Kəmwetə 9 - The New Testament in the Babanki language

¹ Ntsɨ̀ŋ ngə̀ŋ ə̀ Nyìngòŋ tsen toŋ ə̀soŋ ə wen ə və ndiʼ vətàyn, mà yen fədzɨ̀ŋ fə lù fa kàŋ ə̀ fə̀ŋ a nse ə̀ və ku kənzàs kəchʉ̀ ə nkwòŋ tsen a ghə̀ shwemə shiʼi dyʉ̀ tò dyʉ̀ à wen.

² Fədzɨ̀ŋ a fìfə bòʼ əchʉ̀ ə nkwòŋ ayi, fələʼ fə tsenfə fʉ̀ ə̀ kùʼ fa tsu kə̀ʼə̀ tò sə fə fʉ̀ fa əchɨ əzhiʼ ghoʼoghə. Fələʼ afìfə fʉ̀ ə̀ fènsə̀ shi kènla chwìchwì bè baynə shiʼì.

³ Ngùməsə fʉ̀ fa tì fələʼ afì ə̀ shiʼi a nse, və ku kədyòʼ kə təŋam à səwensə,

⁴ ə̀ gàʼ à səwensə la, kə sə à kùm ə̀ byɨ̀fsə agəŋ ə nse, ko tè kəfo fəzhʉfə, ko tè fəkòʼ. Və bòŋsə̀ gàʼ à səwensə la sə chələ viʼi vyi a və ko kiʼ əchwitə Nyìngòŋ à vəwenə təchʉ̀ təkə̀ʼ.

⁵ Ngùməsə asènsə nko diʼ əzhwilə viʼi a vyi zhwilə, sə ndiʼ ə ku tò ngəʼ à vəwenə a vəsàŋ vətàyn. Ngəʼ a sə ndìʼ ə ku diʼi ə ndiʼ tò nə̀ ngəʼ a wìʼ ə yenə a zhʉ a əŋam ə chə wen.

⁶ A lu ə ndiʼ a mətsi ayì, viʼi ə nkəŋə pfʉ kò və nyenə. Vəwenə a nkòŋə̀ ə pfʉkə alì əpfʉ ə tyenə lyɨ̀ vəwenə.

⁷ Ngùməsə ashìsə ndìʼ to nə̀ təlyəŋ a tə bvʉ̀tə̀ ə dyʉ̀ a ghòŋ sə nkìʼ ə̀fo à vəwenə a tʉ və diʼ a nə̀ təsòʼ tə təfòyn a və shɨtə̀ nə̀ gul

⁸ Nyɨŋsə tʉ ə səwensə ndìʼ to nə̀ nyɨŋsə tʉ əki, asoŋ səwensə diʼ to nə̀ asoŋ ə və abìkəŋ.

⁹ Ngùməsə ashìsə ndìʼ mu sə kɨŋtə̀ li ədyʉ̀ʼ ə səwensə nə̀ ə̀fo mu və shɨ̀tə̀ nə̀ kəkas, sətànə̀ təvò tə vəwenə tə gàʼà tò nə̀ təlyəŋ no tə ghoʼo a tə gùfə̀ ə̀ mfɨŋsə dyʉ̀ a ghòŋ.

¹⁰ Sə nkìʼ tənkwèn to nə̀ təŋam be kiʼ tənchə. Kədyòʼ kə̀ ndìʼ a təkwèn ayì kwʉ̀ʼʉ̀ əchə wìʼ ə ghə̀ zhʉ lɨ̀m a vəsàŋ vətàyn.

¹¹ Ngùməsə a shìsə̀ nkìʼ fòyn a ghə̀ soʼo səwensə, à diʼ ntsɨ̀ŋ yì a ghə̀ tùʼmə̀ nə̀ nkwòŋ yì a ghə̀ shwemə shiʼi dyʉ̀ tò dyʉ̀ lì. Əzhiʼ ə wen a əgàʼ ə Hibùlù ə̀ ndìʼ Abadòn, diʼ a əgàʼ ə Glis la Abolon.

¹² Ngəʼ ə̀ mbì cho li, alì sə̀ bò sə faŋə luwèn əvì.

