Kəmwetə 8 - The New Testament in the Babanki language

Wàyn bi njɨ̀ yì bə̀ys kəmwètə̀ kə mɨ̀ŋ

¹ Andìʼ ando wàyn bi njɨ̀ yì ə̀ bə̀ys mɨ̀ŋ ə tsen ə və ndiʼ sòmbo, əshi chiʼ a kàŋ la kùʼ ə zaʼa kəbyeʼ kə zhʉ.

² Mà mù yèn ntsɨ̀ŋsə ngə̀ŋ Nyìngòŋ shìsə sòmbo a sə nti a shɨ Nyìngòŋ lì mu və ku li təsoŋ sòmbo à vəwenə.

³ Ntsɨ̀ŋ ngə̀ŋ ə̀ Nyìngòŋ tsen vì tɨ̀mə a mbì kəchiʼ kə kəku ə̀ Nyìngòŋ, kiʼ kəkaŋ mu və shɨ̀tə̀ nə̀ gul a və nyùʼù kələŋ tsu. Və ku kələŋ à wen no kə ghoʼo la ghə̀ nyuʼ ə̀ bòsə nə̀ təjɨ̀m tə viʼi Nyìngòŋ no vətsèm, a kwi kəchiʼ kə kəku a və shɨtə̀ nə̀ gul a mbì kəfwoyn

⁴ Ntsɨ̀ŋ ngə̀ŋ ə̀ Nyìngòŋ ayì nyùʼ kələŋ kì ə boʼsə nə̀ təjɨ̀m tə viʼi Nyìngòŋ tì, fələʼ fi fʉ̀ fà wen ə kəvu ə̀ kùʼ a shɨ ə̀ Nyìngòŋ.

⁵ Ntsɨ̀ŋ ngə̀ŋ ə̀ Nyìngòŋ ayì mù lyɨ̀ kəkaŋ kə kələŋ kì ə̀ tsə̀f ə zhiʼ fa kəchiʼ kə kəku ə̀ lwinsə tsu ə̀ mòʼ shìʼsə a nse no a zhʉ̀ kò əghʉ sə̀ mwàntə̀, bwankə̀, gɨsə gàʼà, ə̀ nse be tsɨŋtə̀ bə̀ykə̀.

Və toŋ ə̀soŋ

⁶ Ntɨ̀ŋsə ngə̀ŋ ə̀ Nyìngòŋ shì sòmbo a və kìʼ təsoŋ tì sòmbo mù sə̀ bvʉ̀tə̀ ə toŋ.

⁷ Ntsɨ̀ŋ ngə̀ŋ ə̀ Nyìngòŋ ə̀ mbì toŋ ə̀soŋ ə wen, awoŋ nə̀ əzhiʼ zìtə̀ ə shiʼi a nse mu və fɨ̀ŋ li nə̀ mənlyuŋə. Ə̀fo a vyi shiʼi a lì ə̀ nyùʼ əshyə nse kə mùʼ fa tì ə̀ bàs ə taʼ, ə̀ bè nè tò ndə̀ŋndəŋ nə̀ nkòʼ bè nyùʼ agəŋ ə zhʉghə no a tsèm.

⁸ Kənkùmtə̀ kə ntsɨ̀ŋ ngə̀ŋ ə̀ Nyìngòŋ toŋ ə̀soŋ ə wen, və mòʼ kəfo a mù kə diʼ tò nə̀ pfèn a ghə̀ bolə̀ nə̀ əzhiʼ,

⁹ əshyə mù, əmùʼ fa tì təshyə tətaʼ, ə̀fo zhwisəvə no tsèm a və ndìʼ a shyə mù ayì ə pfʉkə, vənkanuʼ ə bè byɨ̀fkə a shyə mù ayì no vətsèm.

¹⁰ Ntsɨ̀ŋ ngə̀ŋ ə̀ Nyìngòŋ tsen bè tòŋ əsoŋ ə wen, vəwenə ndiʼ vətaʼ, fədzɨ̀ŋ fə ghoʼo fə lù fa kàŋ ə̀ fə̀ŋ a nse baynə tò nə̀ kənkàʼtə̀. Fə fəŋ a lì ə̀ chìʼ təshyə mù mə nchomə̀ əmùʼ, fa tì təshyə tətaʼ nə̀ a kə shi a mu nfʉ.

¹¹ Əzhiʼ fədzɨ̀ŋ ayi ə̀ ndìʼ, məlwì əshyə mù əmùʼ, fa tì təshyə tətaʼ kaʼsə sə̀ lwilwi. Viʼi pfʉkə no vəghoʼo byìʼàndo vəwenə nyʉ̀ mu mə nlwimə a mì.

¹² Ntsɨ̀ŋ ngə̀ŋ ə̀ Nyìngòŋ tsen toŋ ə̀soŋ ə wen à ndiʼ vəkàʼ, kəfo kə pfèn ə̀ byɨsə shyə mùʼ fa təshyə tətaʼ ə̀ chwìchwì nə̀ əsàŋ bènə̀ mədzɨ̀ŋ nè chwìchwì ko bè bayn a kətemə kə zhʉ kə mùʼ fa tì ntemə taʼ ə̀ nə̀nchwì ə̀ bè nè kèn la sàŋ wenə mədzɨ̀ŋ ə bayn li a kətemə kə zhʉ kə mùʼ fa tì ntemə taʼ ə̀ nəntʉʼʉ.

¹³ Mà mù sə ki ə̀ yèn bole ghə̀ tànə̀ chò fa kàŋ dì no a gɨ̀ to gàʼà la, “Ndòyn, ndòyn, ndòyn dìʼ à viʼi vyi a və diʼì a nse a zhʉ a təsoŋ tə gàʼà a ntsɨ̀ŋsə sènsə sətaʼ sə̀ diʼ a mətoŋ lə̀.”