Ŋwàʼlə̀ Luk 14 - The New Testament in the Babanki language

Yesò chʉʼ wù kwaʼa tsen a kətsi kəzhʉ̀tə kə və Jus

¹ A ndiʼ a kətsi kəzhʉ̀tə kətsenkə,Yesò lù ə dyʉ̀ zhɨ a ngə̀ŋ wutsen a ndiʼ kətʉ kə viʼi Falàsi. Viʼi a və ndiʼ tsu ghʉ ashɨ a wen Yesò no ando.

² Wutsen mu afwen wen bènə̀ akwòŋ wen mwikəli vi à Yesò.

³ Yesò mù bèm à ndìʼsə̀sə təsoʼ bènə̀ viʼi Falàsi la,“Soʼo lè byɨmə la və chʉʼ wìʼ a kətsi kəzhʉ̀tə, mu la ghə̀ tènsə lo?”

⁴ Vəwenə chɨmə tò la kùʼ, Yesò kùmsə̀ wìʼ ayì ə chʉʼ wen ə gàʼ à wen la ghə̀ pfwo

⁵ ə bwènsə̀ bèm à vəwenə la, “A diʼ ndo à ghèn a ntìntìn a wàyn wen kò nyàm wen sətsen fəŋ a nkwòŋ à mù a kətsi kəzhʉ̀tə kə, ghə̀ a faŋ ke shìsə tò fa a zhʉ̀ a?”

⁶ Vəwenə nko kiʼi no kənyʉ̀ əgàʼ.

Shìʼsə wen nə̀ Tuʼmə

⁷ Yesò ne yen viʼi vyi a və laʼà la və vi a kəshi kə kəzhɨ, vəwenə nè sə vì lyɨ̀ tò shi ŋaŋtəvə. Ghə̀ mù tyɨftə vəwenə a ngàyn la,

⁸ “Wìʼ sətsen laʼà wù la wù vi a kəshi əzhɨ lam, wù vi kə wù à ŋwʉʼmə a kəshi kə ŋaŋtəkə byiʼàndo ghə̀ zì ghə̀ ndiʼ mu ghə̀ laʼà wìʼ a ghə̀ chò wù.

⁹ Ə wìʼ yì a ghə̀ laʼà ghə̀ŋ vətsèm vi ə gàʼ à wu la, ‘Lù ə ku kəshi à wìʼ ghèn.’ Alì kətʉ kə̀ ne ndìʼì ə wù dyʉ̀ ŋwʉʼmə a kəshi kə tyetə kə.

¹⁰ Wìʼ laʼà wù, wu dyʉ̀ wù bòŋsə̀ ŋwʉʼʉ a kəshi kətyetə kə ndi wìʼ yì a ghə̀ laʼà wù lì vi ə gàʼ à wù la,‘Wùndoŋ mò, kuʼtə vì ə ŋwʉʼmə a kəshi kə ŋaŋtəkə a shə̀.’ Ali, wù ne kuʼmə ashɨ viʼi vyì a ghə̀ŋ vəwenə diʼ a kəshi kəzhɨ akyì a mùʼù.

¹¹ No ndo a ghə̀ kuʼsə wenə wen a kàŋ, Nyìngòŋ lu shisə wen, ə no ndo a ghə̀ shiʼsə wenə wen, Nyìngòŋ ne kuʼsə wen a kàŋ.”

¹² Yesò bwènsə̀ ə gàʼ à wìʼ yì a ghə̀ nlaʼà wen la,“Wù sə nlaʼà viʼi la və vi à wù a kənyʉ̀ no a zhʉ kò kə wù a laʼà ndoŋ shəsə ko vəlèmə vyə lo viʼi ngwaʼ wù nə̀ viʼi və ghoʼkə və vyi a ghə̀ŋ vəwenə tsi boʼsə, byìʼàndo vəwenə ne lyɨ̀ kənyʉ̀ kə vəwenə be laʼà wù, ə kəfo a wù nku à vəwenə a wù a kənyʉ̀ vəwenə zhɨ vəwenə bwènsə̀ lòʼ à wù.

¹³ Wù kyè kənyʉ̀ kyə̀ kə, wu bòŋsə laʼà viʼi kəfem nə̀ viʼi a və ŋàŋlə, nə̀ viʼi kənfyɨf bènə̀ və nlàʼfwen.

¹⁴ Wù sətsèn nè alì mbwaʼmə lu ndiʼ à wù byiʼàndo vəwenə ko lu bwènsə̀ lòʼ wù, Nyìngòŋ lu lòʼ wù a kətsi kyì a viʼi vyì a diʼ viʼi və jùŋə və ashɨ Nyìngòŋ bwènə̀ lù fa pfʉ.”

Ngàyn kùmə̀ kəzhɨ kə ghoʼkə

¹⁵ A ndiʼ ando wutsen a ghə̀ ndiʼi a ntìntìn nòyn ayì nzhʉ kənyʉ̀ kènkə, ə gàʼ à Yesò la, “Saŋlə lu ndiʼ à viʼi vyì a və lə zhɨ a kəchiʼ a kəshi kə foyn Nyìngòŋ.”

¹⁶ Yesò gàʼ à wen la,“Wutsen nlù ki kəzhɨ kə ə laʼà viʼi və ghoʼkə və no vəghoʼo.

¹⁷ Zhʉ kwʉʼ, ghə̀ tɨm wù shyèʼ wen la ghə̀ jèʼè ə shə̀ʼtə̀ a viʼi vyi a ghə̀ tə̀ laʼà li la vəwenə vi byiʼàndo no ghò sə diʼ mu ghə̀ baʼtə̀ li.

