Matìyò 21 - The New Testament in the Babanki language

Yesò kwen a Jelusalèm a nə̀ fòyn

¹ Ando Yesò wenə̀ ndzɨ̀mtə̀sə bàm wen njèʼè dyʉ̀ boʼsə a Jelusalèm, ə̀ dyʉ̀ a ntə̀ʼ Bephag a ghə̀ ndiʼì a shə wenə pfèn olìf tsenghə. Ghə̀ mù tɨm ndzɨ̀mtə̀sə bàm wen səbò

² gàʼà à vəwenə la, “Ghə̀ŋ kwen dyʉ̀ a tì ntə̀ʼ ghèn a ghə̀ŋ a shɨ. Ghə̀ŋ ne sə nkwenə dyʉ̀ ə yen fəmbyèʼè fo a və chuŋə̀ nə̀ wàyn wen à wen a mbyɨ̀. Ghə̀ŋ nè yen ghə̀ŋ zàsə vì nə̀ wen à mò boʼsə nə̀ wàyn wen.

³ Ghə̀ŋ sətsèn nzàsə̀ wìʼ bèm kənyʉ̀ à ghə̀ŋ, ghə̀ŋ gàʼa la, Bobo kiʼ kənyʉ̀ ənè nə̀ səwensə diʼ be a bwènsə̀ tɨm tò luwèn.”

⁴ Kənyʉ̀ a kènkə nlyɨ kəshi ndi ne la kənyʉ̀ a Nyìngòŋ nlù gàʼ chòsə̀ fà nshə̀ʼtə̀ wen ghoʼo ndiʼ nəmwèʼè la,

⁵ “Gaʼa viʼi ntə̀ʼ Zayòn la, ghə̀ŋ yen a, fòyn ghə̀ŋ vì à ghə̀ŋ, ghə̀ bwaʼmə, vì a kwi wàyn fəmbyèʼè fo.”

⁶ Ndzɨ̀mtə̀sə bàm wen ashì mù lù dyʉ̀ nè ando ghə̀ yì gàʼ,

⁷ bwènə̀ vì nə̀ fəmbyèʼè fo a fì bènə̀ wàyn wen ə̀ làfsə vəwenə nə̀ vədàlə və vəwenə, Yesò kuʼ ŋwʉʼʉ à yì a kətʉ.

⁸ Viʼi no ghoʼo tsuʼtə vədàlə və vəwenə mòʼ a ji ghə̀ chò fà yì a kətʉ. Vətsenvə kwàʼtə̀ təntam tə nkòʼ mòʼ a ji.

⁹ Nòyn viʼi vi a ghə̀ ndyʉ̀ fa shɨ Yesò nə̀ yi a ghə̀ mvì fà wen a bàm zìtə̀ sə̀ zɨmə gàʼà la, “Ghoʼsə dìʼ à wàyn fòyn Devìt! Nyìngòŋ bwaʼsə wìʼ yì a ghə̀ vi a zhiʼ nə̀ Bobo! Ghoʼsə diʼ à Nyìngòŋ a ghə̀ diʼ a kàŋ.”

¹⁰ Yesò nè kwen mwètə̀ a Jelusalèm, ntə̀ʼ a yì nə̀ʼkə̀ no tsèm. Viʼi mù sə̀ bèmə̀ la, “Ghèn dìʼ ndo?”

¹¹ Viʼi vi bwènsə̀ la, “A dìʼ Yesò nshə̀ʼtə̀ ghoʼo yì a ghə̀ lù fa ntə̀ʼ Nazalèt a loʼ Galìlì.”

Yesò dzɨ̀m viʼi mbaʼlə̀ wòŋ fa tì ngə̀ŋ Nyìngòŋ

¹² Yesò dyʉ̀ kwen a tì ngə̀ŋ Nyìngòŋ ghoʼo sə̀ dzɨ̀mə̀ viʼi vyi a və mbaʼlə̀ be zenə tsu no vətsèm. Ghə̀ tenlə chiʼ vi a viʼi nkwitə ko à yì a yi kətʉ be tenlə kɨ a viʼi mbaʼlə̀ làto tsu mòʼlə̀ a nse,

¹³ gàʼà à viʼi a vyi la, “Və nyòʼò li a ŋwàʼlə̀ Nyìngòŋ la, viʼi lu dzàŋ ngə̀ŋ ghom la à dìʼ ngə̀ŋ jɨ̀m, alì ghə̀ŋ nkaʼsə luwèn à sə diʼ kəshi a vətsoŋ lyòmtə̀ tsu.”

