Matìyò 19 - The New Testament in the Babanki language

Yesò ziʼi kùmə̀ kəngə̀sə̀ kə lam

¹ Ando Yesò ngaʼà nyʉ̀ venə mwètə̀ ghə̀ lù fa Galìlì dyàŋ dyʉ̀ a shə Judiyà tsenghə a ghə̀ ndiʼì a ndzèn à mù mə Jodàn.

² Viʼi no və ghoʼo dzɨ̀mtə̀ tɨ̀m nə̀ wen tsu ghə̀ chʉʼ viʼi a və nkwaʼkə̀ fà vəwenə a ntìntìn.

³ Və Falàsi vətsenvə vì ə zhʉtə chʉ wen mù bèm à wen la, “No kənyʉ̀ kətsenkə bè dìʼ à vəghəŋ a soʼ a kə gàʼà la wìʼ zì ghə̀ dzɨ̀m wì wen tsu ando ghə̀ kòŋə̀?”

⁴ Yesò bwènsə̀ gàʼ à vəwenə la, “Ghə̀ŋ be ko dzàŋ ə zhʉ kənyʉ̀ a ŋwàʼlə̀ Nyìngòŋ gàʼà? Ghə̀ gàʼà la, andìʼ a kənzìtə̀ kə mbi Nyìngòŋ shɨ̀tə̀ wùlɨm bènə̀ wùwì,

⁵ mù gàʼ la, ‘Byìʼì a lə̀ wùlɨm lə nlù fa mbyɨ̀ tìʼ wen bènə̀ lì wen, ghə̀ dyʉ̀ tsèntə wenə̀ wì wen, vəwenə vəbò sə diʼ kənyʉ̀ kə mùʼ.’

⁶ Vəwenə ko bè diʼ anə̀ viʼi və bò alì sə̀ diʼ to nə̀ wìʼ muʼ ashɨ Nyìngòŋ kə mù sə diʼ la, no ghò a Nyìngòŋ kwiʼ li, wìʼ ko be diʼi zàs.”

⁷ Vəwenə bwènsə̀ bèm à wen la, “A zhʉ a kə diʼ ando wu gaʼà, byìʼì ghò a Mosìs ngàʼa la wùlɨm zì ghə̀ nyoʼ ŋwàʼlə̀ ə̀ kù à wì wen a ghə̀ dìʼì la ghə̀ dzɨ̀mə̀ li wen a?”

⁸ Yesò gàʼà vəwenə la, “Mosìs nlù byɨmə la ghə̀ŋ zì ghə̀ŋ dzɨ̀mə̀ ki vəŋə byìʼàndo tʉ vəŋə nchiʼi ə ghə̀ŋ ziʼi ə̀ kɨ̀ kənyʉ̀. A bwen a lì a Nyìngòŋ nghʉ byìʼì lam fa kənzìtə̀.

⁹ Mà gàʼà à ghə̀ŋ la no ndò a ghə̀ sətsèn dzɨ̀m wì wen à bwen tò la wùwì ayì tsi li wenə wùlɨm tsen, bè dyʉ̀ lam wùwì tsen, mu ghə̀ lì kwaʼà li soʼ lam.”

¹⁰ Ndzɨ̀mtə̀sə bàm wen mù gàʼ à wen la,“Ghèn sətsèn ndiʼ ntsìnə̀ a wùlɨm diʼ ntsi wenə wì wen mu kə bòŋ la kə wìʼ à làm nə̀ mpfen.”

¹¹ Yesò gàʼ à vəwenə la, “A ko diʼ viʼi vətsèm a və zì və tsi ando ziʼi ghenə gàʼà, à zì à tsi tò viʼi vi a Nyìngòŋ ku li kədyòʼ la vəwenə tsi a ji aghèn.

¹² Nyʉ̀ diʼ no ghoʼo a və zì və ne la kə wìʼ à lam. Vətsenvə diʼ kò və lù nlamə mu və bwi vəwenə anə̀ əkànə. Vətsenvə diʼ mu à nè viʼi la vəwenə ndiʼ əkàn. Andiʼ a tʉʼ Yesò viʼi təloʼ tə tsenəvə diʼ mu və tyen lam byìʼì soʼo Fòyn Nyìngòŋ. No ndò a ghə̀ zì ghə̀ byɨmə ə ntsi ando nyʉ̀ venə gàʼà ghə̀ tuʼù zhʉ̀tə.”

Yesò bwaʼsə vunə və tyetəvə

¹³ Viʼi vətsenvə lyɨ̀ vunə və tyetəvə vì nə̀ vəwenə la Yesò ghʉ avu wen à vəwenə a tʉ ə̀ jɨ̀m à vəwenə, alì ndzɨ̀mtə̀sə bàm wen sə sə̀ kəŋkə̀ viʼi a vyi la kə vəwenə be zhuŋsə wen.

¹⁴ Yesò mù gàʼ à ndzɨ̀mtə̀sə bàm wen la, “Ghə̀ŋ ghʉsə vunə vi və vi à mò, kə ghə̀ŋ be à tàm vəwenə byìʼàndo soʼo Fòyn Nyìngòŋ diʼ à viʼi vyi a və diʼi to nə̀ vəwenə.”

