Matìyò 25 - The New Testament in the Babanki language

Yesò ziʼi la və diʼi əŋwʉʼ no məzhʉ̀ ntsèm kə̀ʼtə̀ wen

¹ Yesò bè mò ngàyn ə tsen gàʼà la, “Wàyn Wìʼ lu sə mbwènə̀ vì, soʼo Fòyn Nyìngòŋ ndiʼ tò nə̀ fətitì fə ngòynsə ki sətsensə ə̀ wum, a sə nlù dyʉ̀ sə kə̀ʼtə̀ wùlɨm lam a ghə̀ ndiʼi vì. Vəwenə sə ndyʉ̀ no ndò lyɨ̀ kənkàʼtə̀ kəwen.

² Vəwenə vətsenvə vətàyn ə̀ ntofə, vətàyn ə dzɨ̀ŋtə̀.

³ Və dzɨ̀ŋtəvə vi sə nlyɨ̀ nkàʼtə̀ vəwenə kò vəwenə lə̀ lyɨ̀ mənzhiʼ məghoʼtə,

⁴ və tofəvə vi lyɨ̀ vəsùʼ wè mənzhiʼ tsu əbwètə.

⁵ Lɨm wùwì ayì tàŋ a məvì, ngòynsə ki shì zìtə̀ sə myə̀ʼə̀ nə̀ mbəynsə.

⁶ Ghə̀ nè sə mvì mu à sə̀ diʼ ntìntìn nəntʉʼʉ, və mù sə dzàŋə gàʼà la, Lɨm wùwì sə vì, ghə̀ŋ vi shìsə wen!

⁷ Ngòynsə ki shì lù no sətsèm kùʼsə nkàʼtə̀ vəwenə.

⁸ Ngòynsə ki sə dzɨŋtə sə shì mù gàʼ à vətofəvə vi la, Ghə̀ŋ ku yes fà ghə̀ŋ mənzhiʼ yì byìʼè nkàʼtə̀ vyesə sə lɨmə̀ dyʉ̀.

⁹ Vətofəvə vi tensə ə̀ gàʼ la, Jòʼ! mənzhiʼ a mì ko a kwʉ̀ʼ à vəghəŋ və tsèm, ghə̀ŋ boŋsə dyʉ̀ a kəshi kə baʼlə̀ fo ə̀ zèn ə̀ məŋə fa tsu.

¹⁰ Vəwenə sə ndyʉ̀, lɨm wùwì ayì vì wenə viʼi a və ndiʼì dyʉ̀ kwèn a ngə̀ŋ yì a və ndiʼi ne zhɨ lam tsu və chiʼ chʉ ngə̀ŋ.

¹¹ Ngòynsə ki sətsèn shìsə nè dyʉ̀ zèn mənzhiʼ mì bwènə̀ vì mù sə̀ dzàŋə̀ gàʼà la, ‘Bobo, Bobo, bòʼò chʉ ngə̀ŋ à yès.’

¹² Lɨm wùwì yì bwènsə̀ gàʼ la, Mà gàʼà à ghə̀ŋ nəmwèʼè la, mà ko kɨ̀ ghə̀ŋ.

¹³ Yesò gàʼ a lì mù gàʼ la, Ghə̀ŋ sə ŋwʉʼ lì, ghə̀ŋ ntsi kə̀ʼə̀ byìʼàndo ghə̀ŋ ko kɨ̀ kətsi ko zhʉ yi a Wàyn Wìʼ lu bwènə̀ vì.”

Ngàyn byìʼì viʼi shyèʼ a və nlòʼò vəwenə ando vəwenə nshyèʼè

¹⁴ Yesò bè mò ngàyn tsen gàʼà la, “Soʼo fòyn Nyìngòŋ lu ndiʼ to nə̀ fətitì fə wutsen a ghə̀ nlù sə ndyʉ̀ a jèʼ ə̀ dzàŋtə̀ viʼi shwèʼ wen kù fo wen ə̀ la vəwenə zhʉsə ntùʼmə̀ nə̀ wenəvə.

¹⁵ Ghə̀ nku mbo ko ətàyn à wìʼ muʼ, kù mbo bò à kənkùmtə̀ bè kù kəmbò kə ko kə mùʼ à wutsen, Ghə̀ nkù a no mə ndò tò a ji a ghə̀ nyenə la ghə̀ zì ghə̀ tuʼmə nə̀ wen ghə̀. Ghə̀ ku a lì mù lù dyʉ̀ a jèʼ.

¹⁶ No a zhʉ kò, wù shwèʼ yì a ghə̀ nku mbo ko tàyn à wen lì dyʉ̀ sə̀ nè mbaʼlə̀ ə̀ se mbo ko tàyn.

¹⁷ Yì a və nku mbo ko bò à wen lì shwèʼ nə̀ wenə ghə̀ ə̀ se mbo ko bò à yì a kətʉ.