¹⁸ Alì vəwenə zìtə̀ tò və mùʼ və mùʼ əloyn ji. Wù mbì gàʼ à wù shyèʼ ayì la ‘Ma zenli sɨm sə kəŋ dyʉ̀ ə lye. Dyʉ̀ sènsə ti shyèʼ wù la kə ghə̀ à fwisə tyin à mò.’

¹⁹ Wutsen gàʼ la, ‘Ma zenli vemboŋ ə wum mù sə dyʉ̀ ə mwòmsə vəwenə əshyèʼ sɨm ghomə. Dyʉ̀ sènsə ti shyèʼ wù la kə ghə̀ a fwisə tyin a mò.’

²⁰ Ghə̀ sə dyʉ̀ à wutsen, ghə̀ gàʼ la,‘Ma ko vì byìʼàndo ma bu lan wì ghom tò lamə.’

²¹ Wù shyèʼ ayì bwènə̀ pfwo ə shə̀ʼtə̀ nyʉ̀ na vènə à ti shyèʼ wen, tyin wen fwi, ghə̀ gàʼ à wàyn ayì la, ‘Zaŋsə fʉ̀ ə dyʉ̀ a jisə tosə nə̀ sə tyetəsə a ntə̀ʼ ə boŋtə viʼi kəfem, nə̀ viʼi a və ŋàŋlə ŋàŋlə, nə̀ viʼi kənfyɨf bènə̀ vi ngesə̀ fwen vyi a və diʼ tsu ə vi nə̀ vəwenə.’

²² Wu shyèʼ ayi dyʉ̀ ə bwènə̀ vì ə gàʼ wen la, ‘Tìʼ ma nèli ando wù yì gàʼ alì ngə̀ŋ ko təmə lwin.’

²³ Alì ti shyèʼ wen be gàʼ à wen la, ‘Fʉ dyʉ̀ a ntə̀ʼ a məjìtə mə təsɨm bènə̀ a woŋ a wù a yen ngi tsu tò nə̀ venə ə nè vəwenə vi ndi ngə̀ŋ ghom lwin.

²⁴ Mà gàʼ à ghə̀ŋ la, no wìʼ fa ntìntìn viʼi vyi a ma tə̀ laʼà vəwenə nyiŋkəli a mwòm kəfo kəzhɨkə mò.’”

Kənyʉ̀ kù kə a wù diʼi nè mimbu ndiʼ ndzɨ̀mtə̀ bàm Yesò

²⁵ A ndiʼ ando Yesò njèʼè dyʉ̀, nòyn viʼi sə dzɨ̀mtə̀ dyʉ̀ nə̀ wen. Ghə̀ fuʼtə ə gàʼ à vəwenə la,

²⁶ “Wìʼ zì kò ghə̀ lù kwʉʼ ədiʼ ndzɨ̀mtə̀ bàm mò, chò la ghə̀ kòŋ mò chò ando ghə̀ kòŋə̀ tìʼ wen nə̀ lì wen, ne wì wen, nə̀ vunə wen, nə̀ və lèmə̀ və wen, be kòŋ mò chò tè ngə̀ŋ kətʉ wen.

²⁷ No məndò a ghə̀ sətsèn faŋ ke byèʼè kəntò kə wen ə dzɨ̀mtə mo, ghə̀ zì kò ghə̀ lə ndiʼ ndzɨ̀mtə̀ bàm ghom.

²⁸ No məndo a ghə̀ŋ a ntyìntyìn sətsèn mù nkəŋ bwom ngə̀ŋ ghoʼo ə faŋ ke shiʼi ŋwʉʼʉ ə kyitə ə lye la gàʼa yi kiʼ ki a ji a yi ne myètə kəmbwom akyì tsu lo?

²⁹ Ghə̀ sətsèn faŋ ke nè alì, ə wye kechɨ kə ngə̀ŋ akyì, ə fàŋ ke bwom mwètə̀, à sə nchò no ndò fa ji ə yen, ghə̀ sə chəʼə dyʉ̀ nə̀ wen,

³⁰ gàʼà la,‘Wìʼ ghèn tə̀ zìtə̀ kəmbwom ko ghə̀ diʼi mwètə̀’.

³¹ A le zì a baʼtə̀ fòyn ko nə̀ viʼi ghoŋə nkamsə wum ədyʉ̀ soyn fòyn tsèn ghə̀ kiʼi viʼi ghòŋ nkamsə məwum bò ke ŋwʉʼ ə lye la gàʼa viʼi vyi a venə to no nkayn əsoyn viʼi fòyn tsen a vyi lo?

³² Ghə̀ sətsèn yen la ghə̀ zì kò ghə̀ lə sòyn viʼi fòyn tsen a vyi ghə̀ a tɨmə ntɨm la və dyʉ̀ ə sensə fòyn tsen yì, vəwenə bù bu no kəghaf la yì kòŋə̀ əku no ghò ə vəwenə shɨtə kənyʉ̀ akyì.

³³ Kə le diʼ tò ndə̀ŋndəŋ ando no ndò à ghə̀ŋ ntìntìn faŋ ke moʼtə no məghò yì a ghə̀ kiʼi, kò ghə̀ ndiʼ ndzɨ̀mtə̀ bàm ghom.

Ndzɨ̀mtə̀sə bàm Yesò shì a sə mbu chiʼi kətʉ

³⁴ “Ghə̀ŋ kɨ la, fəmbvaŋ fə bòŋsə, alì mu fə sətsèn faŋ ke be lyìmə̀, ko kənyʉ̀ kə a ndiʼ a wù zì be nè nə̀ fəwenfə, fə be lyìmə̀.

³⁵ Kò fə be boŋ və nè tə̀ kənyʉ̀ kə tsenkə tsu à bwen tò la və chʉtə maʼà. A tofə no məndò ghə̀ tuʼù zhʉtə.”