Lumans 4 - The New Testament in the Babanki language

Ablaham nti akayn a shɨ Nyìngòŋ byìʼì byɨmə wen

¹ Vəghəŋ zizi və gàʼ la gho luwen byìʼì Ablaham ə tìʼ vəghəŋ a?

² A tə ndiʼ la Nyìngòŋ ə lyɨ̀ Ablaham a wù kənyʉ̀ kətɨməkə byìʼì shwèʼè a ghə̀ nè, mu ghə̀ ə nkiʼ kənyʉ̀ ə kùm kədyùʼ fa tsu. Alì ghə̀ ko zi ghə̀ lu kùm kədyùʼ a kənyʉ̀ kətsenkə ashɨ Nyìngòŋ.

³ Və nyoʼ li a ŋwàʼlə̀ Nyìngòŋ la, “Ablaham ə byɨmə Nyìngòŋ, Nyìngòŋ be lyɨ̀ wen a wù kənyʉ̀ kətɨməkə.”

⁴ Wìʼ ə ne shwèʼ, və aloʼ ə wen nə̀ kəfo kə, ko ndiʼ la və ku kəfo a kì ku a wen. A ne diʼ kənyʉ̀ a ghə̀ shyèʼ, və sə diʼ ə lòʼ wen.

⁵ A ne Nyìngòŋ la viʼi və byɨvə ndiʼ viʼi kənyʉ̀ kətɨməkə. Nyìngòŋ nə̀ dyʉ̀ a wìʼ yi a ghə̀ faŋ kò ghə̀ lə ne shyèʼ ali mu ghə̀ byɨmə li kənyʉ̀ ki a ghə̀ ne a wen, ghə̀ lyɨ̀ wen a wù tɨmə byìʼì əbyɨmə ə wen.

⁶ Devìt ə mbe ngaʼa to kənyʉ̀ na kènkə ando ghə̀ ə ngaʼa kumə mbwaʼmə yì a Nyìngòŋ ə ku a wìʼ azhʉ̀ a ghə̀ lyɨ̀ wen a wù kənyʉ̀ kətɨməkə ko andiʼ la ghə̀ shyèʼ kənyʉ̀. Ghə̀ ə ngàʼa la:

⁷ “Njùŋ diʼ a wìʼ yi a Nyìngòŋ ə lyesə li ə nyʉ̀ byɨvə wen ə shʉ̀ mbyɨsə wen.

⁸ Njùŋ ne diʼ a wìʼ yi a Nyìngòŋ ko be taŋtə mbyɨsə wen.”

⁹ Njùŋ a ghèn a Devìt ngaʼa kodiʼ to a viʼi Jus, ghə̀ mbe diʼ a viʼi ətɨm. Kə diʼ to ndə̀ŋndəŋ ando və nyoʼ li a Ŋwàʼlə̀ Nyìngòŋ la, “Ablaham ə byɨmə li Nyìngòŋ, ghə̀ lyɨ̀ wen a wù kənyʉ̀ kətɨməkə.”

¹⁰ Və lə nlyɨ̀ wen a wù kənyʉ̀ kətɨməkə a tʉʼ ko? Və nsə lyɨ̀ wen ali mu və shɨtə li ndyə̀ wen mu, və nko ntɨmə bo ə shɨtə lo? Nyìngòŋ ə nlyɨ̀ wen a wù kənyʉ̀ kətɨməkə, ko və tɨmə ə shɨtə ndyə̀ wen.

¹¹ Və ə shɨtə ndyə̀ wen to a nchwi ə diʼ la Nyìngòŋ ə lyɨ̀ li wen a wù kənyʉ̀ kətɨməkə. Ghə̀ lyɨ wen a wù kənyʉ̀ kətɨməkə byìʼì byɨmə yì a ghə̀ nkiʼi. Kə fʉ̀ alə ndi ghə̀ ndiʼ tìʼ a viʼi vyi a və byɨmə, Nyìngòŋ ə boŋ lyɨ̀ və wen a viʼi kənyʉ̀ kətɨməkə byìʼì byɨmə ə vəwenə a ko ndiʼ la və shɨtə a diʼ ndyə̀ vəwenə.

¹² Ghə̀ diʼ tomə tìʼ a viʼi vyi a və shɨtə li ndyə̀ vəwenə, a kodiʼ to byìʼì ando və shɨtə ndyə̀ vəwenə ali byìʼì ando vəwenə byɨmə kənyʉ̀ ki a Nyìngòŋ ə ghʉ̀, to ndə̀ŋndəŋ ando tìʼ vəghəŋ Ablaham ə byɨmə mibu və shɨtə ndyə̀ wen.