¹⁴ Viʼi kənshɨ̀f wenə̀ viʼi kənkwàʼkə̀ vì yèn wen tsu ghə̀ chʉʼ vəwenə.

¹⁵ Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ sə̀ fwisə̀ tin ando vəwenə nyèn nyʉ̀ kanəvə vi a ghə̀ nè bè zhʉ̀ ando vunə nzɨmə gàʼà tsu la, “Ghoʼsə diʼ à wàyn fòyn Devìt.”

¹⁶ Vəwenə mù bèm à Yesò la, “Wu lə̀ zhʉ kənyʉ̀ kèn a vunə venə gàʼà lə a?” Yesò byɨmə ə̀ bwènsə̀ gàʼ à vəwenə la və nyoʼ li a ŋwàʼlə̀ Nyìngòŋ la, “Nyìngòŋ shɨ̀tə̀ li təchʉ̀ tə vunə vəbwaʼvə a və bu nyoŋə la və nghoʼsə wen. Ghə̀ŋ be ko təmə dzàŋ kəshi akì.”

¹⁷ Yesò gàʼ a lì lù fa tsu fʉ̀ fa Jelusalèm dyʉ̀ tsì a ntə̀ʼ Betanì.

Yesò ghʉ kòyn à fəkòʼ fə figs

¹⁸ Tʉʼ nè layn, Yesò lù tò boʼòngə̀ŋ sə mbwènə̀ dyʉ̀ a Jelusalèm jɨ̀ŋ sə̀ zafə wen.

¹⁹ Ghə̀ yen fəkòʼ fə figs a wenə ji, kwen dyʉ̀ à yì a ti alì kò ghə̀ lù yèn kəfo à yì a kətʉ əchò tò təfʉ ti. Ghə̀ mù gàʼ à fəkòʼ a fìfə la, “Wù ko lu be kumə ashɨ!” No a zhʉ kò fəkòʼ a fìfə zɨm.

²⁰ Ndzɨ̀mtə̀sə bàm wen nè yèn kənyʉ̀ a kènkə sə̀ diʼ nə̀ kaynə, mù bèm à Yesò la,“Fəkòʼ fènfə nè ale nzɨm tò fa zhʉ alə̀ a?”

²¹ Yesò bwènsə̀ gàʼ à vəwenə la, “Mà gàʼà à ghə̀ŋ nəmwèʼè la, ghə̀ŋ sətsèn nkiʼ byɨmə, kye momə̀ mwòmsə mu ghə̀ŋ zì ghə̀ŋ ne kənyʉ̀ kèn a ma ə ne à fəkòʼ fènfə lə̀, bè gàʼ no tè à pfèn ghoʼo ghèn la, Tsuʼmə dyʉ̀ tsòʼ à mù mə nghoʼomə̀, ghə̀ be à nè tò a lì.

²² Ghə̀ŋ sətsèn njɨ̀mə̀ bèmə̀ no ghò à Nyìngòŋ ghə̀ à kù à ghə̀ŋ a zhʉ a ghə̀ŋ kiʼi byɨmə.”

Tʉtʉ ntsèntə̀ Vəjew sə kəŋə əkɨ la kədyòʼ kə Yesò kə lù fa fe lo

²³ Yesò bwènə̀ dyʉ̀ kwen a ngə̀ŋ Nyìngòŋ mù sə nziʼi viʼi tsu, tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ vì bèm à wen la, “Wù nè nyʉ̀ venə nə̀ kədyòʼ kə mu kə lù fa fe? A ku ndò ku kədyòʼ a kènkə à wù a?”

²⁴ Yesò bwènsə̀ gàʼ à vəwenə la, “Nkàyntə̀ mò be a bèm kənyʉ̀ kə mùʼ à ghə̀ŋ, ghə̀ŋ sətsèn bwènsə̀, mà mu à shə̀ʼtə̀ wìʼ yì a ghə̀ŋ a ghə̀ ku kədyòʼ la mà nè nyʉ̀ venə tsu.

