Matìyò 27 - The New Testament in the Babanki language

Və lyɨ̀ Yesò dyʉ̀ nə̀ wen a shɨ Bilate

¹ Tʉʼ lan tò a boʼòngə̀ŋ Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ no vətsèm shɨ̀tə̀ jì əzhwi Yesò,

² kwìʼi wen ə lyɨ̀ wen dyʉ̀ kù à Bilate a fòyn Lum nghʉ̀ la ghə̀ nsoʼo shə Judiyà.

Judàs sɨŋ

³ Judàs a ghə̀ mbaʼlə̀ Yesò nè zhʉ̀ la və diʼi zhwi wen kənyʉ̀ ki kwen à wen a wèn no nànto ghə̀ lyɨ̀ ko yì a və nku à wen lì bwènə̀ dyʉ̀ kù à Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ,

⁴ gàʼà la, “Mà ne li mbyɨ byìʼàndo mà baʼlə li wìʼ və sə diʼi zhwi wen kènla ghə̀ ne li no kənyʉ̀ kə byɨkə.” Vəwenə bwènsə̀ gàʼ à wen la, “Yès pfʉ̀ gho tsu a? A diʼi nsoʼo wù.”

⁵ No a zhʉ̀ kò Judàs mòʼ ko ayi atì ngə̀ŋ Nyìngòŋ ə̀ dyʉ̀ sɨŋ.

⁶ Tʉtʉ vəpfèm və ngə̀ŋ Nyìngòŋ vi boŋtə ko ayì gaʼà la, “Ghenə diʼ ko mənlyuŋ. Soʼ vəghəŋ ko byɨmə la vəghəŋ we a kəmbò kə ngə̀ŋ Nyìngòŋ.”

⁷ Vəwenə mù ghʉ̀ la vəwenə a lyɨ ko ayi dyʉ̀ zen kəshi kə nse fà wù bwomə̀ vəntòyn ə mbvɨ̀mə̀ tɨm tsu.

⁸ A dìʼ kənyʉ̀ a kə ne bu sə dzàŋə̀ kəshi akì nə̀ sɨm mənlyuŋ əzaʼa fa lan.

⁹ Kə nlyɨ kəshi a lì ndi nè la kənyʉ̀ a Nyìngòŋ ngaʼà chòsə̀ fà nshə̀ʼtə̀ wen Jèlimayà la və lyɨ kəshi la, “Və nlyɨ ko kəkas yi məwum ntaʼ a viʼi Islel mbyɨmə la və a zen Yesò tsu,

¹⁰ zèn kəshi kə nse tsu fà wù bwomə̀ vəntòyn, ando Bobo ngaʼà à mò la mà ne.”

Bilate bèmtə̀ nyʉ̀ à Yesò

¹¹ Andìʼ ando və nlyɨ Yesò dyʉ̀ nə̀ wen à Bilate ghə̀ bèm à wen la, “Wù dìʼ fòyn Vəjew mu?” Yesò gàʼ à wen la, “Kə diʼ ando wu gaʼà.”

¹² Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ nzuʼu nyʉ̀ à wen a wèn alì ghə̀ tyen la ghə̀ ko gàʼ kənyʉ̀.

¹³ Bilate mù bèm à wen la, “Wu ko zhʉ ngwàʼà nyʉ̀ venə a və ghàmə̀ wù tsu lə̀.”

¹⁴ Yesò tyen la yì ko a bwènsə̀ no kənyʉ̀ kə mùʼ fa ntìntìn nyʉ̀ a vyi, kənyʉ̀ akì sə fànsə̀ à Bilate.

Və ghʉ la və a zhwi Yesò

¹⁵ No zhʉ kəzhɨ kə məzaʼsə̀ kə kò mvi kwʉ̀ʼʉ̀ kətʉ kə Lum kə gàʼa à viʼi la vəwenə tsu wìʼ a vəwenə kòŋə̀ la və shìsə fa mfɨŋ, ghə̀ shìsə.

¹⁶ Andìʼ a zhʉ a ghèn wutsen diʼ a mfɨŋ a və ndzàŋə̀ wen nə̀ Jisòs Bàlabàs. Viʼi nkɨ wen no nkàyn.

¹⁷ Viʼi ne vì zhùŋtə̀ tsu ndiʼ tsu wìʼ yì a və ndiʼi ne shisə̀ fa mfɨŋ, Bilate mù bèm à vəwenə la, “Ghə̀ŋ kòŋ la mà shisə̀ ndo à ghə̀ŋ a? Bàlabàs mu Yesò ghèn a və dzàŋə̀ nə̀ Wìʼ yì a Nyìngòŋ ntsuʼ li ə̀ ghʉ lə̀ lo?”

