Lumans 7 - The New Testament in the Babanki languageƏsoʼ ə ko be kiʼi kənyʉ̀ ə nè a ghə̀ŋ 1 Ghə̀ŋ ko zhʉ̀ kɨ kənyʉ̀ ki a ma kəŋ ə gàʼ luwen a vəlemə vwomə byìʼì ando no ndo fa ghə̀ŋ a ntìntìn ə kɨ ando əsoʼ ə lam ə jèʼè. Ghə̀ŋ kɨli la əsoʼ ə nə̀ kiʼi kədyòʼ a wìʼ a kətʉ to azhʉ̀ a ghə̀ bo tsì a mbi. 2 Kənyʉ̀ na ken ə diʼ la, wùwì diʼ ə faŋ wenə lɨmə wen ə zàʼa ando lɨm ayi bò tsi a mbi, lɨmə wen pfʉ no zhʉ̀ko, ko əsoʼ ə làm na ghenə ə bè ghaʼa wen. 3 Kə le diʼi la lɨmə wen sətsen ə bo ndiʼ ko andiʼ la ghə̀ tɨmə pfʉ, ghə̀ dyʉ̀ ə tsì wenə wù lɨm ə kədyàŋ, kə ne diʼi la ghə̀ kwaʼa li əsoʼ ə làm. Lɨm ə wen sətsen ə pfʉ no zhʉ̀ ko, ko əsoʼ ə be ə ghaʼa wen a zhʉ a ghə̀ sətsen be lam, ko kə be na diʼi la ghə̀ kwaʼa li əsoʼ ə làm. 4 Kə le diʼ la ghə̀ŋ luwen a vəlemə vwomə la ghə̀ŋ diʼ to ali ando ghə̀ŋ pfʉ̀kə li. Əsoʼ ə kə be ə kiʼ kənyʉ̀ ə nè a ghə̀ŋ byìʼì ando ghə̀ŋ ə pfʉ li ghə̀ŋ və Yesò ə sə diʼ əshyə əwen ə wen. Kə le diʼi la, à kiʼi wen kiʼ ghə̀ŋ luwen, a diʼi wen yi a Nyìngòŋ ə nlùsə fa pfʉ ə nè la vəghəŋ ə kumə ashɨ ə jùŋ ghə̀ a Nyìngòŋ. 5 A ə ndiʼ ando vəghəŋ bo tsi a ji yi a njòsə əwenə vəghəŋ sə ə kəŋ fa tsù, Əsoʼ ə tenə vəghəŋ la və nè mbyɨ, ghə̀ vi to nə̀ əpfʉ̀. 6 Luwen sə diʼ Əsoʼ ə ko be kiʼ kənyʉ̀ ə nè nə̀ vəghəŋ byìʼì ando vəghəŋ sə diʼ alə̀ sə və pfʉkə li a əsoʼ na ghèn a vəghəŋ ə shyèʼ nfɨŋ tsu. Vəghəŋ ko be nè tebè shyèʼ ə Nyìngòŋ a ji ə mu yi a və tə nè fa tsu, shyèʼ akwi kənyʉ̀, mu və nyoʼ a soʼ. Vəghəŋ sə boŋsə shyèʼ a ji ə fi yi a kəzhwì kə Ŋwoʼkə ə diʼi a vəghəŋ. Əsoʼ ə diʼi kəfo kì a mbyɨ diʼ kəwenkə 7 Kənyʉ̀ na kènkə diʼi la gho? Kə le kəʼə la Əsoʼ ə Nyìngòŋ ə diʼ kəfo kə byɨkə mu? Kə ko diʼ ali no faphen byìʼì ando a bwèn fa ə Əsoʼ mu ma ko kɨ kənyʉ̀ ki a mbyɨ diʼ kəwenkə. Əsoʼ tə faŋ ke gàʼ la, “kə ashɨ ə ghəŋə baŋə a fo ə viʼi,” mu ma ko kɨ kənyʉ̀ na kènkə. 8 Alì əsoʼ na yi ə boŋsə nè la mbyɨ nè, ashɨ à ghomə ə̀ baŋə no fo ə tsèm. Əsoʼ ə tə faŋ ke ndiʼ mu mbyɨ ko kiʼ kədyòʼ. 