Lumans 6 - The New Testament in the Babanki language

Vəghəŋ ə tsi byìʼì Yesò

¹ Vəghəŋ zizi və gàʼ la gho, la vəghəŋ faŋ ə nè to mbyɨ ndiʼ Nyìngòŋ ə faŋ ə diʼi ətyɨm ə jùŋə ghə̀ a vəghəŋ mu?

² Kə zizi ko kə lu ndiʼ ali no fa mphen! Mbyɨ ko be kiʼi kənyʉ̀ kumə vəghəŋ no fa mphen. Vəghəŋ sə diʼ mù və ə mpfʉ li a mbyɨ ko vəghəŋ zizi vəghəŋ be ntsi a ti mbyɨ.

³ A ghə̀ŋ kɨli la vəghəŋ vi a və ə nshi mu ə tsentə vəghəŋ və Yesò Klistò sə diʼ alə̀ sə vəghəŋ boŋ li pfʉ ndə̀ŋndəŋ to nə̀ wen?

⁴ Kə diʼi la vəghəŋ ə sə shi mu kə sə diʼ to sə vəghəŋ pfʉ li, və bvɨmə vəghəŋ boʼsə nə̀ wen. Kə ndiʼ alə̀ ndiʼ Bobo nè vəghəŋ ə ntsi ntsìnə̀ ə fi ndə̀ŋndəŋ to ando ghə̀ ə nè Yesò, ghə̀ bwensə lù fa pfʉ. Ghə̀ nè alə nə̀ kədyoʼkə kaynə kə wen.

⁵ To ando vəghəŋ sə diʼ mù və ə nlyɨ̀ li kəshi a ntìntìn əpfʉ̀ ə Yesò, vəghəŋ lu be boŋ lyɨ kəshi a ntìntìn mə lu ə wen fa pfʉ.

⁶ Vəghəŋ ə kɨ la və ə sə bayntə Yesò a kəntò ə bayntə boʼsə nə̀ ntsìnə̀ ə mu ə vəghəŋ ndiʼ kədyòʼ kə mbyɨ kì a kə ndiʼ a wen ə mu ghə̀ na ghèn mè, ko vəghəŋ ə be a ndiʼ əkòs a mbyɨ,

⁷ byìʼì ando wìʼ nə̀ pfʉ ko mbyɨ be kiʼ kədyòʼ a wen a kətʉ.

⁸ Ando vəghəŋ sə diʼ mù və pfʉ li vəghəŋ və Yesò, vəghəŋ ə kɨ nəmwèʼè la vəghəŋ və wen lu ə ntsi diʼ.

⁹ Vəghəŋ ə kɨ la pfʉ ə ko be kiʼi kədyòʼ a kətʉ ə Yesò. Ghə̀ mpfʉ li, Nyìngòŋ ə lùsə wen fa pfʉ, ko ghə̀ ə be diʼ lu pfʉ.

¹⁰ Ghə̀ sə diʼ mù ghə̀ ə pfʉ li, pfʉ wen byɨbsə kədyoʼkə mbyɨ to nəmwèʼè, ghə̀ ə sə tsi luwen, tsi kuʼsə Nyìngòŋ.

¹¹ Kə le diʼi la ghə̀ŋ diʼ ə lyɨ̀ la ghə̀ŋ boŋ li pfʉ a mbyɨ, ko mbyɨ ə be kiʼi kənyʉ̀ kətsen kə ə nè kumə ghə̀ŋ, vye və Yesò Klistò na ə tsi luwen ə kùʼsə to Nyìngòŋ.

¹² Kə ghə̀ŋ be lù əwʉ̀sə mbyɨ la ghə̀ ə nsoʼo ə wen ə ghəŋə ghèn a ghə̀ diʼ lù pfʉ lə, nè la ghə̀ŋ nè nyʉ̀ vyi a ghə̀ŋ kəŋ.

¹³ Kə ghə̀ŋ ne moʼtə kəshi kə wen ə ghə̀ŋ no to kə muʼ la ghə̀ ne mbyɨ. Kə ghə̀ŋ moʼtə kəshi kə wen kətsen ə ndiʼ kəfo kəshyèʼ a nyʉ̀ ə byɨvə. Ghə̀ŋ boŋsə ku mwetə təwen ə tyəŋtə a Nyìngòŋ to nə̀ viʼi vyi a və lùsə li vəwenə fa pfʉ, və sə tsi. Ghə̀ŋ ku mwetə təwen ə təŋtə a Nyìngòŋ ə ndiʼ əfo əshyèʼ ə nyʉ̀ tɨməvə.

