Kòlòsyàns 2 - The New Testament in the Babanki language

¹ Ma kəŋ la ghə̀ŋ kɨ ando ma ntaŋkə li ne shwèʼè no nə̀ kədyoʼkə a ghə̀ŋ viʼi və byɨməvə və, ə be ə shwèʼè a viʼi vyi a və tsi a loʼ Làdisìyà no vətsèm nə̀ vi a nkàyntə̀ vəwenə ko tɨmə yen mò.

² Ma ne alə̀ ndi vəwenə kiʼ tətyɨm tə totə, ndiʼ to kənyʉ̀ kə mùʼ, kòŋ tə wen tyəŋtə. Ma kəŋ la ghə̀ŋ shɨtə kɨ nyʉ̀ vyi a Nyìngòŋ ə lyomtə ndi ghə̀ŋ tuʼ tə ghaʼ nyʉ̀ na venə ə kiʼ əbwaʼmə ə ghoʼo. Ənyʉ̀ na venə a Nyìngòŋ ə nlyomtə sə diʼ luwen mu ghə̀ diʼi li làynsə a vəghəŋ a diʼ Klistò.

³ Ətof no tsèm diʼi mu ghə̀ lyomtə li a ti Klistò. Ghə̀ bù no nànto.

⁴ Ma gaʼa nyʉ̀ venə a ghə̀ŋ, ndiʼ və ne kə no to wìʼ lù lobtə ghə̀ŋ nə̀ gaʼa ə fwomə ghə̀.

⁵ Ma ŋwʉ̀ʼ no məzhʉ̀ ə ntsèm ətɨmə ghomə diʼi to ghə̀ŋ no tèbe ando ma ko diʼ vəghəŋ amuʼ. Ma saŋlə ando ghə̀ŋ shɨtə tsì be saŋlə kumə ji yì a ghə̀ŋ tuʼtə ghaʼa əbyɨmə ə ghəŋə fa tsù a Klistò.

Ə ntsìnə̀ fi a ti Klistò

⁶ Ando ghə̀ŋ sə diʼ mù ghə̀ŋ ə byɨmə li Yesò Klistò la à diʼ Bobo ghə̀ŋ, ghə̀ŋ ntsi li to nə̀ viʼi vyi a və diʼi wenə wen a kənyʉ̀ kə mùʼ.

⁷ Ghə̀ŋ we aghaŋ, be bwom wenə ghə̀ŋ ghə̀ to a wen. Ghə̀ŋ bwòm ntsìnə̀ ə ghəŋə a wen a wen ando və bwomə ngə̀ŋ akwi kəchɨ kə ngə̀ŋ kə jùŋə kə, shɨtə ghaʼ byɨmə yi a və tə ziʼi a ghə̀ŋ, ghə̀ŋ a to dyʉ̀ to nə̀ mbì. Ghə̀ŋ a lwin ne ku kəzòŋ a Nyìngòŋ no nànto.

⁸ Ghə̀ŋ tuʼmə kə wìʼ ne lobtə ghə̀ŋ nə̀ ətof ə zɨmghə ə lyɨ̀ ghə̀ŋ a əkòs. Tənki tə ətof tèntə kiʼi kənyʉ̀ kumə to ətsìnə̀sə lòʼ viʼi di əzhwi vi a və soʼo mbi. Ətof na yi ko kiʼi kənyʉ̀ kumə Klistò.

⁹ Nyìngòŋ ndiʼ li wenə wen no tsèm əcho fa Klistò a wenə wìʼ.

¹⁰ Ghə̀ŋ ko be gho no kənyʉ̀ kətsenkə a tyi ə Klistò. Ghə̀ diʼ kətʉ̀kə ə zhwi ə tsèm vi a və soʼo be kiʼi kədyòʼ.

¹¹ Və nshɨtə li ghə̀ŋ ando ghə̀ŋ nsə diʼ a kənyʉ̀ kə mùʼ vye vəwenə. Əshɨtə na ghenə ko diʼ yi a viʼi nə̀ shɨtə ne kəvu kə. A diʼ yi a Klistò ə shɨtə, ə shisə ətyɨm ə byɨghə fa ghə̀ŋ wen.

¹² A ndiʼ ndo ghə̀ŋ shi mu, və bvɨmə li ghə̀ŋ və Klistò, vye vəwenə mbwensə li lù fa pfʉ a amuʼ əcho fa byɨmə yi a ghə̀ŋ kiʼi a kədyòʼ Nyìngòŋ ki a kə nlùsə Klistò fa pfʉ.

