Ŋwàʼlə̀ Luk 21 - The New Testament in the Babanki language

Kəku kə Wùwì mpfʉ̀

¹ Yesò mbu ndiʼ tò a ngə̀ŋ Nyìngòŋ, ne ki dyʉ̀sə̀ nə̀ kəshi kyì a və ku kəku tsu ə yen ando viʼi və ghoʼkə və moʼo kəku kə vəwenə a nkyè kəku.

² Ghə̀ be yen ando wùwì mpfʉ̀ femə tsen boŋ vì əku fəkotə fə wen.

³ Ghə̀ mù gàʼ la “Mà shə̀ʼtə̀ a ghə̀ŋ nəmwèʼè la, wùwì mpfʉ̀ femə ghèn kuli kəfo kə chò kəku kə viʼi venə no vətsèm,

⁴ byiʼàndo vəwenə fàbtə̀ fàbtə̀ fa ko ghoʼo yi a vəwenə kiʼi ə vì əku, alì wùwì ghèn à wen a tyì kəmfem ken la ghə̀ kiʼi tè kəfo əzhɨ myetə ku fəkotə fə wen.”

Yesò gàʼ kùmə̀ ə bə̀ytə̀ ngə̀ŋ Nyìngòŋ

⁵ Viʼi nè mù sə ngàʼà kùmə̀ ngə̀ŋ Nyìngòŋ, ando və nshɨtə bwom nə̀ ngùʼsə, be gàʼà kùmə̀ fo jùŋ və a viʼi nku la və nyoʼ ngə̀ŋ Nyìngòŋ tsu. Yesò mù gàʼ la,

⁶ “Ghə̀ŋ yenə, kəbəŋ kenkə lə̀, zhʉ boʼsə vì a və a bèytə̀ aloʼ yi no a tsèm ko to ngùʼ a faŋ a kətʉ ghə̀ tsen.”

⁷ Vəwenə bèm à wen la,“Ndìʼsə̀, nyʉ̀ a venə lu lyɨ̀ kəshi ze? Kə lu sə zìtə̀ əchò kəchʉtə kyi kə ndiʼ ghò?”

⁸ Ghə̀ gàʼ la, “Ghə̀ŋ tùʼmə̀ la kə wìʼ lù lobtə ghə̀ŋ. Viʼi lu nvì no və ghoʼo diʼ la və vì à mò a zhiʼ. Gàʼà la, Ma diʼ no nkàyntə wen yi lə̀, be gàʼà la ‘Zhʉ kwʉʼli luwen!’ Ghə̀ŋ zhʉ alì kə wì à dzɨ̀mtə̀ vəwenə.

⁹ Ghə̀ŋ sətsèn zhʉ la təghoŋ tə sə̀ fʉ̀ bènə̀ la təsoyn tə sə fʉ̀, kə ghə̀ŋ à fàyn la kənsèsə̀ kə mbyi kə boʼsə li byiʼàndo nyʉ̀ a venə diʼi lyɨ̀ kəshi a mbì”.

¹⁰ Ando ghə̀ ngàʼà alì be gàʼ la “Təloʼ tə lu soynə tə̀ tsentə, təfòyn tə̀ soynə tə̀ tsen tə.

¹¹ Pfensə nlù shenkə, nse nə̀ʼə̀, jɨ̀ŋ be kù a shi a shi. Təkwaʼa a tə dyàŋə̀ bè fʉ̀, chwitə faynsə və a nfʉ̀ fa kaŋ baŋsə viʼi.

¹² Nyʉ̀ a venə lu sə nchò mu və ghaʼtəli ghə̀ŋ a loʼ ntsentə və Jus ə be wye ghə̀ŋ a mpfɨŋ. Və lu kyè ghə̀ŋ ə dyʉ̀ nə̀ ghə̀ŋ a shɨ təfòyn tə bènə̀ viʼi a və soʼ tò byìʼì mò.

¹³ Ghenə lu ndiʼ tʉʼ ə ghə̀ŋ shə̀ʼtə̀ ntɨm jùŋə ghom à vəwenə.

¹⁴ Ghə̀ŋ ghʉ à ghə̀ŋ tətyɨm la ghə̀ŋ ko lə zhuŋsə təwen təŋtə kwòʼtə̀ jì a ghə̀ŋ lu dyʉ̀ ə bwènsə̀ nyʉ̀ a və bèmtə̀ à ghə̀ŋ li,

¹⁵ byiʼàndo mà lu ku gàʼ a tof à ghə̀ŋ a wìʼ ko lə chò kò tènsə nyʉ̀ vyi a ghə̀ŋ gàʼà.

¹⁶ Vətiʼi vəŋə, vəlì vəŋə, və lèmə̀ vəŋə, viʼi ndoŋsə ghə̀ŋ bènə̀ viʼi loʼ ne ku ghə̀ŋ à viʼi kəbàyn ghə̀ŋ la və zhuŋsə ghə̀ŋ bè zhwilə ghə̀ŋ vətsenvə.

¹⁷ No viʼi vətsèm lu bàyn ghə̀ŋ byìʼì mò,

¹⁸ alì kò tè nyɨŋ muʼ a lè fà ghə̀ŋ a kətʉ.

¹⁹ Mətɨmə ghə̀ŋ a nkàyn a ghə̀ŋ a byɨmə lu nè ghə̀ŋ bwoŋ.”

