Lumans 11 - The New Testament in the Babanki language

Əkusə nshinsə Nyìngòŋ a viʼi Islel

¹ Ma bèmə̀ la, kə le sə diʼ alə̀ diʼi la Nyìngòŋ ə maʼa li viʼi wen mu? Ghə̀ ko maʼa vəwenə no fa mphen! Nò mò fa mo ngeŋ ə boŋ diʼ wù ə Islel mu mà fʉ fa ngwaʼa ngə̀ŋ ə Benjamìn, a ghə̀ ndiʼ wù ə ngeŋ ə Ablaham ali ko andiʼ la ghə̀ maʼa li mò.

² Nyìngòŋ ə ko maʼa viʼi wen mu ghə̀ ə ghʉ̀ li la ghə̀ lu bwaʼsə vəwenə mibu shɨtə mbi. A ghə̀ŋ kɨli kənyʉ̀ kì a Ŋwàʼlə̀ Nyìngòŋ ə ngàʼa kumə Ilajà a ghə̀ ə sensə Nyìngòŋ la ghə̀ diʼ kənyʉ̀ ki a viʼi Islel a vəwenə byɨbsə. Ghə̀ ə sensə gàʼa la,

³ “Viʼi venə zhwilə li nshə̀ʼtə̀ shəsə a Bobo. Vəwenə byɨbsə li əbaŋ kəku ə wù. A faŋ to mò, vəwenə sə be kəŋ ə zhwi mo.”

⁴ Ghə̀ gaʼa ali, Nyìngòŋ ə gàʼ a wen la, “A ko faŋ to wù. Mà bo kiʼi viʼi vətsenvə nkamsə sòmbo, və zhʉ fa mò, mu vəwenə nyɨŋ li la və ko kuʼsə tebè Bàl.”

⁵ Kə be diʼ ndə̀ŋndəŋ a vəghəŋ luwen. Nyìngòŋ ə diʼi li ətyɨm ə jùŋ ghə̀ ə wen, ə tsuʼ shisə viʼi vətsenvə no tèbe ando vəwenə ə tyetə.

⁶ Nyìngòŋ sətsen ə ndiʼ mu ghə̀ tsuʼ viʼi a venə a ji na ghèn, ko kə be a ndiʼ la ghə̀ tsuʼ byìʼì shyèʼ tsenghə a vəwenə ne, a bwen ali ko və nà gàʼa la à ne ətyɨm ə jùŋə ghə̀ Nyìngòŋ.

⁷ Kə lə diʼi la viʼi Islel və ghoʼovə ə ghʉ li kəfo kì a vəwenə və tsèm tə kəŋ no nànto ə kiʼi, à kiʼi to təshɨ tə viʼi alə̀ ando Nyìngòŋ ə tsùʼtə. Viʼi no və ghoʼo tosə li tətyɨm ə zhʉ̀ fa Nyìngòŋ.

⁸ Kə fʉ̀ to ando və nyoʼo a Ŋwàʼlə̀ Nyìngòŋ la, “Nyìngòŋ ə nè li vəwenə la kə və lu zhʉ kɨ tebè kənyʉ̀, ko və wenə ə kɨ tebè kənyʉ̀, no tèbè ə zàʼa fa layn.”

⁹ Devìt ə gaʼa ə gàʼ la ghə̀ jɨ̀mə̀ la, “Əfo ə zhɨvə ə vəwenə kaʼkə a ələ ə ne vəwenə fəŋ, Nyìngòŋ ə be ku ngəʼ a vəwenə.”

¹⁰ Ghə̀ ə gaʼa kwʉ̀ʼsə la ghə̀ kəŋ la, “Nyìngòŋ ə mòʼ kənfyɨf a vəwenə ashɨ, vəwenə ndiʼ ko və lu yen ə̀ shi, la ghə̀ we vəwenə a ngəʼ vəwenə kaʼ ə lu kwaʼkə to a ntìntìn ngəʼ.”

¹¹ Ma bèmə la, viʼi Jus ə kòyntə fəŋ mwetə mu? Kə ko diʼ ali no fa mphen! A ə ndiʼ ando vəwenə ne mbyɨ, Nyìngòŋ ə kwòʼtə viʼi ətɨm ə ku bwoŋ a vəwenə. Ghə̀ ə ne alə ndiʼ viʼi Jus kaʼkə ə shɨmtə viʼi ətɨm.

¹² A ndiʼ ando viʼi Jus ne mbyɨ, Nyìngòŋ ə ku əghoʼ a viʼi mbyi vətsenvə. Kə lə diʼi la Nyìngòŋ ə ku li əghoʼ a viʼi ətɨm byìʼì ando viʼi Jus fəŋ li. Ghə̀ sətsen ə ku əghoʼ na ghenə a viʼi ətɨm byìʼì mə əfəŋə viʼi Jus, ghə̀ be le ku əghoʼ na yi a viʼi azhʉ̀ a viʼi Jus bwensə vi a wen a?

