Matìyò 9 - The New Testament in the Babanki language

Yesò chʉʼ wù kənkwaʼkə kə

¹ Yesò kwen a nkanuʼ bwènə̀ dyàŋ dyʉ̀ a ntə̀ʼ yi a ghə̀ ntsi tsu.

² Viʼi vətsen və lyɨ̀ wìʼ vì nə̀ wen mu ghə̀ kwaʼkə li, a Yesò, ghə̀ nyoŋ a ghàm. Yesò nè yen byɨmə yì a vəwenə nkiʼi ə gàʼ à wù kənkwaʼkə yì la, “Kə a fwaynə a wàyn ghom. Ma lyesə li nku mbyɨ shəsə.”

³ Ndìʼsə̀sə təsoʼ sə tsensə zhʉ alì mù sə gàʼà tò a vəwenə a tətyɨm la, “Wìʼ ghèn telə̀ Nyìngòŋ.”

⁴ No zhʉ̀ kò, Yesò kɨ təkwòʼtə̀ tə vəwenə mù bèm à vəwenə la, “Ghə̀ŋ kwòʼtə nyʉ̀ byɨvə alə̀ byìʼì gho?

⁵ A bwaʼmə kəkò, əgàʼ la, ‘Və lyesəli nku mbyɨ shəsə’ mu, əgàʼ la, ‘Lu jeʼ a?’

⁶ Ma diʼi à ghə̀ŋ luwen la Wàyn Wìʼ kiʼi adyòʼ a kwi nse ə lyesə ku mbyɨsə viʼi.” Ghə̀ gàʼ alì mù gàʼ à wù kənkwaʼkə yì la, “lu lyɨ ghàm ə wu mpfwo.”

⁷ Wìʼ ayì lu sə jèʼè pfwo.

⁸ Viʼi nè yen alì sə fàyn no ŋàŋ, bè mù sə̀ kuʼsə Nyìngòŋ ando ghə̀ ku nki àdyoʼ a ghèn à viʼi.

Yesò tsuʼ Matìyò a nə̀ ndzɨ̀mtə̀ bàm wen

⁹ Yesò lù fa tsu sə dyʉ̀ yen wìʼ, a zhiʼi wen ndìʼ Matìyò, ghə̀ ŋwʉʼ atò yì a və tinə kənsè tsu Yesò gàʼ à wen la, “Dzɨ̀mtə̀ mo.” No a zhʉ kò, ghə̀ lù sə dzɨ̀mtə̀ dyʉ̀ fa wen a bàm.

¹⁰ Yesò nə̀ dyʉ̀ ŋwʉʼ a kəshi kə kəzhɨ a ngə̀ŋ Matìyò, viʼi a və tinə kənsè bènə̀ viʼi və byɨvə vətsenəvə, no vəghoʼo bè ŋwʉʼ wenə ndzɨ̀mtə̀sə bàm ə wen.

¹¹ Və Falàsi vətsenəvə yen ali mù bèm a ndzɨ̀mtə̀sə bàm Yesò la, “Byìʼì ghò a ndìʼsə̀ ghə̀ŋ zhɨ wenə viʼi tinə kənsè bènə̀ viʼi və byɨvə vətsenəvə a?”

¹² Yesò zhʉ kənyʉ̀ a vəwenə gàʼà bwensə̀ bèm à vəwenə la, “Wìʼ a ghə̀ diʼi to kò kəŋ wù kəfʉ. A nə̀ kəŋə tò viʼi vyì a və kwaʼkə.

¹³ Ghə̀ŋ dyʉ̀ kəŋ kɨ̀ kənyʉ̀ kənkə a Nyìngòŋ gàʼ à wenə ŋwàʼlə̀ la, ‘Mà kusə shɨnsə a viʼi, kə ghə̀ŋ nə̀ shə̀ tò nyamsə a mo.’ Ma ko tə vi ə tisə viʼi vyì a və sə ti akayn, mà tə vi ə tisə viʼi və byɨvə.”

