Ŋwàʼlə̀ Luk 18 - The New Testament in the Babanki language

Ngàyn wùwì mphʉ wenə kətʉ kə nsoʼsə kətsen kə

¹ Yesò bè mò tò mu ngàyn tsen à ndzɨ̀mtə̀ sə bàm wen ə ziʼi vəwenə la vəwenə diʼi jɨ̀mə̀ tò məzhʉ tsèm, kò ve lù bwaʼa.

² Ghə̀ gàʼ la, “Kətʉ kə nsoʼsə kətsen kə nlù dìʼ a ntə̀ʼ tsen, kò ghə̀ lə̀ fàynə Nyìngòŋ, kèn la ghə̀ lyɨ̀ la wìʼ diʼ kəfo.

³ Wùwì mphʉ tsen be diʼ ntə̀ʼ ayì, dyʉ̀ a ngə̀ŋ wìʼ ghèn tò mətʉʼ tsèm, gàʼà la, ‘Soʼo shi kətʉ kom fà viʼi kəbàyn mò.’

⁴ Ghə̀ nè sə vì gàʼà, alì kətʉ kə nsoʼsə a kyì sə bʉʼsə tò bʉʼsə. A lu be bwènsə̀ kwòʼtə̀ tò wen la yì a tinə nsoʼ ayì, no tè ando yi ko fàyn Nyìngòŋ, kò yi lə lyɨ̀ la wìʼ diʼ kəfo,

⁵ à bwen alì, ghə̀ a vì a wen a ngə̀ŋ tò mətsi tsèm alə̀ nè la kə yì a kiʼi nzhʉtə.”

⁶ Bobo gàʼ alì ə mù gàʼ à ndzɨ̀mtə̀sə bàm wen la, “Ghə̀ŋ zhʉtə kənyʉ̀ a soʼ nsoʼ byɨ ayì ngàʼ a!

⁷ A lè a zì a bòŋsə faŋ Nyìngòŋ ke zhʉ̀tə di viʼi wen a və di a wen nə̀nchwì nə̀ nəntʉʼʉ a? Ghə̀ lè zì ghə̀ mu bʉʼsə kətʉ kə wen tò bʉʼsə à vəwenə a?

⁸ Mà gàʼ à ghə̀ŋ la, Nyìngòŋ ko lə laʼtə ke soʼ ə ku nsoʼ vəwenə alì Wàyn Wìʼ le lu sə bwenə vì a nsè a shə̀, ə yen viʼi və bu byɨmə à Nyìngòŋ a?”

Ngàyn wù Falàsi wenə wù kənsè

⁹ Ghə̀ bè mò ngàyn tsen à vəwenə vətsenvə a vəwenə yenə tò təwen tə vəwenə la vəwenə diʼ viʼi jùŋ və kèn la viʼi vətsen və diʼ viʼi və jùŋ və.

¹⁰ “Viʼi vətsenvə və bò nluli kuʼ dyʉ̀ kwen a ngə̀ŋ Nyìngòŋ əjɨ̀m. Wù muʼ diʼ wù Falàsi, ghə̀ tsen diʼ wù tin kənsè.

¹¹ Wù Falàsi yì mù dyʉ̀ tɨmə wen nyɨŋ ə mù sə jɨ̀mə, gàʼà la, ‘Mà ku kəzòŋ kə̀ a Nyìngòŋ byiʼ ando ma ko diʼ a nə̀ viʼi vətsen vyi a və zàŋsə shi fo viʼi tò kədyàŋ, kò diʼ a nə̀ viʼi vyi a və kwàʼtə̀ təsoʼ, ko dzɨ̀mtə̀ kyi viʼi. Ma ko diʼ a nə̀ wù tinə̀ kənsè ghèn.

¹² Mà bamə chʉ̀ à ghayn à bò a woŋ mpfen, gə̀tə̀ fo vwomə shi wum, ma kù kə mùʼ à wù.’

¹³ Wìʼ yì a ghə̀ tinə kənsè lì sə jɨ̀mə ti tò kəghaf, kò ghə̀ lə kòŋ əki kuʼsə nə̀ kaŋə ali ghə̀ ghʉ kəvu kə wen a wen kədʉʼ tò a nshinsə a nshinsə jɨ̀mə̀ gàʼà la, ‘Nyìngòŋ, kusə shinsə à mò, mà diʼ wù nyʉ̀ byɨvə!’

