Ŋwàʼlə̀ Luk 20 - The New Testament in the Babanki language

Tʉtʉ viʼi Islel bèm əkɨ kəshi a Yesò lyɨ adyòʼ wen fa tsu

¹ Tʉʼ nlayn kətsi kətsenkə, Yesò sə ziʼi viʼi a ngə̀ŋ Nyìngòŋ, shəʼtə̀ ntɨm jùŋ à vəwenə. Tʉtʉ vəpfèm və ngə̀ŋ Nyìngòŋ nə̀ ndìʼsə̀ sə təsoʼ, bènə̀ vəchəʼ vì

² ə bèm à wen la, “Shəʼtə̀ à yès la wù nè nyʉ̀ venə nə̀ adyòʼ mu ghə̀ lù fafe a? A ku ndo nku adyòʼ a ghenə à wù a?”

³ Ghə̀ bwènsə̀ gàʼ à vəwenə la, “Ma boŋ bèm kənyʉ̀ à ghə̀ŋ. Ghə̀ŋ shəʼtə̀ à mò la,

⁴ à lù ku Nyìngòŋ ku adyòʼ a Joyn la ghə̀ nè nku mu à viʼi mu, à nkù viʼi lo?”

⁵ Vəwenə sə̀ kayntə kənyʉ̀ a kyì à vəwenə a ntìntìn gàʼa la, “Vəghəŋ sətsèn gàʼ la, ‘A nku Nyìngòŋ ku adyòʼ a wen,’ ghə̀ à bèm la, ‘Ghə̀ŋ be faŋ kè byɨmə kənyʉ̀ a ghə̀ ngàʼà byìʼì ghò?’

⁶ Vəghəŋ sətsèn gàʼ la, ‘A nku viʼi ku adyòʼ à wen,’ viʼi vətsèm à tem ə zhwilə vəghəŋ nə̀ ngùʼsə byiʼ ando vəwenə nkɨ la Joyn ndiʼi nshə̀ʼtə̀ ghoʼo.”

⁷ Ando vəwenə nkwòʼtə̀ alì, mù gàʼ la yès ko ki kəshi a kə nlù fa tsu.

⁸ Yesò mù gàʼ à vəwenə la, “No nkàyntə mò lì ko shə̀ʼtə̀ kəshi a adyòʼ lu fa tsu sə nè nyʉ̀ a venə.”

Yesò mò ngàyn, ghə̀ ghaʼ tʉtʉ no vətsèm

⁹ Ando ghə̀ ngaʼà alì bè mò ngàyn tsen à vəwenə la, “Wutsen nlu boʼ sɨm lamsə lwi wen, ə ku a viʼi la və shyèʼ, ə gə̀tə̀ ku wen nə̀ fo a və fʉ̀ fa tsu. Mù lù ə dyʉ̀ a loʼ tsen ghə̀ no kəghaf.

¹⁰ Zhʉ kwʉ̀ʼ, və kwòŋ; ghə̀ tɨm wù shyèʼ wen tsen la ghə̀ dyʉ̀ ə gàʼ viʼi vyì a ghə̀ ku sɨm lamsə ayì à vəwenə la vəwenə ku və lamsə̀ vətsen və à wen lo. Viʼi a vyi ghaʼ wù shyèʼ ayì ə ghòm ə dzɨ̀mə̀ wen, ghə̀ bwènə̀ pfwo tò nə̀ avu ə zɨm ghə̀.

¹¹ Ghə̀ be tɨm wù shyèʼ tsen, vəwenə bè ghòm wen tò ghòmə be nyàblə̀ nə̀ wen ndi dìʼsə kətʉ kə wen ə dzɨ̀mə̀ wen ghə̀ bè pfwo tò nə̀ avu zɨm ghə̀.

¹² Ghə̀ be tɨm ghə̀ muʼ a ndiʼ viʼi shyèʼ və taʼ, vəwenə ghòmə lyomsə wen ə ten shìsə wen fa sɨm ayì.

¹³ Tì sɨm ayi kwòʼtə̀ no kənyʉ̀ a ghə̀ zì ghə̀ ne ə gàʼ tò a wen tyɨm la, ‘Ma tɨm wàyn kòŋ mò, zhʉ tsen ghə̀ vəwenə à fàyn wen.’

¹⁴ Wàyn wen ayì dyʉ̀, vəwenə yen wen ə gàʼ la, ‘Ghèn diʼ njɨ̀ngə̀ŋ tìʼ sɨm ghèn. Vəghəŋ ghaʼ wen ə zhwi ndi lyɨ̀ fo vyi a ghə̀ tə̀ diʼi lu kiʼi a ndiʼ və vəghəŋ.’