Nyìngòŋ ə bwoŋsə viʼi ətɨm

¹³ Mà sə gaʼa a ghə̀ŋ viʼi ətɨm luwen. Ghə̀ŋ kɨli la ma diʼ wù ə ntɨm a Nyìngòŋ ə tsuʼ la mà ə̀ shə̀ʼtə̀ kənyʉ̀ kə wen a ghə̀ŋ, ma diʼ nə̀ saŋlə kumə ə shwèʼè na ghenə.

¹⁴ Ma kəŋ la viʼi lòʼ ə yès, ə viʼi Jus, yen shyèʼ na ghenə ə shɨmtə ghə̀ŋ, Nyìngòŋ ə bwoŋsə vəwenə vətsenvə.

¹⁵ A ndiʼ ando Nyìngòŋ ə maʼa vəwenə, ghə̀ baʼtə̀ ntsìnə̀ wenə viʼi mbyi vətsenvə. Ghə̀ sətsen bwensə lyɨ̀ vəwenə luwen, kə ne diʼ no ale a, kə ne diʼ la ghə̀ lùsə li viʼi fa pfʉ.

¹⁶ Və sətsen byə̀ʼ kəbayn ə kù a Nyìngòŋ a ambì, kə ne diʼi la no əghɨf ə kəbayn na yì no tsèm ə kiʼ to Nyìngòŋ, mu aghaŋ ə fəkoʼ ə sətsèn ndiʼ a nse, a kiʼ Nyìngòŋ, kə ne diʼi la à kiʼi wen kiʼi tə ntam ə tyitə.

¹⁷ Ghə̀ŋ viʼi ətɨm diʼ alə̀ to nə̀ təntam tə fəkoʼ a fə tə kuʼ, və kwàʼtə̀ vi ə zhùŋtə̀, ə sə kwi a fəkoʼ a və we. Ghə̀ŋ sə diʼ luwen, zhɨ̀ əfo ə zhɨvə vi a fəkòʼ fə zhɨtəfə na fenfə ə zhɨ̀, be boŋ kiʼi aghaŋ yi a fə kiʼi.

¹⁸ Kə le diʼi la ghə̀ŋ ko diʼ ə ghaŋsə wen a viʼi vi a vəwenə diʼ to nə̀ tə ntam titə a və kwàʼtə̀ ə maʼa. Ghə̀ŋ kɨli la ghə̀ŋ diʼ to nə̀ təntam, ghə̀ŋ ko ghaʼa aghaŋ, a boŋsə ghaʼa aghaŋ ghaʼa ghə̀ŋ.

¹⁹ Wìʼ ə tsen fa ghə̀ŋ a ntìntìn zizi ko ghə̀ a gàʼ la Nyìngòŋ ə tə kwàʼtə̀ maʼa təntam a tentə ə ku kəshi a ghə̀ŋ.

²⁰ Kə diʼ no nəmwèʼè la və tə ə kwàʼtə̀ maʼa vəwenə, a diʼ byìʼì ando vəwenə kò byɨmə, ə wʉ̀sə ghə̀ŋ, a diʼ byìʼì ando ghə̀ŋ byɨmə, ali ghə̀ŋ ko diʼ ə ghaŋsə əwen. Ghə̀ŋ ə mbòŋsə̀ fwàynə̀ Nyìngòŋ,

²¹ byìʼì ando ghə̀ sətsen ndiʼ mu ghə̀ ə maʼa li viʼi Jus, vəwenə diʼ nkàyntə̀ təntam tə fəkoʼ a fenfə, ghə̀ ne boŋsə ə wʉ̀sə ghə̀ŋ a?

²² Ghə̀ŋ kɨ la Nyìngòŋ ə tùʼmə̀ nə̀ viʼi ali, əsoʼ ə wenə to tò ali. Əsoʼ ə wenə ə to a viʼi vyi a və ə wʉ̀sə ji ə tɨmə, ali ghə̀ tùʼmə̀ nə̀ ghə̀ŋ azhʉ̀ a ghə̀ŋ zhʉ̀ tò fa wen, a bwen ali, ghə̀ be a maʼa ghə̀ŋ.

²³ A diʼ a viʼi Jus mu vəwenə sətsen kwitə ə byɨmə a Yesò Nyìngòŋ a bwensə ə lyɨ̀ vəwenə fa kəshi yi a vəwenə ə ndiʼ tsu. Ghə̀ kiʼi kədyòʼ ə nè ali.

