Lumans 13 - The New Testament in the Babanki language

Viʼi və byɨməvə diʼ ə nzhʉ viʼi a və soʼo

¹ Nò ghə̀ŋ vətsèm diʼ ə nzhʉ fa viʼi a və soʼo ghə̀ŋ byìʼì ando wu ə soʼo ko diʼ a ghə̀ faŋ ke shi adyòʼ fa Nyìngòŋ ə nsoʼo. Nò viʼi a və soʼo no vətsèm diʼ mu à ghʉ̀ Nyìngòŋ.

² Kə lə diʼi la à tensə no ndò ə tensə viʼi a və soʼo, kə a diʼ la ghə̀ tensə li kənyʉ̀ kì a Nyìngòŋ ə ghʉ̀, Nyìngòŋ ə lu soʼo wen.

³ Viʼi vi a və tsi ntsìnə̀ ə jùŋ ə ko diʼ ə mfwàynə̀ viʼi a və soʼo. A diʼ ə mfwàynə̀ vyi a və tsi ntsìnə̀ ə byɨ. Wìʼ ə sətsèn ə faŋ ke kəŋ la wù ə soʼo ə fwàynsə a wen, ghə̀ ne to nyʉ̀ ə jùŋvə, ghə̀ a boŋsə bwomsə wen.

⁴ Kə diʼ alə̀ byìʼì ando wìʼ a ghə ə soʼo diʼ wù ə shwèʼè Nyìngòŋ, gyàmtə̀ ghə̀ŋ la ghə̀ŋ ə nè nyʉ̀ ə jùŋvə. Wù yi ne mbyɨ, wu à fwaynə viʼi a və soʼo byìʼì ando vəwenə kiʼi kədyòʼ ə ku ngəʼ a viʼi vyi a və ne nyʉ̀ ə byɨvə. Vəwenə diʼ viʼi shyèʼ ə Nyìngòŋ, ku ngəʼ a viʼi vyi a və ne nyʉ̀ ə byɨvə, a diʼ ji yì a Nyìngòŋ diʼi fa tsu la ghə̀ fwisə tin a viʼi və byɨvə.

⁵ Kə lə diʼ la no ndo diʼ ə nzhʉ fa viʼi a və soʼo, a ko diʼ to byìʼì ando ghə̀ fwaynə la Nyìngòŋ ə zizi ghə̀ ə fwisətin a wen ali byìʼì ando ghə̀ kɨli fa wen a tyɨm la kə bòŋ ə ghə̀ nè alə̀.

⁶ A lə kənyʉ̀ kì a ghə̀ŋ diʼ ə lòʼo kensè byìʼì ando viʼi a və soʼo diʼ mu vəwenə ku li təwen tə vəwenə ə nè shyèʼ a ghenə a Nyìngòŋ.

⁷ Wìʼ ə diʼ ə lòʼ kəfo no tèbe a ndo fa ntìntìn ə viʼi a venə, a ghə̀ diʼ lòʼ. A diʼ kensè kə wòŋ, ghə̀ lòʼ, a ndiʼ no tèbe ghə̀ kətʉ wen, ghə̀ lòʼ, a ndiʼ tèbe gumlə, ghə̀ ə shɨtə gumlə vəwenə, a ndiʼ əkuʼsə ə ku a vəwenə, ghə̀ ə ku.

Ghə̀ŋ ə kòŋ mə̀ təwen ə tyəŋtə

⁸ Kə wìʼ na zhɨ əko ə wìʼ. Ghə̀ŋ diʼ ə mbòŋsə̀ nkòŋ mə̀ təwen ə tyəŋtə byìʼì a diʼ kənyʉ̀ ghə̀ŋ diʼ ə ne. No ndò a ghə̀ ne ali mu ghə̀ zhʉ̀ Əsoʼ.

⁹ Təsoʼ tentə lə la, “kə wù lù tsì nə̀ wì wìʼ kò nə̀ lɨmə wìʼ, kə wù lù zhwi, kə wù lù tsoŋ, kə ashɨ à wu a baŋə a fo ə viʼi.” Təsoʼ a tentə no tə tsèm ə tsèntə fʉ̀ to fa ntsìnə̀ ghèn la, “Kòŋ lèmə̀ wù to ndə̀ŋndəŋ ando wù kòŋ wenə wu.”

¹⁰ No ndò a ghə̀ kòŋ lèmə̀ wen, ko ghə̀ be na ne kənyʉ̀ kə kəbyɨkə a wen. Kə le diʼ la wìʼ yì nkiʼi ə kòŋ, kə a ndiʼ la ghə̀ ghʉ̀ təsoʼ no tətsèm.

¹¹ Ə kwʉ̀ʼsə, ghə̀ŋ diʼ ə nè nyʉ̀ a venə no ə tsèm byìʼì ando ghə̀ŋ kɨli zhʉ̀ yi a vəghəŋ ə diʼ tsu luwen. Əzhʉ kʉʼʉ li la ghə̀ŋ lu fa mbinsə byìʼì ando a ndiʼ ando vəghəŋ ə mbyɨmə to byɨmə, zhʉ̀ sə boʼsə ando vəghəŋ bwòŋ mwetə, ali luwen ə sə diʼ mù ghə̀ be ə boʼsə chò fa lì.

¹² Ə tʉʼ ə layn li, kəbəŋ kə sə laynə mwetə vì. Vəghəŋ maʼa li nyʉ̀ kəbəŋ kə fenəkə ə boŋsə lyɨ̀ fo ghòŋ vi a və soynə tsu nə̀nchwì.

¹³ Vəghəŋ ə nshɨtə ghaʼa təwen tə vəghəŋ a nə̀ viʼi a və tsi a ntìntìn əbayn. Kə vəghəŋ ne kwetə no tèbe ghò, no tèbe fè və zhɨ, kə vəghəŋ ne moʼtə məlʉ̀ʼ ghaʼa vəghəŋ. Kə vəghəŋ ne nè nyʉ̀ ə kənfwàʼlə̀ nə̀ təwen tə vəghəŋ. Kə vəghəŋ ne taŋmə, kə vəghəŋ ne ghə̀ʼə̀ viʼi.

¹⁴ Ghə̀ŋ boŋsə ghaʼ to ntsìnə̀ ə fi yì a Bobo Yesò Klistò ə ku li a ghə̀ŋ a fo ghòŋ. Kə vəghəŋ na kù ji la njòsə əwen ə vəghəŋ sə tisə vəghəŋ, kwetə tèbe ghò ando sə kòŋ, vəghəŋ ə ne to ne.