Ŋwàʼlə̀ Luk 2 - The New Testament in the Babanki language

Bwi Yesò

¹ A bè ndiʼ a tʉʼ ayì mu fòyn Augustus kuli soʼ la və nyoʼ təzhiʼ tə viʼi no vətsèm a tə̀loʼ tə̀tsèm a ti nə̀ Lum.

² A ndiʼi mbi zhʉ a və nyòʼò təzhiʼ ando Kulinoy ndiʼi kətʉ a shə sylia a loʼo Luma.

³ No məndò bwènə̀ dyʉ̀ a wen a loʼo ə dyʉ̀ nyòʼò zhiʼi wen.

⁴ Josèf mù lù fa ntə̀ʼ Nazalèt a loʼo Galìlì dyʉ̀ a ntə̀ʼ Betə̀lèhem a loʼo Jùdiyà a ndiʼi kəshi a və bwì fòyn Devìt tsu ando ghə̀ nlu fa ngwàʼa fòyn Devìt.

⁵ Josèf ndyʉ̀ alì ədzʉ̀ nyòʼo zhiʼi wen a taŋ ghèn wenə̀ Mèli a ndiʼi lyɨ a nə̀ wi wen, alì mu Mèli sə diʼ nə̀ bèmə̀.

⁶ Ando vəwenə ndiʼi tsu, zhʉ kwʉʼə̀ Mèli bwi.

⁷ Ghə̀ nbwi wàyn mbì wen à diʼ wulɨm, lemtə wen nə̀ basə ndisə, nyòŋsə̀ wen a tyi ntʉʼ a nyamsə nvì zhɨ fa tsu, byeʼe ando kəshi kə nko bè ndiʼ a ngə̀ŋ yi a viʼi jèʼ əvì tsi tsu, ə vəwenə tsi tsu.

⁸ A ndiʼi nə̀tʉʼə ayì, a shə loʼo ayì, ntsɨ̀ŋsə nyamsə sətsensə diʼ a toʼ, tsɨ̀ŋə̀ nyamsə vəwenə.

⁹ A sətsèn ntsɨ̀ŋ ngə̀ŋ Bobo fʉ̀ a vəwenə ashɨ, baynə Bobo vì kaʼ vəwenə, vəwenə sə diʼ nə̀ fàynə no nànto.

¹⁰ Alì ntsɨ̀ŋ ngə̀ŋ Bobo yì gàʼà vəwenə la “Kə ghə̀ŋ à fàyn, ghə̀ŋ zhʉtə, byèʼè ma vili nə̀ ntɨm jùŋə a ghə̀ŋ ne nè viʼi vətsèm saŋlə.

¹¹ Və bwili mbwòŋsə̀ lan a ghə̀ŋ a loʼo fòyn Devìt a diʼi Klistò a ghə̀ diʼi Bobo.

¹² Kəfo a kə diʼ a ghə̀ŋ kə diʼ la ghə̀ŋ a yen wàyn a və lèmtə a basə ndisə ə nyòŋsə̀ a ntʉʼ nyamsə.”

¹³ A sətsèn, nòynə ntsɨ̀ŋsə ngə̀ŋ Nyìngòŋ vì boʼsə ntsɨ̀ŋ ngə̀ŋ Nyìngòŋ yì vəwenə sə̀ zhɨmə ndzàŋsə ghoʼsə Nyìngòŋ la,

¹⁴ “Vəghəŋ ghoʼsə Nyìngòŋ a ghə̀ diʼi a kàŋ. Mbwaʼmə diʼ a kwi nse a viʼi a ghə̀ kòŋə.”

¹⁵ Ando ntsɨ̀ŋsə ngə̀ŋ Nyìngòŋ sə bwenə li kuʼ a kàŋ, ntsɨ̀ŋsə nyamsə gàʼ a vəwenə ntyìntyìn la “Vəghəŋ dyʉ̀ a Betə̀lèhem dyʉ̀ lye kənyʉ̀ kenkə a kə fʉ̀ tsu a Nyìngòŋ neli vəghəŋ nkɨ.”

¹⁶ Vəwenə nyɨŋ dyʉ̀ yèn Mèli nə̀ Josèf bènə̀ wàyn yì a ghə̀ nyəŋ a tì ntʉʼ.

¹⁷ Ando vəwenə yènə wen, vəwenə shə̀ʼtə̀ kənyʉ̀ a ntsɨ̀ŋ ngə̀ŋ Nyìngòŋ ngaʼa li byìʼì wàyn ghèn.

