Ŋwàʼlə̀ Luk 17 - The New Testament in the Babanki language

Yesò shə̀ʼtə̀ jì a ndzɨ̀mtə̀sə bàm wen nə̀ ntsi tsu

¹ Yesò gàʼ à ndzɨ̀mtə̀sə bàm wen la, “Nyʉ̀ vyi a və nè viʼi ne mbyɨsə ko faŋ kè ndiʼ, alì ngəʼ ghoʼo diʼ à wìʼ yì a ghə̀ nè la viʼi yenə ngəʼ!

² Kə diʼi bòngsə̀ boŋ a wen la və tuŋ ti a wen a ŋwì, dyʉ̀ mòʼo wen a mu mə ghoʼomə̀ əchò la ghə̀ nè wàyn mùʼ fa ntìntìn ə vunə venə nè mbyɨ.

³ Ghə̀ŋ tsɨŋ tə wenə tyəŋtə. “Lèmə̀ ghə̀ŋ nè mbyɨ a ghə̀ŋ, ghə̀ŋ ə kəŋkə̀ wen, ghə̀ sətsèn kwìtə tyɨm ə wen fa kənyʉ̀ kə byɨkə a kì, və lyèsə ku wen.

⁴ Ghə̀ nè nyʉ̀ byɨvə à wù no ghaynə ashə̀ʼ a kətsi, ghə̀ nè no zhʉ̀ ko, vì sensə wù la, ghə̀ ko be lu mwòm, wu lyèsə̀ ku wen.”

Əbyɨmə

⁵ Viʼi ntɨm vì gaʼa Bobo la, “Nè yès tuʼù kiʼi byɨmə a Nyìngòŋ!”

⁶ Bobo bwènsə̀ gaʼa vəwenə la, “A tuʼù kiʼi la ghə̀ŋ kiʼi byɨmə a ghə̀ diʼi to nə̀ əshɨ ngwaʼa mostàd, mu ghə̀ŋ zì ghə̀ŋ gaʼà fəkoʼ fe sykamayn fen fə la tsuʼmə kwen zhɨtə wenə wen a chì a mù fə be nè to lì.

⁷ “A lè dìʼ ndo a ghə̀ŋ a ntìntìn a ghə̀ zì gàʼ a wìʼ ghə̀ pfwo fa wen a sɨm ko fa ntsɨŋə byɨsə wen la ghə̀ zaŋsə vì ŋwʉʼʉ zhɨ a?

⁸ Gaʼa kò wu a bòŋsə gaʼa wen la ghə̀ kwitə ndisə wen pfè kəfo ku wù zhɨ bè kù kəfo wù nyʉ mibu nkàntə̀ wen zhɨ bè nyʉ̀?

⁹ Ghə̀ lè zì ghə̀ ku kəzòŋ a wù shə̀ʼ a yì byiʼ ando ghə̀ nè li tò kənyʉ̀ a ghə̀ yi gàʼa?

¹⁰ Kə diʼi ndiʼ tò a lì à ghə̀ŋ. Və sə tsèn ə ku shwèʼ, ghə̀ŋ shwèʼ mwètə̀, ghə̀ŋ ə ghʉ̀ la ghə̀ŋ diʼ tò viʼi shwèʼ, ghə̀ŋ nè tò shwèʼè yi a ghə̀ŋ kiʼi nè.”

Yesò ə̀ chʉʼ viʼi kənsòtə̀ wum

¹¹ Ando Yesò nlu sə dyʉ̀ a Jelusalèm ghə̀ cho fa ghomə nə̀ Sàmalìyà wenə Galìlì,

¹² Ghə̀ nè sə kwenə dyʉ̀ a ti ntə̀ʼ ə tsen a, viʼi kənsòtə̀ vətsenvə wum yenə wen ə tɨmə tò fa kəghaf

¹³ Ə zɨmə gaʼa wen la, “Yesò kusə nshinsə à yès a Tìʼ,”

¹⁴ Yesò yen vəwenə gàʼa la, “Ghə̀ŋ dyʉ̀, vəpfèm və ngə̀ŋ Nyìngòŋ yenə tsaʼa ghə̀ŋ.” Vəwenə sə dyʉ̀ a ji və chʉʼ vəwenə.

¹⁵ Wìʼ mu fà vəwenə ntìntìn, a diʼ wù Sàmalìyà, nè yen no zhʉ kò la ghə̀ to li bwènə̀ sə ghoʼsə dyʉ̀ nə̀ Nyìngòŋ no gɨ to

¹⁶ Ghə̀ dyʉ̀ ne yen Yesò ə fəŋ a wen a shɨ achəʼ achəʼ ə ku kəzòŋ a wen.

¹⁷ Yesò mù bèm la, “Mà yi chʉʼ viʼi əwum, viʼi vətsenvə vyì abʉ̀muʼ ə dyʉ̀ fe a?

¹⁸ Kə lè dìʼ la no wìʼ fà vəwenə ntìntìn ko yi kwòʼtə̀ əbwenə vyi ku kəzòŋ be kuʼsə Nyìngòŋ, a bwen tò wù kətɨm ghèn mu lo?”

