Lumans 10 - The New Testament in the Babanki language

¹ Ma kòŋ no nànto be jɨ̀mə̀ to jɨ̀mə̀ a vəlemə vwomə la Nyìngòŋ ə bwoŋsə viʼi Jus.

² Ma kɨli la vəwenə sùtə̀ kòŋ ə kuʼsə Nyìngòŋ ali ko və kuʼsə a ji ətof.

³ Vəwenə ko kɨ ji yì a Nyìngòŋ nə̀ lyɨ viʼi kənyʉ̀ kətɨməkə fa tsù. A le kənyʉ̀ ki a vəwenə tensə li ji na ghèn ə boŋsə shɨtə ghə̀ vəwenə.

⁴ Yesò sə diʼ mù ghə̀ vi li ə ne la kə Əsoʼ ə be ə kiʼi kədyòʼ. Ghə̀ nè alə̀ ndiʼ no ndo yi a ghə̀ byɨmə a wen ndiʼ ti a nkàyn ashɨ Nyìngòŋ.

Nyìngòŋ zizi ghə̀ bwoŋsə no ndo

⁵ Mosìs ə nyoʼo la wìʼ ə kəŋ nti akàyn byìʼì əsoʼ, ghə̀ diʼ ə shɨtə ghʉ̀ tə əsoʼ no tə tsèm ə be tsi byìʼì təwen tə.

⁶ Alì, ji yi a viʼi ə diʼ nti a nkàyn shɨ Nyìngòŋ fa tsu diʼ byìʼì əbyɨmə, a ko diʼ byìʼì ə əsoʼ. Və nyoʼ li a Ŋwàʼlə̀ Nyìngòŋ la, “kə wù bèm a wenə wù la, a lə kuʼ ndo akàŋ a?” Mu wù le bèmə la, a kuʼ ndo ə lyɨ̀ ə shiʼsə nə̀ Yesò a?

⁷ “Kə wù bèm la, a lə shiʼi dyʉ̀ ndo alòʼ ə vəmpfʉ və nse a?” Mu wù le bèmə la, a shiʼi dyʉ̀ ndò ə lùsə Yesò fa pfʉ a?

⁸ Və nyòʼò li la, “kənyʉ̀ kə Nyìngòŋ kə boʼsə a ghə̀ŋ. Kə diʼ a ghə̀ŋ təchʉ̀ be diʼ a ghə̀ŋ a tətyɨm.” A diʼ kəwenkə a yès ə shə̀ʼtə̀ la ghə̀ŋ zhʉ ə byɨmə.

⁹ Yès ə gàʼa la no ndò sətsen ə gàʼ nə̀ əchʉ̀ ə wenə la Yesò diʼ Bobo ə byɨmə a wen a tyɨm la Nyìngòŋ ə nlùsə li wen fa pfʉ, ghə̀ lù bwòŋ.

¹⁰ Kə diʼ alə̀ byìʼì ando wìʼ ə byɨmə a wen tyɨm, Nyìngòŋ ə lyɨ̀ wen a wù kənyʉ̀ kətɨməkə, ghə̀ gàʼa nə̀ əchʉ̀ ə wenə la Yesò diʼ Bobo, ghə̀ a bwòŋ.

¹¹ Kə diʼ to ndə̀ŋndəŋ ando və nyoʼ a Ŋwàʼlə̀ Nyìngòŋ la, “A byɨmə no ndo a wen, ko ghə̀ lu ə diʼsəkətʉ.”

¹² Nyìngòŋ diʼ Bobo a viʼi və tsèm. Nəkwoŋ ko diʼ fa wù ə Jus nə̀ wù kətɨm. Ghə̀ bwaʼsə no ndò yi a ghə̀ loynə ə gyamtə fa wen.

¹³ Kə diʼ to ando və nyoʼ a Ŋwàʼlə̀ Nyìngòŋ la, “Bobo lu bwòŋsə no ndo yi a ghə̀ tòŋtə əzhiʼ ə wen ə loynə ə gyamtə.”

¹⁴ Alì viʼi sətsen ə ndiʼ ko ndiʼ la və byɨmə a wìʼ, və a loynə ə gyamtə fa wen a? Və zizi və byɨmə a wen ale ko ndiʼ la və zhʉ̀ ntɨm kumə wen a? Və zizi və zhʉ̀ ntɨm kumə wen ale ko ndiʼ la wìʼ shə̀ʼtə̀ li a?

¹⁵ Wìʼ lə zizi ghə̀ shə̀ʼtə̀ ntɨm a ghèn a viʼi ko andiʼ la və tɨmə wen tɨmə a? Və nyòʼò li a Ŋwàʼlə̀ Nyìngòŋ la, “Ghə̀ŋ yen ando viʼi ə vi nə̀ ntɨm ə jùŋ ə shə̀ʼtə̀, məvì ə vəwenə boŋ ə no nànto!”

¹⁶ Alì, à ko diʼ viʼi və tsèm a və zhʉ̀ ntɨm ə jùŋ na ghèn ə sə wʉ̀ kətʉ tsu. Kə diʼ to ndə̀ŋndəŋ ando nshə̀ʼtə̀ əsoʼgho ə gaʼa ə bèm la, “Viʼi vi a və zhʉ̀ ntɨm yì a yès shə̀ʼtə ə byɨmə le bè diʼ no və ndo a Bobo?”

¹⁷ Kə le diʼi nəmwèʼè la wìʼ ə byɨmə to azhʉ̀ a ghə̀ zhʉ̀ ntɨmə Nyìngòŋ, wìʼ ə zhʉ̀ to azhʉ̀ a və shə̀ʼtə li ntɨm kumə Yesò a wen.

¹⁸ Ma sətsen ə bèm la, kə le diʼ la viʼi Jus ko zhʉ̀ kənyʉ̀ kə Nyìngòŋ mu? Vəwenə zhʉ li to no zhʉ, to ndə̀ŋndəŋ ando və nyoʼ li a Ŋwàʼlə̀ Nyìngòŋ la: “Və zhʉ li gɨsə nshə̀ʼtə̀sə to shì ə tsèm a mbi. Vəwenə shə̀ʼtə̀ li kənyʉ̀, və zhʉ to tətàŋ tə mbi tə tsèm.”

¹⁹ Ma bèmə la, kə lə diʼ la viʼi Islel ko tə zhʉ kɨ kənyʉ̀ ki a və nshə̀ʼtə̀ mu? Mosìs ngaʼa kumə kənyʉ̀ na kènkə ə gàʼ la Nyìngòŋ ə gàʼ la: “Ma na ne ghə̀ŋ, ghə̀ŋ ə kiʼ kənghə̀ʼ kumə viʼi, a vəwenə ko kwʉ̀ʼ ə kiʼ əloʼ ə wen ə vəwenə. Ma na ne, ghə̀ŋ fwisətin kumə viʼi lòʼ ə tsen ghə̀, ko vəwenə kiʼ ətof.”

²⁰ Azayà ə gaʼa to no a ndayn ko ghə̀ lù fàyn kənyʉ̀ la, Nyìngòŋ ə gàʼ la: “Viʼi yen li mò, ko ndiʼ la və tə ə kəŋ mò. Ma diʼi li wenə ghomə a viʼi, ko ndiʼ la və tə ə bèmə mò.”

²¹ Alì fa viʼi Islel, Nyìngòŋ ə gàʼ la, “Ma naʼsə̀ li avu a ghomə a kətsi kə ə pfen ə dzàŋ viʼi la və vi, vəwenə tyen ə zhʉ̀ mo. Vəwenə tò li kətʉ ə bwenə fa mo a bàm.”