Və bèm kənyʉ̀ a Yesò byìʼì bamə ə chʉ̀

¹⁴ Ndzɨ̀mtə̀sə bàm ə Joyn Ku amù sə tsensə nvi li ə bèm a Yesò la, “Byìʼì gho a yès viʼi Falàsi ə bamə əchʉ̀, ndzɨ̀mtə̀sə bàm ə wù sə ko bamə a?”

¹⁵ Yesò ə bèm a vəwenə la, lɨm wùwì lə laʼa viʼi akəshi kə lam, və vi, və a ndì dì ghə̀ bu dìʼ to tsu lo? Kətsi kə lə vi, ə və lyɨ lù nə̀ lɨm wùwì fa vəwenə a ntìntìn, ə vəwenə mu ə bamə chʉ̀.

¹⁶ “Wìʼ zì kò ghə̀ lə̀ lyɨ̀ kəbàs kə ndisə kə fikə ə bàʼsə ndisə musə tsu. Ghə̀ ne ali, kə basə kə ndisə a kì a bwənsə ə tsuʼmə, ə sə ə tsuʼmə a zhʉ a yì, bè tuʼtə ghoʼsə kəbʉʼ a kì a və yi bàʼsə.

¹⁷ Kə lə diʼ to ndə̀ŋndəŋ ando viʼi ko tɨmə ə wye məlyʉ̀ʼ kenla mə to li a vəsaʼ və gwʉ̀ nyamsə musə. Və ne ali, ə vəsaʼ a vyi sə baykə, və a gho məlyʉ̀ʼ ə gho vəsaʼ. Və lèmə̀ bòŋsə wye tò məlyʉ̀ʼ kenla mə to li a vəsaʼ və fivə. Və ne alì, ko kəfo kə a lè.”

Yesò ə lusə wàyn wùwì fa ə pfʉ ə be chʉʼʉ wùwì ə tsen

¹⁸ Yesò ə bu gàʼa tò gàʼa, wù ə kətʉ ə viʼi və Jus ə tsen ə vi ə laŋtə a wen alwi ashɨ ə gàʼa la, “Wyè ghom pfʉ li toʼ luwen lə̀ alì ma kəŋ la wù vi ə kùmə̀ wen toʼ kùmə̀ ə ndi ghə̀ bwənsə lu.”

¹⁹ Yesò ə lu tò lu wenə ndzɨ̀mtə̀sə bàm ə wen ə mu sə dyʉ̀ abàm ə wìʼ a yi.

²⁰ To alì, wùwì ə tsen ə vi fa abàm ə Yesò, mu ghə̀ nlaʼtə to alə̀ yenə zhʉ ə wen, mu kwaʼa a yi ə kuli ngəʼ a wen a ngwʉʼ njʉ̀sə̀ bò, ə kùm əsoŋ ə ndisə ə Yesò.

²¹ Ghə̀ nə̀ nkumə ali byɨmə to no la ghə̀ sətsèn kum tò ndisə wen, ə ghə̀ a to.

²² Yesò ə kaʼsə ə yen wen ə mù gàʼ la, “Kə wu faynə a wàyn ə ghom. Byɨmə ə wu ne li wù to.” A diʼ toʼ zhʉ yi a wùwì a yi ə to tsu.

²³ Yesò ə ne dyʉ̀ zaʼa a ngə̀ŋ ə wù ə kətʉ a yi ə kwen yen viʼi, və ghoʼo no alə̀, vətsenəvə bʉʼ fo, vətsenəvə dì.

²⁴ Ghə̀ gàʼa a vəwenə la, “Ghə̀ŋ fʉ. Wàyn ghèn ko pfʉ pfʉ, ghə̀ bʉnə bʉnə.” Vəwenə mu sə chyeʼ wen tò chyeʼ.

²⁵ A sə ə diʼ to ando viʼi fʉ a kəbəŋ, ghə̀ kwen dyʉ̀ a ngə̀ŋ ə ghaʼ kəvu kə wàyn a yi, no a zhʉ ko, ghə̀ lu tò lu.