Nyìngòŋ ə ghʉ kənyʉ̀ a Ablaham

¹³ Nyìngòŋ ə wʉ̀ a Ablaham wenə ngwaʼ ə ngə̀ŋ ə wen la ghə̀ lu ku mbi a vəwenə, a kodiʼ byìʼì ando vəwenə ə zhʉtə Əsoʼ. A ndiʼ byìʼì ando ghə̀ byɨmə Nyìngòŋ, ghə̀ lyɨ̀ wen a wù kənyʉ̀ kətɨməkə.

¹⁴ Nyìngòŋ ə ndiʼ ə ku kəfo kì a ghə̀ wʉ̀ a viʼi vyi a və zhʉtə Əsoʼ, kə a diʼi la əbyɨmə ə ko kiʼi kənyʉ̀ ə nè, ko kənyʉ̀ kə wʉ kə ə Nyìngòŋ be a nkiʼi kəshi.

¹⁵ Kə diʼ alə̀ byìʼì ando Əsoʼ ə nè to la Nyìngòŋ ə fwisə tin a viʼi byìʼì ando vəwenə kwaʼa əsoʼ a yi, mu əsoʼ ə faŋ ke ndiʼ, ko wìʼ lu kwaʼa.

¹⁶ Kə le diʼi la kənyʉ̀ kəwʉkə na kènkə ə diʼ byìʼì byɨmə yì a Ablaham ə nkiʼi. Nyìngòŋ ə ku kənyʉ̀ kəwʉkə na kènkə to ngwaʼ ngə̀ŋ ə Ablaham no tsèm byìʼì ətyɨm ə jùŋə yi a ghə̀ kiʼi. Ghə̀ ko ku to a viʼi vyi a və wʉ̀ Əsoʼ. Ghə̀ ku a viʼi ətɨm vi a və kiʼi byɨmə ndə̀ŋndəŋ to nə̀ Ablaham byìʼì ando Ablaham ndiʼ tìʼ vəghəŋ və tsèm.

¹⁷ Kə diʼ to ndə̀ŋndəŋ ando və nyòʼo a Ŋwàʼlə̀ Nyìngòŋ a kəshi yi a ghə̀ ə gaʼa tsu a Ablaham la, “Ma wʉ̀ li wù a tìʼ a təloʼ to kədə̀ŋ.” Nyìngòŋ yi a Ablaham ə mbyɨmə ə wʉ̀ li wen a tìʼ a vəghəŋ. Ghə̀ nè li la viʼi və pfʉkəvə bwensə ə ntsi. Ghə̀ ə gaʼa to nə̀ əchʉ̀ la fo ndiʼ, və sə diʼ ko andiʼ la və ndiʼ.

¹⁸ Ablaham ə byɨmə li Nyìngòŋ ə sə ti to akwi əbyɨmə ə wen no tèbe ando kə ə kəʼə a viʼi la kənyʉ̀ kì a ghə̀ nki dyʉ̀ sə nə̀ kəwenkə ko lù kwʉʼ. Ghə̀ ə ti to akwi əbyɨmə ə wen ə lu sə diʼ tìʼ a viʼi təloʼ no a kədə̀ŋ to ndə̀ŋndəŋ ando və ghʉ̀ a wen ə gàʼ la, “Viʼi ngwaʼa ə ngə̀ŋ ə wù lu ə diʼ to kədə̀ŋ.”

¹⁹ Ghə̀ ko bwaʼ fa wen a byɨmə no tèbe ando ghə̀ nsə diʼ mu ghə dwinəli ə̀ sə kuʼu dyʉ̀ ngʉ̀ʼ əghɨ, ko andiʼ la ghə̀ kiʼi kədyòʼ, ko wi wen Sela bwi li.

²⁰ Ghə̀ ko nə̀ʼkə̀ fa wen a əbyɨmə, a kənyʉ̀ a Nyìngòŋ ngaʼa. Ghə̀ ə boŋsə kwi dyʉ̀ to ambì a wen əbyɨmə, kuʼsə Nyìngòŋ.

²¹ Ghə̀ ə ntuʼtə̀ kɨ to nəmwèʼè la Nyìngòŋ be kiʼi kədyòʼ ə nè kənyʉ̀ ki a ghə̀ nghʉ̀.

²² A le kənyʉ̀ kə ə nè, Nyìngòŋ ə lyɨ̀ wen a wù kənyʉ̀ kətɨməkə.

²³ Kənyʉ̀ a kènkə a və nyoʼ lə kumə Ablaham la, “Ghə̀ nlyɨ li wen a wù kənyʉ̀ kətɨməkə,” a ko ndiʼ la və nyoʼtə to a wen.

²⁴ Və mbe nyòʼ a vəghəŋ vyi a və byɨmə Nyìngòŋ yi a ghə̀ nlùsə Bobo vəghəŋ Yesò fa pfʉ.

²⁵ Nyìngòŋ ə ku wen la və zhwi byìʼì mbyɨsə vəghəŋ ə bwensə lùsə wen fa pfʉ ə ne la vəghəŋ ndiʼ ti a nkàyn ashɨ ə Nyìngòŋ.