¹⁸ Ghə̀ mbèmə̀ a lì byìʼàndo ghə̀ nkɨ la à ne tò kənghə̀ʼ la və ghaʼ Yesò vì nə̀ wèn à wen.

¹⁹ Bilate mbù bù a ngə̀ŋ soʼo nsoʼ Yesò, wì wen tɨm ntɨm à wen gàʼà la, “Kə a we kəvu kə̀ a wèn wìʼ ghèn a və kəŋə zhwi wen tò kədyàŋ lə̀, byìʼàndo mà tə yèn ngəʼ no nànto a jòmsə nəntʉʼʉ lan byìʼì wen.”

²⁰ Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ twəs viʼi la vəwenə gàʼ à Bilate tò la ghə̀ shisə Bàlabàs, bòŋsə̀ kù Yesò vəwenə zhwi.

²¹ Bilate bè bèm à vəwenə la, “Ghə̀ŋ kòŋ la mà shisə ndo fa ntìntìn viʼi venə və bò lo?” Vəwenə gàʼ tò la shìsə “Bàlabàs.”

²² Bilate mù bè bèm a vəwenə la, “Ghə̀ŋ ke kəŋə la mà shisə̀ wen ə nè ale nə̀ Yesò ghèn a və dzàŋə̀ nə̀ Wìʼ yì a Nyìngòŋ ntsuʼ li ə̀ ghʉ lə a?” Vəwenə bwènsə̀ tò vətsèm la, “Bantə wen a kəntò.”

²³ Bilate bè bèm la, “Byìʼì ghò? Ghə̀ byɨsə no ghò?” Vəwenə be zɨ̀mə tò ntàŋ muʼ la, “Və bantə wen a kəntò!”

²⁴ Bilate nè yèn la ghə̀ yènə ngəʼ tò kədyàŋ mu soyn zi ghə̀ be fʉ̀, ghə̀ lyɨ̀ mu ə shʉ̀ avu wen tsu tò vəwenə a shɨ gàʼà la, “mà ko kiʼ kəvu a pfʉ wìʼ ghèn. Nsoʼ ghə̀ŋ.”

²⁵ Vəwenə bwènsə̀ tò vətsèm la, “Ghʉsə mənlyuŋ mə wen ndiʼ à yès bènə̀ à vunə vyesə.”

²⁶ Bilate mù shìsə Bàlabàs fa mfɨŋ ando vəwenə kəŋə ə kù Yesò la və ghom mi bu dyʉ̀ bantə wen a kəntò.

Vəsugyèʼ sə chəʼə Yesò

²⁷ Vəsugyèʼ və Bilate lyɨ̀ Yesò kwèn nə̀ wen ati ntuʼ. No vəsugyèʼ vətsèm vì ntsèntə̀ à wen a mbyɨ̀.

²⁸ Vəwenə tsuʼtə ndisə wen ə mò dàlə bo à wen a wèn.

²⁹ Vəwenə bo sòʼ ndzoŋsə ə chìʼ à wen a kətʉ ə zəʼə mbàŋ nyamə à wen a kəvu mù sə vì laŋtə̀ a wen a shɨ gàʼà la, “səʼ fòyn Vəjew!”

³⁰ A sə laʼtə vəwenə sə chʉ mənte à wen a wèn be bwènsə̀ shi mbàŋ yì sə ghòmə̀ wen tsu tò fa kətʉ.

³¹ Vəwenə nè chəʼə wen mwètə̀ ə tsuʼ dàlə bo yì fà wen a wèn bwènsə̀ mòʼ ndisə wen mi bu lyɨ wen fʉ̀ ədyʉ̀ bantə a kəntò.

Və bantə Yesò a kəntò

³² Vəwenə nè sə ndyʉ̀ ə̀ yèn wù Klen tsen a zhiʼ wen ndìʼ Simon ə̀ kàn la ghə̀ bwèʼè kəntò kə Yesò.

³³ Vəwenə ne dyʉ̀ zaʼa a kəshi a və ndzàŋə̀ nə̀ Golgotà andìʼ Kəshi a kə ndiʼì tò anə̀ Kəwuʼlə kə Kətʉ,

³⁴ kù məlyʉ̀ʼ à wen mu və we li gwʉ̀ tsu la ghə̀ nyʉ. Ghə̀ mwòm tò mwomə ə̀ tyen la ghə̀ ko a nyʉ.