¹⁸ No məndo a ghə̀ nzhʉ kənyʉ̀ a ntsɨ̀ŋsə nyamsə sensə ngaʼà, vəwenə ndìʼì no nə̀ kaynə,

¹⁹ Alì Mèli ghʉ nyʉ venə a wen a tyɨm sə kwòʼtə̀ byìʼì wen və.

²⁰ Ntsɨŋsə nyamsə sensə bwènə̀ dyʉ̀ zhɨmə ndzàŋsə ghoʼsə Nyìngòŋ a nyʉ̀ ə tsèm a vəwenə zhʉ bè yen a ntsɨŋsə Nyìngòŋ sə ngàʼà.

Və chʉ zhiʼi Wàyn

²¹ A ndi a bàmə mətsi fwomə, və shətə ndyə̀ wàyn, ə chʉ zhiʼi wen nə̀ Yesò, byèʼè ando a ndiʼi zhiʼi a ntsɨ̀ŋ ngə̀ŋ Nyìngòŋ chʉ mimbu ghə̀ sə ndiʼi a bèm li wen.

Və dyʉ̀ diʼ wàyn a ngə̀ŋ Nyìngòŋ

²² Kətsi kə kwʉʼ vəwenə shʉ̀ təwen tə vəwenə ando soʼ Mosìs ndiʼì, və lyɨ̀ wàyn kuʼ nə̀ wen a Jelusalèm ədiʼ a Bobo.

²³ Ando və ə nyòʼ a soʼ Bobo la “No wàyn wulɨm kò a ghə̀ nfʉ̀ fa bèm a mbì və diʼi la à diʼ wàyn Bobo.”

²⁴ Və kuʼ nə̀ wen əku kəku kəlàto bò kò vunə bi làto bò ando soʼ Bobo ngàʼà.

²⁵ A ndiʼ alì wutsen diʼ a Jelusalèm a və ndzàŋ zhiʼi wen nə̀ Simon, ghə̀ nkiʼ kəzhwì kəŋwòʼ Kə sə̀ tsi tò ntsìnə̀ tɨmə bè lyɨ̀ zhʉ əshyèʼ shyèʼ Nyìngòŋ. Ghə̀ ntsi kə̀ʼtə̀ mətsi a Bobo a tyì məshɨ mə viʼi Islel.

²⁶ Mu kəzhwì kəŋwoʼkə ndiʼ li a wen la ghə̀ ko lu pfʉ kèn la ghə̀ yenli wìʼ yi a Bobo ntsuʼ li ə tɨm.

²⁷ A ndiʼ ando tiʼi Yesò wenə lì wen ndyʉ̀ nə̀ wen a ngə̀ŋ Nyìngòŋ ndì və nè a wen ando soʼ ngàʼà, kəzhwì kəŋwoʼkə tènsə Simon ghə̀ lù ə dyʉ̀ tsu tò a zhʉ ayì.

²⁸ Ghə̀ shi wàyn ayì à wen avu mu sə̀ kuʼsə Nyìngòŋ gàʼà la.

²⁹ “Nèli luwèn a Bobo, wu shyèʼè wu pfwomə tò nə̀ mbwaʼmə ando wù ghʉ li gàʼà wu,

³⁰ byiʼè ando ashɨ ghomə yenli bwoŋ wu,

³¹ a wu nèli viʼi vətsèm yen,

³² Bayn yì a ghə̀ a diʼ jì wu a viʼi a və ko kɨ Nyìngòŋ, be vì nə̀ kuʼsə a viʼi vyə a loʼo Islel.”

³³ Tiʼi wen nə̀ lì wen ndiʼ nə̀ kaynə byìʼì nyʉ̀ a Simon ngàʼà kumə wàyn a yì.

³⁴ Simon bwaʼsə vəwenə mù gàʼ a Mèli la “Zhʉtə à! Nyìngòŋ tsuʼli wàyn la ghə̀ byɨsə bè bwòŋsə nghoʼo viʼi a loʼo Islel. Ghə̀ lu ndiʼ nchwi fa Nyìngòŋ a və lu ngàʼlə byìʼì wen,

³⁵ ndi nyʉ̀ vyì a viʼi lyòmtə a vəwenə tətyɨm fʉ̀ no tsèm a dayn. Fənyì fə diʼ be ne sù tyɨmə wu.”

