Lumans 12 - The New Testament in the Babanki language

Ntsìnə̀ yì a viʼi shyèʼ ə Nyìngòŋ ə diʼ ntsi

¹ Vəlemə vwomə, ma sensə ghə̀ŋ, byìʼì kusə nshinsə yì a Nyìngòŋ ə diʼi li a ghə̀ŋ la ghə̀ŋ ku təwen ə tyəŋtə a Nyìngòŋ a ndiʼ nə̀ kəku kə, ghə̀ŋ tsi, laynə, nè la ghə̀ ə nsaŋlə. A lə nkàyntə̀ kuʼsə yì a ghə̀ŋ diʼ ə kuʼsə Nyìngòŋ.

² Kə ghə̀ŋ ne tsi to nə̀ viʼi mbyi ashə̀. Ghə̀ŋ boŋsə ə wʉ̀sə Nyìngòŋ ku kwoʼtə ə fìghə a ghə̀ŋ ə kwitə tətyɨm tyəŋtə ndi ghə̀ŋ ə yenə kɨ kənyʉ̀ kì a Nyìngòŋ ə kəŋ, a diʼ to kənyʉ̀ ki a kə be diʼ kənyʉ̀ kətɨməkə, Nyìngòŋ ə kòŋ.

³ Nyìngòŋ ə kiʼi li ətyɨm ə jùŋə ghə̀ a mò ə ku shyèʼ ə wen la mà ə nè, ma sətsèn ə gàʼ a ghə̀ŋ no və tsèm la, kə ghə̀ŋ ə̀ lyɨ təwen ə təŋtə shəʼmə a nsəʼ, a ghə̀ŋ ko zàʼa tebè tsu. Ghə̀ŋ shiʼsə tə kwoʼtə ə təŋtə ə lyɨ̀ təwen ə təŋtə to ando ghə̀ŋ diʼi. Ghə̀ŋ ə ki təwen ə təŋtə chò fa əbyɨmə yi a ghə̀ ku li a ghə̀ŋ.

⁴ Ghə̀ŋ kɨli la əwen wìʼ ə kiʼi ə bàs, və diʼ to kədə̀ŋ, no tèbe kəbàs kə kò ə nè to shwèʼè ə nəkwoŋ.

⁵ Kə le diʼ to ndə̀ŋndəŋ a vəghəŋ. Vəghəŋ viʼi vəbyɨməvə diʼ a kənyʉ̀ kəmùʼ diʼ wèn ə mùʼ vəghəŋ və Yesò Klistò, ali diʼ to ə wèn ə mùʼ byìʼì əbyɨmə yì a vəghəŋ ə tsèntə kiʼ a Yesò, no tèbe kəbàs kə kò ə ghàŋtə to wenə kətsen.

⁶ Vəghəŋ ə kiʼi kəku a ghə̀ ku to nə̀ nəkwoŋ, to ndə̀ŋndəŋ ando ghə̀ kòŋ li ə ku no tèbè a ndò. Kə le diʼi la no ndò diʼ ə lyɨ̀ kəku kə wen ə nè to shwèʼ tsu. Nyìngòŋ ə sətsen ə ndiʼ mu ghə̀ ku li ətof la wìʼ ə shə̀ʼtə̀ ntɨm Nyìngòŋ, ghə̀ ə nshə̀ʼtə̀ zàʼa to ando əbyɨmə ə wen ə diʼ.

⁷ Nyìngòŋ ə sətsèn ə ndiʼ mu ghə̀ ku li kədyòʼ la wìʼ ə gyamtə viʼi, ghə̀ ə gyàmtə̀, wìʼ ndiʼ nziʼi, ghə̀ nziʼi to ziʼi.

⁸ Wìʼ ə nkɨ ə tyɨftə viʼi, ghə̀ ə̀ tyɨftə to tyɨftə; wìʼ nkɨ ə ku fo ə gyàmtə̀ viʼi, ghə̀ nku, kə ghə̀ a nghə̀ʼ. Wìʼ a ghə̀ tisə viʼi diʼ ə ne shyèʼ to nə̀ ətyɨm ə wenə no tsèm, yi a ghə̀ tuʼmə nə̀ viʼi ə nshyèʼ to nə̀ saŋlə.