³⁵ Vəwenə nè bàntə wen mwètə̀ ghʉ ndisə wen sə temə bàʼ ndi yen wìʼ a ghə̀ a zhɨ sə wen sə.

³⁶ Ne mwètə̀ ə̀ ŋwʉʼʉ tsu sə̀ tsɨ̀ŋə̀ wen.

³⁷ Vəwenə nyòʼ kənyʉ̀ kì a vəwenə ngàʼà la ghə̀ mbyɨ̀sə lì a kəbàŋ kə fəkòʼ vì bàntə a wen a kətʉ kə kəntò. Və nyoʼo la, “GHÈN DIʼ YESÒ FÒN VƏJEW”

³⁸ Və mbè bàntə vətsoŋ vətsenvə vəbò a mbyɨ̀ Yesò. Və mbantə ghə̀ muʼ a kəntò a kwoŋ toghə Yesò bè bàntə ghə̀ tsen à wen a kwoŋ nànkwè.

³⁹ Viʼi mù sə chò fa ji mèsə̀ tʉ vəwenə tè wèn gàʼà la,

⁴⁰ “Gaʼa kò wù tə ngàʼà la wù zì wù bətə ngə̀ŋ Nyìngòŋ bwènsə̀ bwòm a məntsi ntaʼ? Bwoŋsə lì wen wu luwèn! A zhʉ a wù diʼi wàyn Nyìngòŋ wu shìʼi fa kəntò a fì yès yen.”

⁴¹ Tʉtʉ vəpfèm və ngə̀ŋ Nyìngòŋ nè ndìʼsə̀sə təsoʼ bènə̀ vəchəʼ və loʼ be sə chəʼə wen tò ndə̀ŋndəŋ,

⁴² gàʼà la, “Ghə̀ lə mbwòŋsə̀ tò viʼi, luwèn sə diʼ kènla ghə̀ zì ghə̀ bwoŋsə wen wenə. Ghə̀ tə ngàʼà la ghə̀ dìʼ fòyn viʼi Islel, ghə̀ shiʼi lì luwèn fa kəntò a shèn ndi yès byɨmə wen.

⁴³ Ghə̀ choʼsə̀ à Nyìngòŋ be gàʼà la ghə̀ dìʼ wàyn wen. Vəghəŋ yen lì la Nyìngòŋ la gyàmtə̀ wen luwèn lo.”

⁴⁴ Tè vətsoŋ vi a və mbantə wenə vəwenə lì bè sə telə̀ wen.

Yesò pfʉ

⁴⁵ A sə ndiʼ a ntìntìn nə̀nchwì shi bwènsə̀ fèn no tsèm əzaʼa fa bwaʼa kəbə̀ŋ.

⁴⁶ A sə ndiʼ a kəlyɨŋ kə təzhʉ tə taʼ a bwaʼa kəbə̀ŋ Yesò zɨmə a gɨ to la, “Eli Eli Lama Sabatani” andiʼ la “Nyìngòŋ! Nyìngòŋ ghom byìʼì ghò a wu maʼa mo a?”

⁴⁷ Viʼi vətsenvə a və nti tsu zhʉ a lì sə gàʼà la, “Ghə̀ ye ghə̀ dzàŋə̀ Elijà”

⁴⁸ No a zhʉ kò, wutsen fa vəwenə a ntìntìn nyɨŋ dyʉ̀ lyɨ̀ kuncha chʉ̀ a kəmbas kə məlyʉ̀ʼ sù a kətyɨ mù sə ku la ghə̀ nyʉ̀.

⁴⁹ Viʼi vətsenvə gàʼ à wìʼ ayì la, “Kə̀ʼtə̀ vəghəŋ yen la Elijà la vì bwòŋsə wen lo.”

⁵⁰ Yesò bè dì no A gɨ to mù ghʉsə kəzhwì kə wen kə kuʼu fʉ̀.

⁵¹ Tò a zhʉ ayì ndisə a və nghàŋsə la sə gə̀sə̀ ngə̀ŋ Nyìngòŋ ghoʼo aghayn a bò bàymə̀ wàŋə̀ bò əzìtə̀ fa kwi shiʼi fʉ̀ a ten, shi sə tsɨŋtə̀ ngùʼsə bàykə̀,

⁵² təsè a və mbvɨ̀mə̀ viʼi tsu sə shenkə̀ bòʼkə̀, viʼi Nyìngòŋ no və ghoʼo bwènsə̀ lù fa pfʉ.