¹⁸ Wù shwèʼ yì a və nku kəmbò kə ko à wen lì dyʉ̀ tyùŋə nkwòŋ lyòmtə̀ kəmbò kə ko tì shwèʼ wen kì tsu.”

¹⁹ Tì shwèʼ ayì tsi no alə̀, lù bwènə̀ pfwo dzàŋtə̀ vəwenə ndi zhʉ la vəwenə tə zhʉsə shwèʼ nə̀ ko wen yi ale lo.

²⁰ Wìʼ yì a və nku mbo ko tàyn a wen, ando ghə̀ mvì ə bwènsə̀, ghə̀ boʼsə mbò ko tàyn vi a ghə̀ nse a kətʉ kə ko ayì ə̀ gàʼ la, Tìʼ, yen a! wù tə ku mbo ko tàyn à mò mà be nse mbo ko tàyn à yì a kətʉ.

²¹ Tì shwèʼ wen ayì gàʼ à wen la, Wù ne li no a nkàyn. Wù dìʼ no wù shwè jùŋə be tùʼmə̀ no a nkàyn. Wù tuʼmə̀ li nə̀ kəfo kətyətəkə, luwen ma ghʉ wù ə wu ntùʼmə̀ nə̀ fo ghoʼvə kwen vì yowù nsaŋlə̀ a muʼu!

²² Wù shwèʼè yì a və nku mbo ko bò à wen lì bè vì gàʼ la, Wù tə ku mbo ko bò à mò, yen a mà kiʼi li se à yì a kətʉ mbo ko bò.

²³ Tì shwèʼ wen ayì gàʼ à wen la, Wù ne li no a nkàyn. Wù dìʼ no wù shwèʼ jùŋə be tùʼmə̀ no a nkàyn. Wù tuʼmə̀ li no nkàyn nə̀ kəfo kətyətəkə. Luwen ma ghʉ wù, wu ntùʼmə̀ nə̀ fo ghoʼvə kwen vì yowù nsaŋlə̀ a muʼu.

²⁴ “Wìʼ yì a və nku kəmbò kə ko à wen lì vì gàʼ la, ‘Tì, mà kɨ la wù dìʼ alə̀ fànsə̀. Wù kɨ əzhɨ kènla wù tə shwèʼ be kɨ əkəŋ fo kò andiʼ la wù tə we.’

²⁵ A diʼ kənyʉ̀ a kə tə nè mà fàyn wù ə̀ lyɨ̀ kəmbò kə ko wù kì ə tyùŋə kəshi lyòmtə tsu. Bwènsə̀ ghàʼa ko wu.”

²⁶ Tì shwèʼ wen yì gàʼ la, Wù dìʼ wù shwèʼ byɨ be diʼ no zhɨ kədyàŋ! Wù tə kɨ no a nkàyn la mà zhɨ kèn la mà ko shwèʼ be kəŋə fo fa kəshi a mà ko we,

²⁷ a tə ne ghò la kə wù ghʉ ko ghomə ghenə a ngə̀ŋ ko ndi mà nə̀ sə nlyɨ̀, lyɨ̀ boʼsə wenə̀ se yì a?

²⁸ Ghə̀ gàʼ alə̀ mù gàʼ à viʼi shwèʼ wen vətsenvə vi la, Ghə̀ŋ shi kəmbò kə ko kì fà wen ku kwʉ̀ʼsə̀ à wìʼ yì a ghə̀ kiʼ mbo ko wum lì.

²⁹ Ghə̀ŋ kɨ la no ndò a ghə̀ kiʼì kəfo və a ku kwʉ̀ʼsə̀ à wen ndi ghə̀ ntùʼtə̀ kiʼ alì no ndò a ghə̀ ko kiʼ kəfo və a shì tè kətyetə kì a ghə̀ kiʼì lì.

³⁰ Ghə̀ŋ shisə wù shwèʼ byɨ ghèn, tem a kəbəŋ kə fenəkə, a kəshi a ghə̀ a nlyuŋlyuŋ dì tsu be pfiʼi asoŋ wen.

Yesò gàʼ kùmə̀ tʉʼ nsoʼ

³¹ “A lu ndiʼ a tʉʼ a Wàyn Wìʼ vì nə̀ ghoʼo fòyn wen wenə̀ ntɨŋsə ngə̀ŋ Nyìngòŋ no sətsèm ghə̀ lu ŋwʉʼʉ à wen a kəfwoyn nə̀ adɨŋə ghoʼ ghə̀ wen.

³² Viʼi təloʼ tə mbi vi tsèntə̀ à wen a shɨ no vətsèm, ghə̀ gə̀sə̀ vəwenə a tənòyn təbò ando ntsɨ̀ŋ byisə lə nè ghə̀ gə̀sə̀ byisə vənjɨ̀ fa byisə vəndoŋ.

³³ Ghə̀ lu ghʉ viʼi vəjùŋvə à wen a shyə kwoŋ toghə ə ghʉ viʼi nyʉ̀ byɨvə à wen a shyə kwoŋ nànkwè.