⁹ Ghə̀ŋ sə nkòŋ viʼi, ghə̀ŋ ə nsùtə̀ kòŋ no nkayn, kə ghə̀ŋ a lobtə lobtə. Ghə̀ŋ ə mbàynə̀ mbyɨ, shɨtə ghaʼ ə nyʉ̀ ə jùŋə və.

¹⁰ Ghə̀ŋ ne kòŋ təwen ə təŋtə to nə̀ vəlemə, be nyʉ̀ʼ məzhʉ̀ ə tsèm, gumlə təwen ə təŋtə.

¹¹ Kə ghə̀ŋ ne bwaʼa. Ghə̀ŋ ə ghàblə̀, shyèʼ a Bobo no nə̀ tətyɨm ə təŋtə no tətsèm.

¹² Ghə̀ŋ saŋlə kumə nyʉ̀ vyi a ghə̀ŋ kɨ la və diʼ ambì. Ngəʼsə nvi a ghə̀ŋ, ghə̀ŋ wensə to wensə be jɨ̀mə̀ to məzhʉ̀ ə tsèm.

¹³ Ghə̀ŋ ə gətə fozhɨvə ə ghə̀ŋ ku viʼi və byɨməvə vi a və ko kiʼ. Ghə̀ŋ myəʼsə ə shisə viʼi və a ghə̀ŋ a loʼ.

¹⁴ Ghə̀ŋ ə jɨ̀mə̀ la Nyìngòŋ ə boŋsə bwaʼsə viʼi vyi a və tsuʼ kəghʉ ə kəŋkə̀. Kə ghə̀ŋ a jɨ̀mə̀ la ghə̀ telə vəwenə.

¹⁵ Viʼi sə saŋlə, ghə̀ŋ ə boŋ saŋlə ghə̀ŋ vəwenə, viʼi ə kusə shinsə, ghə̀ŋ mbe kusə shinsə ve vəwenə.

¹⁶ Ghə̀ŋ ə ntsi to a kənyʉ̀ kə mùʼ. Kə ghə̀ŋ a ghaŋsə əwen. Ghə̀ŋ boŋsə tsèntə vye və viʼi a və bwaʼa. Kə ghə̀ŋ a wʉ̀ la ghə̀ŋ kɨli nyʉ̀ ə tsèm.

¹⁷ Kə ghə̀ŋ be lù bwensə mbyɨ nə̀ mbyɨ. Ghə̀ŋ ə boŋsə mwomsə ə ne nyʉ̀ vyi a və bòŋ a viʼi və tsèm.

¹⁸ Ghə̀ŋ mwomsə no nə̀ kədyòʼ kə ə tsì nə̀ mbwaʼmə vye viʼi vətsèm.

¹⁹ Kə ghə̀ŋ be lù mbwensə mbyɨ a doŋ shomsə. Ghə̀ŋ boŋsə əwʉ̀sə a Nyìngòŋ, ghə̀ diʼ tin nə̀ fwi ə wen to ndə̀ŋndəŋ ando və nyoʼo li la Bobo ə gàʼ la, “A diʼ kəshi ə komkə ə shisə nyʉ̀ vyi a viʼi ə nè. Mà lu bwènsə̀ loʼ nyʉ̀ ə byɨvə ə viʼi.”

²⁰ Və nyoʼo li a Ŋwàʼlə̀ Nyìngòŋ la, “Jɨŋ ə zafə viʼi kəbàyn ə wù, wù ku kəfo, vəwenə zhɨ̀, ətoŋ mu ə zɨmtə vəwenə, wù ku mu, vəwenə nyʉ. Wù sətsèn ə nè a ji na ghèn, vəwenə a diʼsə kətʉ ə kwitə ntsìnə̀sə vəwenə.”

²¹ Kə ghə̀ŋ moʼtə kədyòʼ kə mbyɨ, kə to chò ghə̀ŋ. Ghə̀ŋ boŋsə to chò mbyɨ nə̀ nyʉ̀ ə jùŋə və vyi a ghə̀ŋ nè.