Lumans 15 - The New Testament in the Babanki language

Ghə̀ŋ ə nè viʼi vətsenvə saŋlə

¹ Vəghəŋ vyi a və to a vəghəŋ a byɨmə diʼ ə gyàmtə̀ viʼi vyi a və bwaʼa a vəwenə ngəʼsə. Kə vəghəŋ ne to nyʉ̀ vyi a və bòŋ to vəghəŋ.

² No ndò ə ne to kənyʉ̀ a lèmə̀ wen na saŋlə to saŋlə ndiʼ na kèn kə gyàmtə̀ ə kwisə wen.

³ Nò tèbe Yesò ə ko ə nè kənyʉ̀ ə saŋlə to fa wen a ngeŋ. Və nyòʼ li a Ŋwàʼlə̀ Nyìngòŋ la, “Mbaʼ shisə a və telə wù tsu fəŋ li a mo a kətʉ.”

⁴ Nò tèbe ghò a və nyoʼo a Ŋwàʼlə̀ Nyìngòŋ ə ndiʼ ziʼi a vəghəŋ ndiʼ vəghəŋ ə kɨ nəmwèʼè la kənyʉ̀ kì a vəghəŋ ə ki dyʉ̀sə nə̀ kəwenkə lu kwʉ̀ʼ byìʼì mə̀ wensə nə̀ ətyɨm ə to ghə̀ yi a kənyʉ̀ kə Nyìngòŋ kə ku a vəghəŋ.

⁵ Nyìngòŋ yi a ghə̀ ku ətyɨm ə to ghə̀ nə̀ ə wensə a ghə̀ŋ ə ne la ghə̀ŋ ntsi to nə̀ Yesò Klistò, diʼ to a kənyʉ̀ kə mùʼ a ghə̀ŋ a kwòʼtə,

⁶ ndi ghə̀ŋ ə tsentə ə nkuʼsə Nyìngòŋ, ə Tìʼ Bobo vəghəŋ Yesò Klistò, to a chʉ̀ ə mùʼ.

Viʼi vətsèm lu kuʼsə Nyìngòŋ

⁷ Ghə̀ŋ ə̀ shisə vəlemə to ndə̀ŋndəŋ ando Yesò ə shisə li ghə̀ŋ, ndiʼ kùʼsə diʼ a Nyìngòŋ.

⁸ Ghə̀ŋ kɨli la Yesò ə nvi a wù ə shwèʼè a viʼi Jus ə diʼ a vəwenə la kənyʉ̀ kəwʉkə ə Nyìngòŋ ə ko nə̀ fəŋ. Ghə̀ nè alə ə lwinsə kənyʉ̀ kəghʉ kə kì a Nyìngòŋ ə ghʉ a vətìʼ və vəwenə.

⁹ Ghə̀ nvi ndi nè la viʼi ətɨm ə kuʼsə Nyìngòŋ kumə kusə shɨnsə ə wen to ndə̀ŋndəŋ ando və nyoʼo li a Ŋwàʼlə̀ Nyìngòŋ la: “Byìʼì nakèn kə, mà na kuʼsə wù a ntìntìn ə viʼi kətɨm. Mà na zhɨmə ə dzaŋsə kuʼsə zhiʼ ə wu.”

¹⁰ Və be nyòʼò la: “Ghə̀ŋ ə saŋlə vye və viʼi Nyìngòŋ a viʼi kətɨm.”

¹¹ Və be ə nyòʼ to la: “Ghə̀ŋ viʼi kətɨm no və tsèm, ghə̀ŋ ə kuʼsə Nyìngòŋ. Nò viʼi və tsèm nə̀ kuʼsə Nyìngòŋ.”

¹² Nshə̀ʼtə̀ ə Isayà ngaʼa ə gàʼ la: “Wìʼ lu fʉ̀ fa ngwaʼa ə ngə̀ŋ nə̀ Jesì ə̀ soʼo viʼi kətɨm, vəwenə lu ghʉ təkwòʼtə̀ tə vəwenə a wen, ə byɨmə la ghə̀ diʼ ə mbwòŋsə̀ vəwenə.”