⁵³ Yesò lə̀ bwènsə̀ lù fa pfʉ, vəwenə kwen a ntə̀ʼ Nyìngòŋ andiʼì Jelusalèm, dyʉ̀ sə dìʼì təwen tə vəwenə à viʼi no və ghoʼo.

⁵⁴ Kətʉ kə vəsugyèʼ kì a kə ntsɨ̀ŋə̀ Yesò lì wenə̀ vəsugyèʼ və tsenəvə nè yèn ando shi ntsɨ̀ŋtə̀ bènə̀ nyʉ̀ kanəvə tsenəvə vi a və mfʉ̀ faynə ə ghaʼ vəwenə, vəwenə mù gàʼ la, “Nəmwèʼè wìʼ ghèn tə ndiʼ wàyn Nyìngòŋ.”

⁵⁵ Ki vətsenvə no vəghoʼo nti no kəghaf lyè nyʉ̀ avenə. Vəwenə mvi fa Galìlì wenə̀ və Yesò jèʼè gyàmtə̀ vì nə̀ wen.

⁵⁶ Viʼi vətsenvə a və ndìʼì a ntìntìn ki a vi ndìʼ Mèli andiʼì wù Magdala, Mèli lì Jems wenə Josèf bènə̀ lì vunə Zebedì.

Və bvɨ̀mə̀ Yesò

^57-58 A sə ndiʼ a zhʉ mpfwomə, wutsen dyʉ̀ ə̀ gàʼ à Bilate la ghə̀ kəŋ əlyɨ bvenə Yesò dyʉ̀ bvɨ̀mə̀. Zhiʼ wìʼ aghèn ndìʼ Josèf, ghə̀ diʼ wù ntə̀ʼ Alimàtya, ghə̀ mbè dìʼ ndzɨ̀mtə̀ bàm ə Yesò. Bilate byɨmə la və ku à wen.

⁵⁹ Və ku bvenə Yesò à wen ghə̀ lyɨ̀ ə̀ lemtə nə̀ kəbàs kə ndisə kə fi kə,

⁶⁰ dyʉ̀ bvɨ̀mə̀ wen a sè fighə tsenghə a ghə̀ ntsəfə a wu sə ghʉ la və lu bvɨ̀mə̀ yì tsu. Ghə̀ bvɨ̀mə̀ a lì bùŋsə ngùʼ ghoʼo ə chiʼi chʉ̀ yi tsu, mibu lù.

⁶¹ Mèli wù Magdala bènə̀ Mèli tsen yì ŋwʉʼʉ sə ki dyʉ̀sə̀ nə̀ sè ayi.

Və ghʉ viʼi la və ntsɨ̀ŋə̀ se Yesò

⁶² Tʉʼ lan andiʼ kətsi kə zhʉ̀təkə, Tʉtʉ vəpfèm və ngə̀ŋ Nyìngòŋ bènə̀ viʼi Falàsi dyʉ̀ a Bilate,

⁶³ ə gàʼ à wen la, “Tìʼ, yès bò kwòʼtə̀ la à tə ndiʼ ando wù ndzɨ̀ŋsə ghèn mbu to ghə̀ gàʼ la, ‘Mà lu pfʉ bwènsə̀ lù a mətsi ntaʼ.’

⁶⁴ Ando kə diʼì a lì, tɨm və dyʉ̀ ntsɨ̀ŋə̀ se wen a mətsi ntaʼ a bwen a lì mu ndzɨ̀mtə̀sə bàm wen a dyʉ̀ tsoŋ bvenə wen njèʼè wamə dyʉ̀ à viʼi la Nyìngòŋ lusə̀ li wen fa pfʉ. Vəwenə sətsèn zhò nki ndzɨ̀ŋ a ghenə viʼi byɨmə mu kənyʉ̀ akì a mfànsə̀ chò tè kə mbì kə.”

⁶⁵ Bilate gàʼ à vəwenə la, “Ghə̀ŋ lyɨ vəsugyèʼ dyʉ̀ ghʉ̀ a ji ndi vəwenə nshɨ̀tə̀ tsɨŋ ə sè ayi.”

⁶⁶ Vəwenə dyʉ̀ tòm kəlàŋ a ngùʼ chʉ sè ayì bè mù ghʉ vəsugyèʼ la və ntsɨ̀ŋə̀ sè ayi.