³⁶ A ndiʼ ali, nshə̀ʼtə̀ ghoʼo wùwì tsen diʼ a və ndzàŋ wen nə̀ Ana, a diʼ wàyn Fanuwèl wù ngwaʼa ngə̀ŋ Ashà, mu ghə̀ dwinəli no nànto. Ghə̀ diʼ mu ghə̀ lam ə tsi tò ngwʉ̀ʼsə sòmbo,

³⁷ lɨm ə wen pfʉ. Ghə̀ kwi a nə̀ wùwì pfʉ sə̀ diʼ ngwʉʼ njʉ̀sə̀ kaʼ a məwum fwomə, ŋwʉʼ tò ngə̀ŋ Nyìngòŋ, ghoʼsə Nyìngòŋ, bamə chʉ be jɨ̀mə̀ nə̀nchwì jɨ̀mə̀ nətʉʼʉ.

³⁸ A sə ndiʼ kəlyɨŋ kə zhʉ a və nvì nə̀ Yesò a ngə̀ŋ Nyìngòŋ li, ghə̀ bè kwen tò a zhʉ ayì ə ku kəzòŋ kə Nyìngòŋ byìʼì wàyn a ghèn ə sə̀ shə̀ʼtə̀ kənyʉ̀ kə wàyn kèn a no məndo a ghə̀ nkə̀ʼtə̀ la Nyìngòŋ vi zen kətʉ kə viʼi Jelusalèm fa ngəʼ?

Və bwenə pfwo nə̀ Yesò

³⁹ Josèf wenə Mèli nè myètə no nyʉ̀ tsèm ando soʼ Bobo ngàʼà, vəwenə bwènə̀ pfwo a ntə̀ʼ Nazalèt a loʼo Galìlì.

⁴⁰ Wàyn a ghèn kwi to. Ətof ə wen kwi dyʉ̀ nə̀ mbì, Nyìngòŋ bè bwaʼsə wen.

Yesò a tyì ngə̀ŋ Nyìngòŋ

⁴¹ Tiʼi Yesò wenə lì wen sə̀ kuʼ no ngwʉ̀sə̀ tsèm a Jelusalèm zhɨ kətsi kə məzaʼsə.

⁴² Wàyn nè kwi zaʼa a ngwʉʼ njʉ̀sə̀ bò vəwenə bè kuʼ tsu ando vəwenə nè.

⁴³ Vəwenə nè zhɨ kətsi kə məzaʼsə ə mè, sə̀ mpfwo, Yesò faŋ a bàm a Jelusalèm kò tiʼi wen wenə lì wen lə kɨ.

⁴⁴ Ando vəwenə nkwòʼtə̀ la ghə̀ diʼ a ntyìntyìn viʼi, vəwenə jèʼè kətsi kə mpfen, mù bwènə̀ sə bèmə̀ wen a viʼi ngwaʼa ngə̀ŋ vəwenə bènə̀ a viʼi vətsen və a və nkɨ wen.

⁴⁵ Ali kò və lu yenə wen. Vəwenə mù bwènə̀ kuʼ a Jelusalèm ə kəŋ wen fa tsu.

⁴⁶ Və nkəŋ wen a mətsi taʼ dyʉ̀ yen wen a ngə̀ŋ Nyìngòŋ, ghə̀ ŋwʉʼ wenə ndìʼsə̀sə, zhʉtə nyʉ a vəwenə ngàʼà be bèmtə̀ tsen və à vəwenə.

⁴⁷ No məndo a ghə̀ ndiʼ nə̀ kaynə byìʼì tof wen bènə̀ ji a ghə̀ bwènsə̀ tsu.

⁴⁸ A ndiʼ a zhʉ a tìʼ wen wenə liwen nyenə wen, vəwenə sə diʼ nə̀ kaynə kumə wen. Li wen bèm a wen la “Wàyn ghom, byìʼì gho a wu nè nki kənyʉ̀ kenkə a yès a?” Yo tiʼi wu kəŋ li wù alə̀ sə fàynə.

⁴⁹ Ghə̀ bèm a vəwenə la ghə̀ŋ yi nkə̀ŋ mò a gho? Ghə̀ŋ bè yi mo la mà diʼ a ngə̀ŋ tiʼi ghom.

⁵⁰ Vəwenə nko nkɨ kənyʉ̀ a ghə̀ ngàʼà kə wenkə.

⁵¹ Ghə̀ lu a zhʉ a ghèn bwènə̀ shiʼi a Nazalèt wenə vəwenə mù zhʉmə vəwenə. Li wen ghʉ nyʉ̀ venə a wenə a tyɨm.

⁵² Yesò sə kwi kuʼ no nkayn a wen nə̀ a tof. Nyìngòŋ sə̀ kòŋ wen ə viʼi bè boŋ kòŋə.