¹³ Nyìngòŋ ghə̀ŋ a ghə̀ nè viʼi tsi, kɨ nəmwèʼè la və lu kiʼi kəfo kì a və nki dyʉ̀sə nə̀ kəwenkə kə nè ghə̀ŋ ə saŋlə no nànto ə be ku mbwaʼmə a ghə̀ŋ byìʼì ando ghə̀ŋ byɨmə a Nyìngòŋ. Ghə̀ nè alə̀ ndi ghə̀ŋ ə̀ kɨ nəmwèʼè, ko ghə̀ŋ lu kwoʼtə kənyʉ̀ kwoʼtə a ghə̀ŋ əbyɨmə a Nyìngòŋ chò fa kədyòʼ yi a kəzhwì kə Ŋwoʼkə ə ku a ghə̀ŋ.

Kənyʉ̀ kì a kə ne la Bol nyoʼtə a ji ghèn

¹⁴ Ma kɨ no fa mo a tyɨm a vəlemə vwomə la ghə̀ŋ shɨtə tsi to no ntsìnə̀ ə jùŋ, kɨ mwetə to no kənyʉ̀ kì a kə diʼ nəmwèʼè be kwʉ̀ʼʉ̀ ə ziʼi təwen ə təŋtə.

¹⁵ Ma nyòʼò li nyʉ̀ ə tsenəvə a ghə̀ŋ a ŋwàʼlə̀ ashə to no a kədyòʼ ə zɨ̀ŋtə nyʉ̀ a vyi a ghə̀ŋ. Mà nyoʼ alə̀ byìʼì kədyòʼ kì a Nyìngòŋ ə ku a mò la mà ə̀ nè shwèʼè a ghèn nə̀.

¹⁶ Ghə̀ nè la mà ə̀ diʼ wù ə shwèʼè ə Yesò Klistò, shyèʼ a viʼi ətɨm. Ma shyèʼ to nə̀ pfem ə ngə̀ŋ Nyìngòŋ, shə̀ʼtə̀ ntɨm ə jùŋ Nyìngòŋ a viʼi ətɨm kə diʼ alə̀ to nə̀ kəku a Nyìngòŋ, kəzhwì kə Ŋwoʼkə shʉ̀ laynsə vəwenə, nè la Nyìngòŋ be shi kəku a kì nə̀ saŋlə ghə̀.

¹⁷ Yo Yesò Klistò diʼ to kənyʉ̀ kəmùʼ, à lə kənyʉ̀ kì a kə nè la mà ə nàynə̀ kumə shwèʼè yì a ma nè a Nyìngòŋ.

¹⁸ Mà zizi ko ma lu mwomsə ə gàʼ kənyʉ̀ a bwen to kikə a Yesò ə nè chò fa a mo. Ghə̀ nè li ma lyɨ ə dyʉ̀ nə̀ viʼi ətɨm ashɨ Nyìngòŋ, vəwenə sə zhʉ to fa wen, a diʼ byìʼì ə nyʉ̀ vyi a mà gàʼa nə̀ vi a mà nè.

¹⁹ Ghə̀ nè li, ma sə nè nyʉ̀ ə kaynəvə to a tənkì a tənkì cho fa kədyòʼ kə kəzhwì kə Ŋwoʼkə. Ma shə̀ʼtə̀ li ntɨm ə jùŋ kumə Yesò to shì ə tsèm, ə zìtə̀ fa Jelusalèm ə dyʉ̀ ə zàʼa a Ililikùm.

²⁰ Mà tuʼtə kòŋ to ə shə̀ʼtə̀ ntɨm ə jùŋ ashi a viʼi ko təmə ə zhʉ̀ kənyʉ̀ tsu kumə Yesò. Ma ko kòŋ ə bè ə shə̀ʼtə̀ a kəshi mu viʼi sə kɨ kənyʉ̀ tsu kumə Yesò, kə kə ne diʼi la ma shyèʼè a kəshi ə wù kədyàŋ.