¹⁴ Ghə̀ŋ nè alə ndiʼ ko mbyɨ be a ə kiʼ kədyòʼ a ghə̀ŋ kətʉ byìʼì ando Nyìngòŋ sə diʼ mù ghə̀ diʼi li ətyɨm ə jùŋə ghə̀ a ghə̀ŋ, ko ghə̀ŋ ə be tsi tebè a ti əsoʼ.

Vəghəŋ diʼ əkòs ə ne nyʉ̀ a diʼ nyʉ̀ tɨməvə

¹⁵ Vəghəŋ zizi və gàʼ la gho luwen a? A le diʼ la vəghəŋ na faŋ ə nə̀ nè dyʉ̀ to nə̀ mbyɨ byìʼì ando vəghəŋ ko be tsi tebè a tsi əsoʼ, tsi to byìʼì ətɨm ə jùŋə ghə̀ Nyìngòŋ mu? Kə zizi ko kə lu ndiʼ alə̀ no faphen!

¹⁶ A ghə̀ŋ kɨli la ghə̀ŋ sətsen ku təwen ə təŋtə a əkòs a wìʼ, a ghə̀ŋ ne ndiʼ ə kòsə a wìʼ ayi zhʉ to fa wen? Ghə̀ŋ sətsen ku təwen ə təŋtə a əkòs a mbyɨ, a ghə̀ŋ ne zhʉ to fa mbyɨ, kəmwètə kikə diʼi əpfʉ̀. Mu ghə̀ŋ sətsen ku tə wen ə təŋtə a Nyìngòŋ a ghə̀ŋ ne ndiʼ əkòs ə wen, a kəmwètə kikə ne diʼ la ghə̀ a lyɨ ghə̀ŋ a viʼi kənyʉ̀ kətɨməkə.

¹⁷ Vəghəŋ diʼ ə ku kəzòŋ a Nyìngòŋ byìʼì ando a ndiʼ a tʉʼ tseghə, ghə̀ŋ diʼ əkòs a mbyɨ ali ə lu zhʉ ziʼi yì a və ziʼi a ghə̀ŋ ə byɨmə nə̀ tyɨm ə ghəŋə no tsèm.

¹⁸ Nyìngòŋ ə tə ə bwoŋsə ghə̀ŋ, ko ghə̀ŋ be diʼ əkòs a mbyɨ. Ghə̀ŋ sə boŋsə diʼ əkòs a Nyìngòŋ di ghə̀ŋ ə njèʼè a jisə tɨmə sə.

¹⁹ Ma gaʼa shəʼmə nə̀ nyʉ̀ a və diʼ to no ghə̀ŋ a ntìntìn byìʼì ando ətof ə ghəŋə bo temsə̀ kumə nyʉ̀ kəzhwì. A ə ndiʼ fa mbì, mu ghə̀ŋ ku li təwen ətəŋtə shəŋsə a əkòs a mbyɨ ə sə nè dyʉ̀ to nə̀ nyʉ̀ kəməŋ ə be tuʼ nè dyʉ̀ to nə̀ nyʉ̀ ə byɨvə ə tsenəvə. Ma sə gàʼa luwen la ghə̀ŋ ku təwen ətəŋtə a əkòs ə tuʼ nè dyʉ̀ nə̀ nyʉ̀ ə tɨmə və ndiʼ ntsìnə̀ shəŋsə layn ə mwetə ashɨ Nyìngòŋ.

²⁰ Andiʼ ando ghə̀ŋ mbo bu əkòs a mbyɨ, ko ghə̀ŋ kiʼ kənyʉ̀ kumə jisə tɨməsə.

²¹ Kə diʼ nəmwèʼè la ghə̀ŋ ko se kənyʉ̀ kə tsen kə fa a ntìntìn nyʉ̀ na venə a ghə̀ŋ ə nè. Ghə̀ŋ sə diʼsə kətʉ kumə nyʉ̀ na venə luwen. Kəmwètə kə nyʉ̀ na venə ə diʼ to əpfʉ̀.

²² A diʼ luwen mu və bwoŋsə li ghə̀ŋ fa mbyɨ, ghə̀ŋ sə ə boŋsə diʼ əkòs a Nyìngòŋ, əse yi diʼ la ghə̀ŋ sə tsi ətsìnə̀sə laynə sə, diʼ lu kiʼi ntsìnə̀ yì a ghə̀ ko lu mè.

²³ Ghə̀ŋ kɨli la əmòʼtə mbyɨ ə diʼ əpfʉ̀ ali Nyìngòŋ ə ku ə ntsìnə̀ yì a ghə̀ ko lu mè to kədyàŋ chò fa a Yesò Klistò ə Bobo vəghəŋ.