²⁵ Joyn wù ku à mù nlyɨ̀ kədyòʼ fa fe əku mu a? A nku Nyìngòŋ ku kədyòʼ à wen mu à nku viʼi lo? Vəwenə zìtə̀ sə̀ bèsə̀ à vəwenə a ntìntìn gàʼà la ‘Vəghəŋ sətsèn gàʼ la à nku Nyìngòŋ ku kədyòʼ à wen ghə̀ à bèm la ghə̀ŋ be tə mfaŋ ke byɨmə kənyʉ̀ a ghə̀ ngàʼà byìʼì ghò?’

²⁶ Vəghəŋ sətsèn gàʼ la à nkù viʼi kù kədyòʼ à wen mu viʼi zì və mwom kənyʉ̀ à vəghəŋ a təwen byìʼàndo no vəwenə vətsèm ə̀ nlyɨ̀ la Joyn ndiʼ nshə̀ʼtə̀ ghoʼo.”

²⁷ Vəwenə kwòʼtə̀ a lì mù gàʼ à Yesò la, “Yès ko kɨ.” Yesò mù gàʼ à vəwenə la, “No nkàntə̀ mò li ko a shə̀ʼtə̀ kəshi kì a ma lyɨ̀ kədyòʼ fa tsu bu sə nè nyʉ̀ venə.”

Ngàyn kùmə̀ wìʼ wenə̀ vunə wen vəbò

²⁸ Yesò bè gàʼ à viʼi a vyi la vəwenə kwoʼtə kənyʉ̀ kùmə̀ ngàyn a ghə̀ nkəŋə mò mù gàʼ la, “Wutsen ndìʼ kiʼ vunə lʉmə wen vəbò. Ghə̀ dyʉ̀ gàʼ à wù mbì la, Fʉ̀ shwèʼ a sɨm lamsə̀ layn a wàyn ghom.”

²⁹ Wàyn ayì gàʼ la, “Mà ko a fʉ̀, alì nè bwènsə̀ kwòʼtə̀ to fa wen a ngəŋ la kə bòŋ la yì fʉ ə mù fʉ̀.

³⁰ Tìʼ wen bè dyʉ̀ à kənkùmtə̀ kə wàyn wen ə̀ gàʼ tò ndə̀ŋndəŋ kənyʉ̀ a ghə̀ yì gàʼ à wù mbì. Ghə̀ zàŋsə̀ byɨmə alì kènla ghə̀ fʉ li.”

³¹ Yesò mù bèm à vəwenə la, “A lè ne wàyn ko fa ntìntìn vunə vi vəbò nè kənyʉ̀ kì a tìʼ vəwenə nkəŋə a? Vəwenə bwènsə̀ la. ‘A ne wù mbì.’ Yesò mù gàʼ la, ‘Mà gàʼà a ghə̀ŋ’ nəmwèʼè la, viʼi vyi a və tinə kənsè bènə̀ njèʼtə̀sə lu kwen a soʼ Fòyn Nyìngòŋ à ghə̀ŋ a mbì.”

³² Mà gàʼà alə̀ byìʼàndo Joyn wù ku à mù mvi li sə̀ dìʼì jì ntsìnə̀ tɨmə a ghə̀ŋ la ghə̀ŋ njèʼè fa tsu a shɨ Nyìngòŋ, alì kò ghə̀ŋ lù byɨmə wen. Viʼi vi a və tinə kənsè bènə̀ njèʼtə̀sə bòŋsə̀ byɨmə wen. Ghə̀ŋ yen nyʉ̀ venə no tsèm bè tyen tò tyenə la ghə̀ŋ ko a kwitə tətyɨm təŋtə byɨmə kənyʉ̀ kì a ghə̀ ngàʼà.

Yesò mò ngàyn kùmə̀ viʼi a və nshyèʼè a sɨm wutsen

³³ Yesò bè gàʼ à viʼi vi la vəwenə bè zhʉ̀tə ngàyn tsen. “Tì sɨ̀m tsen nlù bòʼ sɨm lamsə̀ lwi wen, kwìʼi mbàyn kaʼsə wen sɨm ayi, tyùŋə nkwòŋ yì a və ne nwìʼì lamsə̀ ayì tsu mu shɨ̀tə məlyʉ̀ʼ bè bwòm kəmbaŋ kə ngə̀ŋ ntsɨ̀ŋ a kəntìntìn kə sɨm ayì mù kù sɨm ayi la viʼi nshwèʼè gə̀tə̀ ku yì nə̀ fo vi a və fʉ̀ fa tsu. Ghə̀ ku a lì lù dyʉ̀ a jèʼ a loʼ tsenghə.