¹⁴ Mà shə̀ʼtə̀ a ghə̀ŋ la wìʼ a ghèn nlù sə pfwo zaʼa à wen ngə̀ŋ mu Nyìngòŋ tsəʼsəli mbyɨsə wen, ali kèn la ghə̀ tsəʼsəli mbyɨsə wu Falàsi yì. No məndo a ghə̀ kuʼsə wenə wen, Nyìngòŋ lu shiʼsə wen, alì no ndo a ghə̀ shiʼsə̀ wenə wen a nsè, Nyìngòŋ lu kuʼsə wen.”

Yesò mbwaʼsə vunə və bwaʼvə

¹⁵ Viʼi lyɨ̀ vunə və bwaʼvə vì nə̀ vəwenə a Yesò ndi ghə̀ mbwaʼsə vəwenə. Ndzɨ̀mtə̀sə bàm wen nè yen alì mù sə kəŋkə̀ viʼi a vyi.

¹⁶ Alì Yesò dzàŋ vunə a vyi ə gàʼ la,“Ghə̀ŋ kye vunə vəwenə vì à mò. Kə ghə̀ŋ be tàm vəwenə byìʼì soʼ fòyn Nyìngòŋ kiʼ viʼi a nə̀ vəwenə.

¹⁷ Mà gàʼ à ghə̀ŋ nəmwèʼè la, No ndò a ghə̀ fàŋ shisə soʼ fòyn Nyìngòŋ tò nə̀ wàyn bwaʼ, kò ghə̀ lù kwèn a kəshi kə fòyn a kèn.”

Wu ghoʼo tsen bèm kənyʉ̀ à Yesò

¹⁸ Kətʉ kə və Jus kə tsenkə mù bèm à Yesò la, “Ndìʼsə̀ jùŋə, mà lè zì mà nè no ghò ndi lu kiʼi bwòŋ a ghə̀ a fàŋ tò ghayn mùʼ a?”

¹⁹ Yesò bèm à wen la, “Byìʼì ghò a wù dzàŋ mò la wù jùŋ a? No wù jùŋ muʼ ko diʼ əchò tò Nyìngòŋ.

²⁰ Wù kɨ təsoʼ tèntə a tə gàʼà la, ‘Kə wìʼ à tsi nə̀ wì wìʼ ko wenə lɨm wìʼ, kə wìʼ à zhwi wìʼ, kə wìʼ a tsoŋ, kə wìʼ à tɨmə a bàm wìʼ a ghə̀ zhò ndzɨ̀ŋsə byìʼì wutsen, ngumlə̀ tìʼ wù nə̀ lì wù.’”

²¹ Kətʉ kyì mù gàʼ à wen la, “Mà ghʉli təsoʼ tèntə no tə tsèm no fa tyetə.”

²² Yesò zhʉ alì ə gàʼ à wen la, “Wù bù kiʼi kənyʉ̀ kə mùʼ ənè, dyʉ̀ ə baʼlə fo vyə tsèm ə ku ko yi a viʼi kəmfem ndi lu kiʼi ghoʼo wu a kàŋ. Wù nè ne alì, wu vi ə dzɨ̀mtə̀ mò.”

²³ Kətʉ a kyì nè zhʉ kənyʉ̀ na kèn, kə nè, ghə̀ sə̀ diʼ tò nshinsə a nshinsə byìʼì ghə̀ ndiʼi no wù ghoʼo.

²⁴ Yesò ki wen mù gàʼa la, “Kə to no nə̀ nànto à viʼi və ghoʼkə və vəwenə kwen a kəshi kə soʼ fòyn Nyìngòŋ!

²⁵ Kə bwaʼmə à fəbyèʼè fo fə chò fa kəbʉ̀ʼ kə nsoʼ cho la wù ghoʼo kwen a kəshi kə soʼ fòyn Nyìngòŋ.”

²⁶ Viʼi vyì a və nzhʉ gàʼ wen mù bèm à wen la, “Kə lè tsèn ndiʼ ali, à lù bwòŋ ndo?”