¹⁹ A ndo ghə̀ ngaʼà ali mù gaʼa wù Sàmalitàn ayì la, “Lu dyʉ̀ à wù kəshi. Əbyɨmə wu nè li wu nto.”

Mə vi soʼo fòyn Nyìngòŋ

²⁰ Viʼi Falàsi vətsenvə mu bèm a Yesò la, “Soʼo fòyn Nyìngòŋ lə vì a tʉʼ kò?” Ghə̀ gàʼa vəwenə la, “Kəchʉtə kə tsen kə ko diʼ a kə lə dìʼ la soʼo fòyn Nyìngòŋ zìtə̀ li a mə̀ vì.

²¹ No wìʼ ko lə gàʼ la yen a, ghə̀ ghèn a ghə̀ sə vì kò ghə̀ yì, byìʼàndo soʼo fòyn wen diʼ a ghə̀ŋ a ntìntìn luwen lè.”

²² Ghə̀ mu bwènsə̀ gàʼ a ndzɨ̀mtə̀sə bàm wen la “Tʉʼ lə vyì a ghə̀ŋ lə shɨmtə la wàyn wìʼ yi ndiʼi ndiʼ wenə ghə̀ŋ alì, kò ndiʼ la ghə̀ŋ a yen.

²³ A lə ndiʼ a tʉʼ ayi, ə viʼi a gàʼ la, ‘Ghə̀ ghèn afàʼà, ghə̀ ghèn a shə̀!’ Kə ghə̀ŋ nè zhʉ, ko dyʉ̀ a kəshi kətsen.

²⁴ Əvì a Wàyn wìʼ lə nkə̀ʼə̀ ndə̀ŋndəŋ tò nə̀ əwʉ a ghə̀ lə mwànə̀, və yen ando ghə̀ baynə a təshə tə mbyì tə tsèm.

²⁵ Ghə̀ diʼi yenə ngəʼ a jisə, no sə ghoʼo viʼi mbyì luwen bè mò wen mimbu ənyʉ̀ venə əlyɨ kəshi.

²⁶ Wàyn Wìʼ nlù sə nvi, nyʉ̀ chò ando və ncho a tʉʼ Nuwà.

²⁷ Viʼi nzhɨ, nyʉ,lamə be ku vunə a lamə, əzaʼ fa kətsi Nuwà nkwen a kəbaŋ, kəkuŋ kə vì ə zhwilə viʼi vyì a və nfaŋə̀ no vətsèm.

²⁸ Nyʉ be lu chò a tʉʼ a Wàyn Wìʼ vì ando və nchò a tʉʼ Lòt. A ndiʼ a tʉʼ ayì, viʼi nzhɨ, nyʉ, zenə fo, bàʼlə fo, wye tuʼu fo, be bwòmə aloʼ.

²⁹ A ndiʼ a kətsi a Lòt nfʉ̀ fa Sodòm, Nyìngòŋ shʉ̀ʼ zhiʼ bènə̀ nguʼsə, sə fwi tò nə̀ məkàyn, fa kàŋ və shiʼi ə zhwilə viʼi vyì a Lòt nlù ə ghʉsə lì no vətsèm.

³⁰ A lè ando nyʉ lu ndìʼ a kətsi a Wàyn Wìʼ lu vì.

³¹ “Nyʉ̀ venə lə sə nchò, wìʼ ndiʼ a kətʉ kə ngə̀ŋ, kə ghə̀ be a shiʼi əlyɨ̀ fo fa tyì ngə̀ŋ. Wìʼ ndiʼ te sɨm, kə ghə̀ be a bwènə̀ pfwo a ngə̀ŋ.

³² Kə ghə̀ŋ a lyesə kənyʉ̀ a kə ncho nə̀ wì Lòt.

³³ No məndo a ghə̀ mwòmsə ə bwòŋsə̀ ngə̀ŋ kətʉ wen, ghə̀ a pfʉ, no məndo a ghə̀ à lè sàŋ kətʉ wen mu ghə̀ a bwòŋ.

³⁴ Mà gàʼa ghə̀ŋ la, a lə ndiʼ a nətʉʼ kətsi ayi, viʼi və bò lə nyoŋ a kwen, və vì lyɨ̀ wù muʼ ə moʼtə wutsen.

^35-36 Kyi lə mbvù kəbayn a ti, və bò, və vì ə lyɨ̀ ghə̀ muʼ ə moʼtə ghə̀ tsen.” Lyʉmə lu shyèʼè a sɨm və bò ə və vi lyɨ̀ wu muʼ ə moʼtə wutsen.

³⁷ Ndzɨ̀mtə̀sə bàm wen mù bèm à wen la, “Nyʉ̀ venə lu cho fe a Bobo?” Ghə̀ gàʼ à vəwenə la, “Kəfo kə pfʉ̀kə sətsen ndiʼ tè fe, ŋoŋò à kɨ, ə zhʉŋtə̀ tsu.”