyʉ̀.

¹⁰ Tʉtʉ vəpfèm və Nyìngòŋ bènə̀ ndìʼsə̀sə təsoʼ Nyìngòŋ a və nti a kəshi ayì sə̀ sə̀mtə̀ zuʼu nyʉ̀ a wèn Yesò.

¹¹ Elod wenə̀ ve sugyèʼ və wen sə̀ chəʼə wen be gaʼà nyʉ̀ zafə və a wen. Vəwenə mù moʼ dàlə a moʼo tò təfòyn a wen a wèn, bwènsə̀ təmə wen a Bilate.

¹² Əlù fa kətsi a ghèn, Elod wenə̀ Bilate sə̀ diʼ viʼi ndoŋsə byìʼe a ndiʼ a mbì vəwenə ndiʼ viʼi kəbàyn.

Və bè gìsə̀ vì nə̀ Yesò a shɨ Bilate

¹³ Ando Yesò ə bwènə̀ vì, Bilate mù dzàŋ tʉtʉ vəpfèm və Nyìngòŋ nə̀ viʼi a və soʼo loʼ bènə̀ viʼi vətsen və,

¹⁴ ə gàʼà vəwenə la “Ghə̀ŋ tə vì nə̀ wìʼ ghèn a mò gàʼà la ghə̀ diʼì jìsə byɨsə a viʼi. Ma soʼli wen a ghə̀ŋ ashɨ kò ma lə̀ yèn kənyʉ̀ kə̀ shwe kə wen a ntyìntyìn nyʉ̀ a ghə̀ŋ gaʼà byìʼì wen.

¹⁵ Ndə̀ŋndəŋ ando Elod ko yi yèn bè mù bwènsə̀ təmə wen a vəghəŋ. Nkàyntə̀ ghə̀ŋ yènli la ghə̀ ko nè no kənyʉ̀ kətsenkə a kə diʼi la ghə̀ diʼ pfʉ.

¹⁶ Ma li a gàʼa və ghòmə wen ə ghʉsə wen.”

¹⁷ A ndiʼ ntsìnə̀ vəwenə la no məzaʼsə̀ ko Bilate diʼi shisə wu muʼ fa nfɨŋ a viʼi kòŋə̀.

¹⁸ Ando ghə̀ gaʼà alì vəwenə zɨmə tò ntàŋ muʼ la zhwi wìʼ ghèn ə shisə Bàlabàs à yès.

¹⁹ Bàlabàs ghèn ndiʼ wìʼ a zìtə̀ sòyn a loʼ zhwi wìʼ.

²⁰ Bilate bè gisə̀ gaʼa vəwenə, ando ghə̀ nkəŋ jì ə moʼtə̀ Yesò,

²¹ ali vəwenə bè zɨmə la “Və bayntə wen, və bayntə wen a kəntò.”

²² Bilate bè gìsə̀ gàʼ a ghan a taʼ à vəwen la byìʼì ghò, ma ko yèn kənyʉ̀ kəbyɨkə wen a kə diʼì la və diʼi zhwi wen byìʼì kəwenkə,ma diʼ gàʼ və ghòmə wen ə ghʉsə wen.

²³ Vəwenə sə̀ sə̀mtə̀ zɨmə tò zɨmə la və bayntə wen a kəntò. Fa bàm a tsu gə̀ vəwenə zhɨ.

²⁴ Bilate mù byɨmə la və bayntə Yesò ando viʼi venə nkəŋ.

²⁵ Ghə̀ mù shìsə̀ wìʼ yì a və we a nfɨŋ byìʼì mə sòyn bènə̀ mə zhwi ando vəwenə bèmə̀. Ghə̀ mù bè ku Yesò a vəwenə la vəwenə nè no ghò nə̀ wen a vəwenə nkəŋ.

Və bayntə Yesò a kəntò

²⁶ Vəwenə mù lyɨ̀ Yesò ə lù nə̀ wen, sə ndyʉ̀ a jì bwùmtə̀ wùtsen a və ndzàŋ wen nə̀ Simon a ndiʼi wù Silen. Ghə̀ lu fa tyì Loʼ sə̀ vì, vəwenə ghaʼa wen ə nè ghə̀ byèʼè kəntò kə Yesò sə̀ dyʉ̀ fa wen a bàm.