²¹ Ma kəŋ la ghə̀ŋ ə diʼ to ando və nyoʼo a Ŋwàʼlə̀ Nyìngòŋ la: “Viʼi vyi a və ko tɨmə shə̀ʼtə kənyʉ̀ a vəwenə kumə wen, lu yen ə̀ wen, a viʼi a və ko tɨmə zhʉ kənyʉ̀ kumə wen, zhʉ kɨ kənyʉ̀ kə wen.”

Bol ə baʼtə̀ ə dyʉ̀ ə ghayntə viʼi Lum

²² A lə kənyʉ̀ kì a kə nè la kə ma ə kiʼi ə zhʉ̀ ə vi ə yen ghə̀ŋ.

²³ Alì, luwen ando mà mwetə li shwèʼè ghomə a ashə a ghèn, mu ma tsì li a ngùʼsə, kòŋ no nànto ə vi ə yen ghə̀ŋ,

²⁴ ma kɨli la ma na sə dyʉ̀ a Sɨ̀ben ə chò yèn ghə̀ŋ ndiʼ vəghəŋ yen mə a fəshinə fə zhʉ̀ alə, ghə̀ŋ be gyàmtə̀ mò, a mo jèʼ.

²⁵ A diʼ luwen ma dyʉ̀ a Jelusalèm ə gyàmtə̀ viʼi Nyìngòŋ tsu,

²⁶ byìʼì ando viʼi və byɨməvə a Màsìdonìyà nə̀ viʼi a Akayà tə nsaŋlə ə mòʼ əko la və gyàmtə̀ viʼi Nyìngòŋ vyi a və femə a Jelusalèm.

²⁷ Vəwenə tə kwòʼtə ə nè alə̀ to fa vəwenə a ngeŋsə, ali a diʼ to no kəshi kə vəwenə ə nè alə̀ byìʼì ando viʼi Jus tə ə gyàmtə̀ viʼi ətɨm a ntsìnə̀ kəzhwì ə vəwenə, kə sə boŋ la viʼi tɨm boŋ gyàmtə̀ viʼi Jus nə̀ əfo vi a vəwenə ə kiʼi.

²⁸ Ma dyʉ̀ yen vəwenə ə ku əko na ghenə no zhʉ̀ ko ə sə dyʉ̀ a Sɨ̀ben ə chò ghayntə ghə̀ŋ mibu dyʉ̀.

²⁹ Ma kɨli la ma sə nvi ghayntə ghə̀ŋ ə Yesò tsentə bwaʼsə vəghəŋ no nànto.

³⁰ Ma sensə ghə̀ŋ a vəlemə vwomə la ghə̀ŋ ə jɨ̀mə̀ a mò no nə̀ kədyoʼkə. Ghə̀ŋ ə jɨ̀mə̀ byìʼì ando vəghəŋ ə kiʼi to əbyɨmə ə mùʼ a Bobo vəghəŋ Yesò Klistò, kəzhwì kə Ŋwoʼkə be nè la vəghəŋ ə̀ kòŋ təwen tə vəghəŋ.

³¹ Ghə̀ŋ ə jɨ̀mə̀ la kə viʼi Jùdiyà vyi a və ko kɨ Nyìngòŋ nè yenə ngəʼ a mò. Ghə̀ŋ be ə njɨ̀mə̀ la Nyìngòŋ nè, viʼi və byɨməvə vyi a Jelusalèm ə saŋlə ə shi ə gyàmtə̀ yì ando mà dyʉ̀ nə̀ wenə ghə̀ a vəwenə.

³² Ghə̀ŋ ə jɨ̀mə̀ ndi mà na sə vi a ghə̀ŋ, ghə̀ŋ saŋlə azhʉ̀ a Nyìngòŋ ə we kəvu, a ma be zhʉ̀tə̀ vəghəŋ.

³³ Ma jɨ̀mə̀ la Nyìngòŋ ə Tìʼ mbwaʼmə ə diʼ vye vəwenə. Amèyn.