²⁴ Nò fa mpfèn, Nyìngòŋ ə sətsen ə ndiʼ, mu ghə̀ lyɨ̀ li ghə̀ŋ ə viʼi ətɨm, ghə̀ŋ diʼ alə̀ to nə̀ təntam tə fəkoʼ a tə kumə kuʼ, ghə̀ a ghʉ ale ə bwensə ə lyɨ̀ təntam mu tə fʉ̀ fa fəkoʼ mu və zhɨtə zhɨtə a?

Nyìngòŋ ə kusə nshinsə to a viʼi vətsèm

²⁵ Kənyʉ̀ kə lyomtəkə kə tsen kə diʼ a ma kəŋ la ghə̀ŋ kɨ a vəlemə vwomə ndi kə nè ko ghə̀ŋ be ghaŋsə əwen. Kənyʉ̀ na kì ə diʼi la viʼi Islel vətsenvə diʼ luwen, to kətʉ ali diʼ ə na ə kwitə ə byɨmə azhʉ̀ a viʼi ətɨm vi a Nyìngòŋ ə tsuʼ tə ə byɨmə li mwetə.

²⁶ Kə le diʼi la Nyìngòŋ ne ə bwòŋsə viʼi Islel tò və tsèm tò ndə̀ŋndəŋ ando və nyoʼ a Ŋwàʼlə̀ Nyìngòŋ la: “Mbwòŋsə̀ lu fʉ̀ fa ntə̀ʼ Zayòn. Ghə̀ lu shʉ̀ lyesə mbyɨsə viʼi ngwaʼ ngə̀ŋ ə Jàkob.”

²⁷ Nyìngòŋ ə gaʼa li la, “Ma fas li la mà lu ne kənyʉ̀ na kènkə a vəwenə a kətsi yi a mà lyesə ku mbyɨsə vəwenə.”

²⁸ Viʼi Jus ə tensə li ə zhʉ ntɨm ə jùŋ, nakèn kə ne vəwenə sə diʼ viʼi kəbayn Nyìngòŋ. Kənyʉ̀ na kèn ne li Nyìngòŋ ə bwòŋsə ghə̀ŋ viʼi ətɨm, ali ə ghʉ̀ la ghə̀ na kòŋ viʼi Jus byìʼì və tìʼ və vəwenə.

²⁹ Kə diʼ alə̀ byìʼì ando Nyìngòŋ ə ndemə tsuʼ wìʼ ə bwaʼsə wen, ko ghə̀ lu be kwitə əkwoʼtə ə wen.

³⁰ A ghə̀ŋ viʼi ətɨm, ghə̀ŋ nko zhʉ Nyìngòŋ, ali luwen ə sə diʼ mù ghə̀ kusə li nshinsə a ghə̀ŋ byìʼì ando viʼi Jus tyen li ə zhʉ fa wen.

³¹ Kə lə diʼ to ali a viʼi Jus. Nyìngòŋ ə kusə shinsə a ghə̀ŋ a vəwenə kəshi ndiʼ vəwenə yen ə kwitə tətyɨm, ghə̀ be kusə nshinsə a vəwenə.

³² Nyìngòŋ ə kwiʼi li viʼi no vətsèm ə nè la və to kətʉ ndiʼ ghə̀ diʼ kusə ə shinsə yì a ghə̀ kiʼi a vəwenə.

Vəghəŋ diʼ ə kuʼsə Nyìngòŋ

³³ Kə diʼ no nəmwèʼè la Nyìngòŋ ə kiʼi əghoʼ ə kaynəghə ə ku a viʼi, kiʼi to ətof ə tsèm, kɨ nyʉ̀ ə tsèm! Wìʼ ə zizi ko ghə̀ lu shə̀ʼtə kənyʉ̀ kì a ghə̀ kwòʼtə. Wìʼ ə zizi ko ghə̀ lu kɨ ji yì a ghə̀ nè nyʉ̀ fa tsù.

³⁴ Kə diʼ ndə̀ŋndəŋ ando və nyoʼ a Ŋwàʼlə̀ Nyìngòŋ la: “Wìʼ ə ko kɨ kənyʉ̀ kì a Bobo ə kwoʼtə, wìʼ ə ko kwʉ̀ʼ ə tyɨftə wen.

³⁵ Wìʼ ko diʼ a ghə̀ tɨmə ku kəfo a Nyìngòŋ ə nki la ghə̀ bwensə lòʼ.”

³⁶ A shɨtə Nyìngòŋ shɨtə fo ə tsèm, fo a vyi sə diʼ to byìʼì ando ghə̀ kòŋ la və ndiʼ, vì nə̀ əkuʼsə a wen. Əkuʼsə ə dyʉ̀ a Nyìngòŋ to məzhʉ̀ ə tsèm. Amèyn.