¹⁵ Ghə̀ gàʼ a lì ghʉ̀ avu wen à vəwenə a tʉ bwaʼsə vəwenə mù lù sə̀ jèʼè dyʉ̀.

Yesò ziʼi kùmə̀ ghoʼ bènə̀ soʼ Fòyn Nyìngòŋ

¹⁶ Wutsen nlù vì bèm à Yesò la, “Ndìʼsə̀, ma lè zì mà ne no ghò jùŋə ndi lu kiʼi bwòŋ a?”

¹⁷ Yesò bèm à wen la, “Byìʼì ghò a wu bèmə̀ kənyʉ̀ kə jùŋ kə kì a wù zì wù ne à mò a? A bòŋ nkwʉʼ tò Nyìngòŋ. Wù sətsèn kòŋ əkiʼi bwòŋ wu zhʉ̀ kənyʉ̀ kì a təsoʼ tə wen tə gàʼà.”

¹⁸ Wìʼ a yì bèm à Yesò la, “Wù gàʼà təsoʼ tə kò.?” Yesò gàʼ la “Mà gàʼà tì a tə gàʼà la, kə wìʼ zhwi; kə wìʼ tsi nə̀ wì wìʼ ko nə̀ lɨm wìʼ, kə wìʼ tsoŋ; kə wìʼ zhò ndzɨ̀ŋ byìʼì wutsen.

¹⁹ Nzhʉ gɨ̀ tìʼ wù bènə̀ lì wù, kòŋə lèmə̀ wù tò ndə̀ŋndəŋ ando wù kòŋə̀ wen wu.”

²⁰ Wàyn wùlɨm ayì bwènsə̀ gàʼ à wen la,“Mà ghʉ li təsoʼ tèntə no tətsèm. A bè fàŋ ghò tsen mà ne a?”

²¹ Yesò bwènsə̀ à wen la, “A zhʉ a wù kəŋə kwʉ̀ʼʉ̀ mè, wu dyʉ̀ bàʼlə fo vyə no tsèm ə̀ ku ko yi à viʼi kənfem ndi lu kiʼi ghoʼ a kàŋ. Wù ne nè a lì wù vì dzɨ̀mtə̀ mò.”

²² Andìʼ a zhʉ a wàyn wùlɨm a yì nzhʉ, kənyʉ̀ akì ghə̀ lù kò ghə̀ be nsaŋlə̀ byìʼàndo ghə̀ nkìʼ ghoʼ no ghoʼo.

²³ Yesò mù gàʼ à ndzɨ̀mtə̀sə bàm wen la, “Mà gàʼà à ghə̀ŋ nəmwèʼè la kə lu nto no nànto wu ghoʼo kwen a soʼ Fòyn Nyìngòŋ.

²⁴ Mà be shə̀ʼtə̀ kənyʉ̀ à ghə̀ŋ, kə bwaʼmə à fəmbwèʼè fo fə chò fa kəbʉ̀ʼ kə nsoʼ chò la wu ghoʼo kwen a sòʼ Fòyn Nyìngòŋ.”

²⁵ Ndzɨ̀mtə̀sə bàm wen sə nè zhʉ̀ kənyʉ̀ a kènkə sə̀ diʼ nə̀ kaynə, mù bèm a wen la, “Kə lè yi ndiʼ a lì à lə̀ bwòŋ ndò?”

²⁶ Yesò ki vəwenə tò fəchìʼ, mù gàʼ la, “kənyʉ̀ a kènkə to chò tò wìʼ, alì nyʉ̀ tsèm bwaʼmə à Nyìngòŋ.”

²⁷ Bità mù bèm la, “Gaʼa kò wù yen li la yès moʼtə̀ li no ghò a yes tə nè sə̀ boʼsə wù. Yès lu se gho?”

²⁸ Yesò gàʼ à vəwenə la, “Mà gàʼà à ghə̀ŋ nəmwèʼè la a lu ndiʼ a mbi fi, a zhʉ a Wàyn Wìʼ ŋwʉʼʉ li à wen a kəfwoyn nə̀ ghoʼo wen, a dìʼ a zhʉ ayì a ghə̀ŋ vi njʉ̀sə̀ bò a ŋwʉʼʉ a fwoyn njʉ̀sə̀ bò ə nsoʼo ngwàʼsə loʼ Islel shì njʉ̀sə̀ bò.

²⁹ Adìʼ tè ndò a ghə̀ moʼtə̀ li kəbəŋ kə wen ko vəlèmə və wen lʉmə, ko vəlemə və wen ki, ko tìʼ wen ko lì wen ko vunə wen ko təsɨm tə wen byìʼì mò mu ghə̀ lu bwènsə̀ kiʼi viʼi bènə̀ fo aghayn ghɨ. Ghə̀ be lə kiʼi bwoŋ a ghə̀ lu faŋə̀ tò ghayn ə mùʼ.

³⁰ Kənyʉ̀ a ghə̀ŋ diʼi be kɨ dìʼ la, nghoʼo viʼi a və diʼì luwèn a mbì lu ndiʼ a bàm, nghoʼo viʼi a və diʼ a bàm luwèn lu ndiʼ a mbì.”