¹⁵ Vəwenə gàʼ alì mù ghaʼ wen ə fʉ̀ nə̀ wen fa sɨm ayì ə dyʉ̀ zhwi.” Yesò mù bèm à vəwenə la, “Ghə̀ŋ kwòʼtə̀ la, tì sɨm ayì zì ghə̀ ne no ghò nə̀ viʼi a venə a?

¹⁶ Ghə̀ à vì ə zhwilə viʼi a vyi no vətsèm ə lyɨ̀ sɨm ayì ə ku a viʼi kədyàŋ.” Yesò ne myètə̀ ngàyn a ghèn, viʼi vyì zhʉtə alə̀ ə gàʼ la kə Nyìngòŋ lə̀ byɨmə wìʼ ne nki kənyʉ̀ kènkə a viʼi shyèʼ sɨm a vyì nlù mwòm lə̀.

¹⁷ Yesò ki vəwenə alə̀ mù bèm la, “Kəshi kə ŋwàʼlə̀ Nyìngòŋ kèn gàʼà la gho, kə gàʼà la: ‘Ngùʼ yì a viʼi kəmbwom tə̀ màʼà lì kaʼsəli sə diʼ ngùʼ bʉ ngə̀ŋ’.

¹⁸ No məndo a ghə̀ kàŋtə a ngùʼ bʉ ngə̀ŋ a ghèn, ghə̀ à fə̀ŋ ə tyinkə a temə a temə, ngùʼ ayì fəŋ tə̀ a kətʉ, ndo ghə̀ a bvʉ̀sə̀ tò bvʉsə.”

Tʉtʉ vyi bèm kənyʉ̀ byìʼì lòʼo kənsè

¹⁹ Ndìʼsə̀ sə təsoʼ bènə̀ tʉtʉ vəpfèm və ngə̀ŋ Nyìngòŋ kɨ la ghə̀ yi mò ngàyn yì byìʼì vəwenə mù sə kəŋ ji əghaʼ wen tò a zhʉ ayì ali vəwenə ə fàyn nə̀ ashɨ viʼi.

²⁰ Vəwenə mù ghʉ ashɨ à wen a wèn be lòʼ viʼi ə tɨm à wen a bàm la vəwenə wamə nè taʼ sə vəwenə diʼ viʼi və jùŋvə, ə bèmtə̀ nyʉ̀ a wen əzhʉ la ghə̀ ko gàʼ kənyʉ̀ ə və ghaʼ wen tsu ə ku à wìʼ a Luma a ghə̀ nsoʼ shə loʼ ayi.

²¹ Vəwenə gàʼ à wen la, “Yès kɨ la wù gàʼ à tò nəmwèʼè, be ziʼi tò nyʉ̀ vyi a diʼi tò nyʉ̀ nəmwèʼè, wù ko lyè la wìʼ chò wutsen, alì wù lutə̀ sù ziʼi tò təsoʼ tə Nyìngòŋ ando tə diʼì.

²² Soʼo lè byɨmə la yès lòʼ kənsè à fòyn ghoʼo a Luma mu ghə̀ ko byɨmə à?”

²³ No a zhʉ kò, Yesò kɨ tofə vəwenə mù gàʼ la,

²⁴ “Ghə̀ŋ dìʼ ko kəkas à mò lì.” Vəwenə dìʼ, ghə̀ bèm la, “A diʼ kəndemndem kəkə̀ʼ ndo tsu bənə̀ zhiʼi wen lə̀?” Vəwenə bwènsə̀ gàʼ la, “A diʼ kə̀ʼ fòyn ghoʼo fa Lum nə̀ zhiʼi wen ə̀.”

²⁵ Yesò mù gàʼ la, “Kə ndiʼ alì, ghə̀ŋ nku fo fòyn tò à fòyn bè ku fo Nyìngòŋ tò à Nyìngòŋ.”

²⁶ Kə chò vəwenə byiʼàndo, vəwenə nko yen kənyʉ̀ əghaʼ wen tsu a ntìntìn viʼi. Təchʉ̀ tə vəwenə zɨm, vəwenə, chiʼ la kùʼ.

Viʼi Sadùsi bèm kənyʉ̀ kùmə̀ məlù fa pfʉ

²⁷ Viʼi Sadùsi vətsenvə vì a Yesò, a diʼ viʼi vyì a və ko byɨmə la wìʼ lə lù fa pfʉ, bèm a wen la,

²⁸ “Ndìʼsə̀, gàʼa kò Mosìs nlù nyòʼo à yès la, ‘Lèmə̀ wìʼ sətsèn pfʉ, kiʼ wùwì, a lì ke nkiʼ vunə, lèmə̀ wu pfʉ a yì à lyɨ̀ wùwì mphʉ ayì, wenə wen bwi vunə wu pfʉ ayì lo?’