9 Ma ə̀ ntsi ando mà ko tɨmə kɨ Əsoʼ ali əsoʼ ə lu vi no achʉʼ ə ko ma sə kòŋ no nànto ə nè mbyɨ, mu pfʉ. 10 Əsoʼ a ghèn ə̀ ndiʼ ə nè la mà ə tsi, ali ghə boŋsə nè la mà pfʉ pfʉ. 11 Mbyɨ lobtə mo chò fa a nyʉ̀ yi a əsoʼ chuŋsə mo mu zhwi mo. 12 Kə lə diʼi la Əsoʼ ə laynə, no tèbe a gho a ghə gaʼa be laynə, diʼ tɨmə, be bòŋ. 13 A lə diʼ la kəfòkə ə jùŋ kə alə̀ ə boŋsə nè la mà pfʉ mu? Kə ko diʼ ali no fa mpfen! A ə̀ vi nə̀ mbyɨ vi nə̀ əpfʉ̀ a mò. Mbyɨ ne chò fa kəfo kə jùŋ kə, ə vi nə̀ əpfʉ̀ a mò. Kə ə fʉ̀ alə ndiʼ kənàʼ kə mbyɨ kə bayn. Əsoʼ ə diʼ kəfo kì a kə gyàmtə̀ ə diʼ ə làynsə la mbyɨ ə fwàynsə no mwèʼmwèʼ. Ngəʼ yì a ghə̀ diʼ a vəghəŋ a ntìntìn 14 Vəghəŋ ə kɨ la Əsoʼ ə diʼ mu à ku Nyìngòŋ, ali ma kumə diʼ to wìʼ a və baʼlə a kəkòs a mbyɨ. 15 Ma ko tuʼtə̀ kɨ ənyʉ̀ vyi a ma nè byìʼì ando kənyʉ̀ ki a ma kəŋ ne ko ma ne kəwenkə, ki kə a ma bàynə̀ ma boŋsə ne kəwenkə. 16 Luwen lə ando ma nè kənyʉ̀, a diʼ nyʉ̀ a ma ko kòŋ, à lə diʼ la ma byɨmə la Əsoʼ ə ti a nkàyn. 17 Kə lə diʼi la, à ko lutə nè tebè mo ne kənyʉ̀ na kèn. A boŋsə nè mbyɨ yì a ghə̀ diʼi a mo a wen. 18 Ma kɨli la kənyʉ̀ kə ə jùŋkə ko diʼ a mo wen. Ma gaʼa a mo njòsə wen ashə a sə kòŋ mbyɨ lə. Ma gaʼa alə̀ byìʼì ando ma kòŋ to ə̀ nè nyʉ̀ ə jùŋə və ali ko kə bwaʼmə. 19 Ma ko nè tebè nyʉ̀ ə jùŋə və vi a ma kòŋ ə nè. Ma boŋsə nè to nyʉ̀ ə byɨvə vi a ma ko kòŋ ə nè. 20 Mà sətsen ə nè to kənyʉ̀ kì a ma ko kòŋ ə nè, kə ne diʼi la à ko be nè mo nè kənyʉ̀ na kì, a kə lə diʼi la à nè mbyɨ yì a ghə̀ diʼi a mo wen. 21 Kə sə diʼ a mò luwen to sə à diʼ əsoʼ la mà sə kəŋ ə nè kənyʉ̀ kə jùŋ kə, ma boŋsə nè to kənyʉ̀ kəbɨkə. 22 A diʼ a mo a ti tyɨm ma kòŋ ə wʉ̀ əsoʼ ə Nyìngòŋ, 23 ali yen nə̀ la à boŋsə shyèʼ to əsoʼ ə kədyàŋ a mo wen, shyèʼ ali, soynə əsoʼ yi a ghə̀ diʼi a mo ətyɨm. Ghə nè mò, ma diʼ to sə ma diʼ a ngə̀ŋ nfɨŋ a mbyɨ. A diʼ əsoʼ ə mbyɨ na ghèn a ghə̀ shyèʼ a mo wen. 24 Ma diʼ no a ngəʼ! A le gyàmtə̀ shisə ndo mo fa wen ashə a ghə vi nə̀ əpfʉ̀ ə a mò lə a? 25 Ma kù kəzòŋ a Nyìngòŋ à ghə̀ shisə mo fa tsu chò fa a Bobo vəghəŋ Yesò Klistò! Ma yen li la ma kòŋ to no a mo tyɨm ə wʉ̀ əsoʼ ə Nyìngòŋ ali a diʼ a wèn ə wìʼ ə mò, shyèʼ to kəkòs a mbyɨ. |
© 2017 CABTAL