²⁷ Ghə̀ gàʼ a vəwenə la, “Kənyʉ̀ a wìʼ zì kò ghə̀ lə̀ nè kə bwaʼmə à Nyìngòŋ ghə̀ nè.”

²⁸ Bità gàʼ à wen la, gaʼa kò wù yenli la yes moʼtəli məbəŋ myesə sə dzɨ̀mtə wù lo?.

²⁹ Yesò bwènsə̀ gàʼ à vəwenə la, “Ma gàʼà ghə̀ŋ nəmwèʼè la, no wìʼ ko diʼ a ghə̀ sətsèn moʼtə kəbəŋ kə wen, kò wì wen, kò lèmə̀ wen, kò tìʼ wen nə̀ lì wen, kò vunə wen byìʼì kənyʉ̀ kə fòyn Nyìngòŋ,

³⁰ ke Nyìngòŋ kwʉʼsə ghoʼo wen a nsè a shə̀, ə ghə̀ bè kiʼ bwòŋ a ghə̀ lə faŋ tò ghayn mùʼ.”

Yesò bè kùmtə̀ a ndiʼ à ghayn taʼ la pfʉ wen sə̀ boʼsə vi

³¹ Yesò lyɨ̀ ndzɨ̀mtə̀sə bàm wen, njʉ̀sə̀ bò ə gàʼ à vəwenə la, “Ghə̀ŋ kɨ la vəghəŋ kuʼ dyʉ̀ a Jelusalèm luwen, no ghò a nshə̀ʼtə̀ sə ghoʼkə sə diʼ mu sə nyoʼli kùmə̀ Wàyn Wìʼ diʼ kwʉʼ.

³² Və ne ku wen a tɨmə, ə və chəʼə wen, nè nyʉ diʼsə kətʉ, bè chʉ̀lə mənte a wenə wèn.

³³ Və nè ghòm wen bè zhwi wen, à sə ndiʼ a bamə mətsi ntaʼ, ghə̀ bwòŋ fa pfʉ.”

³⁴ Ghə̀ ngaʼà lì kò viʼi ntɨm wen vi lò, kɨ kənyʉ̀ a ghə̀ gàʼà kəwen kə, byiʼ ando tof yi a ghə̀ ndiʼì a ntìntìn kənyʉ̀ a kì ndìʼ mu və lyomtə̀ li fà vəwenə.

Yesò chʉʼ wù kənshɨ̀f

³⁵ Yesò mu nè sə boʼsə dyʉ̀ a Jèlikò, yèn wù kənshɨ̀f tsen ghə̀ ŋwʉʼ a wenə ji, lonə.

³⁶ Ghə̀ zhʉ tò ando nòynə viʼi chò ghə̀ bèm la, à cho ghò?

³⁷ Və gàʼa wen la à chò Yesò, wù Nazalèt.

³⁸ Ghə̀ zɨmə gàʼ la, “Yesò, Wyè Fòyn Devìt, kusə shɨnsə à mo!”

³⁹ Viʼi vyi a və njèʼè dyʉ̀ fa mbì kənkə wen gàʼa la kə ghə̀ ba gàʼ. Ghə̀ bòŋsə̀ zɨmə dyʉ̀ tò nə̀ mbì, la, “Wàyn Fòyn Devìt, kusə shɨnsə a mò!”

⁴⁰ Yesò tɨmə gàʼ la və lyɨ̀ wen vì nə̀ wen a yì. Və ne nvi boʼsə nə̀ wen, Yesò bèm a wen la,

⁴¹ “Wù kəŋ la mà nè ghò à wù a?” Wì a bwènsə̀ gàʼ la, “Bobo, ne mà bwènsə̀ yenə shi!”

⁴² Yesò mù gàʼa wen la, “N-yenə shi əbyɨmə wu ne li wu nto.”

⁴³ No a zhʉ̀ kò, ghə̀ bwènsə̀ sə yenə shi, lu sə dzɨ̀mtə̀ dyʉ̀ nə̀ wen, kuʼsə dyʉ̀ nə̀ Nyìngòŋ. No mə ndò a ghə̀ yenə kənyʉ̀ a kə chò sə boŋ kuʼsə Nyìngòŋ.