Yesò gàʼ ando və lu byɨbsə Jelusalèm

²⁰ Tʉʼ a ghə̀ŋ lu yen vəsugyèʼ gɨ̀mə kaʼ nə̀ Jelusalèm, ghə̀ŋ kɨ la kətsi kə kwʉʼli və byɨbsə wen.

²¹ Ando kə a ndiʼ alì, no məndo a Judiyà nyɨŋ ə kuʼ a kwi pfensə, viʼi a və diʼi a tyì ntə̀ʼ diʼ fʉ̀kə̀, wìʼ ndiʼ kə ndiʼ a ntə̀ʼ kə ghə̀ be a bwènə̀ kwèn tsu.

²² A lè mù diʼ mətsi mù a Nyìngòŋ a ku ngəʼ a viʼi venə ndi nè la nyʉ̀ tsèm a və nyòʼò a ŋwàʼlə̀ Nyìngòŋ və kwʉʼ.

²³ Mətsi a mì lu nfàynsə̀ nə̀ nkwoŋ à kì və gufkəvə bènə̀ vyi a bù kiʼi vunə və bwaʼ və. Zhuŋsə wèn lu ndiʼ a nse shə̀, alì ngəʼ ghoʼo ndiʼ à viʼi a venə.

²⁴ Və lu zhwilə vəwenə vətsen və nə̀ mənyi ə ghaʼtə vəwenə vətsen və ə dyʉ̀ ghʉ a kòs tò təshə tə mbyi tətsèm. A le ando və lu tsəʼsə Jelusalèm nə̀ aghʉ be nyàblə̀ nə̀ vəwenə əzaʼa fa zhʉ a zhʉ vəwenə ne kwʉ̀ʼ.

Yesò gàʼ byìʼì məvì Wàyn Wìʼ

²⁵ “Tʉʼ ayi ku kwʉʼ, chwitə dìʼ a chʉzhʉ, a sàŋ bènə̀ a mədzɨ̀ŋ. Mu mə ghoʼmə lu nəʼə bè fùʼù, vì nə̀ zhuŋsə a təloʼ tə mbyi. A tʉʼ ayì viʼi vətsèm kəŋ jì ə nyɨŋ.

²⁶ Viʼi lu nfəŋkə və sə pfʉ byìʼì fàyn, ando vəwenə lu nkə̀ʼtə̀ kənyʉ̀ a kə diʼ ne fʉ̀ a mbyi byiʼàndo fo vyi a və diʼi a kaŋ a diʼ nə̀ sàŋ bènə̀ mədzɨ̀ŋ lu shenkə.

²⁷ A bàm a tsu vəwenə yen wàyn wìʼ ghə̀ shiʼi a tyì mbòʼ kiʼ kədyòʼ nə̀ bayn ghoʼ ghə̀.

²⁸ Nyʉ̀ a venə sətsèn zìtə̀ əlyɨ̀ kəshi no a zhʉ̀ kò, ghə̀ŋ tsoʼsə tʉ vəŋə ə ki kaŋ byiʼàndo zhʉ sə̀ boʼsə vì a Nyìngòŋ a bwòŋsə ghə̀ŋ.”

²⁹ Yesò mù mò ngàyn ghèn à vəwenə gàʼ à la “Ghə̀ŋ kwòʼtə̀ byìʼì fəkòʼ fə kəbvèm benə nkòʼ mətsenə.

³⁰ Gaʼa kò təfʉ titə nə̀ zàʼà, no a zhʉ̀ kò a tə zìtə̀, ghə̀ŋ kɨ la byɨ̀ŋ sə chʉ̀.

³¹ Kə diʼ tò ndə̀ŋndəŋ ando ghə̀ŋ lu yen nyʉ̀ venə və lyɨ̀ kəshi. Ghə̀ŋ nè yen alì ghə̀ŋ kɨ la soʼo Nyìngòŋ sə̀ boʼsə.

³² Ma gàʼ à ghə̀ŋ nəmwèʼè la viʼi mbyi luwen ko zì və pfʉ mè ken la nyʉ̀ a venə choli no tsèm.

³³ Kaŋ wenə nse lu chò alì kò a ndiʼ la kənyʉ̀ kə a kwitə fa nyʉ̀ vyi a ma gàʼà.

³⁴ Ghə̀ŋ tuʼmə nə̀ tə wen təŋtə, bwen alì, ghə̀ŋ a lyɨ̀ kəzhɨ nə̀ məlyʉʼʉ̀ a ndiʼ shyèʼ ghə̀ŋə. Ko nyʉ̀ mbyi venə bʉʼ ashɨ ghə̀ŋə, kətsi kèn sə vì kò ghə̀ŋ lə kɨ.

³⁵ Kə le bvʉ̀tə vì tò vì à viʼi vətsèm a nse a shen.

³⁶ Ghə̀ŋ ŋwʉʼ no məzhʉ̀ tsèm bvʉ̀tə tò bvʉ̀tə be jɨ̀mə̀ la Nyìngòŋ ku kədyòʼ ghə̀ŋ cho fa tyì nyʉ̀ no tsèm a və lu nfʉ̀ tò nə̀ bwaʼmə ə tɨmə a kəshi kə nsoʼ ashɨ Wàyn Wìʼ.”

³⁷ Yesò nziʼi a ngə̀ŋ Nyìngòŋ a mətsi ayì tʉʼ ne jɨ ghə̀ pfwo kuʼ tsi a kwi pfen olìf.

³⁸ Tò nətʉʼ nətʉʼ viʼi vətsèm sə lu dyʉ̀ tsèntə̀ a ngə̀ŋ Nyìngòŋ zhʉtə ziʼi wen.