³⁴ A dìʼ a zhʉ a yì a fòyn a gàʼ à viʼi kənyʉ̀ kə tɨmə kə vi a və ti à wen a shyə kwoŋ toghə la, ‘Ghə̀ŋ venə a Tìʼ ghomə bwaʼsə li lə̀, ghə̀ŋ kwen vì ə̀ nzhɨ njùŋ yì a ghə̀ nshɨtə li ghʉ̀ a ghə̀ŋ fa kənzìtə̀ kə mbi,

³⁵ byìʼàndo jɨ̀ŋ nzafə mò ghə̀ŋ ku fo zhɨvə à mò, toŋ à mù nzhɨmə mò ghə̀ŋ ku mu mà nyʉ. Mà ndìʼ wu fi a kəshi ghə̀ŋ shisə mo à ghə̀ŋ a aloʼ,

³⁶ ndìʼ kənàʼ kə à ntsuʼ, ghə̀ŋ ku ndisə mà mòʼ. Mà nkwaʼa ghə̀ŋ tùʼmə̀ nə̀ mò və shwin mò a mfɨŋ ghə̀ŋ vì ghayntə mò.’

³⁷ A diʼ a zhʉ a yì a viʼi kənyʉ̀ kətɨməkə vi nè mbèmə̀ la, ‘Bobo, yès nyèn wù fe jɨ̀ŋ zafə wù yès kù fozhɨvə la wù zhɨ a, be yèn wù fe toŋ à mù zɨmə wù yès ku mu la wù nyʉ a?’

³⁸ Wù ndìʼ wu fi fe yès shisə wù à yès a aloʼ a, ko sə diʼ nə̀ kənàʼ ntsuʼ fe yès ku ndisə la wù moʼ a?

³⁹ Wù nkwaʼa fe yès vì sə tùʼmə̀ nə̀ wù a ko wù ndìʼ a ngə̀ŋ mfɨŋ fe yès vì ghayntə wù a?

⁴⁰ Fòn mu gàʼ la, ‘Mà gàʼà à ghə̀ŋ nəmwèʼè la no ghò a ghə̀ŋ nè a wù muʼ a ghə̀ ndìʼi əbam a ntìntìn vəlèmə̀ vwomə venə dìʼ mu ghə̀ŋ nè à mò.’”

⁴¹ “Fòyn ne gàʼ a lì mu gàʼ à viʼi nyʉ̀ byɨvə vi à wen a kwoŋ nànkwè la, ‘Ghə̀ŋ lukə fà mo a mbyɨ̀, ghə̀ŋ venə a Nyìngòŋ moʼò li kòyn à ghə̀ŋ lə̀. Ghə̀ŋ dyʉ̀ kwen a zhìʼ yì a ghə̀ ko lə lɨmə lì a və nshɨ̀tə̀ à Satan wenə̀ ntsɨ̀ŋsə wen.

⁴² A ndìʼ a zhʉ a jɨ̀ŋ nzafə mò ghə̀ŋ tyen la ghə̀ŋ ko a ku kəfo mà zhɨ, toŋ à mù zɨmə mò ghə̀ŋ tyen la ghə̀ŋ ko ku mu mà nyʉ.

⁴³ Mà ə̀ ndìʼ wu fi alì ghə̀ŋ tyen la ghə̀ŋ ko shisə mo à ghə̀ŋ a aloʼ, diʼ kənàʼ ntsuʼ ghə̀ŋ tyen la ghə̀ŋ ko a ku ndisə mà moʼ. Mà nkwaʼa, ghə̀ŋ tyen la ghə̀ŋ ko tùʼmə̀ nə̀ mò, və shwinə̀ mò a mfɨŋ ghə̀ŋ tyen la ghə̀ŋ ko vi əghayntə mo.’”

⁴⁴ Viʼi nyʉ̀ byɨvə a vyi mu mbèmə̀ a zhʉ ayì la, Bobo, yès nyèn wù fe jɨ̀ŋ zafə wù, toŋ à mù zɨmə wù, wù diʼ wu fi, diʼ nə̀ kənàʼ ntsuʼ, kwaʼà, diʼ a ngə̀ŋ mfɨŋ, kènla yès gyamtə li wù a?

⁴⁵ Fòn mu gàʼ à vəwenə la, Mà gàʼà à ghə̀ŋ nəmwèʼè la no ghò a ghə̀ŋ ntyenə ənè a wìʼ muʼ a ghə̀ ndiʼ a bàm fa ntìntìn vəlèmə̀ vwomə venə dìʼ mu ghə̀ŋ ntyen la ghə̀ŋ ko a nè à mò.

⁴⁶ Fòn ne gàʼ a lì mu tɨm vəwenə, vəwenə lu dyʉ̀ kwen a tì ngəʼ yì a ghə̀ ko lə mè, viʼi kənyʉ̀ kətɨməkə vi kiʼi bwòŋ yi a ghə̀ faŋə̀ tò ghayn mùʼ.