²⁷ Nòynə viʼi sə̀ dzɨ̀mtə̀ Yesò, a vəwenə à ntyìntyìn kyi vətsenvə ndiʼ tsu a və ndì bè kusə̀ shinsə a wen.

²⁸ Yesò fuʼtə̀ gàʼ a vəwenə la “kyi Jelusalèm kə ghə̀ŋ a dì byìʼì mò, alì ghə̀ŋ dì byìʼì ngə̀ŋ kətʉ ghə̀ŋ bènə̀ vunə vəŋə.

²⁹ Ghə̀ŋ zhʉtə̀ a! byìʼe ando mətsi mə sə̀ vì a viʼi a ne gàʼ la ‘mbwaʼmə diʼ a və də̀m bènə̀ a kyi a və ko bwi kò nyòŋsə̀ wàyn.’

³⁰ A zhʉ ayì vəwenə ne ngàʼà pfèn sə la ‘Biymə a yes a kətʉ, bè gaʼà bàmsə la Chiʼ yes.’

³¹ Byìʼe a zhʉ a vəwenə zì və nè nkì nyʉ̀ vènə a mò a ma diʼi tò nə̀ fəkoʼ fəzhʉfə kə ne ndiʼ alə̀ à fəzɨmfə a?”

³² A ndiʼ a zhʉ a və ndyʉ̀ nə̀ və bè ndyʉ̀ nə̀ viʼi vətsenvə vəbò a vəwenə kwaʼtə təsoʼ.

³³ Vəwenə nè dyʉ̀ ə zaʼa kəshi kətsenkə a və ndzàŋ nə̀ kəwuʼlə kə kətʉ ə bayntə wen bènə̀ viʼi kwaʼtə təsoʼ vyi tsu a kəntò və bayntə ghə̀ muʼ a kəntò à wenə̀ kwòŋ to ghə̀ nə̀ ghə̀ tsen a wen kwòŋ nàkwè.

³⁴ Yesò laʼtə̀ ə gàʼ la “Tìʼ! maʼa lè nyʉ̀ vəwenə byiʼè vəwenə ko kɨ kənyʉ̀ a vəwenə nè.” Vəwenə laʼtə mù zìtə̀ sə̀ tem baʼ ndì yèn wìʼ a ghə̀ a ghə̀ a zhɨ ndisə Yesò.

³⁵ Viʼi tɨmə sə̀ lyè, tʉtʉ vəwenə sə̀ telə wen gàʼà la “Ghə̀ tə bwòŋsə̀ viʼi vətsenvə ghə̀ bwòŋsə̀ li wenə wen luwèn a zhʉ a ghə̀ diʼ Klistò yì a Nyìngòŋ ntsuʼli”

³⁶ Və sugyèʼ bè sə̀ telə wen bè vì ku kəmbas kə məlyʉ̀ʼ a wen,

³⁷ “a zhʉ a wù diʼ fòyn viʼi loʼ Islel wù bwòŋsə wen wu.”

³⁸ Vəwenə bè nyòʼ Gàʼà tsen ghə̀ bayntə à wen a kətʉ kə kəntò la “Ghèn diʼ fòyn və Jus”

³⁹ Wìʼ muʼ fa ntyìntyìn viʼi vyi a və mbayntə wen Yesò sə̀ telə̀ wen gàʼà la “Gaʼa kò wù diʼ Klistò yì bwòŋsə̀ wenə wu ə̀ bè bwòŋsə̀ yes,”

⁴⁰ Ali ghə̀ tsen yì kənkə̀ wen ə bèm la “Wu bè ko fàyn Nyìngòŋ tə a zhʉ a wu pfʉ tò nə̀ wen?

⁴¹ Yo wu nəmwèʼè byìʼì nyʉ̀ byɨvə a yo wu nèli, byiʼè ando yowù kiʼi lòʼ ə nyʉ̀ byɨvə a yowù nèli, alì wìʼ ghèn ko nè no kənyʉ̀ kə byɨkə kətsen.”