²⁹ Vəlèmə ndiʼi sòmbo, ghə̀ mbì lam wùwì ə pfʉ, kèn nə̀ wàyn.

³⁰ Bamə wen nyòŋsə̀ wùwì ayì be pfʉ mòʼtə̀ ken nə̀ wàyn.

³¹ Kənkùmtə̀ kə wen bè nyòŋsə̀ wùwì ayì be pfʉ ken nə̀ wàyn. Vəwenə no vətsèm lu nyòŋsə̀ wùwì ayì be pfʉ̀kə ken nə̀ wàyn.

³² Wùwì ayì bè nè kaʼà pfʉ.

³³ A le lu ndiʼ a kətsi a və lu fa pfʉ, wùwì a ghèn ndiʼ ghə̀ ndo, ando vəlèmə a vyi sòmbo lam li wen no vətsèm a?”

³⁴ Yesò gàʼ à vəwenə la, “Viʼi mbyi layn ə lamə,

³⁵ alì viʼi a və kwʉʼù li bwòŋ fa pfʉ a tʉʼ ayì, be zhɨ bwòŋ a ghə̀ faŋə a ghan mùʼ ko lu lam.

³⁶ Kə lə ndiʼ alì byiʼ ando vəwenə ko le be pfʉ. Vəwenə lə ndiʼ ndə̀ŋndəŋ to nə̀ ntsɨ̀ŋsə Nyìngòŋ, bè diʼ vunə Nyìngòŋ byiʼ ando vəwenə luli fa pfʉ.

³⁷ No bè Mosìs ndiʼi li la və bwòŋsə viʼi fa pfʉ a kəshi kə Ŋwàʼlə̀ Nyìngòŋ kì a kə gàʼà kùmə̀ zhiʼ a ghə̀ mbolə̀ a toʼ. A ndiʼ a kəshi kə ŋwàʼlə̀ a ghèn ghə̀ dzàŋ Bobo nə̀ Nyìngòŋ yì a Ablaham nə̀ Izìk nə̀ Jàkob nlù sə̀ gumlə̀.

³⁸ Nyìngòŋ ko diʼ Nyìngòŋ viʼi və pfʉ̀və, a diʼ Nyìngòŋ viʼi a və diʼi və to byiʼ ando ghə̀ sətsèn ndiʼ Nyìngòŋ no mə ndo ayì, a ndiʼi to.”

³⁹ Yesò nè gàʼa mwètə̀, ndìʼsə̀ sə təsoʼ sətsensə gàʼ a wen la,“Ndìʼsə̀ wù gaʼà li a nkàyn.”

⁴⁰ Vəwenə gàʼa lì, kò no wìʼ mùʼ bè mwòmsə əbèm kənyʉ̀ a wen.

⁴¹ Ghə̀ mù bèm a vəwenə la, “Wìʼ lè zì ghə̀ gàʼ la Klistò dìʼ wàyn Devìt a?

⁴² Gaʼa ko nkàntə̀ Devìt ngàʼa a ŋwàʼlə̀ Salms la: ‘Bobo ngàʼa a Bobo ghom la, Ŋwʉʼmə ashə̀ kwòŋ toghə mò

⁴³ Zaʼa fa zhʉ a mà nè viʼi kəbàyn nə̀ wù kwen a tyi soʼò wù.’

⁴⁴ A lè sətsèn ndiʼ mu Devìt ndzàŋ wen nə̀ Bobo, ghə̀ bè a ndiʼ wàyn Devìt a le lo?”

Yesò pfàntə̀ ndzɨ̀mtə̀sə bàm wen byìʼì ndìʼsə̀ sə təsoʼ

⁴⁵ Yesò gàʼ a ndzɨ̀mtə̀sə bàm wen a ji a viʼi vətsèm diʼi zhʉ la,

⁴⁶ “Ghə̀ŋ ntùʼmə̀ ghə̀ŋ və ndìʼsə̀ sə təsoʼ sensə. Vəwenə kòŋə njèʼè və dàlə və ghoʼkəvə, fʉ̀ dyʉ̀ a fàf ghoʼkə və ndi viʼi nyɨ vì toŋtə̀ vəwenə, dyʉ̀ aloʼ ntsèntə̀, Nyìngòŋ vəwenə kuʼ ŋwʉʼmə tò ambì, vəwenə be dyʉ̀ a shi kəzhɨ, vəwenə kòŋ əkuʼu ŋwʉʼʉ tò shi ŋaŋtə və.

⁴⁷ Vəwenə kòŋə lobtə kyì mpfʉ̀ ə shi, fo vəwenə no tsèm, wamə ə diʼ la vəwenə diʼ viʼi və jùŋvə, byìʼì ando vəwenə jɨ̀mə̀ lòtə̀. Nyìngòŋ lə ku ngəʼ byìʼì vəwenə.”