²⁶ Soʼgho kənyʉ̀ a kyi ə waŋ tò əshi ə tsèm ashə əloʼ na yì.

Yesò ə ne, viʼi və shɨfkəvə və bò ə bwənsə sə yenə əshi

²⁷ Yesò ə nlu li ə bè sə dyʉ̀, viʼi və shɨfkəvə vətsenəvə mu sə dyʉ̀ tò a wenə a bàm, və bò, dzàŋ gàʼa tò la, “Kusə shɨnsə a yès a Wàyn Fòyn Devìt!”

²⁸ Ghə̀ dyʉ̀ kwen a ngə̀ŋ, viʼi a vyə ə vi ə bùmtə wen tsu. Ghə̀ bèm a vəwenə la, “Ghə̀ŋ byɨmə nəmwèʼè la mà zi ə mà ne ə ghə̀ŋ bè yenə əshi a?” Vəwenə bwènsə̀ la, “Yès ə byɨmə a Bobo.”

²⁹ Yesò ə kùm ashi ə vəwenə ə gàʼa la, “Nyìngòŋ ə nè, ə ghə̀ŋ bwənsə ə yenə, toʼ ndə̀ŋndəŋ ando ghə̀ŋ byɨmə li.”

³⁰ Vəwenə bwənsə mu sə yenə əshi. Yesò ə tensə a vəwenə la, “Kə wìʼ nə̀ zhʉ.”

³¹ Alì, vəwenə fʉ ə dyʉ̀ ə mu sə jèʼè shə̀ʼtə̀ soʼgho a ghèn kùmə̀ Yesò toʼ ashə əloʼ na yì ə tsèm.

Yesò chʉʼ wìʼ a ghə̀ nko gaʼa

³² Viʼi vyì a Yesò ə chʉʼʉ li ə ne sə ə lù və be vi nə̀ wìʼ a Yesò ghə̀ kiʼ kəzhwì kə byɨkə, ko ghə̀ be gàʼa.

³³ Yesò dzɨ̀mə̀ shisə kəzhwì kə byɨkə a kì alì, wìʼ a yi ə gàʼa. Ənòyn ə viʼi vyi ə sə dìʼ nə̀ kàynə ə gàʼa la, “vəghəŋ ko tɨmə yen nki kənyʉ̀ alə̀ aloʼ ə Islel a shə̀.”

³⁴ Alì viʼi Falàsi ə sə gaʼa dyʉ̀ tò la, “A ku fòyn əzhwì ə byɨvə əku adyòʼ la ghə̀ ə dzɨ̀mə̀ shisə əzhwì ə byɨvə avenə.”

Yesò ə sə kusə shinsə a viʼi

³⁵ Yesò ə sə jèʼè kwenə a ntə̀ʼ sə ghoʼkə sə nə̀ sə tyetəsə, ziʼi a aloʼ ntsentə ə vəwenə, shə̀ʼtə̀ ntɨm ə jùŋ byìʼì əfòyn ə Nyìngòŋ, bè chʉʼʉ tənkyì tə kwaʼa tò tə tsèm.

³⁶ A mu sə diʼ to ando ghə̀ yenə ənòyn ə viʼi vyi a ghə̀ ə fʉ vi, ghə̀ kusə shɨnsə a vəwenə byìʼì ando vəwenə ə nkiʼ ngəʼsə, sə ghoʼo, ko ə gyàmtə̀ ə ndiʼ. Vəwenə ndiʼ tò nə̀ byisə njɨ̀ kenə ntsɨ̀ŋ.

³⁷ Ghə̀ mu gàʼa ndzɨ̀mtə̀sə bàm ə wen la, “Fozhɨvə ə dìʼ a mə pfì, ghoʼo no alə̀, alì viʼi və pfi və tyetə.

³⁸ Ghə̀ŋ jɨ̀m li a Nyìngòŋ yi a ghə̀ diʼ tì sɨm la ghə̀ tɨm kwùʼsə̀ viʼi və shwèʼ və və fʉ pfì pfwo a venə.”