⁴² Ghə̀ bè dyʉ̀ mbì əgàʼ la “Yesò kwòʼtə̀ mo a zhʉ a wù sə̀ soʼo fòyn wu.”

⁴³ Yesò bwènsə̀ gàʼ a wen la “Nəmwèʼè, nəmwèʼè, ma shə̀ʼtə̀ à wù la wù a ndiʼ yowù layn a kəshi kəbwòŋ Nyìngòŋ.”

Yesò Pfʉ̀

⁴⁴ A sə̀ ndiʼ a ntyìntyìn nə̀nchwì shi fen ə chiʼtə nse yì no tsèm əzaʼa fa kəlyɨŋ kə mbwaʼà kəbəŋ.

⁴⁵ Kə sə̀ ndiʼ alì chwìchwì lɨmə, ndisə ghoʼsə a və ngə̀tə̀ ngə̀ŋ tsu à ghan à bò bàymə̀ wàŋ bò.

⁴⁶ Yesò mù dì a gɨ to la “Tiʼi ghom! Mà weli kəzhwì kom à wù kəvu.” A ndiʼ a zhʉ a ghə̀ ngaʼà mwètə̀ ghə̀ pfʉ.

⁴⁷ A ndiʼ a zhʉ a kətʉ və sugyèʼ n-yenə kənyʉ̀ a kə nlyɨ̀ kəshi, ghə̀ ghoʼsə Nyìngòŋ ə gàʼ la “Nəmwèʼè, nəmwèʼè wìʼ ghèn nko kiʼi le nyʉ̀.”

⁴⁸ A ndiʼ a zhʉ a viʼi no vətsèm a və ntsentə̀ əyen kənyʉ̀ a kə a lyɨ̀ kəshi n-yenə nyʉ̀ venə̀, vəwenə sə̀ pfwo nə̀ kusə shinsə ghoʼo ghə̀.

⁴⁹ Viʼi ndoŋsə wen no vətsèm bènə̀ kyì a və ndzɨ̀mtə̀ wen fa Galìlì ntɨmə kəghaf ə yenə nyʉ̀ a venə no tsèm.

Və bvɨ̀mə̀ Yesò

⁵⁰ Wutsen ndiʼ a və ndzàŋ wen nə̀ Josèf a ghə̀ nlu fa ntə̀ʼ Alimàtya a loʼ və Jus. Ghə̀ ndiʼ wìʼ fa ntsèntə̀ tʉtʉ, a ghə̀ ndiʼ wùjuŋə bè diʼ wù kənyʉ̀ kə tɨmə kə.

⁵¹ Ghə̀ nko byɨmə a kwòʼtə̀ bènə̀ kənyʉ̀ a vəwenə nè. Ghə̀ nkə̀ʼtə̀ soʼ fòyn Nyìngòŋ.

⁵² Ghə̀ ndyʉ̀ a Bilate ə̀ bèm bvenə Yesò

⁵³ Bilate byɨmə ghə̀ mù shiʼsə bvenə Yesò lemtə nə̀ ndisə ə̀ nyòŋsə̀ a tyì sè tsen ghə̀ a və ntyuŋ a nguʼ. A ndiʼ sè a və ko ntɨmə̀ bvɨ̀mə̀ wìʼ tsu.

⁵⁴ A ndiʼ kətsi a tʉʼ ndiʼ layn à ndiʼ kətsi kəzhʉtə kə.

⁵⁵ Kyì vyi a ghə̀ nvì wen vəwenə fa Galìlì, dzɨ̀mtə̀ dyʉ̀ yèn sè ayì bè yèn ando və nyòŋsə̀ bvenə wen.

⁵⁶ Vəwenə mù bwènə̀ dyʉ̀ ə̀ shɨtə̀ njʉ̀sə̀ bènə̀ məzhiʼì əzuʼ a wèn Yesò. A sə ndiʼ kətsi kəzhʉtəkə, vəwenə zhʉtə̀ ando soʼo ndiʼì.