¹³ A ndiʼ fa ambì, ghə̀ŋ ndiʼ mù ghə̀ŋ phɨkə li a ghə̀ŋ a mbyɨsə, be diʼ ko andiʼ la və shisə ətyɨm ə byɨghə yi a ghə̀ŋ nkiʼi. Nyìngòŋ ə nè li ghə̀ŋ və Yesò ə bwènsə̀ lù ə sə tsi. Ghə̀ lysə li ku nyʉ̀ ə byɨvə ə vəghəŋ to ə tsèm,

¹⁴ mbe tsəʼsə kəfo kì a vəghəŋ tə ə diʼ ə lòʼ. A ndiʼ ndo vəghəŋ kwaʼ əsoʼ, kə ndiʼ la vəghəŋ ə kiʼ kəfo ə lòʼ. Luwen ə sə diʼ mù Nyìngòŋ ə lyɨ̀ li kəfo na ki ə bàyntə a kəntò.

¹⁵ A ndiʼ ando Klistò mpfʉ a kəntò, Nyìngòŋ ə nè əzhwi vyi a və soʼo nə̀ vyi a və tisə la kə və be kiʼ kədyòʼ, ə diʼsə kə tʉ kə zhwi na vyi ashɨ ə mbi ə tsèm. A le ji yì a ghə̀ ə̀ nzhɨ̀ əzhwi a venə fa tsù.

¹⁶ Kə le diʼi la kə ghə̀ŋ moʼtə wìʼ ə tɨmə to nə̀ wìʼ ə soʼo əku təsoʼ a ghə̀ŋ kumə kəfo kì a ghə̀ŋ zhɨ kò vi a ghə̀ŋ nyʉ̀. Kə ghə̀ŋ moʼtə wìʼ ghaʼa ghə̀ŋ la ghə̀ŋ gumlə Nyìngòŋ nəkwoŋ a mətsi mə ghoʼo mə mətsenə a ngʉ̀ʼ kò a və sàŋ və tsenəvə kò a mətsi mə chʉʼ lòʼ Vəjus mətsen.

¹⁷ Əfo na venə diʼ to ndèmdèm nyʉ̀ a və diʼ lù vi, ali nəmwèʼè yi a ghə̀ diʼi a ntìntìn nyʉ̀ a ghèn diʼ to Klistò.

¹⁸ Kə ghə̀ŋ moʼtə wìʼ gàʼ a ghə̀ŋ la ghə̀ŋ shiʼsə təwenə təŋtə a nse be gumlə ətsɨŋsə Nyìngòŋ, a bwen ali a ghə̀ŋ a gho əmòʼtə ə ghenə. Vəwenə nə̀ kumə gàʼa la nyʉ̀ ə venə ə fʉ a vəwenə alə to sə a tsi jòmsə, kwòʼtə̀ ə vəwenə diʼ to əkwoʼtə ə byɨghə ne vəwenə ghaŋsə əwen to kədyàŋ.

¹⁹ Vəwenə ko be tsèntə tebè wenə Klistò yi a ghə̀ diʼ kətʉ. A diʼi wen yi a ghə̀ kù kədyòʼ a əwen ə tsèm la ghə̀ nkwi a ji yi a Nyìngòŋ ə ne la ghə̀ kwi fa tsù. Yesò ghaʼa əwen wen na ghèn ə tsèm to ndə̀ŋndəŋ ando məghaŋ nə̀ tsèntə ghaʼa əwen wìʼ a kəfo kə muʼ

²⁰ Ghə̀ŋ sə diʼ to sə ghə̀ŋ və Klistò pfʉ li amuʼ zhwi vi a və soʼo mbi li ko be kiʼi kədyòʼ a ghə̀ŋ kətʉ. Kə le diʼ alə̀, ghə̀ŋ sə bo ghʉ̀ to təsoʼ tə mbi to nə̀ viʼi mbyi byìʼì ghò?

²¹ Təsoʼ tentə əgàʼa to la, kə ghə̀ŋ ghaʼ kəfo kènkə, kə ghə̀ŋ mwom kəfo kəzhɨkə kènkə, kə ghə̀ŋ nkumə kəfo kènkə.

²² Təsoʼ tentə əgaʼa kumə to əfo, a və diʼ ə byɨf. A diʼ to nyʉ̀ ə viʼi a və ghʉ ə sə jèʼe ziʼi.

²³ Təsoʼ tentə kəʼə to sə tə fɨsə ətof. Tə kəʼə to sə tə ne la wu kòŋ Nyìngòŋ no nànto əbe gumlə, be kiʼi kədyòʼ a wu kwi wen. Ali ko ghə̀ le kiʼi no kənyʉ̀ kətsen ə gyamtə wìʼ la ghə̀ ə nghaʼa əwen wen kumə nyʉ̀ ə njòsə wen a Nyìngòŋ ko kòŋ.

« Roimhe

Air adhart »

Lean sinn:

Ceanglaichean taic

Sanasan