¹³ Ntsɨ̀ŋ ngə̀ŋ ə̀ Nyìngòŋ bè tòŋ ə̀soŋ ə wen ə və ndiʼ ə̀ ntʉfə, mà zhʉ gɨ̀ fʉ̀ vì fa təbʉ tə kàʼ a tə ndìʼ a kəchiʼ kə kəku kì a və nshɨ̀tə nə̀ gul a kə nti a shɨ Nyìngòŋ lì.

¹⁴ Gɨ̀ ayì ə̀ ngàʼà à ntsɨ̀ŋ ngə̀ŋ ə̀ Nyìngòŋ ayì la, “zàtə̀ ntsɨ̀ŋsə ngə̀ŋ ə̀ Nyìngòŋ shì səkàʼ a və̀ nkwiʼì a mù mə ghoʼomə̀ a və ndzàŋə̀ nə̀ Yuphlates lì.”

¹⁵ Və mù zàtə̀ ntsɨ̀ŋsə ngə̀ŋ Nyìngòŋ ashì səkàʼ byìʼàndo əzhʉ ə nkwʉʼ li, kətsi kə kwʉ̀ʼ, sàŋ nə̀ ngwʉ̀ʼ bè kwʉ̀ʼ ə və zhwi wìʼ muʼ ə̀ mùʼ fa tì viʼi vətaʼ.

¹⁶ Və shə̀ʼtə̀ à mò la ənòyn ə vəsugyèʼ vi a və nyɨŋ a kwi təlyəŋ tì diʼ vəmalàn ə̀ ghɨ ə̀ bò.

¹⁷ Ghèn dìʼ ji a mà ə̀ nyèn təlyəŋ tì a jòm yì a ghə̀ mfʉ à mò a kə̀ʼ lì; viʼi vyi a və̀ nyɨŋ a kwi təlyəŋ tətyɨm tə vəwenə ə nkìʼ ə nkɨ̀ŋsə ghòŋ sə bàŋə̀ tò nə̀ əzhiʼ, nyìmə̀ to nə̀ məkàyn be nyòʼlə̀ nyòʼlə. Ətʉ təlyəŋ atì ə̀ nkə̀ʼə̀ to nə̀ ətʉ ve abìkəŋ. Əzhiʼ nə̀ fələʼ nə̀ məkàyn fʉ̀ fà təwentə a təchʉ̀.

¹⁸ Ngəʼsə fànsəsə asènsə sə̀ taʼ a ndìʼ əzhiʼ, nə̀ fələʼ nə̀ məkàyn a sə mfʉ̀ fa təchʉ̀ ə̀ təlyəŋ atì, ə zhwi wìʼ muʼ mùʼ fa tì viʼi və taʼ.

¹⁹ Kədyòʼ kə təlyəŋ atì ə̀ ndìʼ à vəwenə təchʉ̀ nə̀ à vəwenə a tənkwèn. Təkwèn tə vəwenə ndìʼ to nə̀ zhusə, kiʼ ətʉ. Tə̀ nlyomsə viʼi nə̀ təwentə.

²⁰ Viʼi vətsenvə vi a ngəʼsə asènsə nko zhwì vəwenə lì, tyen la vəwenə ko a kwitə fà vəwenə mbyɨsə. Vəwenə mfaŋ li sə ghoʼsə̀ tò vədeblə̀ bènə̀ mənyo mì a və shɨtə̀ nə̀ gul nə̀ silva bènə̀ kəkas kətsen a kə bàŋə̀ baŋə, ə̀ shɨ̀tə̀ mətsenə nə̀ ngùʼ, bè shɨ̀tə̀ mətsenə nə̀ nkòʼ, à diʼ ə̀fo və ko yenə shi, ko ə nzhʉ ənyʉ̀ kènla və jèʼè.

²¹ Vəwenə bè tyèn la vəwenə ko a kwitə fà əzhwi viʼi, ko fà vəwenə nyʉ̀ luʼ viʼi, ko fà vəwenə nyʉ̀ ə ku sensə, ko fà vəwenə tsoŋ.