³⁴ Zhʉ məkwòŋ nè kwʉ̀ʼ ghə̀ tɨm viʼi shwèʼ wen vətsenvə la və dyʉ̀ gàʼ à viʼi vi a ghə̀ tə ku sɨm ayi à vəwenə la vəwenə ku və wen vəlamsə̀.

³⁵ Viʼi a və nshwèʼè sɨm ayi ghaʼ viʼi shwèʼ tì sɨm vi a ghə̀ yì tɨm lì ghòm ghə̀ mùʼ, ə̀ zhwì kənkùmtə̀ kə wen be temlə ghətsen nə̀ ngùʼsə.

³⁶ Tì sɨ̀m ayì bè tɨ̀m viʼi shwèʼ vətsenvə və ghoʼo chò vi a ghə̀ yì tɨ̀m a mbì lì. Viʼi sɨm vi bè nè tò ndə̀ŋndəŋ kənyʉ̀ a və yì nè a və mbì vi à vəwenə.

³⁷ A kəmwetə ghə̀ tɨm wàyn wen à vəwenə kwòʼtə̀ fà wen ngə̀ŋ la vəwenə ne dyʉ̀ fàyn wàyn ghom.

³⁸ Viʼi shwèʼè sɨ̀m a vyi nè dyʉ̀ yen wàyn yì tò yenə, kwòʼtə̀ à vəwenə ngəŋsə la, Ghèn dìʼi ne ndiʼ njɨ̀ngə̀ŋ tì sɨ̀m ghèn. Vəghəŋ ghaʼ wen zhwi ndi lyɨ fo vi a ghə̀ tə ndiʼ ne lyɨ̀ lì.

³⁹ Vəwenə gàʼ a lì mù ghaʼ wen fʉ̀ nə̀ wen fa sɨm ayì dyʉ̀ zhwi.”

⁴⁰ Yesò mù bèm à vəwenə la, “kə lè yì chò alə̀ tì sɨ̀m a ghèn à bwènə̀ vì nè ale nə̀ viʼi vi a ghə̀ tə kù sɨm la vəwenə nshwèʼè lì?”

⁴¹ Vəwenə bwènsə̀ à wen la, “Kə sətsèn chò a lì, tì sɨ̀m ayì a zhwilə viʼi və byɨvə avenə, ə̀ kù sɨm ayi à viʼi kədyàŋ vəwenə nshwèʼè ku və wen fo tò a zhʉ.”

⁴² Yesò bwènsə̀ gàʼ à vəwenə la, Ŋwàʼlə̀ Nyìngòŋ ə gàʼ à la, Ngùʼ yì a viʼi shwèʼ tə màʼà lì kaʼsə li sə diʼ ngùʼ bʉ ngə̀ŋ. A dìʼ shwèʼè Bobo alə̀, à diʼ kənyʉ̀ kə mesəkə à vəghəŋ?

⁴³ Ghə̀ŋ be ko təmə̀ ndzàŋ kəshi akènkə? Byìʼì ntsìnə̀ ghə̀ŋ aghèn, “Mà gàʼà a ghə̀ŋ la və lu shi soʼ Fòyn Nyìngòŋ fa ghə̀ŋ, ə ku a viʼi vyi a və kumə ashɨ.

⁴⁴ [No ndò a ghə̀ kòntə a wèn ngùʼ bʉ ngə̀ŋ aghèn, ghə̀ à fə̀ŋ tìnkə a ntemə a ntemə, mu ngùʼ aghèn bè sətsèn fə̀ŋ a kətʉ no ndò ghə̀ à bvusə̀ wen a kəbyìʼ”]

⁴⁵ Tʉtʉ vəpfèm və ngə̀ŋ Nyìngòŋ vi bènə̀ viʼi Falàsi vi nè zhʉ̀ ngàynsə Yesò a sènsə kɨ̀ tò kɨ la ghə̀ gàʼà byìʼì vəwenə,

⁴⁶ vəwenə mù sə̀ kəŋə jì əghaʼ wen alì sə fàynə̀ nòyn viʼi yì a ghə̀ ndiʼì tsu byìʼàndo nòyn ayi nlyɨ̀ wen anə̀ nshə̀ʼtə̀ ghoʼo.